Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 20

Naakpɛɛ Nii ni Ji Enyɔ ni Efee Be ni Eyɔɔ Kana Lɛ

Naakpɛɛ Nii ni Ji Enyɔ ni Efee Be ni Eyɔɔ Kana Lɛ

MARKO 1:14, 15 LUKA 4:14, 15 YOHANE 4:43-54

  • YESU SHIƐ AKƐ “NYƆŊMƆ MAŊTSƐYELI LƐ EBƐŊKƐ NYƐ”

  • ETSA GBEKƐ NUU KO NÍ KƐ LƐ TEŊ JEKƐ

Be ni Yesu eye aaafee gbii enyɔ yɛ Samaria lɛ, eshi kɛtee lɛ diɛŋtsɛ emaŋ lɛ niiaŋ. Eshiɛ waa momo yɛ Yudea, shi jeee ehejɔɔmɔ hewɔ ekuɔ esɛɛ eyaa Galilea lɛ. Moŋ lɛ, eyabɔi shiɛmɔ yɛ gbɛ ni da nɔ yɛ he ni eda yɛ lɛ. Yesu diɛŋtsɛ wie akɛ, “gbalɔ ko hiɛ bɛ nyam yɛ lɛ diɛŋtsɛ emaŋ,” no hewɔ lɛ, ekpaŋ gbɛ akɛ abaahere lɛ hiɛmɛɛ yɛ jɛmɛ. (Yohane 4:44) Yɛ nɔ najiaŋ ni ekaselɔi lɛ kɛ lɛ aaahi shi lɛ, amɛku amɛsɛɛ kɛtee amɛwekumɛi aŋɔɔ, ni amɛyatsa nitsumɔi ní amɛtsuɔ tsutsu lɛ nɔ.

Mɛɛ sane Yesu bɔi shiɛmɔ? No ji: “Nyɔŋmɔ Maŋtsɛyeli lɛ ebɛŋkɛ nyɛ. Nyɛtsakea nyɛtsui, ni nyɛnáa hemɔkɛyeli yɛ sane kpakpa lɛ mli.” (Marko 1:15) Ni te mɛi fee amɛnii yɛ he amɛhã tɛŋŋ? Yɛ anɔkwale mli lɛ, Galileabii babaoo here Yesu hiɛmɛɛ, ni amɛkɛ woo hã lɛ. Jeee sane ni eshiɛɔ lɛ kɛkɛ hewɔ amɛfee nakai lɛ. Nyɔji komɛi ni tsɔ be nɛɛ hiɛ lɛ, no mli lɛ Galileabii lɛ ekomɛi yɛ Yerusalem be ni ayeɔ Hehoo lɛ, ni amɛna naakpɛɛ nii ni Yesu fee lɛ.Yohane 2:23.

Nɛgbɛ Yesu je shiɛmɔ he ta kpele ni efã yɛ Galilea lɛ shishi yɛ? Eeenyɛ efee akɛ yɛ Kana, he ni be ko ni eho lɛ, ehã nu tsɔ wein yɛ yookpeemɔ okpɔlɔŋmɛɛ ko shishi yɛ lɛ. Be ni Yesu yɔɔ jɛmɛ nɔ ni ji shii enyɔ nɔ lɛ, abakɛɛ lɛ akɛ gbekɛ nuu fioo ko he miiye waa, ni eehe egbo. Eji Maŋtsɛ Herode Antipa, mɔ ni sɛɛ mli lɛ ehã afo Yohane Baptisilɔ lɛ yitso lɛ sɔɔlɔi lɛ eko binuu. Sɔɔlɔ nɛɛ nu akɛ Yesu ejɛ Yudea eba Kana. No hewɔ lɛ, efã gbɛ kɛjɛ eshĩa ni yɔɔ Kapernaum lɛ kɛtee Kana koni eyatao Yesu. Sɔɔlɔ ni werɛ eho ehe waa nɛɛ kɛɛ lɛ akɛ: “Nuŋtsɔ, kpelekemɔ shi oba dani mibi bibioo lɛ agbo.”Yohane 4:49.

Yesu here nɔ kɛ wiemɔ ko ni baahã nuu lɛ naa akpɛ ehe. Ekɛɛ lɛ akɛ: “Yaa; obinuu lɛ yɛ wala mli.” (Yohane 4:50) Herode sɔɔlɔ nɛɛ he Yesu ye, ni eku esɛɛ akɛ eeya emaŋ. Be ni enyiɛ gbɛ eyaa lɛ, enyɔji ní he miitswa shi lɛ kɛ lɛ bakpe, ni amɛkɛɛ lɛ sane kpakpa ko. No ji akɛ, ebi lɛ yɛ wala mli ni eyɛ jogbaŋŋ! Bɔ ni afee ni ena nɔ ŋmɛlɛtswaa nɔ ni atsa ebi lɛ, ebi amɛ akɛ: ‘Mɛɛ be ehe wa lɛ lɛ?’

Amɛhã lɛ hetoo akɛ: “Atridii lɛ tse yɛ enɔ nyɛ, yɛ ŋmɛlɛtswaa ni ji kpawo lɛ nɔ.”Yohane 4:52.

Sɔɔlɔ lɛ yɔse akɛ, nakai ŋmɛlɛtswaa lɛ nɔ nɔŋŋ Yesu kɛɛ lɛ akɛ, “Obinuu lɛ yɛ wala mli” lɛ. Enɛ sɛɛ lɛ, nuu nɛɛ, ní yɔɔ nii babaoo kɛ nyɔji hu lɛ, kɛ eshĩabii lɛ fɛɛ batsɔmɔ Kristo kaselɔi.

No hewɔ lɛ, Kana ji he ko ni Yesu fee naakpɛɛ nii srɔtoi enyɔ yɛ, ehã nu tsɔ wein ni sɛɛ mli lɛ, etsa gbekɛ nuu fioo lɛ ní kɛ lɛ teŋ jekɛmɔ aaafee kilomitai 26 lɛ. Anɔkwa, jeee enɛɛmɛi pɛ ji naakpɛɛ nii ni efee. Shi tsamɔ nɛɛ sa kadimɔ, ejaakɛ no hã ana akɛ eku esɛɛ kɛba Galilea. Eyɛ faŋŋ akɛ, Yesu ji gbalɔ ni Nyɔŋmɔ kpɛlɛɔ enɔ, shi ani ‘abaawo gbalɔ nɛɛ hiɛ nyam yɛ lɛ diɛŋtsɛ emaŋ’?

Kɛ́ Yesu yashɛ Nazaret, ni ji emaŋ lɛ, enɛ baafee faŋŋ. Mɛni mɛɔ lɛ yɛ jɛmɛ?