Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 7

Ŋulamiiaŋkwɛlɔi Yasara Yesu

Ŋulamiiaŋkwɛlɔi Yasara Yesu

MATEO 2:1-12

  • ŊULAMIIAŊKWƐLƆI NYIƐ “ŊULAMI” KO SƐƐ KƐTEE YERUSALEM, NO SƐƐ LƐ AMƐNYIƐ ESƐƐ KƐTEE YESU ŊƆƆ

Hii komɛi jɛ Boka ba Yerusalem. Ŋulamiiaŋkwɛlɔi ji amɛ, ni tsɔɔ akɛ amɛkaseɔ bɔ ni ŋulamii tsiɔ amɛhe hãa lɛ he nii, ni amɛkɛɔ akɛ no hãa amɛnyɛɔ amɛtsɔɔ nibii ni baa mɛi anɔ lɛ shishi. (Yesaia 47:13) Amɛna “ŋulami” ko be ni amɛyɔɔ amɛmaŋ yɛ Boka lɛ, ni amɛnyiɛ esɛɛ kilomitai ohai abɔ kɛtee Yerusalem moŋ, shi jeee Betlehem.

Be ni ŋulamiiaŋkwɛlɔi lɛ shɛ jɛmɛ lɛ, amɛbi akɛ: “Nɛgbɛ Yudafoi lɛ amaŋtsɛ ni afɔ lɛ lɛ yɔɔ? Ejaakɛ wɔna eŋulami be ni wɔyɔɔ Boka lɛ, ni wɔba koni wɔbakoto lɛ.”Mateo 2:1, 2.

Be ni Maŋtsɛ Herode ni yɔɔ Yerusalem lɛ nu enɛ lɛ, eyoyoro. No hewɔ lɛ, etsɛ osɔfoi tsiifoi lɛ kɛ Yudafoi lɛ ajamɔŋ hiɛnyiɛlɔi krokomɛi lɛ, ni ebi amɛ he ni abaafɔ Kristo lɛ yɛ. Amɛdamɔ Ŋmalɛi lɛ anɔ amɛhã lɛ hetoo akɛ: “Yɛ Betlehem.” (Mateo 2:5; Mika 5:1) Be ni Herode nu nakai lɛ, ehã atsɛ ŋulamiiaŋkwɛlɔi lɛ ahã lɛ, ni ekɛɛ amɛ yɛ teemɔŋ akɛ: “Nyɛyaa ni nyɛyataoa gbekɛ bibioo lɛ fitsofitso, ni kɛ́ nyɛna lɛ lɛ, nyɛbakɛa mi koni mi hu maya ni mayakoto lɛ.” (Mateo 2:8) Shi anɔkwa, Herode miitao ni ena gbekɛ bibioo lɛ ní egbe lɛ!

Be ni ŋulamiiaŋkwɛlɔi lɛ shi lɛ, naakpɛɛ nɔ ko ba. “Ŋulami” lɛ ni amɛna be ni amɛyɔɔ Boka lɛ nyiɛ amɛhiɛ kɛtee. Ekã shi faŋŋ akɛ, enɛ jeee ŋulami folo ko kɛkɛ, shi moŋ eji ŋulami ko ni akɛhã koni etsɔɔ amɛ gbɛ. Ŋulamiiaŋkwɛlɔi lɛ nyiɛ ŋulami lɛ sɛɛ aahu kɛyashi eyawa yɛ shĩa ni Yosef kɛ Maria kɛ amɛbi bibioo lɛ yɔɔ amrɔ nɛɛ yiteŋ.

Be ni ŋulamiiaŋkwɛlɔi lɛ bote shĩa lɛ mli lɛ, amɛna Maria kɛ gbekɛ bibioo ko, ni ji Yesu. Kɛkɛ ni ŋulamiiaŋkwɛlɔi lɛ koto lɛ. Ni amɛkekee lɛ shika tsuru, ohɛ́ ni jeɔ ŋma, kɛ mire. No sɛɛ lɛ, be ni amɛmiihe amɛshi kɛya Herode ŋɔɔ lɛ, Nyɔŋmɔ bɔ amɛ kɔkɔ yɛ lamɔ mli akɛ amɛkaku amɛsɛɛ kɛtee jɛmɛ. No hewɔ lɛ, amɛtsɔ gbɛ kroko nɔ kɛtee amɛmaŋ.

Namɔ osusuɔ akɛ lɛ ehã “ŋulami” lɛ tsɔɔ ŋulamiiaŋkwɛlɔi lɛ gbɛ lɛ? Kaimɔ akɛ, ŋulami lɛ etsɔɔɔ amɛ gbɛ kɛyaaa Yesu ŋɔɔ tɛ̃ɛ yɛ Betlehem. Moŋ lɛ, enyiɛ amɛhiɛ kɛtee Yerusalem, he ni amɛkɛ Maŋtsɛ Herode, mɔ ni miitao egbe Yesu lɛ yakpe yɛ lɛ. Ni eji Nyɔŋmɔ kɛ ehe wooo sane lɛ mli ni ebaabɔ ŋulamiiaŋkwɛlɔi lɛ kɔkɔ akɛ amɛkatsɔɔ Herode he ni Yesu yɔɔ kulɛ, ebaagbe lɛ. Enɛ hãa wɔnaa faŋŋ akɛ, Satan, ni ji Nyɔŋmɔ henyɛlɔ lɛ ji mɔ ni taoɔ egbe Yesu lɛ, ni etsɔ gbɛ nɛɛ nɔ bɔ ni afee ni ekɛtsu eyiŋtoo lɛ he nii.

Ekrokromɛi Hu Nɛ

Yesu Kristo—Ani Ekã He Eji Gbekɛ, Aloo Etsɔ Maŋtsɛ?

Ani esa akɛ wɔkai Yesu akɛ abifao loo maŋtsɛ? Namɛi ji ‘hii nilelɔi’ ni basara lɛ lɛ? Mɛni efeɔ amrɔ nɛɛ?