Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 35

Gɔŋ nɔ Shiɛmɔ ni Ehe Gbɛ́i Waa Lɛ

Gɔŋ nɔ Shiɛmɔ ni Ehe Gbɛ́i Waa Lɛ

MATEO 5:1–7:29 LUKA 6:17-49

  • GƆŊ NƆ SHIƐMƆ LƐ

Eeenyɛ efee akɛ, etɔ Yesu akɛni eye nyɔɔŋ muu fɛɛ kɛsɔle ni no sɛɛ lɛ ehala kaselɔi 12 koni amɛbatsɔmɔ bɔfoi lɛ hewɔ. Amrɔ nɛɛ je etsɛre ni kɛ̃lɛ, eyɛ hewalɛ lolo ni eeshwe akɛ eye ebua mɛi. Ni efee nakai yɛ gɔŋ ko nɔ yɛ Galilea, ni ekolɛ jɛmɛ kɛ Kapernaum, he ni etsu enitsumɔi lɛ titri yɛ lɛ, jekɛɛɛ.

Asafokui jɛ shɔŋŋshɔŋŋ ba eŋɔɔ. Mɛi komɛi jɛ wuoyi, yɛ Yerusalem kɛ Yudea hei krokomɛi. Mɛi komɛi hu jɛ Tiro kɛ Sidon, ni ji ŋshɔnaa maji ni yɔɔ kooyi-anai lɛ amli. Mɛni hewɔ amɛba amɛtaoɔ Yesu lɛ? “Amɛba lɛ toiboo kɛ agbɛnɛ hu, koni etsa amɛhelai lɛ ehã amɛ.” Ni nakai pɛpɛɛpɛ eba lɛ—Yesu ‘tsa amɛ fɛɛ.’ Bo lɛ, susumɔ he okwɛ! Etsa mɛi ni he yeɔ lɛ fɛɛ. Agbɛnɛ hu, Yesu ye ebua “mɛi ni mumɔi ni he tseee haoɔ amɛ lɛ,” mɛi ni Satan bɔfoi fɔji lɛ piŋɔ amɛ lɛ.Luka 6:17-19.

No sɛɛ lɛ, Yesu tao he ko ni yɔɔ trɛnɛɛ yɛ gɔŋ lɛ nɔ, ni asafoku lɛ bua amɛhe naa yɛ jɛmɛ. Eeenyɛ efee akɛ ekaselɔi lɛ, titri lɛ bɔfoi 12 lɛ, yɛ emasɛi kpaakpa. Mɔ fɛɛ mɔ efee klalo akɛ ebaabo tsɔɔlɔ ni tsuɔ naakpɛɛ nitsumɔi nɛɛ toi. Yesu hã maŋshiɛmɔ ko ni ye ebua etoibolɔi lɛ waa. Kɛjɛ no sɛɛ kɛbaa nɛɛ, mɛi babaoo hu ená nakai maŋshiɛmɔ lɛ he sɛɛ. Wɔ hu wɔbaanyɛ wɔná he sɛɛ, ejaakɛ ekɛ wiemɔi ni shishinumɔ waaa ni mli kã shi faŋŋ gbala anɔkwalei ni mli kwɔlɔ amli. Yesu kɛ nɔkwɛmɔnii kɛ nibii ni mɛi le tsu nii. Enɛ hãa mɛi fɛɛ ni miitao amɛtsɔ gbɛ ni saa Nyɔŋmɔ hiɛ lɛ nɔ amɛná shihilɛ kpakpa lɛ nuɔ nibii ni etsɔɔ lɛ ashishi jogbaŋŋ. Mɛɛ otii komɛi hãa Yesu shiɛmɔ lɛ feɔ nɔ ni nɔ bɛ kwraa lɛ?

NAMƐI YƆƆ MIISHƐƐ LƐƐLƐŊ?

Mɔ fɛɛ mɔ miisumɔ ni ená miishɛɛ. Akɛni Yesu le enɛ hewɔ lɛ, ewie mɛi ni yɔɔ miishɛɛ lɛɛlɛŋ lɛ he kɛje eshiɛmɔ lɛ shishi. Bo lɛ, susumɔ bɔ ni enɛ baagbala etoibolɔi lɛ ajwɛŋmɔ lɛ he okwɛ. Shi nibii komɛi baahã amɛhiɛ afee amɛ yaa.

Ekɛɛ akɛ: “Mɛi ni le akɛ Nyɔŋmɔ he miihia amɛ lɛ yɛ miishɛɛ, ejaakɛ amɛnɔ ji ŋwɛi Maŋtsɛyeli lɛ. Mɛi ni yeɔ awerɛho lɛ yɛ miishɛɛ, ejaakɛ abaashɛje amɛmii. . . . Mɛi ni jalɛ he hɔmɔ kɛ kumai yeɔ amɛ lɛ yɛ miishɛɛ, ejaakɛ amɛbaatɔrɔ. . . . Mɛi ni awaa amɛ yi yɛ jalɛ hewɔ lɛ yɛ miishɛɛ, ejaakɛ amɛnɔ ji ŋwɛi Maŋtsɛyeli lɛ. Nyɛyɛ miishɛɛ, kɛ́ mɛi bɔ nyɛ ahora ni amɛwa nyɛ yi . . . yɛ mihewɔ. Nyɛmii ashɛa nyɛhe ní nyɛmli afilia nyɛ.”Mateo 5:3-12.

Mɛni wiemɔ ni ji “miishɛɛ” ni Yesu kɛtsu nii lɛ tsɔɔ? Jeee mɔ ko ni eyi kɛ ŋmɔlɔ loo emli efili lɛ, taakɛ ebaa lɛ kɛ́ mɔ ko miishwɛ ehiɛ lɛ he ewieɔ lɛ. Anɔkwa miishɛɛ yaa shɔŋŋ fe nakai. Etsɔɔ mɔ tsui ni nyɔɔ emli diɛŋtsɛ yɛ shihilɛ mli, ní emii shɛɔ bɔ ni eyɔɔ lɛ he.

Yesu tsɔɔ akɛ, mɛi ni le akɛ Nyɔŋmɔ he miihia amɛ, mɛi ni werɛ hoɔ amɛhe yɛ eshafeelɔi ni amɛji lɛ hewɔ, kɛ mɛi ni baleɔ Nyɔŋmɔ ni amɛsɔmɔɔ lɛ lɛ ji mɛi ni yɔɔ miishɛɛ lɛɛlɛŋ lɛ. Kɛ́ anyɛ amɛ loo awa amɛyi yɛ Nyɔŋmɔ suɔmɔnaa nii ni amɛfeɔ lɛ hewɔ po lɛ, amɛyɛ miishɛɛ, ejaakɛ amɛle akɛ amɛmiisa ehiɛ, ni akɛ ekɛ naanɔ wala baajuro amɛ.

Shi mɛi pii susuɔ akɛ kɛ́ mɔ ko yɛ nii, ni etiuɔ ŋɔɔmɔyeli sɛɛ lɛ, no hãa enáa miishɛɛ. Yesu kɛɛ no moŋ hãaa mɔ aná miishɛɛ. Ewie nɔ ko ni  yɔɔ srɔto, ni baahã etoibolɔi lɛ babaoo asusu nii ahe, ekɛɛ akɛ: “Nyɛ mɛi ni nyɛji niiatsɛmɛi lɛ, kpoo hã nyɛ ejaakɛ nyɛná nyɛmiishɛjemɔ lɛ fɛɛ momo. Kpoo hã nyɛ mɛi ni nyɛtɔrɔ amrɔ nɛɛ, ejaakɛ hɔmɔ baaye nyɛ. Kpoo hã nyɛ mɛi ni nyɛŋmɔɔ amrɔ nɛɛ, ejaakɛ nyɛbaaye awerɛho ni nyɛbaafofoi. Kpoo hã nyɛ kɛji gbɔmɛi fɛɛ wieɔ nyɛhe ekpakpa, ejaakɛ nakai nɔŋŋ amɛtsɛmɛi lɛ fee amale gbalɔi lɛ.”Luka 6:24-26.

Mɛni hewɔ ehã niiatsɛmɛi, mɛi ni ŋmɔɔ, kɛ mɛi ni gbɔmɛi fɛɛ wieɔ amɛhe ekpakpa lɛ kpoo lɛ? Ejaakɛ kɛ́ mɔ ko yɛ nibii nɛɛ ni emii shɛɔ nomɛi ahe waa lɛ, no baahã eku ehiɛ efɔ̃ Nyɔŋmɔjamɔ nɔ, ni enáŋ anɔkwa miishɛɛ. Yesu etsɔɔɔ akɛ kɛ́ mɔ ko miiye ohia loo hɔmɔ miiye lɛ lɛ, no kɛkɛ baahã ená miishɛɛ. Kɛ̃lɛ, bei pii lɛ, mɛi ni yɔɔ fimɔ shihilɛ mli loo amɛbɛ nɔ ko tsɔ lɛ ji mɛi ni boɔ Yesu tsɔɔmɔi lɛ atoi, ni amɛnáa anɔkwa miishɛɛ.

Yesu kaselɔi lɛ ji mɛi ni yɔɔ ejwɛŋmɔ mli be ni ewie akɛ: “Shikpɔŋ lɛ nɔ ŋoo ji nyɛ” lɛ. (Mateo 5:13) Ekã shi faŋŋ akɛ, jeee ŋoo diɛŋtsɛ he ewieɔ lɛ. Akɛ ŋoo baa nii ayi. Akɛ ŋoo babaoo toɔ afɔleshaa latɛ lɛ masɛi yɛ Nyɔŋmɔ sɔlemɔwe lɛ, ni akɛwoɔ nibii ni akɛbahãa akɛ afɔle lɛ. Akɛfeɔ nɔ ko ni fiteee loo ekpɔtɔɔɔ hu he mfoniri. (3 Mose 2:13; Ezekiel 43:23, 24) Yesu kaselɔi lɛ ji “shikpɔŋ lɛ nɔ ŋoo” kɛ shishinumɔ lɛ akɛ, amɛnáa mɛi anɔ hewalɛ kpakpa, ni tsɔɔ akɛ amɛyeɔ amɛbuaa mɛi koni amɛkakpɔtɔ yɛ mumɔŋ kɛ jeŋbaŋ. Hɛɛ, sane ni amɛshiɛɔ lɛ baanyɛ abaa mɛi fɛɛ ni boɔ toi lɛ awala yi.

Yesu kɛɛ ekaselɔi lɛ hu akɛ: “Nyɛji je lɛŋ la lɛ.” Akɛ kane emaaa kɛntɛŋ shishi, shi moŋ akɛmaa kanetso nɔ koni ekpɛ. No hewɔ lɛ, Yesu wo amɛ hewalɛ akɛ: “Nyɛhãa nyɛla lɛ atsoa yɛ gbɔmɛi ahiɛ, koni amɛna nyɛnitsumɔi kpakpai lɛ, ni amɛwo nyɛ-Tsɛ ni yɔɔ ŋwɛi lɛ hiɛ nyam.”Mateo 5:14-16.

TAOMƆ NII NI NƆ BƐ NI ESA AKƐ ESƐƐNYIƐLƆI LƐ ASHƐ HE

Yudafoi lɛ ajamɔŋ hiɛnyiɛlɔi lɛ buɔ Yesu akɛ etɔ̃ɔ Nyɔŋmɔ Mla lɛ nɔ, ni etsɛko tsɔ nɛ ni amɛtee eyi nɔ apam koni amɛgbe lɛ. No hewɔ lɛ, Yesu wie faŋŋ akɛ: “Nyɛkasusua akɛ miba Mla lɛ kɛ Gbalɔi lɛ aguu. Mibaaa guu, shi moŋ miba koni mibawo amɛ obɔ.”Mateo 5:17.

 Hɛɛ, Yesu yɛ bulɛ ni mli kwɔ waa kɛhã Nyɔŋmɔ Mla lɛ, ni ewo mɛi hewalɛ ni amɛ hu amɛfee nakai nɔŋŋ. Anɔkwa, ekɛɛ akɛ: “No hewɔ lɛ, mɔ fɛɛ mɔ ni kuɔ kitãi bibii nɛɛ ateŋ ekome mli ni etsɔɔ mɛi ni amɛ hu amɛfee nakai lɛ, abaatsɛ lɛ bibioo fe fɛɛ yɛ ŋwɛi Maŋtsɛyeli lɛ mli.” Eetsɔɔ akɛ, mɔ ni feɔ nakai lɛ boteŋ Maŋtsɛyeli lɛ mli kwraa. Etsa nɔ akɛ: “Shi mɔ fɛɛ mɔ ni kɛ kitãi nɛɛ tsuɔ nii, ni etsɔɔ mɛi lɛ, abaatsɛ lɛ agbo yɛ ŋwɛi Maŋtsɛyeli lɛ mli.”Mateo 5:19.

Yesu wie eshi nifeemɔi po ni hãa mɔ kuɔ Nyɔŋmɔ Mla lɛ mli lɛ. Be ni Yesu wie akɛ Mla lɛ kɛɔ akɛ, “Esaaa akɛ ogbeɔ gbɔmɔ” lɛ sɛɛ lɛ, ekɛfata he akɛ: “Mɔ fɛɛ mɔ ni kãa he ehiɛɔ enyɛmi he mlifu mli lɛ, akɛ lɛ baaye sane yɛ saneyelihe lɛ.” (Mateo 5:21, 22) Kɛ́ mɔ ko tee nɔ ehiɛ mɔ kroko he mlifu mli lɛ, eji hiɛdɔɔ sane, ni ekolɛ no baahã egbe mɔ lɛ po. No hewɔ lɛ, Yesu tsɔɔ nɔ ni esa akɛ mɔ afee kɛtiu toiŋjɔlɛ sɛɛ be ni ekɛɛ akɛ: “Belɛ, kɛ́ okɛ onɔkeenɔ miiba afɔleshaa latɛ lɛ he ni okai yɛ jɛmɛ akɛ onyɛmi yɛ sane ko eshi bo lɛ, shi onɔkeenɔ lɛ yɛ jɛmɛ, yɛ afɔleshaa latɛ lɛ hiɛ, ni oya. Klɛŋklɛŋ lɛ, okɛ onyɛmi lɛ ayasaa, ni oku osɛɛ oba, ni okɛ onɔkeenɔ lɛ abahã.”Mateo 5:23, 24.

Nɔ kroko ni Mla lɛ wieɔ eshiɔ ji gbalafitemɔ. Yesu wie akɛ: “Nyɛnu akɛ akɛɛ akɛ: ‘Esaaa akɛ ofiteɔ gbãla.’ Shi mi lɛ, miikɛɛ nyɛ akɛ, mɔ fɛɛ mɔ ni yaa nɔ ekwɛɔ yoo ni enáa ehe akɔnɔ lɛ, ekɛ lɛ efite gbãla momo yɛ etsuiŋ.” (Mateo 5:27, 28) Jeee jeŋba sha he susumɔ ni baa mɔ yiŋ be kukuoo kɛkɛ lɛ he Yesu wieɔ lɛ; moŋ lɛ, eema bɔ ni sane lɛ yɔɔ hiɛdɔɔ hã kɛji mɔ ko ‘tee nɔ ekwɛ’ yoo loo nuu lɛ nɔ mi. Bei pii lɛ, ya ni ayaa nɔ akwɛɔ mɔ ko lɛ teɔ akɔnɔi ashi. Kɛkɛ lɛ, kɛ́ hegbɛ ko ba lɛ, ebaanyɛ ehã mɔ afite gbãla. Te mɔ aaafee tɛŋŋ etsĩ enɛ naa lɛ? Ekolɛ ehe baahia ni ekɛ hiɛdɔɔ afee nibii komɛi. Yesu kɛɛ akɛ: “Kɛ́ oninejurɔ hiŋmɛi miitɔ̃tɔ onane lɛ, fãa oshɛ ofɔ̃. . . . Kɛ́ oninejurɔ miitɔ̃tɔ onane lɛ, foo oshɛ ofɔ̃.”Mateo 5:29, 30.

Mɛi komɛi ejɛ amɛsuɔmɔ mli amɛhã afo amɛnine loo amɛnane ní hela ko ni naa wa emɔ lɛ lɛ, bɔ ni afee ni amɛhi wala mli. Belɛ, shishinumɔ yɛ he akɛ Yesu kɛɛ ehe miihia waa ni ‘ashɛ’ nɔ fɛɛ nɔ, ní nɔ ko ni he hiaa waa tamɔ hiŋmɛi loo nine po fata he lɛ ‘afɔ̃.’ Nakai feemɔ baahã mɔ atsi ehe kɛje jeŋba sha he susumɔi kɛ nibii ni jɛɔ mli kɛbaa lɛ ahe. Yesu tsɔɔ mli akɛ: “Ehi hã bo akɛ ogbɔmɔtso lɛ henii kome baaŋmɛɛ bo, fe nɔ ni ogbɔmɔtso muu lɛ fɛɛ aaayagbe naa yɛ Gehena” (ni ji he ko ni ashãa jwɛi yɛ, yɛ Yerusalem gbogboi lɛ asɛɛ), ni tsɔɔ naanɔ hiɛkpatamɔ lɛ.

Agbɛnɛ hu, Yesu wo ŋaa yɛ bɔ ni esa akɛ akɛ mɛi ni yeɔ mɛi awui kɛ mɛi ni tsɔɔ mɛi anaa aye ahã lɛ he. Ekɛɛ akɛ: “Nyɛkatea shi nyɛwoa efɔŋfeelɔ, shi mɔ fɛɛ mɔ ni baagba oninejurɔ toiŋ lɛ, tsɔ ekroko lɛ hu ohã lɛ.” (Mateo 5:39) No etsɔɔɔ akɛ esaaa akɛ mɔ ko fãa lɛ loo eweku he kɛ́ mɔ ko  batutua amɛ. Yesu wie toiŋgbamɔ he, nɔ ko ni afeee koni akɛye mɔ awui waa loo akɛgbe mɔ; shi moŋ eji mɔjɛmɔ. Eetsɔɔ akɛ, kɛ́ mɔ ko gba otoiŋ loo ejɛ bo koni ekɛtsɔ onaa ní ekɛbo anɔ loo nyɛtaa sane naa lɛ, kaafee lɛ eko oto najiaŋ.

Nakai ŋaawoo lɛ kɛ Nyɔŋmɔ mla ni kɛɛ asumɔ naanyo gbɔmɔ lɛ kpãa gbee. No hewɔ lɛ, Yesu wo etoibolɔi lɛ ŋaa akɛ: “Nyɛyaa nɔ nyɛsumɔa nyɛhenyɛlɔi ni nyɛsɔlea nyɛhãa mɛi ni waa nyɛ yi lɛ.” Etsɔɔ yiŋtoo kpakpa hewɔ ni esa akɛ afee nakai lɛ, akɛ: “Koni nyɛtsɔmɔ nyɛ-Tsɛ ni yɔɔ ŋwɛi lɛ bii, ejaakɛ ehãa ehulu teɔ shi yɛ mɛi fɔji kɛ mɛi kpakpai fɛɛ nɔ.”Mateo 5:44, 45.

Yesu mua eshiɛmɔ lɛ fã nɛɛ naa akɛ: “Belɛ taakɛ nyɛ-Tsɛ ni yɔɔ ŋwɛi lɛ eye emuu lɛ, nyɛ hu nyɛyea emuu.” (Mateo 5:48) Eyɛ faŋŋ akɛ, etsɔɔɔ akɛ mɛi baanyɛ aye emuu kɛmɔ shi. Kɛ̃lɛ, kɛ́ wɔkase Nyɔŋmɔ lɛ, wɔbaanyɛ wɔlɛɛ wɔsuɔmɔ lɛ mli, ní wɔsumɔ wɔhenyɛlɔi po. Yɛ gbɛ kroko nɔ lɛ, nɔ ni etsɔɔ ji akɛ: “Nyɛyaa nɔ nyɛnaa mɔbɔ, tamɔ bɔ ni nyɛ-Tsɛ lɛ naa mɔbɔ lɛ.”Luka 6:36.

SƆLEMƆ KƐ HIƐ NI AKƐFƆ̃Ɔ NYƆŊMƆ NƆ

Be ni Yesu tsaa ewiemɔ lɛ nɔ lɛ, ewo etoibolɔi lɛ ŋaa akɛ: “Nyɛkwɛa jogbaŋŋ ni nyɛkafea nyɛjalɛ nii lɛ yɛ gbɔmɛi ahiɛ koni amɛna nyɛ.” Yesu wie eshi kwa ni akwaa afeɔ tamɔ nɔ ni aajie Nyɔŋmɔjamɔ su kpo lɛ, be ni ewie akɛ: “Kɛ́ oyaafee ohiafoi ejurɔ lɛ, kaakpã tɛtɛrɛmantɛrɛ kɛtsɔ hiɛ, taakɛ osatofoi lɛ feɔ” lɛ. (Mateo 6:1, 2) Kɛ́ oofee ohiafoi ejurɔ lɛ, esaaa akɛ ohãa mɛi leɔ.

Yesu tsa nɔ akɛ: “Kɛ́ nyɛmiisɔle lɛ, nyɛkafea nyɛnii tamɔ osatofoi lɛ, ejaakɛ amɛsumɔɔ ni amɛdamɔ kpeehei lɛ kɛ gbɛjegbɛi titrii lɛ akoji lɛ anɔ koni mɛi ana amɛ.” Nɔ moŋ ni ekɛɛ afee ji: “Kɛ́ obaasɔle lɛ, botemɔ otsũ mli he ni mɔ ko enaaa bo, ni be ni oŋa oshinaa lɛ, sɔlemɔ ohã o-Tsɛ ni yɔɔ teemɔŋ lɛ.” (Mateo 6:5, 6) Jeee sɔlemɔi ni asɔleɔ yɛ mɛi ahiɛ lɛ fɛɛ Yesu wieɔ eshiɔ lɛ, ejaakɛ lɛ diɛŋtsɛ hu esɔle yɛ mɛi ahiɛ. Eewie eeshi sɔlemɔi ni mɛi sɔleɔ koni amɛkɛsa toibolɔi ahiɛ, ni no ahã toibolɔi lɛ ajie amɛyi lɛ.

Ewo asafoku lɛ ŋaa akɛ: ‘Kɛ́ nyɛmiisɔle lɛ, nyɛkawiea wiemɔ kome too lɛ nɔŋŋ shii abɔ, taakɛ jeŋmajiaŋbii lɛ feɔ lɛ.’ (Mateo 6:7) Yesu etsɔɔɔ akɛ eji tɔ̃mɔ akɛ abaasɔle yɛ sane kome too lɛ nɔŋŋ he shii abɔ. Eetsɔɔ akɛ, esaaa akɛ akɛ wiemɔi ni akase awo yitsoŋ lɛ tsuɔ nii “shii abɔ” yɛ sɔlemɔ mli. Kɛkɛ ni ekɛ sɔlemɔ he nɔkwɛmɔnɔ hã, ni ewie nibimɔi kpawo he yɛ mli. Klɛŋklɛŋ nibimɔi etɛ lɛ hãa anaa hegbɛ ni Nyɔŋmɔ yɔɔ akɛ eyeɔ nɔ lɛ kɛ eyiŋtoi lɛ—akɛ atse egbɛ́i lɛ he, e-Maŋtsɛyeli lɛ aba, ní afee esuɔmɔnaa nii. Esa akɛ wɔtsĩ saji nɛɛ atã yɛ wɔsɔlemɔ mli dani wɔbi wɔ diɛŋtsɛ wɔhiamɔ nii akɛ ahã wɔ niyenii kɛhã gbi lɛ, akɛ wɔhe eshai afa wɔ, ni agbɛnɛ hu wɔbi ni akaka wɔ fe bɔ ni wɔɔnyɛ naa wɔdamɔ, ní ajie wɔ kɛjɛ mɔ fɔŋ lɛ dɛŋ.

 Te esa akɛ wɔna nibii ni wɔyɔɔ lɛ wɔhã tɛŋŋ? Yesu wo asafoku lɛ hewalɛ akɛ: “Nyɛkpaa jwetrii ni nyɛbɔɔ nyɛhãa nyɛhe yɛ shikpɔŋ lɛ nɔ, he ni omlɛ̃gɛ̃ kɛ ŋkanale fiteɔ nii, ni julɔi hu gbuɔ kɛboteɔ mli kɛbajuɔ yɛ lɛ.” Nilee yɛ sane nɛɛ mli waa! Heloonaa jwetrii baanyɛ afite, ni amɛfiteɔ hu, ni kɛ́ wɔyɛ eko lɛ, no etsɔɔɔ akɛ wɔyɛ shidaamɔ kpakpa yɛ Nyɔŋmɔ hiɛ. No hewɔ lɛ, Yesu kɛfata he akɛ: “Nyɛbɔa jwetrii nyɛhãa nyɛhe yɛ ŋwɛi.” Wɔbaanyɛ wɔfee enɛ kɛtsɔ Nyɔŋmɔ sɔɔmɔ ni wɔkɛbaaye klɛŋklɛŋ gbɛhe yɛ wɔshihilɛ mli lɛ nɔ. Mɔ ko mɔ ko nyɛŋ ashɔ̃ shidaamɔ kpakpa ni wɔyɔɔ yɛ Nyɔŋmɔ hiɛ loo naanɔ wala ni akɛbaajuro wɔ lɛ kɛjɛ wɔdɛŋ. No hewɔ lɛ, nɔ ni Yesu wie akɛ: “He ni ojwetri yɔɔ lɛ, jɛmɛ otsui hu baahi” lɛ ji anɔkwale.Mateo 6:19-21.

Yesu kɛ nɔkwɛmɔnɔ ko tsu nii kɛma sane nɛɛ nɔ mi akɛ: “Gbɔmɔtso lɛ kane ji hiŋmɛi lɛ. Belɛ kɛ́ ohiŋmɛi kwɛɔ nɔ kome lɛ, ogbɔmɔtso muu lɛ fɛɛ baakpɛ. Shi kɛ́ ohiŋmɛi klɔɔ mɔ nɔ lɛ, ogbɔmɔtso muu lɛ fɛɛ baawo duŋ.” (Mateo 6:22, 23) Kɛ́ wɔhiŋmɛi naa nii jogbaŋŋ lɛ, etamɔ kane ni asu kɛhã wɔgbɔmɔtso lɛ. Shi kɛ́ wɔhiŋmɛi lɛ baana nii jogbaŋŋ lɛ, ja wɔkɛkwɛ nɔ kome; kɛjeee nakai lɛ, wɔbaana shihilɛ lɛ yɛ gbɛ ni ejaaa nɔ. Kɛ́ wɔkɛ wɔjwɛŋmɔ ma heloonaa nibii anɔ, moŋ fe ni wɔkɛaama Nyɔŋmɔ sɔɔmɔ nɔ lɛ, no baahã ‘wɔgbɔmɔtso muu lɛ fɛɛ awo duŋ,’ ekolɛ wɔbaafee nibii ni tsɔɔ akɛ wɔyeee anɔkwa.

No sɛɛ lɛ, Yesu gba nɔkwɛmɔnɔ ko ni sa kadimɔ waa akɛ: “Mɔ ko nyɛŋ atsɔ nyɔŋ ehã nuŋtsɔmɛi enyɔ; ejaakɛ no lɛ ebaanyɛ mɔ kome ni ebaasumɔ mɔ kroko lɛ, aloo ebaakpɛtɛ mɔ kome he ni ebaagbe mɔ kroko lɛ he guɔ. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.”Mateo 6:24.

Ekolɛ, Yesu toibolɔi lɛ ateŋ mɛi komɛi baasusu bɔ ni amɛaafee amɛná amɛheloonaa hiamɔ nii lɛ he. No hewɔ lɛ, ehã amɛle akɛ kɛ́ amɛkɛ Nyɔŋmɔ sɔɔmɔ ye klɛŋklɛŋ gbɛhe lɛ, ehe ehiaŋ ni  amɛfee yeyeeye. Ekɛɛ akɛ: “Nyɛkwɛa ŋwɛi loofɔji lɛ jogbaŋŋ; amɛduuu nii, asaŋ amɛkpaaa nii, asaŋ amɛbuaaa nii anaa amɛwooo nitoohei, kɛ̃lɛ, nyɛŋwɛi Tsɛ lɛ lɛɔ amɛ.”Mateo 6:26.

Ni koo mli fɔfɔii lɛ ni yɔɔ gɔŋ lɛ nɔ lɛ hu? Yesu wie akɛ: “Solomon anunyam lɛ fɛɛ sɛɛ po lɛ, ewulaaa tamɔ enɛɛmɛi ateŋ ekome.” Mɛni enɛ tsɔɔ? Etsɔɔ akɛ: “Kɛji nɛkɛ Nyɔŋmɔ wulaa koo mli kwɛ̃ɛ nii ni ŋmɛnɛ lɛ amɛyɛ, ni wɔ́ lɛ aŋɔwo flɔnɔɔ mli lɛ, ani ewulaŋ nyɛ babaoo?” (Mateo 6:29, 30) Yesu wo amɛ ŋaa ni nilee yɔɔ mli akɛ: “Nyɛkafea yeyeeye kɔkɔɔkɔ ní nyɛkɛa akɛ, ‘Mɛni wɔɔye?’ aloo, ‘Mɛni wɔɔnu?’ aloo, ‘Mɛni wɔɔwo?’ . . . Nyɛŋwɛi Tsɛ lɛ le akɛ nibii nɛɛ fɛɛ he miihia nyɛ. Belɛ, nyɛyaa nɔ nyɛtaoa Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ, ni abaaŋɔ nibii krokomɛi nɛɛ fɛɛ afata he ahã nyɛ.”Mateo 6:31-33.

BƆ NI AAAFEE ANÁ WALA

Bɔfoi lɛ kɛ anɔkwafoi krokomɛi lɛ miisumɔ ni amɛhi shi yɛ gbɛ ni saa Nyɔŋmɔ hiɛ nɔ, shi amɛnáaa enɛ feemɔ mlɛo. Akɛ nɔkwɛmɔnɔ lɛ, Farisifoi lɛ ateŋ mɛi pii wieɔ mɛi ahiɛ nyanyaanya, ni amɛkojoɔ mɛi yɛ gbɛ ni esaaa nɔ. No hewɔ lɛ, Yesu bɔ etoibolɔi lɛ kɔkɔ akɛ: “Nyɛkpaa kojomɔ, koni akakojo nyɛ; ejaakɛ nɔ kojomɔ ni nyɛkɛkojoɔ mɛi lɛ, akɛbaakojo nyɛ.”Mateo 7:1, 2.

Eyɛ oshara akɛ aaanyiɛ Farisifoi ni wieɔ mɛi ahiɛ nyanyaanya lɛ agbɛtsɔɔmɔ sɛɛ, taakɛ Yesu kɛ nɔkwɛmɔnɔ nɛɛ tsɔɔ mli lɛ, akɛ: “Shwilafo ko nyɛŋ atsɔɔ shwilafo ko gbɛ, aloo jeee nakai? Amɛyi enyɔ lɛ fɛɛ amɛbaayagbee bu mli, aloo jeee nakai?” Belɛ, te esa akɛ Yesu toibolɔi lɛ ana mɛi krokomɛi tɛŋŋ? Esaaa akɛ amɛwieɔ mɛi ahiɛ nyanyaanya, ejaakɛ no baafee esha ni yɔɔ hiɛdɔɔ. Ebi amɛ akɛ: “Te feɔ tɛŋŋ ni okɛɔ onyɛmi akɛ, ‘Anyɛmi, hã majie jwɛi hwiaa lɛ yɛ ohiŋmɛi mli,’ be mli ni onaaa mplaŋ ni yɔɔ bo diɛŋtsɛ ohiŋmɛi mli lɛ? Osatofo! Jiemɔ mplaŋ lɛ yɛ bo diɛŋtsɛ ohiŋmɛi mli klɛŋklɛŋ, kɛkɛ lɛ, obaana faŋŋ bɔ ni ooofee ojie jwɛi hwiaa ni yɔɔ onyɛmi lɛ hiŋmɛi mli lɛ.”Luka 6:39-42.

Enɛ etsɔɔɔ akɛ esaaa akɛ kaselɔi lɛ kojoɔ sane ko kwraa. Yesu kɛɛ amɛ akɛ: “Nyɛkɛ nii ni ji krɔŋkrɔŋ akahãa gbei, asaŋ nyɛkashɛrɛa nyɛdiagbai nyɛshwiea kpolotoi ahiɛ.” (Mateo 7:6) Yɛ mfonirifeemɔŋ lɛ, Nyɔŋmɔ Wiemɔ lɛ mli anɔkwalei lɛ ajara wa tamɔ adiagbai. Kɛ́ mɛi komɛi fee amɛnii tamɔ kooloi, ni amɛhiɛ esɔɔɔ anɔkwalei ni jara wa nɛɛ, esa akɛ kaselɔi lɛ ashi amɛ ní amɛyatao mɛi ni baabo toi.

Yesu wie sɔlemɔ he ekoŋŋ, ni ema bɔ ni ehe hiaa ni aya nɔ asɔle lɛ nɔ mi. Ekɛɛ akɛ: “Nyɛyaa nɔ nyɛbia, ni abaahã nyɛ.” Yesu ma nɔ mi akɛ, Nyɔŋmɔ efee klalo akɛ ebaahã sɔlemɔi ahetoo, be ni ebi akɛ: “Nyɛteŋ namɔ ni kɛ́ ebi bi lɛ aboloo lɛ, ebaahã lɛ tɛ? . . . No hewɔ lɛ, kɛji nyɛ, ni nyɛji mɛi fɔji po lɛ, nyɛle bɔ ni nyɛfeɔ nyɛŋɔɔ nikeenii kpakpai nyɛhãa nyɛbii lɛ, enyiɛ nɔŋŋ nyɛ-Tsɛ ni yɔɔ ŋwɛi lɛ eŋɔŋ nibii kpakpai ehãŋ mɛi ni biɔ lɛ lɛ!”Mateo 7:7-11.

Kɛkɛ ni Yesu kɛ jeŋba he mla ní mɛi pii ebale lɛ hã akɛ: “No hewɔ lɛ, nɔ fɛɛ nɔ ni nyɛtaoɔ akɛ mɛi afee ahã nyɛ lɛ, esa akɛ nyɛ hu nyɛfee nakai nɔŋŋ nyɛhã amɛ.” Ani esaaa akɛ wɔteŋ mɔ fɛɛ mɔ boɔ ŋaawoo kpakpa nɛɛ toi, ní ekɛtsu nii kɛ́ ekɛ mɛi  krokomɛi miishara? Shi ekolɛ wɔnáŋ nakai feemɔ mlɛo, taakɛ Yesu wiemɔ nɛɛ tsɔɔ lɛ, akɛ: “Nyɛtsɔa agbó fintɔŋŋ lɛ mli, ejaakɛ agbó ni lɛɛ kɛ gbɛ ni da lɛ ji nɔ ni kɛ mɔ yaa hiɛkpatamɔ mli lɛ, ni mɛi babaoo ji mɛi ni tsɔɔ agbó nɛɛ mli; shi agbó fintɔŋŋ kɛ gbɛ leleoo lɛ ji nɔ ni kɛ mɔ yaa wala mli lɛ, ni mɛi fioo ji mɛi ni naa no.”Mateo 7:12-14.

Mɛi komɛi baaka akɛ amɛbaahã kaselɔi lɛ aje gbɛ ni kɛ mɔ yaa wala mli lɛ nɔ, no hewɔ lɛ Yesu bɔ kɔkɔ akɛ: “Nyɛkwɛa nyɛhe nɔ jogbaŋŋ yɛ amale gbalɔi lɛ ahe, amɛŋɔɔ gwantɛŋ hewolo amɛhaa amɛhe kɛbaa nyɛŋɔɔ, shi amɛmligbɛ lɛ amɛji klaji fulɔi.” (Mateo 7:15) Yesu tsɔɔ akɛ, tso ko yibii akɛyoɔ akɛ eji tso kpakpa loo tso gbonyo. Nakai nɔŋŋ eji yɛ adesai agbɛfaŋ. No hewɔ lɛ, wɔbaanyɛ wɔyoo amale gbalɔi kɛtsɔ amɛtsɔɔmɔi kɛ amɛnifeemɔi anɔ. Hɛɛ, Yesu tsɔɔ mli akɛ, jeee nɔ ni mɔ ko wieɔ kɛkɛ hãa ebatsɔɔ Yesu kaselɔ, shi moŋ nɔ ni mɔ lɛ feɔ hu fata he. Mɛi komɛi kɛɔ akɛ Yesu ji amɛ-Nuŋtsɔ, shi kɛ́ amɛfeee Nyɔŋmɔ suɔmɔnaa nii hu? Yesu wie akɛ: “Makɛɛ amɛ akɛ: ‘Mileee nyɛ! Nyɛjea minɔ nyɛyaa, nyɛ mɛi ni nyɛtsuɔ mlatɔmɔ nitsumɔi!’”Mateo 7:23.

Be ni Yesu muɔ eshiɛmɔ lɛ naa lɛ, ekɛɛ akɛ: “Mɔ fɛɛ mɔ ni nuɔ miwiemɔi nɛɛ ni ekɛtsuɔ nii lɛ, ebaatamɔ nuu hiɛshikalɔ ko ni ma etsũ yɛ tɛsaa nɔ. Ni nugbɔ nɛ ni nu afuai ba ni kɔɔyɔi tswa ni eshimɔ nakai tsũ lɛ, shi ewuleee, ejaakɛ ato shishi yɛ tɛsaa nɔ.” (Mateo 7:24, 25) Mɛni hewɔ tsũ lɛ wuleee lɛ? Ejaakɛ nuu lɛ tsa “shi kwɔŋkwɔŋ ni etswa faneshi lɛ yɛ tɛsaa nɔ.” (Luka 6:48) No hewɔ lɛ, ebiɔ babaoo fe Yesu wiemɔi lɛ ní aaanu kɛkɛ. Esa akɛ wɔmia wɔhiɛ ni ‘wɔkɛtsu nii.’

Ni mɔ ni ‘nuɔ wiemɔi nɛɛ’ shi “ekɛtsuuu nii lɛ” hu? Etamɔ “nuu kwashia ko ni ma etsũ yɛ shia nɔ.” (Mateo 7:26) Nugbɔnɛmɔ, nu afuai, kɛ kɔɔyɔi baahã tsũ ni tamɔ nakai lɛ awule.

Gbɛ ni Yesu tsɔ nɔ etsɔɔ nii yɛ shiɛmɔ nɛɛ mli lɛ hã asafoku lɛ ahe jɔ̃ amɛhe. Etsɔɔ nii akɛ mɔ ko ni yɔɔ hegbɛ, shi jeee tamɔ jamɔŋ hiɛnyiɛlɔi lɛ. Eeenyɛ efee akɛ mɛi ni bo lɛ toi lɛ ateŋ mɛi babaoo batsɔmɔ ekaselɔi.

Ekrokromɛi Hu Nɛ

Shihilɛ ni Haa Mɔ Tsui Nyɔɔ Emli—Yesu Fee Enɛ he Nɔkwɛmɔnɔ

Saji komɛi ni ba diɛŋtsɛ lɛ haa wɔnaa bɔ ni kɛ́ wɔkɛ Yesu Gɔŋ nɔ Shiɛmɔ lɛ mli ŋaawoi lɛ tsu nii lɛ, wɔtsuii baanyɛ anyɔ wɔmli yɛ shihilɛ mli.