Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 14

Yesu Bɔi Mɛi Kaselɔi Feemɔ

Yesu Bɔi Mɛi Kaselɔi Feemɔ

YOHANE 1:29-51

  • YESU KLƐŊKLƐŊ KASELƆI LƐ BAFATA EHE

Be ni Yesu eyaye gbii 40 yɛ ŋa lɛ nɔ lɛ sɛɛ, kɛ agbɛnɛ hu dani ebaasaa eya Galilea lɛ, eku esɛɛ etee Yohane, mɔ ni baptisi lɛ lɛ ŋɔɔ. Be ni Yesu miihe ashɛ Yohane ŋɔɔ lɛ, Yohane kɛ enine tsɔɔ Yesu ni ejaje etsɔɔ mɛi ni yɔɔ jɛmɛ lɛ akɛ: “Naa, Nyɔŋmɔ Gwantɛŋbi ni wóɔ je lɛ he esha lɛ kɛyaa lɛ! Mɔ nɛ ji mɔ ni miwie yɛ ehe akɛ: ‘Nuu ko miiba yɛ misɛɛ, ni etsɔ mihiɛ, ejaakɛ eyɛ shihilɛ mli dani miba’ lɛ.” (Yohane 1:29, 30) Eyɛ mli akɛ Yohane ye Yesu onukpa fioo moŋ, shi ele akɛ Yesu ehi shi akɛ mumɔŋ bɔɔ nɔ yɛ ŋwɛi dani lɛ Yohane lɛ ba shihilɛ mli.

Otsii fioo komɛi ni tsɔ hiɛ lɛ amli, be ni Yesu ba koni abaptisi lɛ lɛ, no mli lɛ, Yohane bɛ nɔmimaa tsɔ akɛ Yesu ji mɔ ni baatsɔ Mesia lɛ. Yohane jaje akɛ: “Mi po mileee lɛ, shi yiŋtoo hewɔ ni miba ni mibaptisiɔ yɛ nu mli lɛ ji, koni ajie lɛ kpo atsɔɔ Israel.”Yohane 1:31.

Yohane tee nɔ egba etoibolɔi lɛ nɔ ni ba be ni ebaptisi Yesu lɛ, ekɛɛ: “Mina mumɔ lɛ miikpeleke shi tamɔ okpo kɛmiijɛ ŋwɛi, ni ebahi enɔ. Mi po mileee lɛ, shi mɔ tuuntu ni tsu mi akɛ mibabaptisi yɛ nu mli lɛ kɛɛ mi akɛ: ‘Mɔ fɛɛ mɔ ni obaana akɛ mumɔ lɛ miikpeleke shi kɛmiiba enɔ, ni ehiɔ enɔ lɛ, mɔ nɛ ji mɔ ni baptisiɔ yɛ mumɔ krɔŋkrɔŋ mli lɛ.’ Ni mina, ni miye he odase akɛ mɔ nɛ ji Nyɔŋmɔ Bi lɛ.”Yohane 1:32-34.

Enɔ jetsɛremɔ be ni Yesu miiba Yohane ŋɔɔ ekoŋŋ lɛ, no mli lɛ, Yohane kɛ ekaselɔi lɛ ateŋ mɛi enyɔ yɛ he ko. Yohane kɛɛ: “Naa, Nyɔŋmɔ Gwantɛŋbi lɛ!” (Yohane 1:36) Kɛkɛ ni Yohane Baptisilɔ lɛ kaselɔi enyɔ lɛ nyiɛ Yesu sɛɛ. Atsɛɔ mɛi enyɔ nɛɛ ateŋ mɔ kome Andrea. Eeenyɛ efee akɛ, mɔ kroko lɛ ji mɔ ni bɔ nibii nɛɛ he amaniɛ lɛ, ni lɛ hu atsɛɔ lɛ Yohane. Etamɔ nɔ ni Yesu nyɛkwɛ̃ bi ji Yohane nɛɛ, ejaakɛ Salome binuu ji Yohane. Eeenyɛ efee akɛ, Salome nyɛmi yoo ji Yesu nyɛ Maria, ni ewu ji Zebedeo.

Be ni Yesu tsɔ ehe ni ena akɛ Andrea kɛ Yohane nyiɛ esɛɛ lɛ, ebi amɛ akɛ: “Mɛni nyɛtaoɔ?”

Amɛbi lɛ akɛ: “Rabi, nɛgbɛ ohiɔ?”

Ehã amɛ hetoo akɛ: “Nyɛbaa, ni nyɛbaana.”Yohane 1:37-39.

No mli lɛ, atswa aaafee shwane ŋmɛji ejwɛ, ni Andrea kɛ Yohane kɛ Yesu hi shi nakai gbi lɛ. Andrea ná miishɛɛ aahu akɛ, eyana enyɛmi nuu Simon, mɔ ni atsɛɔ lɛ Petro hu lɛ, ni ekɛɛ lɛ akɛ: “Wɔna Mesia lɛ.” (Yohane 1:41) Andrea nyiɛ Petro hiɛ kɛtee Yesu ŋɔɔ. Nibii ni tee nɔ yɛ sɛɛ mli lɛ hãa anaa akɛ, Yohane hu yana enyɛmi Yakobo ni ekɛ lɛ ba Yesu ŋɔɔ; kɛ̃lɛ, Yohane kɛ sane nɛɛ fataaa nibii ni lɛ diɛŋtsɛ eŋmala lɛ ahe.

Enɔ jetsɛremɔ lɛ, Yesu na Filipo, mɔ ni jɛ Betsaida lɛ. Betsaida bɛŋkɛ Galilea Ŋshɔ lɛ naa yɛ ekooyi, ni jɛmɛ ji he ni Andrea kɛ Petro jɛ. Yesu fɔ̃ Filipo nine akɛ: “Baatsɔ misɛɛnyiɛlɔ.”Yohane 1:43.

No sɛɛ lɛ, Filipo yana Natanael, mɔ ni atsɛɔ lɛ Bartolomeo hu lɛ, ni ekɛɛ lɛ akɛ: “Wɔna mɔ ni Mose ŋma ehe sane yɛ Mla lɛ mli, ni Gbalɔi lɛ hu ŋma ehe sane lɛ: Yesu, Yosef bi ni jɛ Nazaret lɛ.” Natanael heee eyeee, ni ekɛɛ Filipo akɛ: “Ani nɔ ko kpakpa ko baanyɛ ajɛ Nazaret?”

Filipo kɛɛ lɛ akɛ: “Ba ni obakwɛ.” Yesu na Natanael miiba ni ekɛɛ akɛ: “Naa, Israelnyo ni ekã shi faŋŋ akɛ, lakamɔ ko bɛ emli” lɛ.

Natanael bi lɛ akɛ: “Te fee tɛŋŋ ole mi?”

Yesu hã lɛ hetoo akɛ: “Dani Filipo tsɛ bo lɛ, be mli ni oyɔɔ agbami tso lɛ shishi lɛ, mina bo.”

Natanael naa kpɛ ehe ni ekɛɛ lɛ akɛ: “Rabi, bo ji Nyɔŋmɔ Bi lɛ, bo ji Israel Maŋtsɛ lɛ.”

Yesu bi lɛ akɛ: “Akɛni mikɛɛ bo akɛ mina bo yɛ agbami tso lɛ shishi lɛ hewɔ ohe oye lɛ? Obaana nibii wuji fe enɛɛmɛi.” No sɛɛ lɛ, Yesu wo shi akɛ: “Lɛɛlɛŋ, lɛɛlɛŋ, miikɛɛ nyɛ akɛ, nyɛbaana ni agbele ŋwɛi naa, ní Nyɔŋmɔ bɔfoi lɛ miikwɔ ni amɛmiikpeleke kɛmiiba gbɔmɔ Bi lɛ ŋɔɔ.”Yohane 1:45-51.

Enɛ sɛɛ nɔŋŋ lɛ, Yesu kɛ ekaselɔi hei ni ená lɛ shi Yordan Jɔɔ lɛ niiaŋ, ni amɛfã gbɛ kɛtee Galilea.