Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 62

Heshibaa He Nikasemɔ ni He Hiaa

Heshibaa He Nikasemɔ ni He Hiaa

MATEO 17:22–18:5 MARKO 9:30-37 LUKA 9:43-48

  • YESU TSƆ HIƐ EGBA EGBELE KƐ ESHITEE LƐ EKOŊŊ

  • EKƐ SHIKA NI AJIE YƐ LOO DAAŊ LƐ WO TOO

  • NAMƆ BAAFEE AGBO FE FƐƐ YƐ MAŊTSƐYELI LƐ MLI?

Be ni Yesu tsake yɛ gɔŋ ko nɔ, ni agbɛnɛ hu etsa gbekɛ nuu ko ni yɔɔ daimonio lɛ yɛ kpokpaa ni ji Kaisarea Filipi lɛ nɔ lɛ sɛɛ lɛ, ewó Kapernaum gbɛ etere. Ekɛ ekaselɔi lɛ pɛ fã gbɛ nɛɛ ejaakɛ esumɔɔɔ ni asafoku lɛ “ale.” (Marko 9:30) Enɛ hã ená hegbɛ kroko ni ekɛbaasaa ekaselɔi lɛ eto egbele lɛ kɛ nitsumɔ ni amɛbaatsu lɛ. Egbala mli etsɔɔ amɛ akɛ: “Abaajie gbɔmɔ Bi lɛ awo gbɔmɛi adɛŋ, ni amɛbaagbe lɛ, ni yɛ gbi ni ji gbi etɛ lɛ nɔ lɛ, abaatee lɛ shi.”Mateo 17:22, 23.

Esaaa akɛ ekaselɔi lɛ naa enɛ akɛ sane hee. Mra mli lɛ, Yesu ewie akɛ abaagbe lɛ, eyɛ mli akɛ Petro heee yeee akɛ nakai nɔ ko baaba Yesu nɔ moŋ. (Mateo 16:21, 22) No sɛɛ lɛ, bɔfoi etɛ lɛ na Yesu tsakemɔ lɛ, ni amɛnu sanegbaa ni kɔɔ Yesu ‘shimɔ kɛyaa’ lɛ he lɛ. (Luka 9:31) Eyɛ mli akɛ Yesu sɛɛnyiɛlɔi lɛ nuuu nɔ ni ewie lɛ shishi jogbaŋŋ moŋ, shi no hã “amɛwerɛ ho amɛhe waa.” (Mateo 17:23) Fɛɛ sɛɛ lɛ, amɛshe gbeyei akɛ amɛbaabi lɛ sane ko yɛ he.

Sɛɛ mli lɛ amɛyashɛ Kapernaum, he titri ni Yesu jɛɔ etsuɔ esɔɔmɔ nitsumɔ lɛ yɛ lɛ, ni bɔfoi lɛ ateŋ mɛi babaoo hu jɛ jɛmɛ. Jɛmɛ ji he ni hii ni heɔ sɔlemɔwe too lɛ ba Petro ŋɔɔ yɛ. Eeenyɛ efee akɛ akɛni amɛmiitao amɛkɛ sane afɔ̃ Yesu nɔ akɛ ewooo too hewɔ lɛ, amɛbi Petro akɛ: “Ani nyɛtsɔɔlɔ lɛ wooo drakmai enyɔ [sɔlemɔwe] too lɛ?”Mateo 17:24.

Petro hã hetoo akɛ: “Ewoɔ.” Be ni amɛshɛ shĩa lɛ, no mli lɛ, Yesu le nɔ ni etee nɔ lɛ momo. No hewɔ lɛ, nɔ najiaŋ ni Yesu baamɛ ni Petro abɔ lɛ amaniɛ lɛ, ebi lɛ akɛ: “Te osusuɔ tɛŋŋ, Simon? Namɛi adɛŋ shikpɔŋ lɛ nɔ maŋtsɛmɛi lɛ heɔ too loo yi too kɛjɛɔ? Yɛ amɛ diɛŋtsɛ amɛbii lɛ adɛŋ loo mɛikpɔji adɛŋ?” Petro hã hetoo akɛ: “Yɛ mɛikpɔji lɛ adɛŋ.” Ni Yesu kɛɛ lɛ akɛ: “Belɛ, yɛ anɔkwale mli lɛ, esaaa akɛ bii lɛ woɔ too.”Mateo 17:25, 26.

Yesu Tsɛ ji jeŋ muu lɛ fɛɛ Maŋtsɛ, ni lɛ ji mɔ ni ajáa yɛ sɔlemɔwe lɛ. No hewɔ lɛ, yɛ mla naa lɛ esaaa akɛ Nyɔŋmɔ Bi lɛ woɔ sɔlemɔwe too lɛ. Yesu kɛɛ akɛ: “Shi bɔ ni afee ni wɔkatɔ̃tɔ amɛnane lɛ, yaa ŋshɔ lɛ naa oyafɔ̃ kpoŋ, ni loo klɛŋklɛŋ ni baabakɔ kpoŋ lɛ, shá lɛ, ni kɛ́ ogbɛ edaaŋ lɛ, obaana jwiɛtɛi shika [stata kapɛlɛ, loo drakmai ejwɛ]. Ŋɔɔ ni okɛhã amɛ kɛhã mi kɛ bo fɛɛ.”Mateo 17:27.

Etsɛɛɛ ni kaselɔi lɛ bua amɛhe naa, ni amɛbi Yesu akɛ: “Belɛ namɔ ji agbo fe fɛɛ yɛ ŋwɛi Maŋtsɛyeli lɛ mli?” (Mateo 18:1) Hii nɛɛ nɔŋŋ ni etsɛko tsɔ lɛ amɛmiishe gbeyei akɛ amɛbaabi Yesu egbele lɛ he sane lɛ, amrɔ nɛɛ amɛsheee gbeyei akɛ amɛbaabi lɛ amɛwɔsɛɛ he sane. Yesu le nɔ hewɔ ni amɛbi sane lɛ. Amɛje ŋwane yɛ nakai sane lɛ he be ni amɛnyiɛ gbɛ kɛbaa Kapernaum ni amɛnyiɛ esɛɛ lɛ. No hewɔ lɛ, ebi amɛ akɛ: “Mɛni he ŋwane nyɛjeɔ yɛ gbɛ lɛ nɔ lɛ?” (Marko 9:33) Akɛni amɛhiɛ egboi hewɔ lɛ, amɛtswaaa amɛsɛŋ ejaakɛ amɛje ŋwane yɛ mɔ ni ji agbo fe fɛɛ yɛ amɛteŋ lɛ he.

Eyɛ naakpɛɛ waa akɛ be ni kaselɔi lɛ kɛ Yesu enyiɛ aaafee afii etɛ ni amɛbo ewiemɔ toi ni amɛna enifeemɔi fɛɛ sɛɛ lɛ, amɛje ŋwane ni tamɔ nɛkɛ yɛ amɛteŋ. Shi anɔkwa sane lɛ ji akɛ, amɛyeee emuu. Kɛfata he lɛ, yɛ jamɔ ni atsɔse amɛ yɛ mli lɛ mli lɛ, agbalaa jwɛŋmɔ kɛyaa gbɛhe kɛ hegbɛ ni mɔ ko yɔɔ lɛ nɔ waa. Agbɛnɛ hu, etsɛko tsɔ ni Yesu wo Petro shi akɛ ebaaŋɔ Maŋtsɛyeli lɛ naa “samfei” komɛi ehã lɛ. Ani eeenyɛ efee akɛ no hã enu he akɛ enɔ kwɔ fe kaselɔi krokomɛi lɛ? Ekolɛ Yakobo kɛ Yohane hu nu he nakai nɔŋŋ akɛni amɛkɛ amɛhiŋmɛii na Yesu tsakemɔ lɛ hewɔ.

Bɔ fɛɛ bɔ ni sane lɛ ji lɛ, Yesu fee nɔ ko kɛjaje su ni amɛjie lɛ kpo lɛ. Etsɛ gbekɛ bibioo ko kɛba eŋɔɔ, ni ekɛ lɛ damɔ kaselɔi lɛ ateŋ, ni ekɛɛ amɛ akɛ: “Kɛ́ nyɛtsakeee ní nyɛtsɔmɔ tamɔ gbekɛbii bibii lɛ, nyɛboteŋ ŋwɛi Maŋtsɛyeli lɛ mli kɔkɔɔkɔ. Belɛ, mɔ fɛɛ mɔ ni baaba ehe shi tamɔ gbekɛ bibioo nɛɛ, lɛ ji agbo fe fɛɛ yɛ ŋwɛi Maŋtsɛyeli lɛ mli; ni mɔ fɛɛ mɔ ni hereɔ gbekɛ bibioo tamɔ nɛkɛ yɛ migbɛ́i mli lɛ, hereɔ mi hu.”Mateo 18:3-5.

Gbɛ ni Yesu tsɔ nɔ etsɔɔ amɛ nii lɛ nɔ bɛ kwraa! Yesu mli fuuu ekaselɔi lɛ, ni etsɛɛɛ amɛ amimyelɔi loo hiɛkɔlɔi hu. Moŋ lɛ, ekɛ nɔ ko fee nɔkwɛmɔnɔ koni amɛkase nii kɛjɛ mli. Gbekɛbii bibii jeee anunyam gbɔmɛi loo hiɛnaanɔbii. No hewɔ lɛ, Yesu miitsɔɔ akɛ esa akɛ ekaselɔi lɛ ana amɛhe yɛ nakai gbɛ nɔ. Kɛkɛ ni Yesu mu nikasemɔ ni yɔɔ nɔkwɛmɔnɔ lɛ mli kɛhã esɛɛnyiɛlɔi lɛ naa ekɛɛ: “Mɔ fɛɛ mɔ ni feɔ enii akɛ mɔ ni baa shi yɛ nyɛ fɛɛ nyɛteŋ lɛ, lɛ ji agbo.”Luka 9:48.