Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 16

Yesu Tsɔɔ akɛ Ehiɛ Dɔɔ Anɔkwa Jamɔ He

Yesu Tsɔɔ akɛ Ehiɛ Dɔɔ Anɔkwa Jamɔ He

YOHANE 2:12-22

  • YESU HÃ SƆLEMƆWE LƐ TSE

Yɛ yookpeemɔ ni tee nɔ yɛ Kana lɛ sɛɛ lɛ, Yesu yiŋ etee Kapernaum. Yesu nyɛ kɛ enyɛmimɛi hii—Yakobo, Yosef, Simon, kɛ Yuda—fata ehe kɛfã gbɛ lɛ.

Shi mɛni hewɔ Yesu tee Kapernaum lɛ? Ale maŋ nɛɛ jogbaŋŋ fe Nazaret kɛ Kana, ni ekã shi faŋŋ akɛ eda fe maji enyɔ nɛɛ fɛɛ. Agbɛnɛ hu, kaselɔi hei ni Yesu ená lɛ ateŋ mɛi babaoo jɛ Kapernaum loo he ko ni bɛŋkɛ jɛmɛ. No hewɔ lɛ, Yesu baanyɛ atsɔɔ amɛ nibii komɛi yɛ he ni amɛjɛ lɛ niiaŋ.

Be ni Yesu yɔɔ Kapernaum lɛ, etsu naakpɛɛ nitsumɔi komɛi hu. Enɛ hã mɛi babaoo ni yɔɔ maŋ lɛ mli kɛ hei ni bɛŋkɛ jɛmɛ lɛ nu nibii ni efeɔ yɛ jɛmɛ lɛ. Shi esa akɛ Yesu kɛ ekaselɔi lɛ, ní amɛji Yudafoi ni kɛ amɛjamɔ shwɛɛɛ kwraa lɛ ashi kɛya Yerusalem kɛhã afi 30 Ŋ.B. Hehoo lɛ.

Be ni Yesu kɛ ekaselɔi lɛ yashɛ sɔlemɔwe lɛ yɛ Yerusalem lɛ, ekaselɔi lɛ na nɔ ko yɛ ehe ni esoro no kwraa yɛ nɔ ni amɛna kɛtsɔ hiɛ lɛ he, ni no ná amɛnɔ hewalɛ waa.

Nyɔŋmɔ Mla lɛ bi ni Israelbii lɛ kɛ kooloi ayashã afɔle yɛ sɔlemɔwe lɛ, ni niyenii hu he hiaa gbɔi ni baa jɛmɛ lɛ. No hewɔ lɛ, Mla lɛ ŋmɛɔ gbɛ ní mɛi ni jɛɔ shɔŋŋ ni fãa gbɛ kɛbaa Yerusalem lɛ kɛ shika aba ní amɛkɛbahé ‘tsinai, gwantɛŋi, abotiai,’ kɛ nibii krokomɛi ni he baahia amɛ be ni amɛyɔɔ jɛmɛ lɛ. (5 Mose 14:24-26) Enɛ hewɔ lɛ, guɔyelɔi ni yɔɔ Yerusalem lɛ hɔ̃ɔ kooloi loo loofɔji yɛ sɔlemɔwe lɛ tuuntu, yɛ sɔlemɔwe lɛ kpoi lɛ eko nɔ. Amɛteŋ mɛi komɛi hɔ̃ɔ nibii lɛ kɛ jarawalɛ kɛshishiuɔ nihelɔi lɛ.

Enɛ wo Yesu mli la, ni etsɔ shika tsakelɔi lɛ ashika lɛ eshwie shi, ni etsirɛ amɛkpɔlɔi lɛ etswiatswiaa shi, ni eshwie hii lɛ kɛje jɛmɛ. Kɛkɛ ni Yesu wie akɛ: “Nyɛjiea nibii nɛɛ kɛjea biɛ! Nyɛkɛ mi-Tsɛ we lɛ akpaa jarayeli we feemɔ!”Yohane 2:16.

Be ni Yesu kaselɔi lɛ na enɛ lɛ, amɛkai gbalɛ ko ni kɔɔ Nyɔŋmɔ Bi lɛ he ni kɛɔ akɛ: “Owe lɛ he hiɛdɔɔ lɛ baaye mi” lɛ. Shi Yudafoi lɛ bi akɛ: “Akɛni oofee nibii nɛɛ hewɔ lɛ, mɛɛ okadi okɛbaatsɔɔ wɔ?” Yesu hã amɛ hetoo akɛ: “Nyɛkumɔa sɔlemɔwe nɛɛ, ni gbii etɛ mli lɛ mawó nɔ mama shi.”Yohane 2:17-19; Lala 69:10.

Yudafoi lɛ yasusu akɛ Yesu miitsɔɔ sɔlemɔwe ni yɔɔ Yerusalem lɛ diɛŋtsɛ, no hewɔ lɛ amɛbi lɛ akɛ: “Afii nyɔŋmai ejwɛ kɛ ekpaa akɛma sɔlemɔwe nɛɛ, ni bo lɛ, okɛ gbii etɛ baawó nɔ oma shi?” (Yohane 2:20) Shi no mli lɛ, Yesu miiwie egbɔmɔtso lɛ he akɛ sɔlemɔwe. Afii etɛ sɛɛ, be ni atee lɛ shi lɛ, ekaselɔi lɛ kai wiemɔi nɛɛ.

Ekrokromɛi Hu Nɛ

Elia Fã Jamɔ Krɔŋŋ Hep

Kɛ́ wɔkɛ mɛi ni kɛ Biblia mli sane ko kpãaa gbee lɛ miiwie lɛ, te esa akɛ wɔtsu shihilɛ lɛ he nii wɔha tɛŋŋ?