Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 9

Eda yɛ Nazaret

Eda yɛ Nazaret

MATEO 13:55, 56 MARKO 6:3

  • YOSEF KƐ MARIA WEKU LƐ BADA

  • YESU KASE NITSUMƆ

Yesu da yɛ Nazaret, ni ji maŋ bibioo ko ni heko gbɛ́i tsɔ lɛ mli. Maŋ nɛɛ yɛ Yudea kooyi yɛ Galilea kpokpaa lɛ nɔ, eji maŋ ni ma gɔŋ nɔ, ni eyɛ kpaakpo wulu ni atsɛɔ lɛ Galilea Ŋshɔ lɛ anaigbɛ.

Be ni Yesu eye aaafee afii enyɔ lɛ, Yosef kɛ Maria kɛ lɛ jɛ Ejipt kɛba biɛ. Etamɔ nɔ ni no mli lɛ Yesu pɛ ji amɛbi. Shi sɛɛ mli lɛ, afɔ Yesu nyɛmimɛi hii krokomɛi lɛ—Yakobo, Yosef, Simon, kɛ Yuda. Yosef kɛ Maria fɔ biyei hu. Hɛɛ, kɛhooo lɛ, Yesu yɛ nyɛmimɛi hii kɛ yei ekpaa, ni ji esɛɛbii.

Eji anɔkwale akɛ, Yesu yɛ wekumɛi krokomɛi hu. Wɔwie Elizabet kɛ ebinuu Yohane he momo. Amɛyɛ Yudea, ní kɛ́ ojɛ jɛmɛ kɛmiiba Nazaret yɛ kooyi lɛ, eheɔ kilomitai babaoo lɛ. Agbɛnɛ hu, yoo ko ni atsɛɔ lɛ Salome, ní eeenyɛ efee akɛ eji Maria nyɛmi yoo, ni tsɔɔ akɛ eji Yesu nyɛkwɛ̃ lɛ bɛŋkɛ he ni amɛyɔɔ lɛ yɛ Galilea. Salome wu ji Zebedeo. Belɛ, amɛbihii enyɔ, ni ji Yakobo kɛ Yohane lɛ baafee Yesu nyɛkwɛ̃ bii. Wɔnyɛɛɛ wɔtsɔɔ kɛji Yesu kɛ amɛ shara babaoo be ni amɛdaraa lɛ moŋ, shi sɛɛ mli lɛ, amɛbatsɔmɔ enanemɛi kpaakpa, ni amɛyi enyɔ lɛ fɛɛ batsɔmɔ Yesu bɔfoi.

Esa akɛ Yosef atsu nii waa kɛkwɛ eweku ni daa lɛ. Kapintafonyo ji lɛ. Ekwɛ Yesu akɛ lɛ diɛŋtsɛ ebi, ni no hewɔ lɛ atsɛɔ Yesu akɛ “kapintafonyo lɛ bi lɛ.” (Mateo 13:55) Yosef tsɔɔ Yesu kapinta nitsumɔ lɛ, ni ekase nitsumɔ lɛ jogbaŋŋ. Yɛ anɔkwale mli lɛ, mɛi wie Yesu he akɛ: “Mɔ nɛɛ ji kapintafonyo lɛ.”Marko 6:3.

Yehowa jamɔ ji nɔ titri ni ma Yosef weku lɛ hiɛ. Yosef kɛ Maria tsɔɔ amɛbii lɛ Yehowa he nii ‘be ni amɛta shi yɛ amɛshĩa lɛ kɛ be ni amɛnyiɛ gbɛ teŋ kɛ be ni amɛkã shi kɛ be ni amɛte shi,’ taakɛ Nyɔŋmɔ Mla lɛ bi ni afee lɛ. (5 Mose 6:6-9) Ayɛ kpeehe yɛ Nazaret. Wɔbaanyɛ wɔná nɔmimaa akɛ, Yosef kɛ eweku lɛ yaa amɛyajáa Nyɔŋmɔ yɛ jɛmɛ be fɛɛ be. Sɛɛ mli lɛ, awie akɛ Yesu tee kpeehe lɛ, “taakɛ efɔɔ feemɔ yɛ Hejɔɔmɔ Gbi lɛ nɔ lɛ.” (Luka 4:16) Weku lɛ mii shɛɔ amɛhe hu kɛ́ amɛfã gbɛ yɛ be kɛ beiaŋ kɛtee Yehowa sɔlemɔwe ni yɔɔ Yerusalem lɛ.

Ekrokromɛi Hu Nɛ

Yosef Bu Amɛhe, Ekwɛ Amɛtsiabo, Emia Ehiɛ

Mɛni Yosef fee kɛbu eweku lɛ he? Mɛni hewɔ ekɛ Maria kɛ Yesu tee Egipt lɛ?