Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 1

Saji Enyɔ ni Jɛ Nyɔŋmɔ Ŋɔɔ

Saji Enyɔ ni Jɛ Nyɔŋmɔ Ŋɔɔ

LUKA 1:5-33

  • BƆFO GABRIEL GBA AKƐ ABAAFƆ YOHANE BAPTISILƆ LƐ

  • GABRIEL HÃ MARIA LE AKƐ EBAAFƆ YESU

Wɔbaanyɛ wɔbu Biblia tso muu lɛ fɛɛ akɛ sane ni jɛ Nyɔŋmɔ ŋɔɔ. Wɔ-Tsɛ ni yɔɔ ŋwɛi lɛ kɛhã wɔ koni ekɛtsɔɔ wɔ nii. Shi susumɔ saji krɛdɛi enyɔ komɛi ni akɛhã nɔ ni fe afii 2,000 ni eho nɛ lɛ he okwɛ. Bɔfo ko ni atsɛɔ lɛ Gabriel, ní “damɔɔ Nyɔŋmɔ hiɛ lɛ,” ji mɔ ni kɛhã. (Luka 1:19) Mɛɛ shihilɛi amli bɔfo lɛ kɛ saji ni he hiaa nɛɛ hã yɛ?

Enɛ ba aaafee afi 3 D.Ŋ.B. Namɔ Gabriel kɛ klɛŋklɛŋ sane lɛ yahã? Yehowa osɔfo ko ni atsɛɔ lɛ Zakaria lɛ yɛ Yudea ŋmeŋmei lɛ anɔ, ni eeenyɛ efee akɛ jɛmɛ kɛ Yerusalem jekɛɛɛ. Lɛ kɛ eŋa Elizabet fɛɛ edara yɛ afii amli, shi amɛbɛ bi. Ebashɛ Zakaria nɔ akɛ eyatsu osɔfoyeli nitsumɔ lɛ yɛ Nyɔŋmɔ sɔlemɔwe ni yɔɔ Yerusalem lɛ. Be ni Zakaria yɔɔ sɔlemɔwe lɛ, Gabriel jie ehe kpo trukaa etsɔɔ lɛ yɛ tsofa-kɛ-ŋmashãa latɛ lɛ masɛi.

Ekã shi faŋŋ akɛ, enɛ hã gbeyei mɔ Zakaria waa. Shi bɔfo lɛ hã Zakaria tsui ekɛɛ: “Kaashe gbeyei, Zakaria, ejaakɛ abo fai ní okɛ hiɛdɔɔ kpaa lɛ toi, ni oŋa Elizabet lɛ, ebaafɔ binuu ehã bo, ni obaawo lɛ gbɛ́i akɛ Yohane.” Gabriel kɛshi sɛɛ akɛ, Yohane baatsɔ “agbo yɛ Yehowa hiɛ,” ni ebaasaa “mɛi eto Yehowa.”Luka 1:13-17.

Zakaria na enɛ akɛ nɔ ko ni nyɛŋ aba mli kɔkɔɔkɔ. Mɛni hewɔ? Yɛ afii ni lɛ kɛ Elizabet fɛɛ eye lɛ hewɔ. No hewɔ lɛ, Gabriel kɛɛ lɛ akɛ: “Obaatɔ mu, ni onyɛŋ owie kɛyashi gbi nɔ ni nibii nɛɛ baaba mli, ejaakɛ oheee miwiemɔi . . . lɛ oyeee.”Luka 1:20.

Nakai be lɛ mli fɛɛ lɛ, mɛi ni yɔɔ kpo lɛ nɔ lɛ ahiɛ miifee amɛ yaa, ejaakɛ Zakaria eyatsɛ tsɔ yɛ sɔlemɔtsu lɛ mli. Naagbee lɛ, eje kpo, shi enyɛɛɛ ewie. Eniji kɛkɛ ekɛfeɔ okadii. Mɛi lɛ kɔ sɛɛ akɛ, eyana naakpɛɛ nɔ ko yɛ sɔlemɔtsu lɛ mli.

Be ni Zakaria gbe esɔɔmɔ lɛ naa yɛ sɔlemɔwe lɛ, eku esɛɛ etee eshĩa. No sɛɛ etsɛɛɛ lɛ, Elizabet ŋɔ hɔ! Be ni Elizabet mɛɔ be ni ebaafɔ lɛ, ekɛ ehe tee nyɔji enumɔ, koni mɛi akana lɛ.

No sɛɛ lɛ, Gabriel jie ehe kpo nɔ ni ji shii enyɔ nɔ. Namɔ ejie ehe kpo etsɔɔ? Ejie ehe kpo etsɔɔ oblayoo ko ni boteko gbalashihilɛ mli, ní atsɛɔ lɛ Maria ni yɔɔ Nazaret maŋ lɛ mli, yɛ Galilea kpokpaa lɛ nɔ lɛ. Nazaret yɛ Yerusalem kooyi. Mɛni bɔfo lɛ kɛɛ lɛ? Ekɛɛ lɛ akɛ: “Ohiɛ eba nyam yɛ Nyɔŋmɔ hiɛ.” Gabriel kɛshi sɛɛ ehã Maria akɛ: “Naa! obaaná musu ni obaafɔ binuu, ni obaawo lɛ gbɛ́i akɛ Yesu.” Ekɛfata he akɛ: “Mɔ nɛɛ baatsɔ agbo ni abaatsɛ lɛ Mɔ ni Nɔ Kwɔ Fe Fɛɛ lɛ Bi, . . . ni ebaaye Yakob we lɛ nɔ Maŋtsɛ kɛya naanɔ, ni e-Maŋtsɛyeli lɛ sɛɛ efoŋ.”Luka 1:30-33.

Ŋwanejee ko bɛ he akɛ, Gabriel nu he akɛ eji hegbɛ kpele ni ená akɛ ekɛ saji enyɔ nɛɛ ahã. Be ni wɔkaneɔ Yohane kɛ Yesu he saji babaoo lɛ, wɔbaana nɔ hewɔ ni saji ni jɛ ŋwɛi nɛɛ ahe hiaa waa lɛ.