Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Namɛi Feɔ Yehowa Suɔmɔnaa Nii Ŋmɛnɛ?

 NIKASEMƆ 18

Te Wɔfeɔ Tɛŋŋ Wɔyeɔ Wɔbuaa Wɔnyɛmimɛi ni Eyaje Haomɔ Mli?

Te Wɔfeɔ Tɛŋŋ Wɔyeɔ Wɔbuaa Wɔnyɛmimɛi ni Eyaje Haomɔ Mli?

Dominican Republic

Japan

Haiti

Kɛ́ adebɔɔ naa oshara ba lɛ, Yehowa Odasefoi toɔ gbɛjianɔ amrɔ nɔŋŋ ni amɛyeɔ amɛbuaa amɛnyɛmimɛi ni oshara lɛ enina amɛ lɛ. Nakai ni wɔfeɔ lɛ tsɔɔ akɛ wɔyɛ suɔmɔ diɛŋtsɛ kɛha wɔhe. (Yohane 13:34, 35; 1 Yohane 3:17, 18) Mɛɛ gbɛi anɔ wɔtsɔɔ wɔyeɔ wɔbuaa?

Wɔtsuɔ onia. Beni hɔmɔ ko ni naa wa ba Yudea lɛ, mra be mli Kristofoi ni yɔɔ Antiokia lɛ kɛ shika maje kɛyaye amɛbua amɛnyɛmimɛi Kristofoi lɛ. (Bɔfoi lɛ Asaji 11:27-30) Nakai nɔŋŋ hu kɛ́ wɔnu he akɛ wɔnyɛmimɛi ni yɔɔ je lɛŋ hei srɔtoi lɛ kɛ jaramɔ shihilɛ miikpe lɛ, wɔjɛɔ wɔsafoi lɛ amli wɔtsuɔ onia kɛmajeɔ koni akɛhe nibii ni he hiaa amɛ.—2 Korintobii 8:13-15.

Wɔyeɔ wɔbuaa yɛ gbɛi krokomɛi anɔ. Asafoŋ onukpai ni yɔɔ he ni oshara lɛ eba yɛ lɛ taoɔ asafoŋbii lɛ ateŋ mɔ fɛɛ mɔ sɛɛ gbɛ ni amɛkwɛɔ akɛ amɛyɛ shweshweeshwe lo. Ajinafoi akuu ni kɛ yelikɛbuamɔ haa lɛ kwɛɔ ni akɛ niyenii, nu ni mli tse, atadei, wɔɔhe, kɛ tsofafeemɔ ni sa haa. Odasefoi babaoo ni he esa yɛ nitsumɔi komɛi ni he baahia lɛ amli lɛ jɛɔ amɛsuɔmɔ mli ni amɛ diɛŋtsɛ amɛyaa hei nɛɛ ni amɛyayeɔ amɛbuaa loo amɛsaa shĩai kɛ Maŋtsɛyeli Asai ni efite lɛ. Ekomefeemɔ ni yɔɔ wɔteŋ lɛ kɛ niiashikpamɔ ni wɔná yɛ nitsumɔ ni wɔfeɔ ekome kɛtsuɔ lɛ mli lɛ haa wɔnyɛɔ wɔtoɔ gbɛjianɔ oya nɔŋŋ kɛ́ hiamɔ lɛ ba. Eyɛ mli akɛ wɔfeɔ “mɛi ni ji hemɔkɛyeli lɛ webii lɛ” ejurɔ moŋ, shi kɛ́ ehe bahia lɛ, wɔwaa mɛi krokomɛi hu ekɔɔɔ he eko jamɔ mli ni amɛyɔɔ.—Galatabii 6:10.

Wɔjɛɔ Ŋmalɛi lɛ amli wɔshɛjeɔ amɛmii. Miishɛjemɔ he hiaa mɛi ni oshara enina amɛ lɛ waa. Yɛ be ni tamɔ nɛkɛ mli lɛ, Yehowa ni ji “miishɛjemɔ fɛɛ Nyɔŋmɔ lɛ” woɔ wɔ hewalɛ. (2 Korintobii 1:3, 4) Wɔkɛ miishɛɛ gbaa mɛi ni eyaje oshara mli lɛ shiwoi ni yɔɔ Biblia lɛ mli lɛ, ni wɔhaa amɛnáa nɔmimaa akɛ etsɛŋ kwraa ni Nyɔŋmɔ Maŋtsɛyeli lɛ baajie osharai fɛɛ ni haa wɔpiŋɔ lɛ kɛya.—Kpojiemɔ 21:4.

  • Mɛni hewɔ Odasefoi nyɛɔ amɛtsuɔ nibii ahe nii oya nɔŋŋ kɛ́ oshara ba lɛ?

  • Mɛɛ Ŋmalɛ mli miishɛjemɔi wɔbaanyɛ wɔkɛha mɛi ni eje oshara mli lɛ?