Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Tsi Obɛŋkɛ Yehowa

 YITSO 9

‘Kristo ni Ji Nyɔŋmɔ Hewalɛ Lɛ’

‘Kristo ni Ji Nyɔŋmɔ Hewalɛ Lɛ’

1-3. (a) Mɛɛ niiashikpamɔ ko ní yɔɔ gbeyei waa kaselɔi lɛ ná yɛ Galilea Ŋshɔ lɛ hiɛ, ni mɛni Yesu fee? (b) Mɛni hewɔ atsɛɔ Yesu yɛ gbɛ ní ja nɔ akɛ “Kristo ni ji Nyɔŋmɔ hewalɛ [lɛ]”?

KASELƆI lɛ atsui fã waa. Amɛtá lɛlɛ mli kɛmiifo Galilea Ŋshɔ lɛ kɛkɛ ni trukaa ni ahum ko tswa kɛbanina amɛ. Ŋwanejee ko bɛ he akɛ amɛkɛ ahum ekpe aahu yɛ kpaakpo nɛɛ hiɛ dã—ejaakɛ, hii lɛ ateŋ mɛi komɛi ji wolɛi ní yɔɔ niiashikpamɔ waa. * (Mateo 4:18, 19) Shi ahum nɛɛ ji ‘ahum ni naa wa diɛŋtsɛ,’ ni etsɛɛɛ ni eha ŋshɔ lɛ hiɛ bɔi hamahama feemɔ. Hii lɛ bɔ mɔdɛŋ waa akɛ amɛaakudɔ lɛlɛ lɛ, shi ahum lɛ miihe aye amɛ nɔ kwraa. Ŋshɔkei ní nɔ kwɔlɔ “kumɔ wo lɛlɛ lɛ mli,” ni eha lɛlɛ lɛ bɔi yimɔ kɛ nu. Yɛ hoofeemɔ ní yaa nɔ lɛ fɛɛ sɛɛ lɛ, no mli lɛ Yesu ewɔ vii diɛŋtsɛ yɛ lɛlɛ lɛ sɛɛgbɛ, ejaakɛ etɔ lɛ waa yɛ asafo babaoo ní etsɔɔ amɛ nii nakai gbi lɛ hewɔ. Akɛni kaselɔi lɛ miishe gbeyei akɛ amɛbaanyɔ hewɔ lɛ, amɛyatsĩɛ lɛ, ni amɛkpa lɛ fai akɛ: “Nuntsɔ, heremɔ wɔyiwala, wɔmiilaaje!”—Marko 4:35-38; Mateo 8:23-25.

2 Yesu sheee gbeyei. Ekɛ hekɛnɔfɔɔ ní eye emuu kɛmɔ shi ŋã kɔɔyɔɔ lɛ kɛ ŋshɔ lɛ yi akɛ: “Bu onaa ní ofee diŋŋ.” Amrɔ nɔŋŋ kɛkɛ ni kɔɔyɔɔ lɛ kɛ ŋshɔ lɛ bo toi—ahum lɛ kpa tswaa, ni ŋshɔkei lɛ fɔ̃ɔ kuumɔ, ni “eŋmɛ dɛmm.” Agbɛnɛ gbeyei ko ní efɔɔɔ kaa mɔmɔ kaselɔi lɛ. Ni amɛkɛ amɛhe wie huhuuhu akɛ: “Namɔ po nɛ?” Yɛ anɔkwale mli lɛ, mɛɛ gbɔmɔ yɔɔ ní baanyɛ aŋã kɔɔyɔɔ kɛ ŋshɔ yi tamɔ bɔ ni ajajeɔ gbekɛ ko ní miikɔ jeŋba fɔŋ lɛ?—Marko 4:39-41; Mateo 8:26, 27.

 3 Shi Yesu jeee gbɔmɔ folo ko kɛkɛ. Yehowa jie ehewalɛ lɛ kpo yɛ egbɛfaŋ, kɛ agbɛnɛ hu, kɛtsɔ enɔ yɛ gbɛ̀i ní efɔɔɔ kaa nɔ. Bɔfo Paulo ní akɛ mumɔ tsirɛ lɛ lɛ tsɛ́ lɛ yɛ gbɛ ní ja nɔ akɛ “Kristo ni ji Nyɔŋmɔ hewalɛ [lɛ].” (1 Korintobii 1:24) Mɛɛ gbɛ̀i anɔ Nyɔŋmɔ hewalɛ lɛ jeɔ kpo yɛ Yesu mli yɛ? Ni te bɔ ni Yesu kɛ hewalɛ tsu nii eha lɛ baanyɛ asa wɔshihilɛ he eha tɛŋŋ?

Hewalɛ ní Nyɔŋmɔ Bi Koome lɛ Yɔɔ

4, 5. (a) Mɛɛ hewalɛ kɛ nɔyeli hegbɛ Yehowa kɛha e-Bi koome lɛ? (b) Awula Bi nɛɛ koni enyɛ etsu e-Tsɛ lɛ adebɔɔ mli yiŋtoi lɛ ahe nii yɛ mɛɛ gbɛ nɔ?

4 Susumɔ hewalɛ ní Yesu yɔɔ yɛ eshihilɛ mli dani ebatsɔ adesa lɛ he okwɛ. Yehowa kɛ lɛ diɛŋtsɛ “enaanɔ hewalɛ” lɛ tsu nii beni ebɔ e-Bi koome lɛ, mɔ ni abale lɛ yɛ sɛɛ mli akɛ Yesu Kristo lɛ. (Romabii 1:20; Kolosebii 1:15) Yɛ no sɛɛ lɛ, Yehowa kɛ hewalɛ kpele kɛ nɔyeli hegbɛ wo Bi nɛɛ dɛŋ, ni ekɛ nitsumɔ wo edɛŋ koni etsu E-debɔɔ mli yiŋtoi lɛ ahe nii. Biblia lɛ wieɔ Bi lɛ he akɛ: “Lɛ enɔ atsɔ̃ afee nibii fɛɛ, ni ashĩii lɛ afeee nɔ ko nɔ ko ni afee.”—Yohane 1:3.

5 Wɔbaanyɛ wɔnu bɔ ni nakai nitsumɔ lɛ da ha lɛ shishi bibioo pɛ kɛkɛ. Bo diɛŋtsɛ feemɔ hewalɛ ní he baahia ní akɛbɔ ŋwɛibɔfoi ní he wa waa lɛ akpekpei abɔ, kɛ jeŋ muu fɛɛ ní wɔnaa kɛ emli ŋulamii kushai akpekpei akpei abɔ, kɛ shikpɔŋ lɛ kɛ enɔ wala bɔɔ nii srɔtoi babaoo nɛɛ fɛɛ kɛba shihilɛ mli lɛ he mfoniri okwɛ. Bi koome lɛ nine shɛ hewalɛ ní fe fɛɛ yɛ jeŋ muu lɛ fɛɛ mli—ni ji Nyɔŋmɔ mumɔ krɔŋkrɔŋ lɛ nɔ, bɔni afee ní enyɛ etsu nakai nitsumɔi lɛ. Nɛkɛ Bi nɛɛ ná miishɛɛ kpele diɛŋtsɛ akɛ eji Nitsumɔ Ŋaalɔ, mɔ ni Yehowa kɛtsu nii ní ekɛbɔ nibii krokomɛi fɛɛ lɛ.—Abɛi 8:22-31.

6. Yɛ Yesu gbele yɛ shikpɔŋ nɔ kɛ eshitee lɛ sɛɛ lɛ, mɛɛ hewalɛ kɛ hegbɛ akɛha lɛ?

6 Ani Bi koome lɛ nine baanyɛ ashɛ hewalɛ kɛ nɔyeli hegbɛ babaoo nɔ? Yɛ Yesu gbele yɛ shikpɔŋ nɔ kɛ eshitee lɛ sɛɛ lɛ, ewie akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ.” (Mateo 28:18) Hɛɛ, aha Yesu nyɛmɔ kɛ hegbɛ koni ekɛ hewalɛ  atsu nii yɛ jeŋ muu lɛ fɛɛ mli. Ákɛ “maŋtsɛmɛi amaŋtsɛ kɛ nuntsɔmɛi anuntsɔ” lɛ, aha lɛ hegbɛ akɛ efo “nɔyeli fɛɛ kɛ hegbɛ fɛɛ kɛ hewalɛ fɛɛ sɛɛ”—nɔ ni anaa kɛ nɔ ni anaaa fɛɛ—ní teɔ shi woɔ e-Tsɛ lɛ. (Kpojiemɔ 19:16; 1 Korintobii 15:24-26) Nyɔŋmɔ ‘eshwɛɛɛ nɔ ko nɔ ko ní eŋɔtooo Yesu shishi’—ni ji akɛ, ja Yehowa diɛŋtsɛ pɛ kɛkɛ.—Hebribii 2:8; 1 Korintobii 15:27.

7. Mɛni hewɔ wɔbaanyɛ wɔná nɔmimaa akɛ Yesu kɛ hewalɛ ní Yehowa kɛha lɛ lɛ tsuŋ nii yɛ gbɛ fɔŋ nɔ kɔkɔɔkɔ lɛ?

7 Ani esa akɛ wɔhao wɔhe akɛ ekolɛ Yesu kɛ ehewalɛ lɛ baatsu nii yɛ gbɛ fɔŋ nɔ? Dabi kwraa! Yesu sumɔɔ e-Tsɛ lɛ lɛɛlɛŋ, ni efeeŋ nɔ ko ní esaaa ehiɛ kɔkɔɔkɔ. (Yohane 8:29; 14:31) Yesu le jogbaŋŋ akɛ Yehowa kɛ ehewalɛ akɛ ofe lɛ tsuuu nii yɛ gbɛ fɔŋ nɔ kɔkɔɔkɔ. Yesu diɛŋtsɛ kɛ ehiŋmɛii ena akɛ Yehowa taoɔ hegbɛi ni “ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.” (2 Kronika 16:9) Lɛɛlɛŋ, Yesu hu yɛ suɔmɔ ní e-Tsɛ yɔɔ kɛha adesai lɛ eko, no hewɔ lɛ wɔbaanyɛ wɔná hekɛnɔfɔɔ akɛ Yesu kɛ ehewalɛ lɛ baatsu nii yɛ gbɛ ní he yɔɔ sɛɛnamɔ nɔ be fɛɛ be. (Yohane 13:1) Yesu efee nɔkwɛmɔnɔ ní eye emuu efɔ̃ shi yɛ enɛ gbɛfaŋ. Nyɛhaa wɔsusua hewalɛ ní eyɔɔ beni eyɔɔ shikpɔŋ nɔ, kɛ bɔ ni akanya lɛ ní ekɛtsu nii eha lɛ he wɔkwɛa.

‘Eyɛ Hewalɛ yɛ Wiemɔ Mli’

8. Yɛ Yesu mufɔɔ lɛ sɛɛ lɛ, mɛni aha lɛ hewalɛ koni efee, ni te ekɛ ehewalɛ lɛ tsu nii eha tɛŋŋ?

8 Eka shi faŋŋ akɛ, Yesu efeee naakpɛɛ nii beni eji gbekɛ nuu, ní edaa yɛ Nazaret lɛ. Shi enɛ tsake beni abaptisi lɛ yɛ afi 29 Ŋ.B. sɛɛ, beni eye aaafee afii 30 lɛ. (Luka 3:21-23) Biblia lɛ kɛɔ wɔ akɛ: “Nyɔŋmɔ ŋɔ Mumɔ krɔŋkrɔŋ kɛ hewalɛ efɔ Yesu ni jɛ Nazaret lɛ mu, ni ekpaa shi efeɔ ejurɔ ni etsáa mɛi fɛɛ ní abonsam haoɔ amɛ lɛ.” (Bɔfoi lɛ Asaji 10:38) “Efeɔ ejurɔ”—ani no etsɔɔɔ akɛ Yesu kɛ ehewalɛ lɛ tsu nii yɛ gbɛ kpakpa nɔ? Yɛ emufɔɔ lɛ sɛɛ lɛ, ebatsɔ “gbalɔ ni yɔɔ hewalɛ yɛ nitsumɔ kɛ wiemɔ mli.”—Luka 24:19.

9-11. (a) Nɛgbɛ Yesu tsu enitsɔɔmɔ lɛ mli babaoo yɛ, ni mɛɛ kaa ekɛkpe? (b) Mɛni hewɔ gbɛ ní Yesu tsɔ nɔ etsɔɔ nii lɛ ha asafoi lɛ ahe jɔ̃ amɛhe lɛ?

 9 Yesu ná hewalɛ yɛ wiemɔ mli yɛ mɛɛ gbɛ nɔ? Bei pii lɛ, etsɔɔ nii kpetekplee yɛ agbo naa—yɛ kpaakpoi anaa kɛ gɔji amasɛi, yɛ gbɛjegbɛi ahe kɛ jarai anɔ hu. (Marko 6:53-56; Luka 5:1-3; 13:26) Eji ewiemɔi lɛ eteee mɔ miishɛɛ shi kulɛ, etoibolɔi lɛ baashi lɛ amɛya ni amɛboŋ lɛ toi. Yɛ yinɔ ní tsɔ woji akalamɔ be lɛ hiɛ lɛ, esa akɛ toibolɔi ní hiɛ sɔɔ etsɔɔmɔi lɛ kɛ ewiemɔi lɛ ato amɛjwɛŋmɔ kɛ amɛtsui mli. No hewɔ lɛ ehe bahia ní Yesu nitsɔɔmɔ lɛ afee nɔ ni yɔɔ miishɛɛ diɛŋtsɛ, ní eshishinumɔ yɔɔ faŋŋ, ní anyɛɔ akaiɔ yɛ gbɛ ní waaa nɔ. Shi kaa nɛɛ jeee naagba ko kwraa kɛha Yesu. Ákɛ nɔkwɛmɔnɔ lɛ, susumɔ e-Gɔŋ nɔ Shiɛmɔ lɛ he okwɛ.

10 Gbi ko leebi yɛ afi 31 Ŋ.B. shishijee gbɛ lɛ, asafo babaoo ko bua amɛhe naa yɛ gɔŋ ko he yɛ Galilea Ŋshɔ lɛ naa. Amɛteŋ mɛi komɛi jɛ Yudea kɛ Yerusalem tɔ̃ɔ, aaafee kilomitai 100 kɛmiishɛ 110 jɛkɛmɔ. Mɛi krokomɛi hu jɛ ŋshɔnaa shikpɔji ní ji Tiro kɛ Zidon ní yɔɔ kooyigbɛ lɛ anɔ kɛba. Helatsɛmɛi pii tsi amɛbɛŋkɛ Yesu koni amɛta ehe, ni etsá amɛ fɛɛ. Beni mɔ kome folo po bɛ amɛteŋ dɔŋŋ ní he miiye kɛ hela ko ní mli wa lɛ, kɛkɛ ni ebɔi amɛ nitsɔɔmɔ agbɛnɛ. (Luka 6:17-19) Beni ewie egbe naa yɛ sɛɛ mli be ko lɛ, nɔ ni amɛnu lɛ ha amɛnaa kpɛ amɛhe waa. Mɛni hewɔ?

11 Afii komɛi asɛɛ lɛ, mɔ ko ní nu nakai shiɛmɔ lɛ ŋma akɛ: “Mɛi lɛ ahe jɔ̃ amɛhe yɛ enitsɔɔmɔ lɛ hewɔ; ejaakɛ etsɔɔ amɛ nii akɛ mɔ ko ni yɔɔ hegbɛ.” (Mateo 7:28, 29) Yesu wie kɛ hewalɛ ko ní amɛnyɛ amɛnu he. Edamɔ Nyɔŋmɔ najiaŋ ewie, ni ekɛ hegbɛ ní Nyɔŋmɔ Wiemɔ lɛ yɔɔ lɛ fi enitsɔɔmɔ lɛ sɛɛ. (Yohane 7:16) Yesu wiemɔi yɛ faŋŋ, ni eŋaawoi kɔneɔ mɔ yiŋ, ni anyɛɛɛ aje esane naatsɔɔmɔi ahe ŋwane. Ewiemɔi lɛ shɛ saji amli otii ní he hiaa waa lɛ kɛ etoibolɔi lɛ atsuii hu ahe. Etsɔɔ amɛ bɔ ni amɛaafee ní amɛná miishɛɛ, bɔ ni asɔleɔ, bɔ  ni amɛaafee amɛtao Nyɔŋmɔ Maŋtsɛyeli lɛ, kɛ bɔ ni amɛaafee amɛná wɔsɛɛ be ni yɔɔ shweshweeshwe. (Mateo 5:3–7:27) Ewiemɔi lɛ tsĩɛ mɛi ni anɔkwale kɛ jalɛ he hɔmɔ yeɔ amɛ lɛ atsuii ahiɛ. Gbɔmɛi ní tamɔ nɛkɛ jɛ amɛsuɔmɔ mli ‘amɛkwá’ amɛ diɛŋtsɛ amɛhe ni amɛshi nɔ fɛɛ nɔ koni amɛbanyiɛ esɛɛ. (Mateo 16:24; Luka 5:10, 11) Kwɛ hewalɛ ní Yesu wiemɔi lɛ yɔɔ lɛ he odaseyeli ní enɛ ji!

‘Eyɛ Hewalɛ yɛ Nitsumɔ Mli’

12, 13. Yesu ‘yɛ hewalɛ yɛ nitsumɔ mli’ yɛ mɛɛ shishinumɔ naa, ni te enaakpɛɛ nii lɛ yɔɔ srɔtoi babaoo ha tɛŋŋ?

12 Yesu ‘yɛ hewalɛ yɛ nitsumɔ mli’ hu. (Luka 24:19) Sanekpakpai lɛ bɔɔ naakpɛɛ nii pɔtɛɛ ní fá fe 30 ní efee—fɛɛ yɛ ‘Yehowa hewalɛ mli’ lɛ ahe amaniɛ. * (Luka 5:17) Yesu naakpɛɛ nii lɛ sa mɛi akpei abɔ ashihilɛ he. Naakpɛɛ nii enyɔ pɛ—ni ji hii 5,000 kɛ sɛɛ mli lɛ hii 4,000 ní elɛ amɛ, ní “soro yei kɛ gbekɛbii” lɛ—kɔɔ asafo babaoo ní ekolɛ amɛyifalɛ baashɛ mɛi 20,000 he!—Mateo 14:13-21; 15:32-38.

“Amɛna Yesu nyiɛ ŋshɔ lɛ hiɛ”

13 Yesu naakpɛɛ nii lɛ yɛ srɔtoi babaoo diɛŋtsɛ. Eyɛ hegbɛ yɛ daimonioi anɔ, ni efamɔɔ amɛ ní etɔɔɔ lɛ kwraa. (Luka 9:37-43) Eyɛ adebɔɔ mli nibii anɔ hewalɛ, ni eha nu tsɔ wein. (Yohane 2:1-11) Enyiɛ Galilea Ŋshɔ ní kɔɔyɔɔ tswaa waa yɛ hiɛ lɛ nɔ, ni efee ekaselɔi lɛ naakpɛɛ. (Yohane 6:18, 19) Eyɛ hewalɛ yɛ helai anɔ, ni etsáa gbɔmɔtso lɛ he nibii ní tɔmɔi yɔɔ he lɛ, kɛ helai ní ehiii tsamɔ, kɛ helai ní kɛ mɔ wala woɔ oshara mli lɛ po. (Marko 3:1-5; Yohane 4:46-54) Etsuɔ tsamɔi nɛɛ ahe nii yɛ gbɛ̀i srɔtoi anɔ. Ejɛ shɔŋŋ etsá mɛi komɛi, yɛ be mli ní mɛi krokomɛi lɛ nuɔ he beni Yesu taa amɛhe diɛŋtsɛ lɛ. (Mateo 8:2, 3, 5-13) Etsá mɛi komɛi amrɔ nɔŋŋ, shi mɛi krokomɛi lɛ, fiofio.—Marko 8:22-25; Luka 8:43, 44.

14. Mɛɛ shihilɛi ashishi Yesu tsɔɔ yɛ akɛ eyɛ hewalɛ ní ekɛaajie gbele kwraa lɛ?

 14 Nɔ ni sa kadimɔ waa ji akɛ, Yesu yɛ hewalɛ ní ekɛaajie gbele. Yɛ bei srɔtoi etɛ ní aŋmala ashwie shi mli lɛ, etée gbohii ashi, ekɛ gbekɛ yoo ko ní eye afii 12 ku sɛɛ eha efɔlɔi, kɛ yoo okulafo ko bi kome pɛ ní eyɔɔ, kɛ nyɛmimɛi yei komɛi anyɛmi nuu ní amɛsumɔɔ esane waa lɛ. (Luka 7:11-15; 8:49-56; Yohane 11:38-44) Shihilɛ ko kwraa efeee nɔ ni wa fe nine. Etée gbekɛ yoo ko ní eye afii 12 lɛ shi yɛ egbele saa nɔ beni egbo lɛ sɛɛ nɔŋŋ. Ŋwanejee ko bɛ he akɛ etée yoo okulafo lɛ binuu lɛ shi kɛjɛ gbonyo adeka lɛ mli, gbi ní egbo lɛ nɔŋŋ. Ni etée Lazaro shi kɛjɛ gbonyo bu lɛ mli beni egbo gbii ejwɛ sɔŋŋ sɛɛ.

Hewalɛ kɛ Nitsumɔ yɛ Gbɛ ní Pɛsɛmkunya Bɛ Mli, ní Jieɔ Sɛɛyoomɔ kɛ Mɔ Hesusumɔ Kpo

15, 16. Mɛɛ odaseyeli yɔɔ ní tsɔɔ akɛ Yesu efeee pɛsɛmkunya yɛ ehewalɛ lɛ kɛ nitsumɔ mli?

15 Ani obaanyɛ ofee bɔ ni kulɛ akɛ Yesu hegbɛ lɛ baatsu nii yɛ gbɛ fɔŋ nɔ kɛji akɛwo nɔyelɔ ko ní yeee emuu dɛŋ lɛ he mfoniri okwɛ? Shi Yesu efeee esha ko. (1 Petro 2:22) Eŋmɛɛɛ gbɛ ní pɛsɛmkunya, hiɛnyam taomɔ, kɛ hiɛjoomɔ ní tsirɛɔ adesai ní yeee emuu lɛ ní amɛkɛ amɛhewalɛ tsuɔ nii kɛyeɔ mɛi krokomɛi awui lɛ awo ehe muji.

16 Yesu efeee pɛsɛmkunya yɛ ehewalɛ lɛ kɛ nitsumɔ mli, ni ekɛtsuuu nii kɛhaaa lɛ diɛŋtsɛ esɛɛnamɔ. Beni hɔmɔ yeɔ lɛ lɛ, ekpoo akɛ eeeha tɛi atsɔmɔ aboloo koni eye. (Mateo 4:1-4) Heloonaa nibii fioo ní eyɔɔ lɛ ji odaseyeli ní tsɔɔ akɛ ekɛ ehewalɛ lɛ tsuuu nii kɛhaaa esɛɛnamɔ yɛ heloonaa nibii agbɛfaŋ. (Mateo 8:20) Odaseyeli yɛ lolo ní tsɔɔ akɛ ehewalɛ nitsumɔi lɛ jɛɛɛ pɛsɛmkunya kanyamɔi amli. Kɛ́ eefee naakpɛɛ nibii lɛ, ekɛ ehe shãa afɔle ní ekɛfeɔ nakai. Beni etsá mɛi ní he yeɔ lɛ, hewalɛ je kpo kɛjɛ emli. Enu hewalɛ ní je kpo kɛjɛ emli nɛɛ he, yɛ helatsamɔ kome pɛ po mli. (Marko 5:25-34) Ni kɛlɛ, eha gbɔmɛi asafo babaoo ta ehe, ni etsá amɛhelai lɛ. (Luka 6:19) Mɛɛ mumɔ ní pɛsɛmkunya bɛ mli nɛ!

17. Yesu tsɔɔ akɛ ekɛ ehewalɛ lɛ tsuɔ nii yɛ sɛɛyoomɔ mli yɛ mɛɛ gbɛ nɔ?

 17 Yesu kɛ ehewalɛ lɛ tsu nii yɛ sɛɛyoomɔ mli. Efeee hewalɛ nitsumɔi lɛ eko kwraa akɛ nii ní ekɛmiitsɔɔ faŋŋ ní mɛi ana loo akɛ nikwɛmɔ nii ní yiŋtoo bɛ he. (Mateo 4:5-7) Ekpɛlɛɛɛ akɛ eeefee okadii ní ekɛtsu nii ní Herode taoɔ ekwɛ, ní jɛ kanyamɔ fɔŋ mli lɛ he nii. (Luka 23:8, 9) Yɛ nɔ̃ najiaŋ ní eeetswa ehewalɛ lɛ he adafi lɛ, bei pii lɛ, Yesu kɛɔ mɛi ní etsáa amɛ lɛ ní amɛkagba mɔ ko mɔ ko. (Marko 5:43; 7:36) Esumɔɔɔ ní gbɔmɛi adamɔ ehe amaniɛbɔi ní baaje kpo hoo lɛ anɔ ní amɛmu ehe saji anaa yɛ gbɛ̀i ní ejaaa nɔ.—Mateo 12:15-19.

18-20. (a) Mɛni ná bɔ ni Yesu kɛ ehewalɛ lɛ tsu nii eha lɛ nɔ hewalɛ? (b) Te onuɔ gbɛ ní Yesu tsɔ nɔ etsá nuu toimulɔ ko eha lɛ he ohaa tɛŋŋ?

18 Esoro nɛkɛ nuu ní yɔɔ hewalɛ, ni ji Yesu nɛɛ kwraa yɛ nakai nɔyelɔi ní kɛ hewalɛ etsu nii kɛ yitsoŋwalɛ, ní haa amɛkuɔ amɛhiɛ amɛshwieɔ mɛi krokomɛi ahiamɔ nii kɛ amanehului anɔ lɛ ahe. Yesu susuɔ gbɔmɛi ahe. Gbɔmɛi ní naa amanehulu, ní ena amɛ lɛ po kɛkɛ sa ehe waa aahu akɛ no kanya lɛ ni etsu amɛmanehulu lɛ he nii. (Mateo 14:14) Esusuɔ amɛhenumɔi kɛ hiamɔ nii ahe, ni musuŋtsɔlɛ henumɔ nɛɛ ná bɔ ni ekɛ ehewalɛ lɛ tsu nii eha lɛ nɔ hewalɛ. Anaa enɛ he nɔkwɛmɔnɔ ko ní kanyaa mɔ yɛ Marko 7:31-37 lɛ.

19 Yɛ nɛkɛ be nɛɛ mli lɛ, gbɔmɛi babaoo diɛŋtsɛ na Yesu ni amɛkɛ mɛi babaoo ní he yeɔ lɛ ba eŋɔɔ, ni etsá amɛ fɛɛ. (Mateo 15:29, 30) Shi Yesu hala nuu pɔtɛɛ ko ni egbala ejwɛŋmɔ kɛba enɔ yɛ gbɛ krɛdɛɛ nɔ. Nuu lɛ emu toi, ni enyɛɛɛ ewie jogbaŋŋ hu. Ekolɛ Yesu yɔse gbeyeishemɔ loo hiɛgbele krɛdɛɛ ní yɔɔ nuu nɛɛ he lɛ. Yesu jɛ mɔ hesusumɔ mli ekɛ nuu lɛ tee afã gbɛ—kɛjɛ asafo lɛ teŋ kwraa—kɛtee teemɔhe ko. Kɛkɛ ni Yesu fee okadii komɛi etsɔɔ nuu lɛ ni ekɛtsɔɔ lɛ nɔ ni ebaafee lɛ. “Eŋɔ ewaobii ewo etoii amli, ni etsɛ̃ lajɔ̃ ekɛsa elilɛi he.” *  (Marko 7:33) No sɛɛ lɛ, Yesu kwɛ ŋwɛi ní emu waa kɛfee sɔlemɔ he okadi ko. Nɛkɛ nifeemɔi nɛɛ baakɛɛ nuu lɛ akɛ, ‘Nɔ ni mibafee maha bo lɛ jɛ hewalɛ ní jɛ Nyɔŋmɔ ŋɔɔ lɛ mli.’ Yɛ naagbee lɛ, Yesu kɛɛ: “Gbelemɔ.” (Marko 7:34) Kɛkɛ ni nuu lɛ toii gbele, ni ebɔi wiemɔ jogbaŋŋ.

20 Kwɛ bɔ ni henumɔ yɔɔ mli akɛ wɔɔsusu he akɛ kɛ́ Yesu kɛ hewalɛ ní Nyɔŋmɔ kɛha lɛ lɛ miitsá mɛi ní naa amanehulu lɛ po lɛ, ejieɔ musuŋtsɔlɛ kpo yɛ amɛhenumɔi ahe! Ani ewooo wɔ hewalɛ akɛ wɔɔle akɛ Yehowa kɛ Mesia Maŋtsɛyeli lɛ ewo Nɔyelɔ ní yɔɔ musuŋtsɔlɛ, ní susuɔ mɔ he tamɔ nɛkɛ lɛ dɛŋ?

Nibii ní Baaba lɛ Ahe Okadi

21, 22. (a) Yesu naakpɛɛ nii lɛ feɔ mɛni he okadi? (b) Akɛni Yesu nyɛɔ ekudɔɔ adebɔɔ mli hewalɛi lɛ hewɔ lɛ, mɛni wɔbaanyɛ wɔkpa gbɛ yɛ e-Maŋtsɛyeli nɔyeli lɛ mli?

21 Hewalɛ nitsumɔi ní Yesu tsu yɛ shikpɔŋ nɔ lɛ ji jɔɔmɔi wuji ní baaba yɛ emaŋtsɛyeli nɔyeli lɛ shishi lɛ he okadii ní atsɔɔ hiɛ anaa. Yesu baatsu naakpɛɛ nitsumɔ ekoŋŋ, yɛ Nyɔŋmɔ jeŋ hee lɛ mli—shi ebaafee enɛ yɛ jeŋ fɛɛ! Susumɔ gbɛkpamɔi ní yɔɔ miishɛɛ ní jwere wɔhiɛ lɛ ekomɛi ahe okwɛ.

22 Yesu baasaa shikpɔŋ lɛ nɔ nibii kɛba shihilɛ ní ŋmɛɔ pɛpɛɛpɛ mli ekoŋŋ. Kaimɔ akɛ eha ahum ko ní naa wa fɔ̃ɔ tswaa ni ekɛfee bɔ ni enyɛɔ ekudɔɔ adebɔɔ mli hewalɛi lɛ he mfoniri. Belɛ, eka shi faŋŋ akɛ, yɛ Kristo Maŋtsɛyeli nɔyeli lɛ shishi lɛ, ehe ehiaŋ ní adesai ashe gbeyei akɛ lasuogbelei, shikpɔŋhosomɔi, lasu gɔji afɛmɔi, loo adebɔɔ mli osharai krokomɛi baaye amɛ awui. Akɛni Yesu ji Nitsumɔ Ŋaalɔ ní Yehowa kɛ lɛ tsu nii ní ekɛbɔ shikpɔŋ lɛ kɛ wala fɛɛ ní yɔɔ nɔ lɛ hewɔ lɛ, enuɔ bɔ ni abɔ shikpɔŋ lɛ aha lɛ shishi jogbaŋŋ diɛŋtsɛ. Ele bɔ ni eeefee ní ekɛ enɔ nibii lɛ atsu nii yɛ gbɛ kpakpa nɔ. Abaatsake shikpɔŋ muu nɛɛ fɛɛ ni ebaatsɔ Paradeiso, yɛ enɔyeli lɛ mli.—Luka 23:43.

23. Ákɛ Maŋtsɛ lɛ, Yesu baatsu adesai ahiamɔ nii ahe nii yɛ mɛɛ gbɛ nɔ?

23 Shi adesai ahiamɔ nii hu? Bɔ ni Yesu nyɛ ekɛ niyenii fioo ko pɛ tsu nii ní ekɛlɛ mɛi akpei abɔ ní amɛtɔrɔ jogbaŋŋ lɛ  maa nɔ mi kɛhaa wɔ akɛ enɔyeli lɛ baajie hɔmɔ kɛya kwraa. Yɛ anɔkwale mli lɛ, niyenii babaoo ní abaaja lɛ jogbaŋŋ hu lɛ, baaha hɔmɔ sɛɛ afo kɛya naanɔ. (Lala 72:16) Hewalɛ ní eyɔɔ yɛ helai anɔ lɛ kɛɔ wɔ akɛ ebaatsá helatsɛmɛi, shwilafoi, toimulɔi, kpajelɔi, kɛ akpakei fɛɛ—ebaatsá amɛ kwraa kɛmɔ shi. (Yesaia 33:24; 35:5, 6) Nyɛmɔ ní eyɔɔ ní enyɛ ekɛtee gbohii ashi lɛ maa nɔ mi akɛ hewalɛ ní ekɛaatee gbɔmɛi akpekpei abɔ ní e-Tsɛ lɛ yɔɔ he miishɛɛ akɛ eeekai amɛ lɛ ashi ekoŋŋ lɛ fata hewalɛ ní eyɔɔ akɛ ŋwɛi Maŋtsɛ lɛ he.—Yohane 5:28, 29.

24. Yɛ be mli ni wɔsusuɔ Yesu hewalɛ lɛ he lɛ, mɛni esa akɛ wɔkai, ni mɛni hewɔ?

24 Yɛ be mli ni wɔsusuɔ Yesu hewalɛ lɛ he lɛ, nyɛhaa wɔkaia akɛ nɛkɛ Bi nɛɛ kaseɔ e-Tsɛ jogbaŋŋ kɛmɔɔ shi. (Yohane 14:9) Enɛ hewɔ lɛ, bɔ ni Yesu kɛ hewalɛ tsuɔ nii ehaa lɛ haa wɔnáa bɔ ni Yehowa kɛ hewalɛ tsuɔ nii ehaa lɛ he shishinumɔ ni yɔɔ faŋŋ. Ákɛ nɔkwɛmɔnɔ lɛ, susumɔ mlihilɛ gbɛ ní Yesu tsɔ nɔ etsá kpitiyelɔ ko lɛ he okwɛ. Yesu musuŋ tsɔ lɛ, ni eta nuu lɛ he ni ekɛɛ: “Miisumɔ.” (Marko 1:40-42) Enɛ tsɔɔ akɛ Yehowa miitsɔ saji ní tamɔ enɛɛmɛi anɔ eekɛɛ wɔ akɛ, ‘Bɔ ni mikɛ mihewalɛ lɛ tsuɔ nii mihaa nɛ!’ Ani enɛ tsirɛɛɛ bo ní ojie wɔ-Nyɔŋmɔ ofe lɛ yi, ní oda lɛ shi akɛ ekɛ ehewalɛ lɛ tsuɔ nii yɛ gbɛ ní suɔmɔ yɔɔ mli tamɔ nɛkɛ nɔ?

^ kk. 1 Ahum fɔɔ tswaa trukaa yɛ Galilea Ŋshɔ lɛ hiɛ. Bɔ ni ŋshɔ lɛ kwɔlɛ baa shi (ní ŋshɔ hiɛ kwɔ fe lɛ aaashɛ mitai 200) hewɔ lɛ, kɔɔyɔɔ lɛ mli dɔɔ fioo yɛ ŋshɔ lɛ hiɛ fe hei krokomɛi ní bɔle lɛ kɛkpe lɛ, ni enɛ kɛ basabasafeemɔ baa kɔɔyɔɔ lɛ mli. Kɔɔyɔɔ ní naa wa waa tswaa kɛ foi kɛbaa Yordan Jɔɔ lɛ mli kɛjɛɔ Hermon Gɔŋ lɛ, ní yɔɔ kooyigbɛ lɛ nɔ. Be kome mli dioofeemɔ lɛ baanyɛ atsake nɔŋŋ ní etsɔ ahum ní miitswa waa yɛ be fioo sɛɛ.

^ kk. 12 Kɛfata he lɛ, bei komɛi lɛ, Sanekpakpai lɛ buaa naakpɛɛ nii babaoo anaa, yɛ sane mlitsɔɔmɔ kome mli. Ákɛ nɔkwɛmɔnɔ lɛ, be ko lɛ, “maŋ muu lɛ fɛɛ” ba amɛbana lɛ, ni etsá mɛi ní he yeɔ lɛ ateŋ “mɛi pii.”—Marko 1:32-34.

^ kk. 19 Lajɔ̃ tsɛ̃mɔ ji gbɛ loo okadi ní atsɔɔ nɔ atsáa mɔ, ní Yudafoi kɛ Jeŋmajiaŋbii fɛɛ kpɛlɛɔ nɔ, ni abɔ lajɔ̃ ní akɛtsuɔ nii yɛ tsamɔi amli lɛ ahe amaniɛ yɛ rabifoi lɛ aniŋmaai amli. Ekolɛ Yesu tsɛ̃ lajɔ̃ lɛ koni ekɛtsɔɔ nuu lɛ kɛkɛ akɛ ebaatsá lɛ. Bɔ fɛɛ bɔ ni sane lɛ ji lɛ, Yesu kɛ elajɔ̃ lɛ tsuuu nii akɛ adebɔɔ naa nii ní helatsamɔ hewalɛ yɔɔ mli.

Ekrokromɛi Hu Nɛ

BUU-MƆƆ (NIKASEMƆ NƆ)

“Omaŋtsɛyeli lɛ Aba”—Shi Mɛɛ Be?

Mɛni hewɔ wɔyɔɔ nɔmimaa akɛ etsɛŋ ni Maŋtsɛ ni Nyɔŋmɔ ehala lɛ baaha afee Nyɔŋmɔ suɔmɔnaa nii yɛ shikpɔŋ lɛ nɔ fɛɛ lɛ?