Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Oweku lɛ Baanyɛ Aná Miishɛɛ

 FÃ 8

Be ni Sane Fɔŋ ko Eba

Be ni Sane Fɔŋ ko Eba

“Nyɛmli filiɔ nyɛ, nyɛ ní ŋmɛnɛmɛ, kɛ́ ehia lɛ, nyɛyeɔ ŋkɔmɔ fioo ko yɛ kai srɔtoi amli lɛ.”—1 Petro 1:6

Eyɛ mli akɛ oobɔ mɔdɛŋ fɛɛ ni obaanyɛ koni miishɛɛ ahi ogbãla lɛ kɛ oweku lɛ mli moŋ, shi nibii komɛi ni okpaaa gbɛ baanyɛ aba ni ehã nakai feemɔ awa kɛhã bo. (Jajelɔ 9:12) Nyɔŋmɔ sumɔɔ wɔ, no hewɔ lɛ, ehã wɔ shishitoo mlai yɛ Ŋmalɛ lɛ mli ni baaye abua wɔ kɛ́ wɔkɛ shihilɛi ni mli wawai kpe. Kɛ́ okɛ shishitoo mlai ni nyiɛ sɛɛ nɛɛ tsu nii lɛ, ebaaye ebua bo kɛ oweku lɛ ni nyɛnyɛ nyɛkpee shihilɛ fɛɛ shihilɛ naa, ekɔɔɔ he eko bɔ ni ejaraa hã.

 1 OKƐ OHIƐ AFƆ̃ YEHOWA NƆ

NƆ NI BIBLIA LƐ KƐƆ: “Nyɛŋɔa nyɛhaomɔ fɛɛ nyɛfɔa enɔ, ejaakɛ lɛ ejwɛŋɔ nyɛnɔ.” (1 Petro 5:7) Hã ehi ojwɛŋmɔŋ be fɛɛ be akɛ jeee Nyɔŋmɔ ji mɔ ni hãa onaa nɔ lɛ. (Yakobo 1:13) Kɛ́ otee nɔ owaje wekukpaa ni yɔɔ okɛ lɛ teŋ lɛ, ebaaye ebua bo yɛ gbɛ ni hi fe fɛɛ nɔ. (Yesaia 41:10) Biblia lɛ kɛɔ akɛ: “Nyɛfɔsea nyɛtsui nyɛshwiea ehiɛ.”Lala 62:9.

Kɛfata he lɛ, kɛ́ okane Biblia lɛ ni okase daa gbi lɛ, no baaye abua bo ni otsɛ otsui oŋmɛ omli. Enɛ baahã ona bɔ ni Yehowa “shɛjeɔ wɔmii yɛ wɔmanehului lɛ fɛɛ mli” lɛ. (2 Korintobii 1:3, 4; Romabii 15:4) Ewo shi akɛ ebaahã oná “Nyɔŋmɔ hejɔlɛ ni fe jwɛŋmɔi fɛɛ lɛ.”Filipibii 4:6, 7, 13.

NƆ NI OBAANYƐ OFEE:

  • Sɔlemɔ ni Yehowa aye abua bo ni oto otsui shi kɛsusu nibii ahe jogbaŋŋ

  • Susumɔ nɔ fɛɛ nɔ ni obaanyɛ ofee yɛ shihilɛ lɛ he lɛ he, ni ohala amɛteŋ nɔ ni hi fe fɛɛ ni obaanyɛ otsu he nii

2 FEEMƆ NIBII NI BAAYE ABUA BO KƐ OWEKU LƐ

NƆ NI BIBLIA LƐ KƐƆ: “Jwɛŋmɔ ni hiɛ kã shi náa nilee, ni nilelɔ toi tiuɔ nilee sɛɛgbɛ.” (Abɛi 18:15, Ga Biblia hee) Bɔɔ mɔdɛŋ ni ole saji fɛɛ ni kɔɔ shihilɛ lɛ he. Okɛ oweku lɛ mli bii lɛ fɛɛ agba he sane. Bo amɛtoi koni ole nɔ ni he hiaa amɛteŋ mɔ fɛɛ mɔ.Abɛi 20:5.

Ni kɛ́ osuɔlɔ ko gbo hu? Kaahã efee bo hiɛgbele akɛ obaafó. Kaimɔ akɛ Yesu po “fó.” (Yohane 11:35; Jajelɔ 3:4) Kɛfata he lɛ, esa akɛ ojɔɔ ohe, ni oná wɔ kpakpa hu. (Jajelɔ 4:6) Enɛ baahã onyɛ okpee jaramɔ shihilɛ lɛ naa.

NƆ NI OBAANYƐ OFEE:

  • Okɛ oweku lɛ afɔ sanegbaa dani sane fɔŋ ko aba. Kɛ́ naagbai ba lɛ, ewaŋ kɛhaŋ amɛ akɛ amɛkɛ bo baagba sane

  • Okɛ mɛi ni kɛ shihilɛ ni tamɔ nakai ekpe pɛŋ lɛ agba sane

 3 KAATSI OHE KƐJE MƐI AHE

NƆ NI BIBLIA LƐ KƐƆ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi hã haomɔ be.” (Abɛi 17:17) Onanemɛi lɛ baasumɔ ni amɛye amɛbua bo, shi ekolɛ amɛleee nɔ ni sa akɛ amɛfee kɛwa bo. Kɛɛmɔ amɛ nɔ fɛɛ nɔ ni obaasumɔ ni amɛfee amɛhã bo. (Abɛi 12:25) Agbɛnɛ hu, hã mɛi ni nuɔ Biblia lɛ shishi lɛ aye abua bo. Gbɛtsɔɔmɔ ni amɛbaajɛ Biblia lɛ mli amɛkɛhã bo lɛ baaye abua bo.Yakobo 5:14.

Kɛ́ okɛ mɛi ni heɔ Nyɔŋmɔ nɔ amɛyeɔ lɛɛlɛŋ ní amɛkɛ amɛhiɛ fɔ̃ɔ eshiwoi anɔ lɛ bɔ daa lɛ, obaaná yelikɛbuamɔ ni he hiaa bo lɛ. Kɛ́ oye obua mɛi ni miishɛjemɔ he miihia amɛ lɛ, no hu baashɛje omii waa. Okɛ amɛ agba hemɔkɛyeli ni oyɔɔ yɛ Yehowa kɛ eshiwoi lɛ amli lɛ he sane. Kã he oye obua mɛi krokomɛi ni yelikɛbuamɔ he miihia amɛ lɛ, ni kaatsi ohe kɛmiije mɛi ni sumɔɔ bo ní amɛsusuɔ ohe lɛ ahe.Abɛi 18:1; 1 Korintobii 15:58.

NƆ NI OBAANYƐ OFEE:

  • Okɛ onaanyo jurɔ ko agba sane ni ohã eye ebua bo

  • Hã ele nibii pɔtɛi ni he hiaa bo, ni kaashiu lɛ nɔ ko nɔ

Ekrokromɛi Hu Nɛ

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

Mɛni kɛ efɔŋfeemɔ ba, ni mɛni hewɔ Nyɔŋmɔ eŋmɛ gbɛ ni eyaa nɔ lɛ? Ani nɔnaa baaba naagbee gbi ko?