Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 50

Asaa Amɛ Ato Koni Amɛshiɛ yɛ Yiwaa Fɛɛ Sɛɛ

Asaa Amɛ Ato Koni Amɛshiɛ yɛ Yiwaa Fɛɛ Sɛɛ

MATEO 10:16–11:1 MARKO 6:12, 13 LUKA 9:6

  • YESU TSƆSE BƆFOI LƐ NI ETSU AMƐ

Be ni Yesu tsu ebɔfoi lɛ enyɔnyɔɔnyɔ akɛ amɛyashiɛ lɛ, ekɛ gbɛtsɔɔmɔi ni nɔ bɛ hã amɛ yɛ bɔ ni esa akɛ amɛtsu shiɛmɔ nitsumɔ lɛ amɛhã lɛ he. Kɛ̃lɛ, jeee no pɛ kɛkɛ efee. Ejɛ mlihilɛ mli ebɔ amɛ kɔkɔ yɛ shiteekɛwolɔi ahe akɛ: “Naa! miitsu nyɛ akɛ gwantɛŋi yɛ klaji ateŋ . . . Nyɛhiɛ ahia nyɛhe nɔ yɛ gbɔmɛi ahewɔ, ejaakɛ amɛbaaŋɔ nyɛ amɛhã kojolɔi, ni amɛkɛ kpelebii baayi nyɛ yɛ amɛkpeehei lɛ. Ni akɛ nyɛ baaya amralofoi kɛ maŋtsɛmɛi ahiɛ yɛ mihewɔ.”Mateo 10:16-18.

Yɛ anɔkwale mli lɛ, Yesu sɛɛnyiɛlɔi lɛ baanyɛ amɛkɛ yiwaa ni naa wa akpe moŋ, shi ewo amɛ shi akɛ: “Kɛ́ amɛŋɔ nyɛ amɛhã lɛ, nyɛkafea yeyeeye yɛ bɔ ni aloo nɔ ni nyɛbaawie lɛ he, ejaakɛ abaaŋɔ nɔ ni nyɛbaawie lɛ ahã nyɛ yɛ nakai ŋmɛlɛtswaa lɛ nɔ nɔŋŋ; ejaakɛ jeee nyɛ kɛkɛ nyɛwieɔ lɛ, shi moŋ nyɛ-Tsɛ lɛ mumɔ lɛ ni tsɔɔ nyɛnɔ ewieɔ lɛ.” Yesu kɛfata he akɛ: “Nyɛmi nuu baaŋɔ nyɛmi nuu ehã gbele, ni tsɛ baaŋɔ ebi ehã, ni bii baate shi awo fɔlɔi ni amɛbaahã agbe amɛ. Ni mɛi fɛɛ baanyɛ nyɛ yɛ migbɛ́i lɛ hewɔ, shi mɔ ni efi shi kɛyawula shi lɛ, abaahere eyiwala.”Mateo 10:19-22.

Akɛni shiɛmɔ nitsumɔ lɛ he miihia waa hewɔ lɛ, Yesu hã esɛɛnyiɛlɔi lɛ na akɛ esa akɛ amɛhiɛ akã shi, koni amɛnyɛ amɛya nɔ amɛtsu nitsumɔ nɛɛ. Ekɛɛ akɛ: “Kɛ́ amɛwa nyɛ yi yɛ maŋ kome mli lɛ, nyɛjoa foi kɛyaa ekroko mli; ejaakɛ lɛɛlɛŋ, miikɛɛ nyɛ akɛ, nyɛgbeŋ Israel maji lɛ fɛɛ naa kɛyashi gbɔmɔ Bi lɛ baaba.”Mateo 10:23.

Mɛɛ gbɛtsɔɔmɔi, kɔkɔbɔi, kɛ hewalɛwoo ni nɔ bɛ po Yesu kɛhã ebɔfoi 12 lɛ nɛkɛ! Shi obaana akɛ, wiemɔi nɛɛ kɔɔ mɛi ni baaná shiɛmɔ nitsumɔ lɛ mli gbɛfaŋnɔ yɛ Yesu gbele kɛ eshitee lɛ sɛɛ lɛ hu ahe. Nɔ ni tsɔɔ nakai ji wiemɔ ni ewie akɛ “mɛi fɛɛ baanyɛ” ekaselɔi lɛ, shi jeee mɛi ni atsu bɔfoi lɛ akɛ amɛyashiɛ amɛhã lɛ kɛkɛ lɛ. Kɛfata he lɛ, amaniɛbɔɔ ko bɛ ni tsɔɔ akɛ akɛ bɔfoi lɛ tee amralofoi kɛ maŋtsɛmɛi ahiɛ yɛ be kukuoo ni amɛkɛshiɛ yɛ Galilea lɛ mli, asaŋ amɛwekumɛi hu eŋɔɔɔ amɛ amɛhãaa ni agbe amɛ.

Eyɛ faŋŋ akɛ, be ni Yesu kɛɔ bɔfoi lɛ nibii nɛɛ, no mli lɛ nibii ni baaya nɔ wɔsɛɛ lɛ ji nɔ ni yɔɔ ejwɛŋmɔ mli. Susumɔ wiemɔ ni ewie akɛ ekaselɔi lɛ egbeŋ shiɛmɔ nitsumɔ lɛ naa “kɛyashi gbɔmɔ Bi lɛ baaba” lɛ he okwɛ. Yesu miitsɔɔ akɛ, ekaselɔi lɛ egbeŋ Nyɔŋmɔ Maŋtsɛyeli lɛ he sane lɛ shiɛmɔ naa dani Maŋtsɛ Yesu Kristo ní awo ehiɛ nyam lɛ baaba akɛ kojolɔ ni Nyɔŋmɔ ehala.

Kɛ́ bɔfoi lɛ kɛ shiteekɛwoo kpe be ni amɛtsuɔ shiɛmɔ nitsumɔ lɛ, esaaa akɛ efeɔ amɛ naakpɛɛ, ejaakɛ Yesu kɛɛ: “Kaselɔ efeee etsɔɔlɔ, asaŋ nyɔŋ efeee enuŋtsɔ.” Nɔ ni Yesu tsɔɔ lɛ yɛ faŋŋ. Afee lɛ niseniianii ni awa lɛ yi yɛ Nyɔŋmɔ Maŋtsɛyeli lɛ ni eshiɛ lɛ hewɔ, ni nakai nɔŋŋ abaafee amɛ hu. Kɛ̃lɛ, Yesu kɛɛ amɛ akɛ: “Nyɛkashea mɛi ni gbeɔ gbɔmɔtso lɛ shi amɛnyɛŋ susuma lɛ amɛgbe lɛ gbeyei; moŋ lɛ, nyɛshea mɔ ni baanyɛ akpãtã susuma lɛ kɛ gbɔmɔtso lɛ fɛɛ hiɛ yɛ Gehena lɛ gbeyei.”Mateo 10:24, 28.

Yesu fee nɔkwɛmɔnɔ yɛ enɛ mli. Ekɛ ekãa fĩ shi aahu kɛtee gbele mli, moŋ fe nɔ ni eeekwa Yehowa, mɔ ni yɔɔ hewalɛ fe fɛɛ lɛ. Nyɔŋmɔ Ofe lɛ ji mɔ ni baanyɛ akpãtã mɔ ko “susuma” (ni ji gbɛkpamɔ akɛ mɔ lɛ baahi shi wɔsɛɛ lɛ) hiɛ loo ebaatee lɛ shi ni ená naanɔ wala. Kwɛ bɔ ni enɛ baahã bɔfoi lɛ atsui anyɔ amɛmli ahã!

Yesu kɛ nɔkwɛmɔnɔ ko tsu nii kɛtsɔɔ bɔ ni Nyɔŋmɔ susuɔ esɛɛnyiɛlɔi lɛ ahe. Ewie akɛ: “Ani afilimatai enyɔ lɛ, jeee kapɛlɛ ni shɛɛɛ nɔ ko ahɔ̃ɔ aheɔ? Kɛ̃lɛ, amɛteŋ ekome folo po egbeŋ shikpɔŋ ni nyɛ-Tsɛ lɛ leee. . . . No hewɔ lɛ, nyɛkashea gbeyei; nyɛjara wa fe afilimatai babaoo.”Mateo 10:29, 31.

Sane ni Yesu kaselɔi lɛ shiɛɔ lɛ baahã shĩai amli bii ateŋ agbala, weku lɛ mli bii lɛ ekomɛi baakpɛlɛ sane lɛ nɔ ni ekomɛi hu ekpɛlɛŋ nɔ. Yesu wie akɛ: “Nyɛkasusua akɛ miba ni mabahã toiŋjɔlɛ aba shikpɔŋ lɛ nɔ.” Hɛɛ, ebiɔ ekãa dani weku ko mli nyo baanyɛ amɔ Biblia mli anɔkwale lɛ mli. Yesu kɛɛ akɛ: “Mɔ fɛɛ mɔ ni dɔɔ tsɛ loo nyɛ he fe mi lɛ esaaa mi; ni mɔ fɛɛ mɔ ni dɔɔ binuu loo biyoo he fe mi lɛ esaaa mi.”Mateo 10:34, 37.

Kɛ̃lɛ, mɛi komɛi baahere kaselɔi lɛ hiɛmɛɛ. Ewie akɛ: “Mɔ fɛɛ mɔ ni hãa mɛi bibii nɛɛ ateŋ mɔ kome nu ni mli ejɔ kpulu kome pɛ koni enu yɛ kaselɔ ni eji lɛ hewɔ lɛ, lɛɛlɛŋ miikɛɛ nyɛ akɛ, ejuromɔnɔ eŋmɛŋ lɛ kɔkɔɔkɔ.”Mateo 10:42.

Akɛni Yesu saa bɔfoi lɛ jogbaŋŋ kɛtsɔ gbɛtsɔɔmɔi, kɔkɔbɔi, kɛ hewalɛwoo ni ekɛhã amɛ lɛ nɔ hewɔ lɛ, amɛyiŋ amɛtee ni “amɛyakpa shikpɔŋkuku lɛ mli fɛɛ, kɛjɛ akrowa kome mli kɛtee akrowa kroko mli, ni amɛjaje sane kpakpa lɛ ni amɛtsa mɛi yɛ he fɛɛ he.”Luka 9:6.

Ekrokromɛi Hu Nɛ

Biblia Kasemɔ Nifeemɔi

Okɛ Miishɛɛ Afi Shi!

Kanemɔ koni ona nɔ ni hã Paulo kɛ Sila anijiaŋ ejeee wui yɛ amɛyi ni awa lɛ fɛɛ sɛɛ lɛ.