Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

Kasemɔ Yesu Sui Nɛɛ . . .

Kasemɔ Yesu Sui Nɛɛ . . .

OMUSUŊ ATSƆ BO

Be ni Yesu ji adesa lɛ, eye emuu, no hewɔ lɛ ekɛ nibii ni haoɔ wɔ lɛ ateŋ babaoo ekpeee. Shi kɛ̃lɛ, enu nii ahe waa ehã mɛi. Ekɛ nibii shã afɔle yɛ amɛhewɔ, ni tsɔɔ akɛ efee nibii ehã mɛi fe bɔ ni akpaa gbɛ tete. Anɔkwa, emusuŋ tsɔ lɛ, ni no hã eye ebua mɛi. Jwɛŋmɔ nɔkwɛmɔnii ni yɔɔ yitsei nɛɛ amli lɛ anɔ, Yitso 32, 37, 57, 99.

HÃ MƐI ANYƐ ABƐŊKƐ BO

Gbekɛbii kɛ onukpai fɛɛ nu he akɛ amɛbaanyɛ amɛbɛŋkɛ Yesu, ejaakɛ ehãaa amɛnu he akɛ ebɛ dekã kɛhã amɛ loo akɛ enɔ kwɔ fe amɛ. Akɛni mɛi nu he akɛ Yesu yɛ amɛhe miishɛɛ hewɔ lɛ, kɛ́ amɛba eŋɔɔ lɛ, amɛhiɛ mɛɔ. Kadimɔ enɛ yɛ yitsei nɛɛ amli, Yitso 25, 27, 95.

SƆLEMƆ BE FƐƐ BE

Yesu kɛ hiɛdɔɔ sɔle be fɛɛ be, ni efee nakai be ni mɔ ko mɔ ko bɛ emasɛi, kɛ agbɛnɛ hu be ni eyɔɔ anɔkwa jálɔi ateŋ. Esɔle yɛ bei srɔtoi amli, jeee niyeli be pɛ. Esɔle kɛda e-Tsɛ lɛ shi, ni esɔle kɛjie eyi hu, ni dani ebaakpɛ yiŋ ko ni yɔɔ hiɛdɔɔ lɛ, esɔleɔ koni e-Tsɛ lɛ atsɔɔ lɛ gbɛ. Susumɔ nɔkwɛmɔnii ni yɔɔ yitsei nɛɛ amli lɛ ahe, Yitso 24, 34, 91, 122, 123.

FÓ MƐI ANƆ MLI

Bei komɛi lɛ, Yesu tsiɔ ehe ní esa akɛ ejɔɔ kɛ etsui ni esa akɛ ewo fioo lɛ etoɔ afã yɛ mɛi ahewɔ. Ejieee ŋkomeŋfa su kpo. Yɛ enɛ hu mli lɛ, efee nɔkwɛmɔnɔ efɔ̃ shi ehã wɔ koni wɔnyiɛ sɛɛ kpaakpa. Kasemɔ bɔ ni nɔkwɛmɔnɔ nɛɛ jeɔ kpo yɛ yitsei nɛɛ amli, Yitso 19, 41, 52.

OKƐ TƆMƆI AKE

Jeee bɔ ni esa akɛ akɛ tɔmɔi ake lɛ he nii pɛ kɛkɛ Yesu tsɔɔ—ekɛ ekaselɔi lɛ kɛ mɛi krokomɛi atɔmɔi ke amɛ. Jwɛŋmɔ nɔkwɛmɔnii ni yɔɔ yitsei nɛɛ amli lɛ anɔ, Yitso 26, 40, 64, 85, 131.

OHIƐ ADƆ ANƆKWA JAMƆ HE

Agba afɔ̃ shi akɛ Yudafoi lɛ ateŋ mɛi babaoo baakpoo Mesia lɛ, ni akɛ ehenyɛlɔi lɛ baagbe lɛ. No hewɔ lɛ, kulɛ Yesu baanyɛ efee nibii fioo komɛi pɛ kɛkɛ ehã mɛi. Yɛ no najiaŋ lɛ, ekɛ hiɛdɔɔ hã mɛi le anɔkwa jamɔ. Efee bɔ ni akɛ hiɛdɔɔ tsuɔ anɔkwa jamɔ he nii lɛ he nɔkwɛmɔnɔ ehã esɛɛnyiɛlɔi fɛɛ ni abooo shɛɛ sane ni amɛshiɛɔ lɛ toi loo aate shi aawo amɛ lɛ. Kwɛmɔ Yitso 16, 72, 103.

BA OHE SHI

Be ni Yesu ji adesa lɛ, enɔ kwɔ kwraa fe adesai yɛ gbɛi babaoo nɔ, ejaakɛ amɛyeee emuu. Akɛ nɔkwɛmɔnɔ lɛ, ele nii ni ehiɛ kã shi kwraa fe adesai. Akɛni Yesu eye emuu hewɔ lɛ, ŋwanejee ko kwraa bɛ he akɛ eyɛ gbɔmɔtsoŋ hewalɛ ni ele nii hu fe mɛi fɛɛ ni ekɛshãra lɛ. Kɛ̃lɛ, ejɛ heshibaa mli esɔmɔ mɛi. Obaanyɛ okase eheshibaa nɛɛ yɛ yitsei ni nyiɛ sɛɛ nɛɛ amli, Yitso 10, 62, 66, 94, 116.

TOO OTSUI SHI

Yesu to etsui shi be fɛɛ be ehã ebɔfoi lɛ kɛ mɛi krokomɛi kɛ́ amɛyanyɛɛɛ amɛkase lɛ loo amɛtsuuu nibii ni ekɛɛ amɛ lɛ he nii lɛ. Etee nɔ ekɛ tsuishitoo tĩ nibii ni etsɔɔ amɛ lɛ amli koni amɛnyɛ amɛbɛŋkɛ Yehowa. Jwɛŋmɔ Yesu tsuishitoo lɛ he nɔkwɛmɔnii ni yɔɔ yitsei nɛɛ amli lɛ nɔ, Yitso 74, 98, 118, 135.