Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 102

Maŋtsɛ lɛ Ta Teji Bi nɔ Kɛbote Yerusalem

Maŋtsɛ lɛ Ta Teji Bi nɔ Kɛbote Yerusalem

MATEO 21:1-11, 14-17 MARKO 11:1-11 LUKA 19:29-44 YOHANE 12:12-19

  • YESU BOTE YERUSALEM KƐ OSHEBƆƆ

  • EGBA YERUSALEM HIƐKPATAMƆ

Enɔ jetsɛremɔ Hɔgbaa, ni ji Nisan 9 lɛ, Yesu kɛ ekaselɔi lɛ shi Betania ni amɛwó amɛhiɛ amɛwo Yerusalem. Be ni eshwɛ fioo ni amɛbaashɛ Betfage, yɛ Oliv Gɔŋ lɛ nɔ lɛ, Yesu kɛɛ ekaselɔi lɛ ateŋ mɛi enyɔ akɛ:

“Nyɛyaa akrowa ni nyɛnaa lɛ mli, ni amrɔ lɛ nyɛbaana teji yoo ni aŋmɔ lɛ shi kɛ ebi. Nyɛfɛnea amɛ ni nyɛkɛ amɛ abahãa mi. Kɛ́ mɔ ko bi nyɛ sane ko lɛ, nyɛkɛa akɛ, ‘Amɛhe miihia Nuŋtsɔ lɛ.’ Ni amrɔ lɛ, ekɛ amɛ baahã nyɛ.”Mateo 21:2, 3.

Kaselɔi lɛ yɔseee akɛ famɔ ni Yesu kɛhã amɛ lɛ ji Biblia mli gbalɛ. Shi sɛɛ mli lɛ, amɛna akɛ eji Zakaria gbalɛ lɛ mlibaa. Zakaria gba akɛ, mɔ ni Nyɔŋmɔ ewo ehe shi akɛ ebaawo lɛ Maŋtsɛ lɛ baaba Yerusalem akɛ mɔ ko ni ‘baa ehe shi, ni etá teji nɔ, teji oblanyo ni ji teji yoo bi ko nɔ.’Zakaria 9:9.

Be ni kaselɔi lɛ shɛ Betfage ni amɛŋɔ teji oblanyo lɛ kɛ emami lɛ, mɛi ni yɔɔ jɛmɛ lɛ bi amɛ akɛ: “Mɛni nyɛfɛneɔ teji bi lɛ kɛyafee?” (Marko 11:5) Shi be ni amɛkɛɛ mɛi lɛ akɛ ehe miihia Nuŋtsɔ lɛ, amɛŋmɛ amɛgbɛ ni amɛkɛyahã Yesu. Kaselɔi lɛ ŋɔ amɛtadei anɔhaanɔi lɛ amɛshwie teji bi lɛ kɛ emami lɛ nɔ, ni Yesu ta teji bi lɛ nɔ.

Be ni Yesu ta teji lɛ nɔ kɛmiibote Yerusalem lɛ, mɛi ni nyaa ehe lɛ ayi bɔi famɔ. Mɛi babaoo kɛ amɛtadei ha gbɛ lɛ nɔ amɛhã lɛ. Mɛi komɛi hu folɔ “tsei aniji kɛjɛ jwɛiiaŋ” ni amɛŋɔ shwie gbɛ lɛ nɔ. Amɛbolɔ akɛ: “Ofainɛ, heremɔ eyiwala! Ajɔɔ mɔ ni baa yɛ Yehowa gbɛ́i mli lɛ! Ajɔɔ wɔtsɛ David Maŋtsɛyeli ni baa lɛ! Ofainɛ heremɔ eyiwala yɛ ŋwɛi flooflo!” (Marko 11:8-10) Be ni Farisifoi ni yɔɔ mɛi lɛ ateŋ lɛ nu nɔ ni mɛi lɛ wieɔ lɛ, amɛmli wo la. Amɛkɛɛ Yesu akɛ: “Tsɔɔlɔ, kã okaselɔi lɛ ahiɛ.” Shi Yesu here nɔ ekɛɛ: “Miikɛɛ nyɛ akɛ, kɛ́ mɛnɛɛmɛi fee dioo lɛ, tɛi lɛ baabolɔ.”Luka 19:39, 40.

Be ni Yesu kwɛ Yerusalem maŋ lɛ, efo eshwie nɔ ni ekɛɛ: “Eji ŋmɛnɛ gbi nɛɛ, hɛɛ, eji okɔ nibii ni kɔɔ toiŋjɔlɛ he lɛ asɛɛ kulɛ—shi amrɔ nɛɛ aŋɔtee ohiŋmɛii.” Abaagbala Yerusalem maŋ lɛ toi akɛni amɛje gbɛ amɛgbo toi lɛ hewɔ. Yesu gba akɛ: “Ohenyɛlɔi lɛ kɛ tsei jaŋŋi kɛ amɛnaa piɔpiɔi baafo afabaŋ amɛwo ohe, ni amɛbaabɔle bo kɛkpe, ni amɛbaasa oyi yɛ he fɛɛ he. Amɛbaaŋɔ bo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ eko nɔ yɛ omli, ejaakɛ be ni abakwɛ omli lɛ, okɔɔɔ sɛɛ.” (Luka 19:42-44) Yesu wiemɔi lɛ ba mli, be ni akpãtã Yerusalem hiɛ yɛ afi 70 Ŋ.B.

Be ni Yesu bote Yerusalem lɛ, “maŋ muu lɛ fɛɛ fee hoo amɛkɛɛ: ‘Namɔ nɛ?’” Ni asafoku lɛ tee nɔ amɛkɛɛ akɛ: “Mɔ nɛɛ ji Yesu, gbalɔ lɛ, ni jɛ Nazaret yɛ Galilea lɛ!” (Mateo 21:10, 11) Asafoku lɛ ateŋ mɛi ni na be ni Yesu tee Lazaro shi lɛ gba naakpɛɛ nii nɛɛ amɛtsɔɔ mɛi krokomɛi. Farisifoi lɛ ye ŋkɔmɔ akɛ, amɛnyɛɛɛ nɔ ko amɛfee. Amɛkɛɛkɛɛ amɛhe akɛ: “Naa! Jeŋ muu lɛ fɛɛ ni efã kɛnyiɛ esɛɛ nɛɛ.”Yohane 12:18, 19.

Yesu tee sɔlemɔwe lɛ eyatsɔɔ nii taakɛ efɔɔ feemɔ kɛ́ etee Yerusalem lɛ. Etsa shwilafoi kɛ akpakei lɛ. Be ni osɔfoi tsiifoi lɛ kɛ woloŋmalɔi lɛ na nɔ ni efeɔ lɛ, ni amɛnu bɔ ni gbekɛbii hii lɛ bolɔɔ yɛ sɔlemɔwe lɛ akɛ: “Ofainɛ, heremɔ David Bi lɛ yiwala!” lɛ, amɛmli wo la. Jamɔŋ hiɛnyiɛlɔi lɛ bi Yesu akɛ: “Oonu nɔ ni mɛnɛɛmɛi kɛɔ lɛ?” Ekɛɛ amɛ akɛ: “Ani nyɛkaneko dã akɛ, ‘Gbekɛbii kɛ abifabii anaa osaa yijiemɔ oto yɛ’?”Mateo 21:15, 16.

Yesu kwɛ nibii ni yɔɔ sɔlemɔwe lɛ. No mli lɛ hulu miihe anyɔ shi, no hewɔ lɛ, ekɛ ebɔfoi lɛ shi. Eshi kɛtee Betania dani Nisan 10 lɛ je shishi, ni jɛmɛ ji he ni amɛyawɔ nakai Hɔgbaa gbɛkɛ lɛ.