Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 18

Yesu Tee Nɔ Eshwere Shi Yohane nɔ Gbɔ

Yesu Tee Nɔ Eshwere Shi Yohane nɔ Gbɔ

MATEO 4:12 MARKO 6:17-20 LUKA 3:19, 20 YOHANE 3:22–4:3

  • YESU KASELƆI LƐ BAPTISI MƐI

  • AWO YOHANE BAPTISILƆ LƐ TSUŊ

Be ni Yesu kɛ ekaselɔi lɛ eyaye Hehoo lɛ yɛ afi 30 Ŋ.B. March loo April sɛɛ lɛ, amɛshi Yerusalem. Shi amɛkuuu amɛsɛɛ kɛyaaa amɛshĩai tɛ̃ɛ yɛ Galilea. Amɛtee Yudea kpokpaa lɛ nɔ, ni amɛbaptisi mɛi babaoo yɛ jɛmɛ. Yohane Baptisilɔ lɛ hu miitsu nitsumɔ ko ni tamɔ nakai nɔŋŋ, ni etee nɔ efee nakai aaafee afi nɛ, ni ekaselɔi lɛ ateŋ mɛi komɛi kɛ lɛ yɛ lolo, ekolɛ yɛ Yordan Faa lɛ jɔɔ lɛ mli.

Yesu diɛŋtsɛ ebaptisiii mɛi, shi moŋ ekaselɔi lɛ ji mɛi ni feɔ nakai yɛ egbɛtsɔɔmɔ naa. Nɛkɛ beiaŋ lɛ, Yesu kɛ Yohane fɛɛ miitsɔɔ Yudafoi lɛ ateŋ mɛi ni etsake amɛtsui yɛ esha ni amɛfee amɛshi Nyɔŋmɔ Mla kpaŋmɔ lɛ hewɔ lɛ nii.Bɔfoi 19:4.

Shi Yohane kaselɔi lɛ ye Yesu he awuŋa, ni amɛyawie ehe amɛtsɔɔ Yohane akɛ: ‘Yesu ni no mli lɛ ekɛ bo yɔɔ lɛ miibaptisi, ni mɛi fɛɛ miiya eŋɔɔ.’ (Yohane 3:26) Kɛ̃lɛ, Yohane yeee awuŋa. Ená miishɛɛ waa akɛ Yesu miiye omanye, ni eesumɔ ni ekaselɔi lɛ hu aná miishɛɛ. Yohane kai amɛ akɛ: “Nyɛ diɛŋtsɛ nyɛyeɔ mi odase akɛ mikɛɛ akɛ, ‘Jeee miji Kristo lɛ, shi moŋ, atsu mi kɛtsɔ nakai mɔ lɛ hiɛ.’” Egba amɛ nɔkwɛmɔnɔ ko ni baahã amɛ fɛɛ amɛnu sane nɛɛ shishi faŋŋ akɛ: “Mɔ fɛɛ mɔ ni hiɛ ayemforo lɛ ji ayemforo wu lɛ. Shi ayemforo wu lɛ naanyo lɛ, kɛ́ edamɔ shi ni enu ehe lɛ, emii shɛɔ ehe naakpa yɛ ayemforo wu lɛ gbee lɛ hewɔ. No hewɔ lɛ, mimiishɛɛ lɛ eyi obɔ.”Yohane 3:28, 29.

Taakɛ ayemforo wu lɛ naanyo lɛ ji lɛ, nyɔji komɛi ni tsɔ be nɛɛ hiɛ lɛ, Yohane mii shɛ ehe waa be ni ejie Yesu shi etsɔɔ ekaselɔi lɛ. Amɛteŋ mɛi komɛi nyiɛ Yesu sɛɛ, ni sɛɛ mli lɛ akɛ mumɔ krɔŋkrɔŋ lɛ baafɔ amɛ mu. Yohane miisumɔ ni ekaselɔi ni kɛ lɛ yɔɔ amrɔ nɛɛ hu anyiɛ Yesu sɛɛ. Anɔkwa, Yohane yiŋtoo ji, ni esaa gbɛ lɛ eto Kristo sɔɔmɔ nitsumɔ lɛ. Yohane tsɔɔ mli akɛ: “Esa akɛ nakai mɔ lɛ aya nɔ ashwere, shi mi lɛ, esa akɛ minɔ aya nɔ agbɔ.”Yohane 3:30.

Sɛɛ mli lɛ, Yohane kroko, mɔ ni tsɔ Yesu sɛɛnyiɛlɔ mra mli lɛ, ŋma he ni Yesu jɛ kɛ nɔ ni etsuɔ kɛhã adesai ayiwalaheremɔ lɛ he sane akɛ: “Mɔ ni jɛ ŋwɛi ba lɛ, efe mɛi krokomɛi fɛɛ. . . . Tsɛ lɛ sumɔɔ Bi lɛ ni eŋɔ nibii fɛɛ ewo edɛŋ. Mɔ ni jieɔ hemɔkɛyeli kpo yɛ Bi lɛ mli lɛ yɛ naanɔ wala; mɔ ni gboɔ Bi lɛ nɔ toi lɛ, enáŋ wala, shi moŋ Nyɔŋmɔ mlifu hiɔ enɔ.” (Yohane 3:31, 35, 36) Mɛɛ anɔkwale ni he hiaa ni esa akɛ mɛi ale po nɛ!

Be ni Yohane Baptisilɔ lɛ wie akɛ esa akɛ gbɛnaa ni ehiɛ kɛ enitsumɔ lɛ nɔ agbɔ lɛ sɛɛ etsɛɛɛ lɛ, Maŋtsɛ Herode hã amɔ lɛ. No mli lɛ, Herode kɛ enyɛmi nuu Filipo ŋa Herodia ebote gbãla mli. Akɛni Yohane kpa Herode gbalafitemɔ nifeemɔ lɛ he mama hewɔ lɛ, Herode hã awo lɛ tsuŋ. Be ni Yesu nu akɛ amɔ Yohane lɛ, ekɛ ekaselɔi lɛ shi Yudea ni ‘amɛtee Galilea.’Mateo 4:12; Marko 1:14.