Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu​—Gbɛ lɛ, Anɔkwale lɛ, Wala Lɛ

 YITSO 17

Etsɔɔ Nikodemo Nii

Etsɔɔ Nikodemo Nii

YOHANE 2:23–3:21

  • YESU KƐ NIKODEMO GBA SANE

  • NƆ NI FƆ NI ‘AAAFƆ MƆ KO EKOŊŊ’ LƐ TSƆƆ

Be ni Yesu yɔɔ Yerusalem kɛhã afi 30 Ŋ.B. Hehoo lɛ yeli lɛ, efee okadii, loo naakpɛɛ nii ni sa kadimɔ waa. Enɛ hã mɛi babaoo ná hemɔkɛyeli yɛ emli. Farisifonyo ko ni atsɛɔ lɛ Nikodemo, ní eji Yudafoi lɛ asaneyelihe wulu ni atsɛɔ lɛ Sanhedrin lɛ mli nyo lɛ, ná nɔ ni Yesu fee lɛ he miishɛɛ waa. Akɛni eetao ele nibii krokomɛi hu hewɔ lɛ, etee Yesu ŋɔɔ nyɔɔŋ, ekolɛ yɛ gbeyei ni esheɔ akɛ kɛji ana lɛ lɛ, bulɛ ni Yudafoi lɛ ahiɛnyiɛlɔi krokomɛi lɛ yɔɔ kɛhã lɛ lɛ baatã lɛ hewɔ.

Nikodemo kɛɛ lɛ akɛ: “Rabi, wɔle akɛ tsɔɔlɔ ni jɛ Nyɔŋmɔ ŋɔɔ ba ji bo, ejaakɛ mɔ ko mɔ ko nyɛŋ afee okadii ni ofeɔ nɛɛ ja Nyɔŋmɔ kɛ lɛ yɛ.” Yesu here Nikodemo nɔ akɛ, kɛji “afɔɔɔ mɔ ko ekoŋŋ” lɛ, enyɛŋ Nyɔŋmɔ Maŋtsɛyeli lɛ mli ebote.​—Yohane 3:2, 3.

Shi, te aaafee tɛŋŋ afɔ mɔ ko ekoŋŋ lɛ? Nikodemo bi lɛ akɛ: “Enyɛŋ ebote enyɛ musu mli nɔ ni ji shii enyɔ nɔ ni afɔ lɛ, aloo jeee nakai?”​—Yohane 3:4.

Dabi, jeee nakai fɔ ni aaafɔ mɔ ko ekoŋŋ lɛ tsɔɔ. Yesu tsɔɔ mli akɛ: “Kɛji ajɛɛɛ nu kɛ mumɔ mli afɔɔɔ mɔ ko lɛ, enyɛŋ ebote Nyɔŋmɔ Maŋtsɛyeli lɛ mli.” (Yohane 3:5) ‘Ajɛ nu kɛ mumɔ mli’ afɔ Yesu, be ni abaptisi lɛ ní mumɔ krɔŋkrɔŋ lɛ kpeleke shi kɛba enɔ lɛ. Nakai be lɛ mli lɛ, gbee ko jɛ ŋwɛi kɛɛ akɛ: “Mɔ nɛ ji mi-Bi ni misumɔɔ lɛ lɛ, mɔ ni mikpɛlɛ enɔ lɛ.” (Mateo 3:16, 17) Nyɔŋmɔ tsɔ gbɛ nɛɛ nɔ ehã ale akɛ, efɔ Yesu akɛ mumɔŋ bi ni baanyɛ abote ŋwɛi Maŋtsɛyeli lɛ mli. Sɛɛ mli​—yɛ afi 33 Ŋ.B. Pentekoste Gbi lɛ nɔ lɛ​—abaafɔse mumɔ krɔŋkrɔŋ lɛ ashwie mɛi krokomɛi ni abaabaptisi lɛ anɔ, ni no baatsɔɔ akɛ afɔ amɛ ekoŋŋ akɛ Nyɔŋmɔ mumɔŋ bii.​—Bɔfoi 2:1-4.

Ewa kɛhã Nikodemo akɛ ebaanu nɔ ni Yesu tsɔɔ lɛ yɛ Maŋtsɛyeli lɛ he lɛ shishi. No hewɔ lɛ, Yesu tsɔɔ lɛ nibii krokomɛi ni kɔɔ nitsumɔ krɛdɛɛ ni etsuɔ akɛ Nyɔŋmɔ Bi ni ji adesa lɛ he. Yesu kɛɛ lɛ akɛ: “Bɔ ni Mose wó onufu lɛ nɔ yɛ ŋa lɛ nɔ lɛ, nakai nɔŋŋ esa akɛ awó gbɔmɔ Bi lɛ nɔ koni mɔ fɛɛ mɔ ni heɔ enɔ yeɔ lɛ, aná naanɔ wala.”​—Yohane 3:14, 15.

Yɛ blema lɛ, ehe bahia ni Israelbii ni onufui ni ebɔɔ yɔɔ amɛmli lɛ kɔ̃mɔ amɛ lɛ akwɛ akɔɔble onufu lɛ koni amɛyi aná wala. (4 Mose 21:9) Nakai nɔŋŋ esa akɛ adesai fɛɛ ajie hemɔkɛyeli kpo yɛ Nyɔŋmɔ Bi lɛ mli, bɔ ni afee ni ahere amɛyiwala kɛjɛ gbele mli, ni amɛná naanɔ wala. Agbɛnɛ, Yesu ma suɔmɔ mli ni Yehowa jɛɔ etsuɔ enɛ he nii lɛ nɔ mi ehã Nikodemo akɛ: “Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala.” (Yohane 3:16) No hewɔ lɛ, be ni Yesu je esɔɔmɔ nitsumɔ lɛ shishi sɛɛ aaafee nyɔji ekpaa, ní eyɔɔ Yerusalem lɛ, ehã efee faŋŋ akɛ, lɛ enɔ abaatsɔ ahere adesai ayiwala.

Yesu kɛɛ Nikodemo akɛ: “Nyɔŋmɔ tsuuu e-Bi lɛ kɛbaaa je lɛ mli koni ebakojo je lɛ.” Enɛ tsɔɔ akɛ, atsuuu lɛ kɛbaaa ni ebakojo adesai yɛ gbɛ ni esaaa nɔ, ní ehã akpãtã amɛ fɛɛ amɛhiɛ. Moŋ lɛ, Yesu kɛɛ atsu lɛ “koni atsɔ enɔ ahere je lɛ yiwala.”​—Yohane 3:17.

Gbeyeishemɔ hewɔ Nikodemo ju shi eba Yesu ŋɔɔ nyɔɔŋ lɛ. No hewɔ lɛ, esa kadimɔ waa akɛ Yesu mu amɛsanegbaa lɛ naa kɛ wiemɔi nɛɛ akɛ: “Agbɛnɛ, enɛ ji nɔdaamɔnɔ kɛhã kojomɔ: akɛ la lɛ eba je lɛ mli, shi gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ, efɔji ni. Ejaakɛ mɔ fɛɛ mɔ ni tsuɔ nihiinii lɛ, enyɛɔ la lɛ ni  ebaaa la lɛ he, koni akakune enitsumɔi lɛ. Shi mɔ fɛɛ mɔ ni feɔ nii ni ji anɔkwale lɛ baa la lɛ he, koni enitsumɔi lɛ aje kpo faŋŋ akɛ nitsumɔi ni kɛ Nyɔŋmɔ suɔmɔnaa nii kpãa gbee.”​—Yohane 3:19-21.

Amrɔ nɛɛ, nɔ ni shwɛɔ Nikodemo, ni ji Farisifonyo kɛ Israel tsɔɔlɔ lɛ ji, ní esusu nɔ ni enu yɛ nɔ ni Yesu tsuɔ koni Nyɔŋmɔ yiŋtoo aba mli lɛ he.

Ekrokomɛi Hu Nɛ

BUU-MƆƆ

Nɔ ni Nyɔŋmɔ Efee Eha Bo

Ŋmalɛ naa shishitoo mla ni ji “akɛ wala atse wala” lɛ yeɔ ebuaa wɔ ni wɔnuɔ nɔ hewɔ ni Nyɔŋmɔ ‘ŋɔ e-Bi koome lɛ eha’ lɛ shishi.

BUU-MƆƆ

Yesu Gbele kɛ Eshitee—Bɔ ni Ehe Yɔɔ Sɛɛnamɔ Kɛhã Bo

Biblia mli anɔkwalei ekpaa ni tsɔɔ bɔ ni mɔ kome gbele baanyɛ ahã mɛi babaoo aná wala.