Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 10

Yesu Weku lɛ Fã Gbɛ Kɛtee Yerusalem

Yesu Weku lɛ Fã Gbɛ Kɛtee Yerusalem

LUKA 2:40-52

  • YESU NI EYE AFII 12 LƐ BIBII TSƆƆLƆI SAJI

  • YESU TSƐ YEHOWA AKƐ “MITSƐ”

Be eshɛ ní esa akɛ Yosef weku lɛ kɛ amɛnanemɛi kɛ amɛwekumɛi afã gbɛ ní amɛfãa daa afi kɛyaa Yerusalem lɛ. Amɛyaa amɛyayeɔ Hehoo lɛ, taakɛ Mla lɛ bi ni afee lɛ. (5 Mose 16:16) Nazaret kɛ Yerusalem teŋ jekɛmɔ aaafee kilomitai 120. Be nɛɛ ji miishɛɛ be kɛhã mɛi fɛɛ, ni deka bɛ kwraa. Amrɔ nɛɛ Yesu eye afii 12, ni eeshwe waa ni eyaye gbi jurɔ lɛ, ní ená hegbɛ hu kɛya sɔlemɔwe lɛ ekoŋŋ.

Yɛ Yesu, kɛ agbɛnɛ hu eweku lɛ gbɛfaŋ lɛ, Hehoo lɛ jeee gbi kome nifeemɔ kɛkɛ. Kɛ́ aye Hehoo lɛ, enɔ jetsɛremɔ lɛ ji “Aboloo ni Akɛ Ma ni Eshako Feɔ lɛ” gbii juji ni akɛ gbii kpawo yeɔ lɛ “amli klɛŋklɛŋ gbi.” (Marko 14:12) Abuɔ gbii nɛɛ akɛ efata Hehoo lɛ yeli lɛ he. Gbɛ ni amɛbaafã kɛjɛ amɛshĩa yɛ Nazaret kɛya Yerusalem, be ni amɛbaayaye yɛ jɛmɛ, kɛ amɛsɛɛ ni amɛbaaku kɛba amɛshĩa lɛ baahe aaafee otsii enyɔ. Shi afi nɛɛ, nɔ ko ni ba ni kɔɔ Yesu he lɛ hewɔ lɛ, amɛye fe nakai. Enɛ kɔɔ naagba ko ni amɛkɛkpe be ni amɛkuɔ amɛsɛɛ kɛjɛɔ Yerusalem kɛyaa shĩa lɛ he.

Be ni amɛnyiɛ gbɛ kɛyaa lɛ, Yosef kɛ Maria yasusu akɛ Yesu futu wekumɛi kɛ nanemɛi ni fãa gbɛ kɛyaa kooyigbɛ lɛ. Shi be ni amɛyato shi yɛ he ko koni amɛwɔ kɛyashi je baatsɛre lɛ, amɛnaaa lɛ. No hewɔ lɛ, amɛyatao lɛ yɛ omaŋfoi lɛ ateŋ, shi amɛnaaa lɛ. Amɛnaaa amɛbinuu lɛ yɛ he ko he ko! Enɛ hewɔ lɛ, Yosef kɛ Maria kɛ amɛhiɛ tsɔɔ Yerusalem gbɛ ekoŋŋ koni amɛyatao lɛ.

Amɛtao lɛ gbi muu fɛɛ, shi amɛnaaa lɛ. Enɔ jetsɛremɔ hu amɛnaaa lɛ. Naagbee mli lɛ, amɛna amɛbinuu lɛ yɛ gbi ni ji gbi etɛ lɛ nɔ yɛ sɔlemɔwe kɛ emli asai babaoo lɛ mli. Amɛna Yesu ni eta Yudafoi lɛ atsɔɔlɔi komɛi ateŋ. Eebo amɛ toi, ni eebibii amɛ saji, ni amɛnaa ekpɛ amɛhe yɛ eniiashishinumɔ lɛ hewɔ.

Maria bi lɛ akɛ: “Mibi, mɛni hewɔ ofee wɔ nɛkɛ? Naa, mi kɛ otsɛ etao bo kɛ hejaramɔ babaoo.”Luka 2:48.

Efee Yesu naakpɛɛ akɛ amɛleee akɛ jɛmɛ amɛbaana lɛ yɛ. Ebi amɛ akɛ: “Mɛni hewɔ nyɛtaoɔ mi? Ani nyɛleee akɛ esa akɛ mahi mi-Tsɛ we lɛ?”Luka 2:49.

Amrɔ nɛɛ, Yosef kɛ Maria ena Yesu, ni Yesu kɛ amɛ ku sɛɛ kɛtee shĩa yɛ Nazaret, ni etee nɔ eba ehe shi ehã amɛ. Etee ehiɛ yɛ hiɛshikamɔ kɛ gbɔmɔtsoŋ dalɛ fɛɛ mli. Eyɛ mli akɛ Yesu edako moŋ, shi ená Nyɔŋmɔ kɛ gbɔmɛi ahiɛ duromɔ. Hɛɛ, kɛjɛ Yesu gbekɛbiiashi tɔ̃ɔ lɛ, etiu mumɔŋ nibii asɛɛ ni ejie bulɛ kpo hu etsɔɔ efɔlɔi, ni enɛ ji nɔkwɛmɔnɔ ni nɔ bɛ.