Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu​—Gbɛ lɛ, Anɔkwale lɛ, Wala Lɛ

 YITSO 31

Amɛkpɔlɔ Ŋmaa yɛ Hejɔɔmɔ Gbi lɛ Nɔ

Amɛkpɔlɔ Ŋmaa yɛ Hejɔɔmɔ Gbi lɛ Nɔ

MATEO 12:1-8 MARKO 2:23-28 LUKA 6:1-5

  • KASELƆI LƐ KPƆLƆ ŊMAA YƐ HEJƆƆMƆ GBI LƐ NƆ

  • YESU JI “HEJƆƆMƆ GBI LƐ NUŊTSƆ”

Agbɛnɛ lɛ, Yesu kɛ ekaselɔi lɛ wó amɛhiɛ amɛwo kooyigbɛ kɛmiiya Galilea. Be nɛɛ ji March loo April, ni ŋmaa yɛ ŋmaa tsei lɛ ahe yɛ ŋmɔji lɛ amli. Akɛni hɔmɔ miiye kaselɔi lɛ hewɔ lɛ, amɛkpɔlɔ ŋmaa lɛ eko ni amɛye. Shi gbi nɛɛ ji Hejɔɔmɔ Gbi, ni Farisifoi lɛ na nɔ ni amɛfee lɛ.

Kaimɔ akɛ, etsɛko tsɔ nɛ ni Yudafoi komɛi ni yɔɔ Yerusalem lɛ ka akɛ amɛbaagbe Yesu, ni amɛkɛ sane fɔ̃ enɔ akɛ eebule Hejɔɔmɔ Gbi lɛ. Amrɔ nɛɛ, Farisifoi lɛ kɛ sane miifɔ̃ enɔ yɛ nɔ ni kaselɔi lɛ fee lɛ hewɔ. Amɛwie akɛ: “Naa! Okaselɔi lɛ miifee nɔ ni mla eŋmɛɛɛ gbɛ akɛ afeɔ yɛ Hejɔɔmɔ Gbi lɛ nɔ.”​—Mateo 12:2.

Farisifoi lɛ tsɔɔ mli akɛ, kɛ́ mɔ ko kpɔlɔ ŋmaa ni ekposa yɛ edɛŋ ni ekpe lɛ, belɛ eekpa ŋmaa ni eegbee ŋmaa. (2 Mose 34:21) Bɔ ni amɛfee kpɛŋŋ yɛ nɔ ni kɛ́ mɔ ko fee lɛ etsɔɔ akɛ eetsu nii lɛ hã Hejɔɔmɔ Gbi lɛ yeli bafee tamɔ jatsu, tsɛ ato gbi nɛɛ koni efee miishɛɛ nɔ, ní amɛkɛwaje amɛ kɛ Yehowa teŋ wekukpaa lɛ. Yesu hã nɔkwɛmɔnii ni tsɔɔ akɛ, ejeee Yehowa Nyɔŋmɔ yiŋtoo akɛ akɛ Hejɔɔmɔ Gbi lɛ he mla lɛ atsu nii yɛ nakai gbɛ nɔ, ni ekɛtswa amɛsusumɔ ni ejaaa lɛ efɔ̃.

Nɔkwɛmɔnɔ kome ni Yesu gba lɛ kɔɔ David kɛ ehii lɛ ahe. Be ni hɔmɔ miiye amɛ lɛ, amɛtee kpeebuu lɛ mli ni amɛyaye aboloi ni akɛmaa Nyɔŋmɔ hiɛ lɛ. Ajieɔ aboloi nɛɛ yɛ Yehowa hiɛ ni akɛ ehee yeɔ najiaŋ, ni osɔfoi lɛ pɛ ji mɛi ni yeɔ aboloi ni ajie nɛɛ. Shi kɛ̃lɛ, yɛ shihilɛ ni David kɛ ehii lɛ yaje mli lɛ hewɔ lɛ, abuuu amɛ fɔ akɛ amɛye nakai aboloi lɛ.​—3 Mose 24:5-9; 1 Samuel 21:2-7.

 Yɛ nɔkwɛmɔnɔ ni ji enyɔ lɛ mli lɛ, Yesu wie akɛ: “Nyɛkaneko yɛ Mla lɛ mli akɛ Hejɔɔmɔ Gbii lɛ anɔ lɛ, osɔfoi ni yɔɔ sɔlemɔwe lɛ buleɔ Hejɔɔmɔ Gbi lɛ, ni kɛ̃lɛ amɛyeee fɔ?” Nɔ ni Yesu tsɔɔ lɛ ji akɛ, yɛ Hejɔɔmɔ Gbi lɛ nɔ po lɛ, osɔfoi lɛ gbeɔ kooloi kɛshãa afɔle ni amɛtsuɔ nibii krokomɛi hu yɛ sɔlemɔwe lɛ. Yesu kɛɛ akɛ: “Shi miikɛɛ nyɛ akɛ nɔ ko ni fe sɔlemɔwe lɛ yɛ biɛ.”​—Mateo 12:5, 6; 4 Mose 28:9.

Yesu kɛ Ŋmalɛi lɛ tsu nii ekoŋŋ kɛma esane lɛ nɔ mi akɛ: “Eji nyɛnu wiemɔ ni ji, ‘Mɔbɔnalɛ mitaoɔ shi jeee afɔle’ lɛ shishi kulɛ, nyɛbuŋ mɛi ni yeee fɔ lɛ afɔ.” Emu naa akɛ: “Ejaakɛ gbɔmɔ Bi lɛ ji Hejɔɔmɔ Gbi lɛ Nuŋtsɔ.” Yesu miiwie be ni ebaaye nɔ akɛ Maŋtsɛ afii akpe, ní ekɛ toiŋjɔlɛ baaba lɛ he.​—Mateo 12:7, 8; Hoshea 6:6.

Kɛjɛ teteete lɛ, Satan eye adesai nyɔŋ dɛŋdɛŋ, ni yiwalɛ nifeemɔi kɛ tai ni yaa nɔ faa lɛ ehã amɛmiina nɔ babaoo. Kwɛ bɔ ni nibii baatsake kwraa be ni Kristo yeɔ nɔ yɛ Hejɔɔmɔ Gbi wulu lɛ mli lɛ! Kristo baahã wɔnine ashɛ hejɔɔmɔ ni he hiaa wɔ ni wɔshweɔ lɛ nɔ.