Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

Gbɛ lɛ, Anɔkwale lɛ, Wala Lɛ

Gbɛ lɛ, Anɔkwale lɛ, Wala Lɛ

Ekã shi faŋŋ akɛ kɛ́ onu sane kpakpa ko lɛ, omii shɛɔ ohe waa. Anɔkwa, sane kpakpa diɛŋtsɛ ko yɛ kɛhã bo kɛ osuɔlɔi fɛɛ.

Sane kpakpa nɛɛ yɛ Biblia lɛ, ni ji wolo ni jeŋ muu fɛɛ Bɔlɔ, Yehowa Nyɔŋmɔ hã aŋma afii babaoo ni eho nɛ lɛ mli. Wɔbaasusu Biblia mli woji ejwɛ ni wieɔ sane kpakpa diɛŋtsɛ kɛhã wɔ fɛɛ lɛ he yɛ wolo nɛɛ mli. Nyɔŋmɔ kɛ Mateo, Marko, Luka, kɛ Yohane tsu nii kɛŋmala Biblia mli woji ejwɛ nɛɛ, ni akɛ amɛgbɛ́i tsɛɔ woji lɛ.

Mɛi babaoo tsɛɔ woji ejwɛ nɛɛ akɛ Sanekpakpai ejwɛ lɛ. Woji ejwɛ lɛ fɛɛ wieɔ sane kpakpa ni kɔɔ Yesu he lɛ he—akɛ lɛ enɔ Nyɔŋmɔ baatsɔ ehere wɔyiwala, ni akɛ Nyɔŋmɔ ŋwɛi Maŋtsɛyeli lɛ nɔ Maŋtsɛ lɛ, Yesu baahã mɛi fɛɛ ni jieɔ hemɔkɛyeli kpo yɛ emli lɛ aná shihilɛ kpakpa kɛya naanɔ.Marko 10:17, 30; 13:13.

MƐNI HEWƆ SANEKPAKPAI EJWƐ?

Ekolɛ obaabi akɛ, mɛni hewɔ Nyɔŋmɔ kɛ emumɔ lɛ tsirɛ hii ejwɛ sɔŋŋ ni amɛŋmala Yesu shihilɛ kɛ enitsɔɔmɔi lɛ ahe saji lɛ?

Sɛɛnamɔi yɛ he akɛ mɛi srɔtoi ŋmala Yesu wiemɔi kɛ nifeemɔi lɛ ahe saji. Akɛ nɔkwɛmɔnɔ lɛ, ŋɔɔ lɛ akɛ hii ejwɛ komɛi damɔ tsɔɔlɔ kpanaa ko masɛi. Klɛŋklɛŋ mɔ lɛ ji toohelɔ, ni edamɔ tsɔɔlɔ lɛ hiɛ. Mɔ ni ji enyɔ nɔ lɛ damɔ tsɔɔlɔ lɛ ninejurɔ nɔ, ni eji helatsalɔ. Nuu ni ji etɛ nɔ ni damɔ tsɔɔlɔ lɛ bɛku nɔ eboɔ lɛ toi lɛ ji wolɛɛnyo, ni enaanyo waa ni. Ni nuu ni ji ejwɛ nɔ, ní miikwɛ nɔ ni yaa nɔ lɛ damɔ tsɔɔlɔ lɛ sɛɛ, ni mɛi krokomɛi lɛ fɛɛ ye lɛ onukpa. Anɔkwafoi ji hii ejwɛ nɛɛ fɛɛ, shi soro nɔ ni amɛteŋ mɔ fɛɛ mɔ nyaa he loo nɔ ni egbalaa ejwɛŋmɔ kɛyaa nɔ. Kɛ́ amɛteŋ mɔ fɛɛ mɔ miiŋma emaniɛbɔɔ lɛ, ekã shi faŋŋ akɛ mɔ ko baaŋmala tsɔɔlɔ lɛ wiemɔi kɛ nifeemɔi lɛ ekomɛi fitsofitso fe mɔ kroko, ni mɔ ko hu baaŋma nɔ ko ni mɔ kroko eŋmaŋ. Kɛ́ wɔkase amaniɛbɔi ejwɛ lɛ fɛɛ, ni wɔhã ehi wɔjwɛŋmɔŋ akɛ soro bɔ ni amɛteŋ mɔ fɛɛ mɔ na nibii ehã kɛ yiŋtoo hewɔ ni eŋma lɛ, ebaahã wɔle nibii ni tsɔɔlɔ lɛ wie kɛ nibii ni efee lɛ jogbaŋŋ. Nɔkwɛmɔnɔ nɛɛ hãa wɔnaa akɛ, sɛɛnamɔ yɛ he akɛ aŋmala Yesu, ni ji Tsɔɔlɔ Kpele lɛ, shihilɛ he saji srɔtoi ejwɛ ashwie shi.

 Nyɛhãa wɔtsaa nɔkwɛmɔnɔ lɛ nɔ. Akɛni toohelɔ lɛ ŋma emaniɛbɔɔ lɛ ehã Yudafoi shikwɛ̃ɛbii titri, ni eesumɔ ni amɛnya he hewɔ lɛ, ewie tsɔɔmɔi kɛ nifeemɔi lɛ ekomɛi ahe kutuu yɛ gbɛ ni baaye abua amɛ lɛ nɔ. Helatsalɔ lɛ gbala ejwɛŋmɔ kɛtee helatsɛmɛi loo obubuafoi atsamɔ nɔ, no hewɔ lɛ etsĩii nibii komɛi ni toohelɔ lɛ wie he lɛ tã, loo soro bɔ ni eto amɛnaa hã. Tsɔɔlɔ lɛ naanyo kpaakpa lɛ wie tsɔɔlɔ lɛ henumɔi kɛ esui ahe waa. Oblanyo lɛ amaniɛbɔɔ lɛ yɛ kuku, ni eyɛ tɛ̃ɛ hu. Fɛɛ sɛɛ lɛ, saji ni amɛteŋ mɔ fɛɛ mɔ ŋmala lɛ ja. Enɛ hãa wɔnaa akɛ, ehi jogbaŋŋ akɛ hii ejwɛ sɔŋŋ ŋmala Yesu shihilɛ he saji shwie shi, ejaakɛ no hãa wɔnuɔ enifeemɔi, enitsɔɔmɔi, kɛ esui lɛ ashishi jogbaŋŋ.

Mɛi komɛi tsɛɔ nɔ ni Mateo ŋma lɛ ‘Mateo Sanekpakpa lɛ,’ ni amɛtsɛɔ nɔ ni Yohane hu ŋma lɛ ‘Yohane Sanekpakpa lɛ.’ Enɛ ja, ejaakɛ eko fɛɛ eko wieɔ “Yesu Kristo . . . he sane kpakpa.” (Marko 1:1) Shi kɛ́ wɔɔkɛɛ lɛ, Yesu he sane kpakpa kome pɛ yɔɔ—ni wɔnaa enɛ yɛ woji ejwɛ lɛ amli.

Mɛi babaoo ni kaseɔ Nyɔŋmɔ Wiemɔ lɛ kɛ Mateo, Marko, Luka, kɛ Yohane woji lɛ amli saji kɛ nibii ni tee nɔ lɛ eko eto eko he, ni amɛtsɔɔ bɔ ni saji lɛ kɛ amɛhe kpãa gbee hã. Aaafee afi 170 Ŋ.B. lɛ, Siria woloŋmalɔ Tatian bɔ mɔdɛŋ akɛ efee nakai. Ebu woji ejwɛ nɛɛ akɛ amɛja, ni ajɛ mumɔŋ aŋmala. Eŋma wolo ni atsɛɔ lɛ Diatessaron lɛ kɛtsɔɔ bɔ ni saji ni yɔɔ woji ejwɛ lɛ amli ni kɔɔ Yesu shihilɛ kɛ esɔɔmɔ lɛ he lɛ kɛ amɛhe kpãa gbee.

Wolo nɛɛ, ni ji Yesu—Gbɛ lɛ, Anɔkwale lɛ, Wala Lɛ hu efee nakai nɔŋŋ, shi efee lɛ jogbaŋŋ kɛmɔ shi po fe nakai. Nɔ hewɔ ji akɛ, amrɔ nɛɛ wɔnuɔ Yesu gbalɛi kɛ enɔkwɛmɔnii lɛ babaoo amlibaa shishi jogbaŋŋ. Niiashishinumɔ nɛɛ hãa nibii ni Yesu wie kɛ nibii ni efee lɛ feɔ faŋŋ kɛhãa wɔ, ni wɔnyɛɔ wɔtoɔ nibii ni tee nɔ lɛ anaa jogbaŋŋ. Kɛfata he lɛ, nibii ni atsa shi ana lɛ ehã saji komɛi efee faŋŋ, ni ehã ana nibii ni yɔɔ mɛi ni ŋma sane kpakpa lɛ ajwɛŋmɔ mli hu. Anɔkwa, yɛ saji lɛ ekomɛi agbɛfaŋ lɛ, mɔ ko mɔ ko nyɛŋ ato naa ni ená nɔmimaa akɛ nakai pɛpɛɛpɛ ni. Kɛ̃lɛ, wolo nɛɛ, ni ji Yesu—Gbɛ lɛ, Anɔkwale lɛ, Wala Lɛ eto saji lɛ anaa bɔ ni shishinumɔ yɔɔ he.

GBƐ LƐ, ANƆKWALE LƐ, WALA LƐ

Be ni okaneɔ wolo nɛɛ ní eŋɔɔ onaa lɛ, bɔɔ mɔdɛŋ ni ohiɛ akakpa sane otu ni yɔɔ mli kɛhã bo kɛ osuɔlɔi lɛ nɔ. Kaimɔ akɛ Yesu Kristo diɛŋtsɛ kɛɛ bɔfo Toma akɛ: “Miji gbɛ lɛ kɛ anɔkwale lɛ kɛ wala lɛ. Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.”Yohane 14:6.

Wolo nɛɛ, ni ji Yesu—Gbɛ lɛ, Anɔkwale lɛ, Wala Lɛ baaye ebua bo koni ona bɔ ni Yesu ji “gbɛ lɛ” lɛɛlɛŋ. Lɛ pɛ enɔ wɔbaanyɛ wɔtsɔ wɔsɔle wɔhã Yehowa Nyɔŋmɔ. Kɛfata he lɛ, Yesu pɛ nɔ wɔbaatsɔ wɔsaa wɔ kɛ Nyɔŋmɔ teŋ. (Yohane 16:23; Romabii 5:8) No hewɔ lɛ, Yesu nɔ wɔbaanyɛ wɔtsɔ wɔhã wekukpãa kpakpa ahi wɔ kɛ Nyɔŋmɔ teŋ.

Yesu ji “anɔkwale lɛ.” Ewie anɔkwale, ni ehi shi yɛ naa. Ehã gbalɛi babaoo ba mli, ni tsɔɔ akɛ “kɛtsɔ enɔ lɛ, amɛtsɔ ‘hɛɛ.’” (2 Korintobii 1:20; Yohane 1:14) Gbalɛi nɛɛ hãa wɔnaa nɔ titri ni etsuɔ koni ehã Nyɔŋmɔ yiŋtoo aba mli.Kpojiemɔ 19:10.

Agbɛnɛ hu, Yesu Kristo ji “wala lɛ.” Ekɛ elá kɛ ewala ni eye emuu lɛ hã akɛ kpɔmɔnɔ koni wɔná “wala diɛŋtsɛ lɛ,” ni ji “naanɔ wala.” (1 Timoteo 6:12, 19; Efesobii 1:7; 1 Yohane 1:7) Ebaatsɔ “wala” hu ehã mɛi akpekpei abɔ ni egboi, ejaakɛ ebaatee amɛ shi kɛba wala mli koni amɛnyɛ amɛhi shi kɛya naanɔ yɛ Paradeiso.Yohane 5:28, 29.

Esa akɛ wɔ fɛɛ wɔnu nitsumɔ ni Yesu tsuɔ koni Nyɔŋmɔ yiŋtoo aba mli lɛ shishi ni wɔjie hiɛsɔɔ kpo. Yaa nɔ okɛ miishɛɛ akase Yesu, ni ji “gbɛ lɛ, anɔkwale lɛ, kɛ wala lɛ” he nii babaoo.

Ekrokromɛi Hu Nɛ

Mɛni Ji Nyɔŋmɔ Yiŋtoo Kɛha Shikpɔŋ Lɛ?

Biblia lɛ tsɔɔ nɔ hewɔ ni Nyɔŋmɔ bɔ shikpɔŋ lɛ, be ni nɔnaa baaba naagbee, kɛ nɔ ni baaba shikpɔŋ lɛ kɛ mɛi ni yɔɔ nɔ lɛ anɔ.