Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Namɛi Feɔ Yehowa Suɔmɔnaa Nii Ŋmɛnɛ?

 NIKASEMƆ 2

Mɛni Hewɔ Atsɛɔ Wɔ Yehowa Odasefoi?

Mɛni Hewɔ Atsɛɔ Wɔ Yehowa Odasefoi?

Noa

Abraham kɛ Sara

Mose

Yesu Kristo

Mɛi babaoo susuɔ akɛ Yehowa Odasefoi ji jamɔ hee ko gbɛ́i. Kɛlɛ, nɔ ni fe afii 2,700 ni eho nɛ lɛ atsɛ anɔkwa Nyɔŋmɔ lɛ tsuji lɛ akɛ ‘edasefoi.’ (Yesaia 43:10-12) Dani afi 1931 lɛ baashɛ lɛ, no mli atsɛɔ wɔ Biblia Kaselɔi. Mɛni hewɔ wɔtsake wɔgbɛ́i lɛ ni wɔfee lɛ Yehowa Odasefoi lɛ?

Ehaa anaa Nyɔŋmɔ ni wɔjaa. Nyɔŋmɔ gbɛ́i ni ji Yehowa lɛ je kpo shii akpei abɔ yɛ Biblia lɛ mli yɛ blema wolokpoi ni akɛ niji ŋmala lɛ amli. Akɛ gbɛnaa gbɛ́i tamɔ Nuŋtsɔ loo Nyɔŋmɔ eye gbɛ́i nɛɛ najiaŋ yɛ Biblia shishitsɔɔmɔi babaoo amli. Kɛlɛ, anɔkwa Nyɔŋmɔ lɛ jie lɛ diɛŋtsɛ egbɛ́i Yehowa lɛ shi etsɔɔ Mose, ni ekɛɛ lɛ akɛ: “Enɛ ji migbɛ́i kɛyaa naanɔ.” (2 Mose 3:15) Etsɔ gbɛ nɛɛ nɔ eha ana akɛ esoro lɛ kwraa yɛ apasa nyɔŋmɔi fɛɛ ahe. Wɔshiɔ wɔtsitsi akɛ Nyɔŋmɔ gbɛ́i krɔŋkrɔŋ lɛ kã wɔnɔ.

Ehaa anaa nitsumɔ ni akɛwo wɔdɛŋ. Mɛi babaoo ni hi shi yɛ blema, kɛjɛ nuu anɔkwafo Habel yinɔ tɔ̃ɔ lɛ, ye hemɔkɛyeli ni amɛyɔɔ yɛ Yehowa mli lɛ he odase. Yɛ afii ohai abɔ ni eho lɛ mli lɛ, Noa, Abraham, Sara, Mose, David, kɛ mɛi krokomɛi bafata ‘odasefoi babaoo ni tamɔ atatu’ nɛɛ ahe. (Hebribii 11:4–12:1) Taakɛ mɔ aŋkro ko baanyɛ aye odase aha mɔ ko ni efeko efɔŋ ko yɛ saneyelihe lɛ, nakai nɔŋŋ wɔ hu wɔtswa wɔfai shi akɛ wɔbaaha mɛi ale anɔkwale ni kɔɔ Nyɔŋmɔ he lɛ.

Wɔkɛmiikase Yesu. Biblia lɛ tsɛɔ Yesu akɛ “odasefonyo anɔkwafo lɛ kɛ anɔkwayelɔ lɛ.” (Kpojiemɔ 3:14) Yesu diɛŋtsɛ kɛɛ akɛ ‘ejie Nyɔŋmɔ gbɛ́i lɛ shi etsɔɔ,’ ni etee nɔ ‘eye anɔkwale’ ni kɔɔ Nyɔŋmɔ he “lɛ he odase.” (Yohane 17:26; 18:37) No hewɔ lɛ, esa akɛ Kristo anɔkwa sɛɛnyiɛlɔi lɛ aha Yehowa gbɛ́i lɛ akã amɛnɔ ni amɛha mɛi ale gbɛ́i lɛ. Enɛ ji nɔ ni Yehowa Odasefoi bɔɔ mɔdɛŋ akɛ amɛbaafee.

  • Mɛni hewɔ Biblia Kaselɔi lɛ ŋɔ gbɛ́i Yehowa Odasefoi lɛ amɛfɔ̃ amɛnɔ?

  • Afii enyiɛ nɛ ni Yehowa ená odasefoi yɛ shikpɔŋ lɛ nɔ?

  • Namɔ ji Yehowa Odasefonyo ni fe fɛɛ?

Ekrokromɛi Hu Nɛ

Nyɔŋmɔ Gbɛ́i Lɛ—Ekɛ Nitsumɔ kɛ Eshishinumɔ

Ajie Nyɔŋmɔ gbɛ́i Yehowa lɛ kɛjɛ Biblia shishitsɔɔmɔi babaoo amli. Mɛni hewɔ? Ani ehe miihia ni akɛ Nyɔŋmɔ gbɛ́i lɛ atsu nii?