Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Tsi Obɛŋkɛ Yehowa

 YITSO 30

“Nyɛnyiɛa yɛ Suɔmɔ Mli”

“Nyɛnyiɛa yɛ Suɔmɔ Mli”

1-3. Kɛ́ wɔkase Yehowa suɔmɔ kpojiemɔ lɛ he nɔkwɛmɔnɔ lɛ, mɛni jɛɔ mli kɛbaa?

“NƆ̃ HAMƆ mli yɛ miishɛɛ babaoo fe hemɔ.” (Bɔfoi lɛ Asaji 20:35, NW) Yesu wiemɔi nɛɛ maa anɔkwale ni he hiaa nɛɛ nɔ mi: Nyɔmɔwoo yɛ suɔmɔ ni pɛsɛmkunya bɛ mli lɛ mli. Eyɛ mli akɛ miishɛɛ babaoo yɛ suɔmɔ hemɔ mli moŋ, shi miishɛɛ ni fe no yɛ suɔmɔ ní aaaha, loo aaajie kpo atsɔɔ mɛi krokomɛi lɛ mli.

2 Mɔ ko bɛ ni le enɛ jogbaŋŋ fe wɔŋwɛi Tsɛ lɛ. Taakɛ wɔna yɛ fã nɛɛ mli yitsei ni tsɔ hiɛ lɛ amli lɛ, Yehowa ji suɔmɔ he nɔkwɛmɔnɔ ni fe fɛɛ. Mɔ ko bɛ ni ejie suɔmɔ kpo yɛ gbɛ ni da nɔ loo be kakadaŋŋ mli fe lɛ. Belɛ, ani eyɛ naakpɛɛ akɛ atsɛɔ Yehowa akɛ ‘miishɛɛ Nyɔŋmɔ lɛ’?—1 Timoteo 1:11.

3 Wɔ-Nyɔŋmɔ ni yɔɔ suɔmɔ lɛ miisumɔ ni wɔbɔ mɔdɛŋ ni wɔtamɔ lɛ, titri lɛ, yɛ suɔmɔ ni wɔɔjie lɛ kpo lɛ mli. Efesobii 5:1, 2 gbaa wɔ akɛ: “Nyɛfea Nyɔŋmɔ kaselɔi, tamɔ bii ni asumɔɔ, ni nyɛnyiɛa yɛ suɔmɔ mli.” Kɛ́ wɔkase Yehowa suɔmɔ kpojiemɔ lɛ he nɔkwɛmɔnɔ lɛ, wɔnáa miishɛɛ kpele ni jɛɔ nɔ̃ hamɔ mli kɛbaa lɛ mli niiashikpamɔ. Wɔnáa tsui ni nyɔɔ mɔ mli akɛ wɔɔle akɛ wɔmiifee nii ni saa Yehowa hiɛ, ejaakɛ e-Wiemɔ lɛ woɔ wɔ hewalɛ koni ‘wɔsumɔ wɔhe.’ (Romabii 13:8) Shi yiŋtoi krokomɛi hu yɛ lolo ni no hewɔ lɛ, esa akɛ ‘wɔya nɔ wɔnyiɛ yɛ suɔmɔ mli.’

Nɔ Hewɔ ni Suɔmɔ He Hiaa

4, 5. Mɛni hewɔ ehe hiaa ni wɔjɛ suɔmɔ mli wɔjie he-kɛ-afɔleshaa kpo wɔtsɔɔ nanemɛi heyelilɔi lɛ?

4 Mɛni hewɔ ehe hiaa ni wɔjie suɔmɔ kpo wɔtsɔɔ wɔnanemɛi heyelilɔi lɛ? Yɛ kukufoo mli lɛ, suɔmɔ ji anɔkwa Kristojamɔ su titri. Kɛ́ wɔbɛ suɔmɔ lɛ, wɔnyɛŋ wɔná wɔkɛ wɔnanemɛi Kristofoi ateŋ wekukpaa ni mli wa, ni nɔ ni fe fɛɛ lɛ, wɔjara waŋ  kwraa yɛ Yehowa hiɛ. Susumɔ bɔ ni Nyɔŋmɔ Wiemɔ lɛ maa anɔkwalei nɛɛ anɔ mi lɛ he okwɛ.

5 Yɛ Yesu shikpɔŋ nɔ shihilɛ lɛ naagbee gbɛkɛ lɛ mli lɛ, ekɛɛ esɛɛnyiɛlɔi lɛ akɛ: “Kitã hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:34, 35) “Taakɛ bɔ ni misumɔ nyɛ lɛ”—hɛɛ, aafã wɔ koni wɔjie suɔmɔ ni Yesu jie lɛ kpo lɛ eko kpo. Yɛ Yitso 29 lɛ mli lɛ, wɔna akɛ Yesu fee he-kɛ-afɔleshaa suɔmɔ ni nɔ bɛ he nɔkwɛmɔnɔ, ni ekɛ mɛi ahiamɔ nii kɛ nɔ ni amɛsumɔɔ ye lɛ diɛŋtsɛ enɔ lɛ hiɛ. Esa akɛ wɔ hu wɔjie suɔmɔ ni pɛsɛmkunya bɛ mli kpo, ni esa akɛ wɔfee enɛ yɛ faŋŋ mli koni mɛi ni yɔɔ Kristofoi asafo lɛ sɛɛ lɛ ana wɔ suɔmɔ lɛ. Eji anɔkwale akɛ, nyɛmimɛi asuɔmɔ mli ni wɔɔjɛ wɔjie he-kɛ-afɔleshaa kpo lɛ ji nɔ ni kadiɔ wɔ ákɛ anɔkwa Kristo sɛɛnyiɛlɔi.

6, 7. (a) Te wɔfeɔ tɛŋŋ wɔleɔ akɛ Yehowa Wiemɔ lɛ maa suɔmɔ ni wɔɔjie lɛ kpo lɛ nɔ mi waa? (b) Paulo wiemɔi ni aŋma yɛ 1 Korintobii 13:4-8 gbalaa jwɛŋmɔ kɛmaa mɛɛ suɔmɔ nɔ?

6 Ni kɛ́ wɔbɛ suɔmɔ hu? Bɔfo Paulo kɛɛ akɛ: “Kɛji . . . mibɛ suɔmɔ lɛ, kulɛ mitsɔ ayawa ni jijeɔ loo ŋmɛlɛ ni gbɛɛɔ.” (1 Korintobii 13:1) Ŋmɛlɛ ni atswaa lɛ gbɛɛmɔ naa wa. Ni ayawa gbɛɛmɔ hu? Shishitsɔɔmɔi krokomɛi kɛɛ akɛ “ŋoŋotswaa ni naa wa” loo “ŋoŋotswaa ni gbɛɛɔ waa diɛŋtsɛ.” Mɛɛ nɔkwɛmɔnii ni sa po nɛ! Mɔ ni bɛ suɔmɔ lɛ tamɔ saŋku ni feɔ hoo ni tsimɔɔ toi ni shwieɔ mɛi kɛyaa sɛɛ, moŋ fe ni amɛbaabɛŋkɛ he koni amɛbo toi. Te aaafee tɛŋŋ ni mɔ ko ni tamɔ nɛkɛ lɛ aaanyɛ ni ekɛ mɛi krokomɛi aná wekukpaa ni bɛŋkɛ lɛ? Paulo kɛɛ hu akɛ: “Kɛji miyɛ hemɔkɛyeli fɛɛ hu, bɔ ni manyɛ gɔji matsirɛ, shi mibɛ suɔmɔ lɛ, jikulɛ mijeee nɔ ko.” (1 Korintobii 13:2) Bo lɛ susumɔ he okwɛ, mɔ ni bɛ suɔmɔ lɛ ji “mɔ ko ni sɛɛnamɔ ko bɛ ehe,” ni nitsumɔi ni ekolɛ ebaatsu lɛ fɛɛ kɔɔɔ he eko! (The Amplified Bible) Ani ejeee nɔ ni yɔɔ faŋŋ akɛ Yehowa Wiemɔ lɛ maa bɔ ni ehe hiaa ni ajie suɔmɔ kpo lɛ nɔ mi waa?

7 Shi, te wɔɔfee tɛŋŋ wɔjie nɛkɛ su nɛɛ kpo yɛ bɔ ni wɔkɛ  mɛi krokomɛi yeɔ haa lɛ mli? Bɔni afee ni wɔha hetoo lɛ, nyɛhaa wɔpɛia Paulo wiemɔi ni anaa yɛ 1 Korintobii 13:4-8 lɛ mli. Amaaa suɔmɔ ni Nyɔŋmɔ yɔɔ kɛha wɔ loo suɔmɔ ni wɔyɔɔ kɛha Nyɔŋmɔ lɛ nɔ mi yɛ nakai kukuji lɛ amli. Shi moŋ Paulo gbala jwɛŋmɔ kɛma bɔ ni esa akɛ wɔsumɔsumɔɔ wɔhe lɛ nɔ. Ewie nibii komɛi ni tsɔɔ suɔmɔ kɛ nibii komɛi ni etsɔɔɔ suɔmɔ lɛ he.

Nɔ ni Suɔmɔ Tsɔɔ

8. Tsuishitoo baanyɛ aye abua wɔ yɛ wɔkɛ mɛi krokomɛi asharamɔ mli yɛ mɛɛ gbɛ nɔ?

8 “Suɔmɔ toɔ etsui shi.” Kɛ́ wɔtoɔ wɔtsui shi lɛ, etsɔɔ akɛ wɔkɛ mɛi krokomɛi yeɔ yɛ tsuishitoo mli. (Kolosebii 3:13) Ani nakai tsuishitoo lɛ he miihia wɔ? Ákɛ bɔɔ nii ni yeee emuu ni miisɔmɔ yɛ ekomefeemɔ mli lɛ, nilee yɛ mli akɛ aaakpa gbɛ akɛ wɔnyɛmimɛi Kristofoi lɛ baanyɛ afee nibii ni  baawo wɔmli la yɛ be kɛ bei amli, ni wɔ hu wɔbaanyɛ wɔfee amɛ nakai nɔŋŋ. Shi tsuishitoo kɛ henɔyeli baanyɛ aye abua wɔ ni wɔkpee mlifu kɛ tɔmɔi bibii ni wɔkɛkpeɔ yɛ wɔkɛ mɛi krokomɛi asharamɔ mli lɛ anaa—ní wɔfiteee asafo lɛ toiŋjɔlɛ.

9. Wɔbaanyɛ wɔjie mlihilɛ kpo wɔtsɔɔ mɛi krokomɛi yɛ mɛɛ gbɛ̀i anɔ?

9 ‘Suɔmɔ mli hi.’ Wɔtsɔɔ nifeemɔi ni sɛɛnamɔ yɔɔ mli kɛ wiemɔi ni tsɔɔ akɛ wɔsusuɔ mɛi krokomɛi ahe lɛ anɔ wɔjieɔ mlihilɛ kpo. Suɔmɔ tsirɛɔ wɔ ni ehaa wɔtaoɔ gbɛ̀i ni wɔɔtsɔ nɔ wɔjie mlihilɛ kpo, titri lɛ wɔtsɔɔ mɛi ni ehia amɛ waa lɛ. Ákɛ nɔkwɛmɔnɔ lɛ, naanyo heyelilɔ ko ni egbɔ lɛ he efee shoo ni ehe baahia ni ayasara lɛ ni awo lɛ hewalɛ. Yelikɛbuamɔ ko he baanyɛ ahia fɔlɔ mɔ kome mɔ loo nyɛmi yoo oshijafo ko ni yɔɔ shia ni jamɔ egbala mli lɛ mli. Ebaanyɛ eba akɛ mɔ ko ni bɛ hewalɛ loo eyɔɔ amanehulu ko mli lɛ baahia mlijɔlɛ wiemɔi ni jɛ naanyo anɔkwafo ko ŋɔɔ. (Abɛi 12:25; 17:17) Kɛ́ wɔŋɔ hegbɛ lɛ ni wɔkɛjie mlihilɛ kpo yɛ nɛkɛ gbɛ̀i nɛɛ anɔ lɛ, wɔtsɔɔ bɔ ni suɔmɔ ni wɔyɔɔ lɛ ji anɔkwa ha.—2 Korintobii 8:8.

10. Yɛ mɛɛ gbɛ nɔ suɔmɔ yeɔ ebuaa wɔ ni wɔfiɔ anɔkwale lɛ sɛɛ ni wɔwieɔ anɔkwale, kɛji ebɛ mlɛo po akɛ wɔɔfee nakai?

10 ‘Suɔmɔ nyaa anɔkwale he.’ Shishitsɔɔmɔ kroko kɛɔ akɛ: “Suɔmɔ . . . kɛ miishɛɛ kpɛtɛɔ anɔkwale lɛ he.” Suɔmɔ tsirɛɔ wɔ ni wɔkpɛtɛɔ anɔkwale lɛ he ni ‘wɔkɛ mɔ fɛɛ mɔ wieɔ anɔkwale.’ (Zakaria 8:16) Ákɛ nɔkwɛmɔnɔ lɛ, kɛ́ suɔlɔ ko kɛ ehe yawo esha ni hiɛdɔɔ yɔɔ mli lɛ mli lɛ, suɔmɔ ni wɔyɔɔ kɛha Yehowa—kɛ mɔ ni etɔ̃—lɛ baaye abua wɔ koni wɔkpɛtɛ Nyɔŋmɔ shishitoo mlai ahe fe ni wɔɔbɔ mɔdɛŋ ni wɔtsimɔ nɔ, wɔtao naajiemɔ, loo wɔmale yɛ efɔŋfeemɔ lɛ he. Wɔkpɛlɛɔ nɔ akɛ, ekolɛ, ebaawa waa akɛ wɔɔkpɛlɛ anɔkwale ni ha eba lɛ nakai lɛ nɔ. Shi akɛni wɔsuɔlɔ lɛ hilɛ-kɛhamɔ kã wɔtsui nɔ hewɔ lɛ, wɔbaasumɔ ni ená Nyɔŋmɔ tsɔsemɔ ni suɔmɔ yɔɔ mli lɛ, ni ebo toi. (Abɛi 3:11, 12) Ákɛ Kristofoi ni yɔɔ suɔmɔ lɛ, wɔmiisumɔ hu ni “wɔba wɔjeŋ fɛfɛo yɛ nii fɛɛ mli.”—Hebribii 13:18.

11. Akɛni suɔmɔ ‘miɔ ŋɔɔ yɛ nii fɛɛ mli’ hewɔ lɛ, mɛni esa akɛ wɔbɔ mɔdɛŋ akɛ wɔɔfee yɛ nanemɛi heyelilɔi afatɔɔi ahe?

 11 ‘Suɔmɔ miɔ ŋɔɔ yɛ nii fɛɛ mli.’ Nakai wiemɔ lɛ shishitsɔɔmɔ diɛŋtsɛ ji “ehàa nibii fɛɛ nɔ.” (Kingdom Interlinear) Petro Klɛŋklɛŋ wolo 4:8 lɛ kɛɔ akɛ: “Suɔmɔ hàa eshai babaoo nɔ.” Hɛɛ, Kristofonyo ni suɔmɔ kudɔɔ lɛ lɛ ebɔŋ mɔdɛŋ akɛ eeejie enyɛmimɛi Kristofoi lɛ atɔmɔi kɛ fatɔɔi akpo. Yɛ shihilɛi babaoo mli lɛ, nanemɛi heyelilɔi atɔmɔi kɛ fatɔɔi lɛ ji nibii bibii, ni abaanyɛ akɛ suɔmɔ ahà nɔ.—Abɛi 10:12; 17:9.

Suɔmɔ tsirɛɔ wɔ ni wɔnáa wɔnyɛmimɛi lɛ amli hekɛnɔfɔɔ

12. Mɛɛ gbɛ nɔ bɔfo Paulo tsɔɔ yɛ akɛ eheɔ nɔ ni hi fe fɛɛ ni kɔɔ Filemon he lɛ eyeɔ, ni mɛni wɔbaanyɛ wɔkase kɛjɛ Paulo nɔkwɛmɔnɔ lɛ mli?

12 ‘Suɔmɔ heɔ nii fɛɛ eyeɔ.’ Moffatt shishitsɔɔmɔ lɛ kɛɔ akɛ suɔmɔ “miisumɔ ni ehe nɔ ni hi fe fɛɛ lɛ eye be fɛɛ be.” Wɔnáaa nanemɛi heyelilɔi ahe jwɛŋmɔ fɔŋ yɛ gbɛ ni ejaaa nɔ, ní wɔje nɔ fɛɛ nɔ ni amɛbaafee lɛ he ŋwane. Suɔmɔ yeɔ ebuaa wɔ ni ‘wɔheɔ nɔ ni hi fe fɛɛ lɛ wɔyeɔ’ yɛ wɔnyɛmimɛi lɛ ahe, ni wɔheɔ amɛ wɔyeɔ. * Kadimɔ nɔkwɛmɔnɔ ko ni yɔɔ wolo ni Paulo ŋma kɛyaha Filemon lɛ mli. Paulo ŋma lɛ bɔni afee ni ewo Filemon hewalɛ koni ekɛ mlihilɛ ahere Onesimo, ni ji nyɔŋ ni jo foi ni eku esɛɛ, ni ebatsɔ Kristofonyo lɛ atuu. Yɛ nɔ najiaŋ ni Paulo aaanyɛ Filemon nɔ lɛ, etsɔ suɔmɔ nɔ ekpa lɛ fai. Etsɔɔ akɛ eyɛ hekɛnɔfɔɔ akɛ Filemon baafee nɔ ni ja, ni ekɛɛ: “Akɛni mihiɛ kã onɔ akɛ ooobo mi toi hewɔ miŋmao nɛɛ, ejaakɛ mile akɛ ooofee fe bɔ ni mikɛɛo nɛɛ tete.” (Kuku 21) Kɛ́ suɔmɔ tsirɛ wɔ ni wɔná hekɛnɔfɔɔ ni tamɔ nɛkɛ yɛ wɔnyɛmimɛi lɛ amli lɛ, ehaa amɛjieɔ nibii ni hi fe fɛɛ ni yɔɔ amɛmli lɛ kpo.

13. Mɛɛ gbɛ nɔ wɔbaanyɛ wɔtsɔɔ yɛ akɛ wɔhiɛ kã nɔ akɛ wɔnyɛmimɛi lɛ nine baashɛ nɔ ni hi fe fɛɛ nɔ?

13 “Suɔmɔ hiɛ kãa nii fɛɛ nɔ.” Yɛ be mli ni suɔmɔ nyɛɔ ekɛ ehe fɔ̃ɔ nii anɔ lɛ, ehiɛ kãa nii anɔ hu. Akɛni suɔmɔ tsirɛɔ wɔ  hewɔ lɛ, wɔhiɛ kã nɔ akɛ wɔnyɛmimɛi lɛ nine baashɛ nɔ ni hi fe fɛɛ nɔ. Ákɛ nɔkwɛmɔnɔ lɛ, kɛ́ “nɔtɔmɔ ko banina” nyɛmi “ko trukaa lɛ,” wɔhiɛ kã nɔ akɛ ekɛ mɔdɛŋ ni abɔɔ koni akɛjaje lɛ yɛ suɔmɔ mli lɛ baatsu nii. (Galatabii 6:1) Wɔhiɛ kã nɔ hu akɛ mɛi ni egbɔjɔ yɛ hemɔkɛyeli lɛ mli lɛ baaná hewalɛ ekoŋŋ. Wɔtoɔ wɔtsui shi wɔhaa nakai gbɔmɛi lɛ, ni wɔfeɔ nɔ fɛɛ nɔ ni wɔɔnyɛ koni wɔye wɔbua amɛ ni amɛhe awa yɛ hemɔkɛyeli lɛ mli. (Romabii 15:1; 1 Tesalonikabii 5:14) Kɛ́ suɔlɔ ko gba afã po lɛ, wɔnijiaŋ ejeee wui akɛ be ko lɛ ehiɛ baatserɛ lɛ ni ebaaku esɛɛ eba Yehowa ŋɔɔ ekoŋŋ, tamɔ bi nyenyeŋtswi ni yɔɔ Yesu abɛbua lɛ mli lɛ fee lɛ.—Luka 15:17, 18.

14. Mɛɛ gbɛ̀i anɔ abaanyɛ aka wɔ tsuishiŋmɛɛ akwɛ yɛ asafo lɛ mli, ni te esa akɛ suɔmɔ aye abua wɔ ni wɔhere nɔ wɔha tɛŋŋ?

14 “Suɔmɔ toɔ etsui shi yɛ nii fɛɛ mli.” Tsuishiŋmɛɛ haa wɔnyɛɔ wɔfiɔ shi shiŋŋ yɛ nijiaŋwujei loo haomɔi amli. Jeee asafo lɛ sɛɛ pɛ tsuishiŋmɛɛ he kaai jɛɔ kɛbaa. Yɛ bei komɛi amli lɛ, kaa lɛ baa kɛjɛɔ asafo lɛ mli. Yɛ emuu ni wɔyeee hewɔ lɛ, ekolɛ wɔnyɛmimɛi lɛ baaje wɔnijiaŋ wui yɛ bei komɛi amli. Wiemɔi ni asusuuu he baanyɛ aye wɔhenumɔi awui. (Abɛi 12:18) Ekolɛ, atsuuu asafoŋ sane ko he nii bɔ ni wɔsusu akɛ esa akɛ atsu he nii. Nyɛmi ko ni abuɔ lɛ lɛ nifeemɔ baanyɛ aha wɔmli afu, ni ebaanyɛ eha wɔsusu wɔyiŋ akɛ, ‘Mɛni hewɔ esa akɛ Kristofonyo ko afee enɛ?’ Kɛ́ wɔkɛ shihilɛi ni tamɔ enɛ kpe lɛ, ani wɔbaatsi wɔhe kɛjɛ asafo lɛ he, ni wɔkpa Yehowa sɔɔmɔ? Kɛ́ wɔyɛ suɔmɔ lɛ, wɔfeŋ nakai! Hɛɛ, suɔmɔ haaa wɔha nyɛmi ko fatɔɔi komɛi atsĩ wɔ gbɛ koni wɔkana nɔ ko kpakpa ko yɛ ehe loo yɛ asafo lɛ mli ákɛ kuu. Suɔmɔ haa wɔyeɔ Nyɔŋmɔ anɔkwa ni wɔfiɔ asafo lɛ sɛɛ ni nɔ ni adesa ko ni yeee emuu lɛ baakɛɛ loo ebaafee lɛ kɔɔɔ he eko.—Lala 119:165.

Nɔ ni Suɔmɔ Efeee

15. Mɛni ji hetsɛ̃, ni mɛɛ gbɛ nɔ suɔmɔ yeɔ ebuaa wɔ koni wɔtsi wɔhe kɛjɛ henumɔ ni fiteɔ mɔ nɛɛ he?

15 “Suɔmɔ he tsɛ̃ɛɛ mɔ.” Hetsɛ̃ baanyɛ aha wɔhiɛ akɔ̃ nɔ ni mɛi krokomɛi yɔɔ lɛ anɔ—nibii ni amɛyɔɔ, hegbɛi, loo nyɛmɔi. Nakai hetsɛ̃ lɛ ji henumɔ ni fiteɔ nii ni pɛsɛmkunya yɔɔ  mli, ní kɛ́ akwɛɛɛ lɛ, ebaanyɛ efite toiŋjɔlɛ ni yɔɔ asafo lɛ mli lɛ. Mɛni baaye abua wɔ koni wɔte shi wɔshi “hiɛkɔɔ . . . mumɔ” ni aaaná lɛ? (Yakobo 4:5) Hetoo lɛ ji suɔmɔ. Nɛkɛ su ni jara wa nɛɛ baanyɛ aha wɔkɛ mɛi ni etamɔ nɔ ni amɛná hegbɛi komɛi yɛ shihilɛ ní wɔ diɛŋtsɛ lɛ wɔbɛ mli lɛ aná miishɛɛ. (Romabii 12:15) Kɛ́ mɔ ko ná yijiemɔ yɛ nyɛmɔi komɛi ni ekaaa loo nifeemɔ ko ni efee lɛ hewɔ lɛ mli lɛ, suɔmɔ yeɔ ebuaa wɔ ni ehaaa wɔmli afu.

16. Kɛ́ wɔsumɔɔ wɔnyɛmimɛi lɛ lɛɛlɛŋ lɛ, mɛni hewɔ esaaa akɛ wɔshwãa yɛ nɔ ni wɔfeɔ yɛ Yehowa sɔɔmɔ mli lɛ he?

16 “Suɔmɔ eshwãaa, efeee pupuupu.” Suɔmɔ haaa ni wɔkɛ wɔnyɛmɔi kɛ nibii ni wɔfee lɛ awó wɔhe nɔ. Kɛ́ wɔsumɔɔ wɔnyɛmimɛi lɛ lɛɛlɛŋ lɛ, te wɔɔfee tɛŋŋ wɔya nɔ ni wɔshwã yɛ nibii ni wɔnyɛ wɔfee yɛ sɔɔmɔ lɛ loo hegbɛi ni wɔyɔɔ yɛ asafo lɛ mli lɛ he be fɛɛ be? Nakai shwãa lɛ baaje mɛi krokomɛi anijiaŋ wui, ni ebaaha amɛnu he akɛ amɛbaa shi kɛ́ akɛ amɛ to he lɛ. Suɔmɔ haaa wɔshwã yɛ sɔɔmɔ hegbɛi ni Nyɔŋmɔ kɛha wɔ lɛ he. (1 Korintobii 3:5-9) Kɛfata he lɛ, suɔmɔ “efeee pupuupu,” loo taakɛ The New Testament in Modern English lɛ kɛɛ lɛ, “enyaaa susumɔi ni ehiɛ akɛ ehe hiaa tsɔ̃ lɛ he.” Suɔmɔ haaa wɔsusu akɛ wɔnɔ kwɔlɔ fe mɛi krokomɛi.—Romabii 12:3.

17. Suɔmɔ tsirɛɔ wɔ koni wɔjie mɛɛ mɔ he susumɔ kpo wɔtsɔɔ mɛi krokomɛi, ni mɛɛ subaŋ esa akɛ wɔkwa?

17 ‘Suɔmɔ efeee nii ni esaaa.’ Mɔ ni feɔ nii ni esaaa lɛ feɔ nii ni ehiii loo nii ni woɔ mɔ mlila. Nakai nifeemɔ lɛ jeee suɔmɔ gbɛ, ejaakɛ etsɔɔ bulɛ ni abɛ kɛha mɛi krokomɛi ahenumɔi kɛ amɛhilɛ-kɛhamɔ. Nɔ ni tamɔɔɔ nakai lɛ, miishɛɛ yɛ suɔmɔ ní tsirɛɔ wɔ koni wɔsusu mɛi krokomɛi ahe lɛ mli. Suɔmɔ haa wɔnáa sui kpakpai, jeŋba ni Nyɔŋmɔ gbeyeishemɔ yɔɔ mli, kɛ bulɛ kɛha wɔnanemɛi heyelilɔi. No hewɔ lɛ, suɔmɔ eŋmɛŋ wɔ gbɛ koni wɔkɛ wɔhe awo “hiɛgbeji anitsumɔ” mli—ni ji su fɛɛ su ni baaha wɔnyɛmimɛi Kristofoi lɛ anaa akpɛ amɛhe loo eha amɛmli afu lɛ.—Efesobii 5:3, 4.

18. Mɛni hewɔ mɔ ni yɔɔ suɔmɔ lɛ biii ni afee nɔ fɛɛ nɔ yɛ egbɛ nɔ lɛ?

18 ‘Suɔmɔ epeleee lɛ diɛŋtsɛ enɔ̃.’ Revised Standard Version  kɛɔ yɛ biɛ akɛ: “Suɔmɔ fiii nɔ doo akɛ afee nii yɛ lɛ diɛŋtsɛ egbɛ nɔ.” Mɔ ni yɔɔ suɔmɔ lɛ biii akɛ afee nɔ fɛɛ nɔ yɛ lɛ egbɛ nɔ, oookɛɛ tamɔ nɔ ni esusumɔi ja be fɛɛ be. Ekɛ ŋaa yeee mɛi krokomɛi anɔ, ni ekɛ yiŋkɔnemɔ hewalɛ ni eyɔɔ lɛ tsuuu nii ni ekɛnyɛ mɛi krokomɛi ni hiɛ susumɔ ni yɔɔ srɔto lɛ anɔ. Kuɛŋtimɔ ni tamɔ nɛkɛ lɛ baajie henɔwomɔ falɛ ko kpo, ni Biblia lɛ kɛɔ akɛ: “Hewoo nyiɛɔ hiɛkpatamɔ hiɛ.” (Abɛi 16:18) Kɛ́ wɔsumɔɔ wɔnyɛmimɛi lɛ lɛɛlɛŋ lɛ, no lɛ wɔkɛ bulɛ baaha amɛsusumɔi, ni he ni eeehi feemɔ lɛ, wɔbaatsɔɔ akɛ wɔmiisumɔ ni wɔŋmɛɛ saji ahe. Mumɔ ni ŋmɛɛɔ saji ahe lɛ kɛ Paulo wiemɔi lɛ yɛ tsakpaa, akɛ: “Mɔ ko mɔ ko akapele miiha ehe, shi moŋ mɔ fɛɛ mɔ apele aha enaanyo.”—1 Korintobii 10:24.

19. Mɛɛ gbɛ nɔ suɔmɔ yeɔ ebuaa wɔ ni wɔtsuɔ saji ahe nii kɛji mɛi krokomɛi tɔ wɔ nɔ lɛ?

19 ‘Suɔmɔ mli wooo la, eniŋŋ efɔŋ he.’ Suɔmɔ mli fuuu oya yɛ nɔ ni mɛi krokomɛi kɛɔ loo amɛfeɔ lɛ he. Eji anɔkwale akɛ, eji nɔ ni fɔɔ kaa akɛ kɛ́ mɛi krokomɛi tɔ onɔ lɛ, omli fuɔ. Shi kɛ́ wɔmli fu yɛ gbɛ ni ja nɔ po lɛ, suɔmɔ haaa wɔkã he ni wɔmli afu. (Efesobii 4:26, 27) Wɔbɛŋ wiemɔi loo nifeemɔi wɔwoŋ wɔmli, tamɔ nɔ ni wɔmiiŋma wɔmiiwo wolo ko mli bɔni afee ni wɔhiɛ akakpa nɔ. Yɛ no najiaŋ lɛ, suɔmɔ tsirɛɔ wɔ koni wɔkase wɔsuɔmɔ Nyɔŋmɔ lɛ. Taakɛ wɔna yɛ Yitso 26 lɛ mli lɛ, Yehowa kɛ sane keɔ kɛji ena akɛ yiŋtoo kpakpa ko yɛ ni eeedamɔ nɔ efee nakai. Kɛ́ ekɛke wɔ lɛ, ehiɛ kpaa nɔ, ni tsɔɔ akɛ, edamɔŋ nakai eshai lɛ anɔ ekojoŋ wɔ yɛ wɔsɛɛ be ko mli dɔŋŋ. Ani wɔdaaa shi akɛ Yehowa ehiɛɛɛ mlifu mli?

20. Te esa akɛ wɔfee wɔnii wɔha tɛŋŋ, kɛji naanyo heyelilɔ ko kɛ ehe wo eshafeemɔ mli ni epiŋ waa yɛ no hewɔ lɛ?

20 “Suɔmɔ nyaaa nɔsha he.” The New English Bible lɛ kaneɔ yɛ biɛ akɛ: “Suɔmɔ nyaaa esha ni mɛi krokomɛi feɔ lɛ he.” Moffatt shishitsɔɔmɔ lɛ kɛɔ akɛ: “Suɔmɔ náaa miishɛɛ kɛji mɛi krokomɛi tɔ.” Suɔmɔ náaa nɔsha he miishɛɛ, no hewɔ lɛ, wɔkuuu wɔhiɛ wɔshwieee jeŋba shara ko kwraa nɔ. Kɛ́ naanyo heyelilɔ ko kɛ ehe wo eshafeemɔ mli ni epiŋ yɛ no hewɔ lɛ, te wɔfeɔ wɔnii wɔhaa tɛŋŋ? Suɔmɔ haŋ ni wɔnya, tamɔ nɔ  ni wɔmiikɛɛ akɛ, ‘Ehi ha lɛ! Esa lɛ!’ (Abɛi 17:5) Shi kɛlɛ, wɔnáa miishɛɛ kɛji nyɛmi ko ni etɔ̃ lɛ kɔ gbɛ kpakpa ni eku esɛɛ ebadamɔ shi ekoŋŋ kɛjɛ emumɔŋ shigbeemɔ mli lɛ.

“Gbɛ ni Hi Fe Fɛɛ”

21-23. (a) Mɛni Paulo tsɔɔ lɛ, beni ekɛɛ akɛ ‘suɔmɔ sɛɛ efooo gbi ko gbi ko’ lɛ? (b) Mɛni abaasusu he yɛ naagbee yitso lɛ mli?

21 “Suɔmɔ sɛɛ efooo gbi ko gbi ko.” Mɛni Paulo kɛ nakai wiemɔi lɛ tsɔɔ? Taakɛ wɔnaa yɛ wiemɔ ni ekɔɔ he lɛ mli lɛ, no mli lɛ eewie mumɔ lɛ nikeenii ni yɔɔ mra be mli Kristofoi lɛ ateŋ lɛ he. Nakai nikeenii lɛ fee okadii ni tsɔɔ akɛ Nyɔŋmɔ duromɔ yɛ asafo ni atse lɛ ehee lɛ nɔ. Shi jeee Kristofoi fɛɛ baanyɛ atsa mɔ, agba, loo awie kɛ lilɛii srɔtoi. Shi kɛlɛ, enɛ he ehiaaa; naakpɛɛ nikeenii lɛ sɛɛ baafo. Ni kɛlɛ, nɔ kroko baahi shi, nɔ  ko ni Kristofonyo fɛɛ Kristofonyo baanyɛ aná eko. Eji nɔ ko ni ekaaa, nɔ ni hiɔ shi daa fe naakpɛɛ nikeenii fɛɛ. Yɛ anɔkwale mli lɛ, Paulo tsɛ lɛ “gbɛ ni hi fe fɛɛ.” (1 Korintobii 12:31) Mɛni ji nɛkɛ “gbɛ ni hi fe fɛɛ” nɛɛ? No ji suɔmɔ gbɛ lɛ.

Ale Yehowa webii yɛ suɔmɔ ni amɛkɛ sumɔsumɔɔ amɛhe lɛ hewɔ

22 Eji anɔkwale akɛ, Kristofoi asuɔmɔ ní Paulo wie he lɛ ‘sɛɛ efooo gbi ko gbi ko,’ ni ji akɛ, ebaŋ naagbee gbi ko gbi ko. Nyɛmimɛi asuɔmɔ ni he-kɛ-afɔleshaa yɔɔ mli lɛ kadiɔ Yesu anɔkwa sɛɛnyiɛlɔi lɛ kɛbashi ŋmɛnɛ. Ani wɔnaaa nakai suɔmɔ lɛ he odaseyeli yɛ Yehowa jálɔi asafoi lɛ amli yɛ je lɛŋ he fɛɛ he? Nakai suɔmɔ lɛ baahi shi kɛya naanɔ, ejaakɛ Yehowa ewo naanɔ wala he shi eha etsuji anɔkwafoi lɛ. (Lala 37:9-11, 29) Eba akɛ wɔɔya nɔ wɔfee nɔ fɛɛ nɔ ni wɔɔnyɛ koni ‘wɔya nɔ wɔnyiɛ yɛ suɔmɔ mli.’ Kɛ́ wɔfee nakai lɛ, wɔbaanyɛ wɔná miishɛɛ kpele ni jɛɔ nɔhamɔ mli baa lɛ. Nɔ ni fe nakai lɛ, wɔbaanyɛ wɔya nɔ wɔhi shi—hɛɛ, wɔya nɔ wɔná suɔmɔ—kɛya naanɔ, yɛ wɔ-Nyɔŋmɔ ni yɔɔ suɔmɔ, ni ji Yehowa kasemɔ mli.

23 Yɛ yitso nɛɛ ni muɔ fã ni wieɔ suɔmɔ he nɛɛ naa lɛ mli lɛ, wɔsusu bɔ ni wɔɔfee wɔjie suɔmɔ kpo wɔtsɔɔ wɔhe lɛ he. Shi yɛ gbɛ̀i babaoo ni wɔtsɔɔ nɔ wɔnáa Yehowa suɔmɔ—kɛ agbɛnɛ hu ehewalɛ, jalɛsaneyeli, kɛ nilee lɛ—he sɛɛ hewɔ lɛ, wɔfeɔ jogbaŋŋ akɛ wɔɔbi akɛ, ‘Te mafee tɛŋŋ majie lɛ kpo matsɔɔ Yehowa akɛ misumɔɔ lɛ lɛɛlɛŋ?’ Abaasusu nakai sanebimɔ lɛ he yɛ wɔ naagbee yitso lɛ mli.

^ kk. 12 Eji anɔkwale akɛ, Kristofoi asuɔmɔ lɛ jeee nɔ ni heɔ nɔ fɛɛ nɔ eyeɔ ni ebiii mli. Biblia lɛ woɔ wɔ hewalɛ akɛ: ‘Nyɛhiɛ akã mɛi ni kɛ mligbalamɔi kɛ pampitoo baa lɛ ahe, ni nyɛtsi nyɛhe kɛjɛ amɛhe.’—Romabii 16:17.