Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 CHAPTER 22

Kaselɔi Ejwɛ Baatsɔmɔ Wolɛi ni Baahɛ Gbɔmɛi

Kaselɔi Ejwɛ Baatsɔmɔ Wolɛi ni Baahɛ Gbɔmɛi

MATEO 4:13-22 MARKO 1:16-20 LUKA 5:1-11

  • YESU TSƐ KASELƆI KONI AMƐNYIƐ ESƐƐ BE FƐƐ BE

  • WOLƐI BATSƆMƆ MƐI NI HƐƆ GBƆMƐI

Be ni Nazaretbii lɛ ka akɛ amɛbaagbe Yesu lɛ sɛɛ lɛ, eshi kɛtee Kapernaum, ni ji maŋ ko ní bɛŋkɛ Galilea Ŋshɔ ni atsɛɔ lɛ hu akɛ, “Genesaret kpaakpo lɛ.” (Luka 5:1) Enɛ hã gbalɛ ni yɔɔ Yesaia wolo lɛ mli akɛ, mɛi ni yɔɔ Galilea ŋshɔnaa gbɛ lɛ baana la kpeteŋkpele ko lɛ ba mli.—Yesaia 8:23; 9:1.

Hɛɛ, yɛ Galilea hu lɛ, Yesu tee nɔ etswa adafi akɛ, “ŋwɛi Maŋtsɛyeli lɛ ebɛŋkɛ.” (Mateo 4:17) Yesu na ekaselɔi lɛ ateŋ mɛi ejwɛ. No mli lɛ, amɛfata Yesu he kɛfã gbɛ lɛ, shi be ni amɛjɛ Yudea amɛba lɛ, kaselɔi lɛ tee amɛyatsa amɛwuoyaa nitsumɔ lɛ nɔ. (Yohane 1:35-42) Agbɛnɛ lɛ, be eshɛ ní esa akɛ amɛhi Yesu masɛi be fɛɛ be koni etsɔɔ amɛ nii, koni kɛ́ eshi etee lɛ, amɛnyɛ amɛtsa sɔɔmɔ nitsumɔ lɛ nɔ.

Be ni Yesu nyiɛ ŋshɔ lɛ naa lɛ, ena Simon Petro, enyɛmi nuu Andrea, kɛ amɛnanemɛi wolɛi krokomɛi ni miisaa amɛyai lɛ. Yesu tsi bɛŋkɛ amɛ, ekwɔ Petro lɛlɛ lɛ, ni ebi lɛ koni etsi lɛlɛ lɛ kɛya nu lɛ hiɛ. Be ni amɛtee ŋshɔ lɛ hiɛ fioo lɛ, Yesu ta shi ni ebɔi asafoku ni ebabua amɛhe naa yɛ ŋshɔ lɛ naa lɛ anɔkwalei ni kɔɔ Maŋtsɛyeli lɛ he lɛ tsɔɔmɔ.

No sɛɛ lɛ, Yesu kɛɛ Petro akɛ: “Nyɛtsia lɛlɛ lɛ kɛyaa he ni mli kwɔ, ni nyɛyaŋmɛa nyɛyai lɛ koni nyɛgbe loo.” Petro here nɔ ekɛɛ: “Tsɔɔlɔ, wɔgbo deŋme nyɔɔŋ nɛɛ mli fɛɛ ni wɔnáaa nɔ ko, shi yɛ owiemɔ lɛ naa lɛ, maŋmɛ yai lɛ.”Luka 5:4, 5.

Amɛŋmɛ amɛyai lɛ, ni amɛgbe loo babaoo aahu akɛ, amɛyai lɛ bɔi gbalamɔ! Amɛkɛ oyaiyeli tsɛ amɛhefatalɔi krokomɛi ni yɔɔ lɛlɛ ko ni bɛŋkɛ amɛ lɛ mli lɛ, koni amɛbaye amɛbua amɛ. Etsɛɛɛ kɛkɛ ni lɛji enyɔ lɛ fɛɛ yimɔ kɛ loi aahu akɛ, lɛji lɛ bɔi shiumɔ. Be ni Petro na enɛ lɛ, egbee Yesu naji anaa ni ekɛɛ: “Nuŋtsɔ, jee mimasɛi ni oya, ejaakɛ nuu eshafeelɔ ji mi.” Yesu here nɔ akɛ: “Kpa gbeyeishemɔ lɛ. Kɛjɛ be nɛɛ nɔ kɛyaa lɛ, obaahɛ gbɔmɛi ni hiɛ kamɔ.”Luka 5:8, 10.

Yesu kɛɛ Petro kɛ Andrea akɛ: “Nyɛbanyiɛa misɛɛ, ni mafee nyɛ wolɛi ni baahɛ gbɔmɛi.” (Mateo 4:19) Etsɛ wolɛi enyɔ krokomɛi, Yakobo kɛ Yohane, ni ji Zebedeo bihii lɛ kɛfata he. Amɛ hu amɛbanyiɛ esɛɛ amrɔ nɔŋŋ. No hewɔ lɛ, mɛi ejwɛ nɛɛ shi amɛwuoyaa nitsumɔ lɛ, ni amɛbatsɔmɔ mɛi klɛŋklɛŋ ni bafee Yesu be fɛɛ kaselɔi.

Ekrokromɛi Hu Nɛ

Petro Wu Eshi Gbeyeishemɔ kɛ Yiŋkɔshikɔshifeemɔ

Yiŋkɔshikɔshifeemɔ nyɛɔ efiteɔ nii waa. Shi Petro wu eshi gbeyei ni mɔ lɛ, kɛ eyiŋ ni fee lɛ kɔshikɔshi yɛ Yesu sɛɛnyiɛmɔ he lɛ.