Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 51

Agbe Gbɔmɔ yɛ Fɔmɔ Gbiyeli Okpɔlɔŋmɛɛ ko Shishi

Agbe Gbɔmɔ yɛ Fɔmɔ Gbiyeli Okpɔlɔŋmɛɛ ko Shishi

MATEO 14:1-12 MARKO 6:14-29 LUKA 9:7-9

  • HERODE HÃ AFO YOHANE BAPTISILƆ LƐ YITSO

Yesu bɔfoi lɛ miishiɛ yɛ Galilea, shi yɛ nakai beiaŋ lɛ, Yohane, mɔ ni jie Yesu shi etsɔɔ lɛ bɛ heyeli ni tamɔ nakai. Aaafee afii enyɔ eho, shi Yohane Baptisilɔ lɛ yɛ tsuŋwoo mli lolo.

No mli lɛ, Yohane ewie faŋŋ akɛ, ejaaa akɛ Maŋtsɛ Herode Antipa baaŋɔ enyɛmi nuu Filipo ŋa Herodia akɛ eŋa. Herode shwie e-klɛŋklɛŋ ŋa lɛ ni ekɛ Herodia bote gbãla mli. Mose Mla lɛ, ní Herode kɛɔ akɛ eyeɔ nɔ lɛ, eŋmɛɛɛ gbãla ni tamɔ nɛkɛ gbɛ, ni eji gbalafitemɔ hu. Akɛni Yohane kune loo ejaje Herode hewɔ lɛ, Herode hã awo lɛ tsuŋ, ekolɛ Herodia ni wo eyiŋ ni efee nakai.

Herode leee nɔ kwraa ni ebaafee Yohane, ejaakɛ mɛi lɛ ‘buɔ lɛ gbalɔ.’ (Mateo 14:5) Shi Herodia lɛ, ele nɔ tuuntu ni etaoɔ ni afee Yohane. Herodia “bɛ lɛ ewo emli,” ni anɔkwa, be fɛɛ be lɛ eetao ni agbe lɛ. (Marko 6:19) Naagbee lɛ, hegbɛ lɛ ba.

Be ni eshwɛ fioo ni abaaye afi 32 Ŋ.B. Hehoo lɛ, Herode ŋmɛ okpɔlɔ wulu ko kɛhã efɔmɔ gbiyeli. Herode abladei kɛ tatsɛmɛi lɛ, kɛ agbɛnɛ hu Galilea hiɛnaanɔbii lɛ fɛɛ ba okpɔlɔŋmɛɛ lɛ shishi. Be ni okpɔlɔŋmɛɛ lɛ yaa nɔ lɛ, Herodia biyoo fioo ni ekɛ etsutsu wu Filipo fɔ, ni atsɛɔ lɛ Salome lɛ, ba ebajo etsɔɔ gbɔi lɛ. Hii lɛ nya ejoo lɛ he waa.

Akɛni Herode banuma lɛ joo lɛ sa ehiɛ waa hewɔ lɛ, ekɛɛ lɛ akɛ: “Bi mi nɔ fɛɛ nɔ ni otaoɔ, ni mahã bo.” Ekã kitã po akɛ: “Nɔ fɛɛ nɔ ni obaabi mi lɛ, mahã bo, kɛ́ mimaŋtsɛyeli lɛ fã tete.” Dani Salome baawie nɔ ko lɛ, eje kpo ni eyabi enyɛ akɛ: “Mɛni mibi?”Marko 6:22-24.

Hegbɛ ni Herodia etao aahu lɛ nɛ! Ehã hetoo oya nɔŋŋ akɛ: “Yohane Baptisilɔ lɛ yitso.” Amrɔ lɛ, Salome ku esɛɛ etee Herode ŋɔɔ eyakɛɛ lɛ akɛ: “Miisumɔ ni oŋɔ Yohane Baptisilɔ lɛ yitso ofɔ̃ kã mli ohã mi bianɛ nɔŋŋ.”Marko 6:24, 25.

Enɛ gba Herode naa waa, shi egbɔi lɛ nu kitã ni ekã Salome lɛ. Esa akɛ etsu he nii, kɛ́ no baabi ni egbe mɔ ko ni efeko efɔŋ ko po, kɛjeee nakai lɛ, ehiɛ baashwie shi. No hewɔ lɛ, Herode tsu bulɔ ko kɛtee tsuŋwoohe lɛ kɛ famɔi ni yɔɔ gbeyei. Etsɛɛɛ ni bulɔ lɛ ku esɛɛ eba kɛ Yohane yitso ni kã kã mli. Ekɛhã Salome, ni lɛ hu ekɛyahã enyɛ.

Be ni Yohane kaselɔi lɛ nu nɔ ni eba lɛ, amɛba amɛbawó egbonyo lɛ ni amɛyafu. No sɛɛ lɛ, amɛyabɔ Yesu amaniɛ.

Sɛɛ mli be ni Herode nu akɛ Yesu miitsa mɛi ni eefãmɔ daimonioi lɛ, gbeyei mɔ lɛ. Eleee kɛji nuu ni feɔ nibii nɛɛ, ni ji Yesu lɛ, nɔŋŋ ji Yohane Baptisilɔ lɛ ni amrɔ nɛɛ ‘atee lɛ shi kɛjɛ gbohii ateŋ’ lɛ. (Luka 9:7) No hewɔ lɛ, Herode Antipa miishwe waa ní ena Yesu. Ekã shi faŋŋ akɛ, jeee Yesu shiɛmɔ lɛ toi etaoɔ ebo. Moŋ lɛ, Herode miitao ena Yesu koni ekwɛ akɛ bɔ ni esusuɔ lɛ, nakai ni loo jeee nakai.

Ekrokromɛi Hu Nɛ

Fĩ Anɔkwa Jamɔ Sɛɛ

Mɛɛ naagbai obaanyɛ okɛkpe be ni ogbaa mɛi krokomɛi ohemɔkɛyeli lɛ he sane? Mɛɛ gbɛ nɔ obaatsɔ ofee nakai ní owoŋ amɛmli la?