Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 48

Efee Naakpɛɛ Nii, Shi Akpoo lɛ yɛ Nazaret Po

Efee Naakpɛɛ Nii, Shi Akpoo lɛ yɛ Nazaret Po

MATEO 9:27-34; 13:54-58 MARKO 6:1-6

  • YESU TSA SHWILAFOI KƐ MUMUII

  • NAZARETBII LƐ KPOO LƐ

Yesu tsu nii gbi muu fɛɛ. Be ni ekɛ lɛlɛ efã gbɛ kakadaŋŋ kɛjɛ Dekapoli kpokpaa lɛ nɔ kɛba sɛɛ lɛ, etsa yoo ni lá hoɔ lɛ lɛ, ni etee Yairo biyoo lɛ shi. Shi gbi lɛ bako naagbee. Be ni eshi Yairo shĩa lɛ eyaa lɛ, hii shwilafoi enyɔ komɛi nyiɛ esɛɛ amɛmiibolɔ akɛ: “Naa wɔ mɔbɔ, David Bi.”Mateo 9:27.

Hii nɛɛ tsɔ tsɛ ni amɛtsɛ Yesu akɛ “David Bi” lɛ nɔ amɛtsɔɔ akɛ, amɛheɔ amɛyeɔ akɛ Yesu ji David niyelɔ ni baata emaŋtsɛ sɛi lɛ nɔ lɛ, ni akɛ lɛ ji Mesia lɛ. Yesu fee tamɔ nɔ ni enuuu amɛbolɔmɔ lɛ, ekolɛ koni ekɛkwɛ akɛ amɛbaakã he amɛbolɔ lo, ni lɛɛlɛŋ hu amɛfee nakai. Be ni Yesu yabote shĩa ko mli lɛ, hii enyɔ nɛɛ nyiɛ esɛɛ kɛbote mli. Yesu bi amɛ akɛ: “Ani nyɛyɛ hemɔkɛyeli akɛ manyɛ mafee enɛ?” Amɛkɛ nɔmimaa hã lɛ hetoo akɛ: “Hɛɛ, Nuŋtsɔ.” Kɛkɛ ni Yesu tara amɛhiŋmɛii ahe ni ekɛɛ: “Yɛ nyɛhemɔkɛyeli lɛ naa lɛ, aba mli nakai ahã nyɛ.”Mateo 9:28, 29.

Amrɔ lɛ, amɛbɔi ninamɔ! Taakɛ Yesu tsɔ hiɛ efã mɛi krokomɛi lɛ, efã amɛ hu akɛ amɛkahã mɔ ko le nɔ ni efee lɛ. Shi akɛni miishɛɛ eyi amɛtsuiiaŋ obɔ hewɔ lɛ, sɛɛ mli lɛ amɛyagbɛ ehe sane shwã jɛmɛ niiaŋ fɛɛ.

Be ni hii enyɔ nɛɛ shi amɛyaa lɛ, akɛ nuu ko ni nyɛɛɛ awie akɛni eyɔɔ daimonio hewɔ lɛ ba eŋɔɔ. Yesu fã daimonio lɛ, ni amrɔ lɛ, nuu lɛ bɔi wiemɔ. Enɛ hã asafoku lɛ naa kpɛ amɛhe ni amɛkɛɛ: “Anako nɛkɛ nɔ ko pɛŋ yɛ Israel.” No mli lɛ, Farisifoi lɛ hu yɛ jɛmɛ. Akɛni amɛnyɛɛɛ amɛje naakpɛɛ nii ni Yesu feɔ lɛ he ŋwane hewɔ lɛ, amɛsaa amɛkɛ sane kome too lɛ nɔŋŋ fɔ̃ Yesu nɔ akɛ: “Daimonioi lɛ anɔyelɔ lɛ hewalɛ ekɛfãmɔɔ daimonioi lɛ.”Mateo 9:33, 34.

No sɛɛ etsɛɛɛ lɛ, Yesu yiŋ akɛ eeya emaŋ Nazaret, ni amrɔ nɛɛ, ekaselɔi lɛ fata ehe. Aaafee afi ni eho nɛ lɛ, etsɔɔ nii yɛ kpeehe ni yɔɔ jɛmɛ lɛ. Be ni Yesu bɔi nitsɔɔmɔ lɛ, mɛi lɛ anaa kpɛ amɛhe yɛ ewiemɔ lɛ hewɔ, shi sɛɛ mli lɛ enitsɔɔmɔ lɛ wo amɛmli la, ni amɛka akɛ amɛbaagbe lɛ. Amrɔ nɛɛ, Yesu miitao eye ebua mɛi ni yɔɔ he ni ehi tsutsu lɛ ekoŋŋ.

Yɛ Hejɔɔmɔ Gbi lɛ nɔ lɛ, eku esɛɛ etee kpeehe lɛ koni eyatsɔɔ nii. Mɛi pii ahe jɔ̃ amɛhe, ni amɛbi po akɛ: “Nɛgbɛ nuu nɛɛ ná hiɛshikamɔ kɛ hewalɛ nitsumɔi nɛɛ kɛjɛ?” Amɛkɛɛ akɛ: “Ani jeee kapintafonyo lɛ bi lɛ nɛ? Ani jeee enyɛ atsɛɔ lɛ Maria, ni enyɛmimɛi hii lɛ hu atsɛɔ amɛ Yakobo kɛ Yosef kɛ Simon kɛ Yuda lɛ? Ni enyɛmimɛi yei lɛ, ani jeee amɛ fɛɛ amɛkɛ wɔ yɔɔ? Belɛ, nɛgbɛ nuu nɛɛ ná nii nɛɛ fɛɛ kɛjɛ mɔ?”Mateo 13:54-56.

Amɛna Yesu akɛ amɛkutsoŋnyo ko kɛkɛ. Amɛshwie amɛyiŋ akɛ, ‘wɔle egbekɛbiiashi, no hewɔ lɛ, te eeefee tɛŋŋ ní efee Mesia lɛ?’ Enɛ hewɔ lɛ, yɛ odaseyelii lɛ—ni ekomɛi ji hiɛshikamɔ kpele ni Yesu yɔɔ kɛ hewalɛ nitsumɔi ni etsuɔ lɛ—fɛɛ sɛɛ lɛ, amɛkpoo lɛ. Akɛni Yesu wekumɛi lɛ le lɛ hewɔ lɛ, amɛ po amɛnane tɔ̃tɔ yɛ ehewɔ, ni no hã ewie akɛ: “Awoɔ gbalɔ hiɛ nyam yɛ he fɛɛ he, ja emaŋ kɛ lɛ diɛŋtsɛ eshĩa kɛkɛ.”Mateo 13:57.

Anɔkwa, Yesu naa kpɛ ehe yɛ hemɔkɛyeli ni amɛbɛ lɛ hewɔ. No hewɔ lɛ, efeee naakpɛɛ nii ko kwraa yɛ jɛmɛ, “fe akɛ ekɛ eniji ŋmɛlɛ helatsɛmɛi fioo komɛi anɔ, ni etsa amɛ.”Marko 6:5, 6.