Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Tsi Obɛŋkɛ Yehowa

 YITSO 12

“Ani Nyɔŋmɔ Yeɔ Sane ko ní Ejaaa?”

“Ani Nyɔŋmɔ Yeɔ Sane ko ní Ejaaa?”

1. Te ekolɛ wɔnuɔ nifeemɔi ní tsɔɔ jalɛ sane ní ayeee lɛ he wɔhaa tɛŋŋ?

ÁLAKA yoomo okulafo ko ni ahe eshika fɛɛ ní ekɛkwɛɔ ehe lɛ yɛ edɛŋ. Yoofɔyoo yitsoŋwalɔ ko eshi ebi abifao ní nyɛɛɛ nɔ ko kwraa efee lɛ efɔ̃ shi ni ejo foi. Áwo nuu ko tsuŋ yɛ efɔŋ ko ní jeee lɛ efee lɛ hewɔ. Te onuɔ shihilɛi nɛɛ ahe ohaa tɛŋŋ? Eka shi faŋŋ akɛ, eko fɛɛ eko haoɔ bo waa, ni eja gbɛ nakai hu. Ákɛ adesai lɛ, wɔyɛ ekpakpa kɛ efɔŋ henumɔ ní mli wa waa. Kɛ́ aye sane ko ní ejaaa lɛ, edɔɔ wɔ waa diɛŋtsɛ. Wɔsumɔɔ ní ato mɔ ní afee lɛ efɔŋ lɛ najiaŋ ní agbala mɔ ni fee efɔŋ lɛ toi. Kɛ́ afeee enɛ lɛ, ekolɛ ehaa wɔsusuɔ akɛ: ‘Ani Nyɔŋmɔ miina nɔ ni yaa nɔ lɛ? Mɛni hewɔ efeee he nɔ ko lɛ?’

2. Te Habakuk fee enii yɛ jalɛ sane ní ayeee lɛ he eha tɛŋŋ, ni mɛni hewɔ Yehowa ewieee ehiɛ yɛ enɛ he lɛ?

2 Yehowa tsuji anɔkwafoi ebibii saji ní tamɔ enɛɛmɛi, yɛ yinɔsane be fɛɛ mli. Ákɛ nɔkwɛmɔnɔ lɛ, gbalɔ Habakuk sɔle eha Nyɔŋmɔ akɛ: “Mɛni hewɔ ohaa mikwɛɔ jalɛ sane ní ayeee tamɔ nɛkɛ? Mɛni hewɔ oŋmɛɔ gbɛ ni awuiyeli, mlakwamɔ, efɔŋfeemɔ, kɛ yiwalɛ gbɛɔ shwãa he fɛɛ he lɛ?” (Habakuk 1:3, Contemporary English Version) Yehowa ewieee Habakuk hiɛ yɛ enibimɔi ní mli kã shi faŋŋ nɛɛ hewɔ, ejaakɛ Lɛ ji mɔ diɛŋtsɛ ní kɛ jalɛsaneyeli shishinumɔ lɛ diɛŋtsɛ wo adesai amli. Hɛɛ, Yehowa kɛ ejalɛsaneyeli henumɔ ní yɔɔ naakpɛɛ lɛ falɛ fioo ko eduro wɔ.

Yehowa Nyɛ̃ɔ Jalɛ Sane ní Ayeee

3. Mɛni hewɔ abaanyɛ akɛɛ akɛ Yehowa le jalɛ sane ní ayeee ní yaa nɔ lɛ fe bɔ ni wɔle lɛ?

3 Yehowa ekuuu ehiɛ efɔ̃ɔɔ jalɛ sane ní ayeee lɛ nɔ. Enaa nɔ  ni yaa nɔ lɛ. Biblia lɛ kɛɔ wɔ yɛ Noa gbii lɛ ahe akɛ: “Yehowa na akɛ gbɔmɛi anɔ fɔŋ feemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ.” (1 Mose 6:5) Susumɔ nɔ ni nakai wiemɔ lɛ tsɔɔ lɛ he okwɛ. Bei pii lɛ, bɔ ni wɔnuɔ jalɛ sane ní ayeee lɛ shishi wɔhaa lɛ damɔ saji fioo komɛi ní wɔnu he, aloo wɔ diɛŋtsɛ wɔkɛkpe lɛ nɔ. Nɔ ni tamɔɔɔ nakai kwraa lɛ, Yehowa le akɛ jalɛ sane ní ayeee lɛ miiya nɔ yɛ je lɛŋ fɛɛ. Enaa nibii ní yaa nɔ lɛ fɛɛ! Nɔ ni fe nakai lɛ, enyɛɔ enaa tsui mli henumɔi diɛŋtsɛ—susumɔi fɔji ní yɔɔ nifeemɔi ní ejaaa lɛ asɛɛ lɛ.—Yeremia 17:10.

4, 5. (a) Biblia lɛ tsɔɔ akɛ Yehowa susuɔ mɛi ní akɛ amɛ yeɔ yɛ gbɛ ní ejaaa nɔ lɛ ahe yɛ mɛɛ gbɛ nɔ? (b) Jalɛ sane ní ayeee lɛ esa Yehowa diɛŋtsɛ he yɛ mɛɛ gbɛ nɔ?

4 Shi Yehowa feɔ babaoo fe na ní enaa jalɛ sane ní ayeee lɛ kɛkɛ. Esusuɔ mɛi ní akɛ jalɛ sane ní ayeee lɛ yeɔ amɛ awui lɛ ahe hu. Beni henyɛlɔi amaji kɛ Yehowa webii lɛ yeɔ kɛ yiwalɛ lɛ, “amɛ ŋtsɔi ni amɛdɔmɔɔ yɛ amɛyiwalɔi kɛ amɛhaolɔi lɛ ahewɔ lɛ” hao lɛ. (Kojolɔi 2:18) Ekolɛ oyɔse akɛ babaoo ní gbɔmɛi naa jalɛ sane ní ayeee lɛ, babaoo ní no gbeɔ amɛhenumɔ kwraa ji no. Jeee nakai kwraa eji yɛ Yehowa gbɛfaŋ! Ena jalɛ sane ní ayeee yɛ gbɛ̀i srɔtoi fɛɛ nɔ lɛ aahu afii 6,000 sɔŋŋ, shi kɛlɛ etsakeko ejwɛŋmɔ yɛ nyɛ̃ɛ ní eyɔɔ kɛha no lɛ he. Yɛ no najiaŋ lɛ, Biblia lɛ maa nɔ mi kɛhaa wɔ akɛ nibii tamɔ “apasa lilɛi,” “niji ní shwieɔ lá ni eye bem shi,” kɛ “amale odaseyelɔ ní foɔ sane tãa” lɛ ji nihii nii kɛha lɛ.—Abɛi 6:16-19.

5 Agbɛnɛ hu, susumɔ bɔ ni Yehowa kɛ hiɛdɔɔ wie eshi Israel hiɛnyiɛlɔi ní yeee jalɛ sane lɛ he okwɛ. Ekɛ mumɔ tsirɛ egbalɔ lɛ ni ebi amɛ akɛ: “Ani jeee nyɛgbɛnaa ji akɛ nyɛaale nɔ ni ja?” Beni Yehowa etsɔɔ amɛhewalɛ ní amɛkɛtsuɔ nii yɛ gbɛ fɔŋ nɔ lɛ mli kɛ wiemɔ ní mli kã shi faŋŋ sɛɛ lɛ, egba nɔ ni baaba nɛkɛ hii ní ekpɔtɔ nɛɛ anɔ lɛ efɔ̃ shi, akɛ: “Amɛaabolɔ amɛaatsɛ́ Yehowa, ni efoŋ amɛdaaŋ, shi moŋ ekɛ ehiɛ aaatee amɛ yɛ nakai be lɛ mli, taakɛ bɔ ni amɛfee efɔŋ yɛ amɛnifeemɔ nii amli lɛ.” (Mika 3:1-4) Kwɛ nyɛ̃ɛ diɛŋtsɛ ní  Yehowa yɔɔ kɛha jalɛ sane ní ayeee! Hɛɛ, lɛ diɛŋtsɛ ená enɛ mli niiashikpamɔ! Satan kɛ afii akpei abɔ ebɔ lɛ ahora aahu yɛ gbɛ ní ejaaa nɔ. (Abɛi 27:11) Kɛfata he lɛ, nifeemɔ ní tsɔɔ jalɛ sane ní ayeee yɛ gbɛ ni yɔɔ gbeyei nɔ lɛ sa Yehowa he waa beni agbe e-Bi lɛ, ní ‘efeko esha’ ko lɛ tamɔ efɔŋfeelɔ lɛ. (1 Petro 2:22; Yesaia 53:9) Eyɛ faŋŋ akɛ, Yehowa le, ni ekuko ehiɛ efɔ̃ko amanehulu ní mɛi ní ayeɔ amɛ sane ní ejaaa lɛ naa lɛ nɔ.

6. Kɛ́ wɔkɛ jalɛ sane ní ayeee kpe lɛ, te ekolɛ wɔbaafee wɔnii wɔha tɛŋŋ, ni mɛni hewɔ?

6 Ni kɛlɛ, kɛ́ wɔna jalɛ sane ní ayeee—aloo akɛ wɔ diɛŋtsɛ ye yɛ gbɛ ko ní ejaaa nɔ lɛ—eji adebɔɔ su akɛ wɔɔfee nɔ ko ní wɔkɛte shi wɔshi enɛ waa. Abɔ wɔ yɛ Nyɔŋmɔ subaŋ nɔ, ni jalɛ sane ní ayeee lɛ teɔ shi ewoɔ nibii fɛɛ ní Yehowa damɔ shi kɛha lɛ kwraa. (1 Mose 1:27) Belɛ, mɛni hewɔ ni Nyɔŋmɔ ŋmɛɔ jalɛ sane ní ayeee gbɛ lɛ mɔ?

Sane ní Kɔɔ Nyɔŋmɔ Maŋtsɛyeli lɛ He Lɛ

7. Tsɔɔmɔ bɔ ni atswa Yehowa maŋtsɛyeli lɛ mpoa aha lɛ mli.

7 Sanebimɔ nɛɛ hetoo kɔɔ maŋtsɛyeli he sane lɛ he. Taakɛ wɔna lɛ, Bɔlɔ lɛ yɛ hegbɛ akɛ eyeɔ shikpɔŋ lɛ kɛ mɛi fɛɛ ní yɔɔ nɔ lɛ anɔ maŋtsɛ. (Lala 24:1; Kpojiemɔ 4:11) Shi, mra mli yɛ adesai ayinɔsane mli ni atswa Yehowa maŋtsɛyeli lɛ mpoa. Te enɛ ba lɛ eha tɛŋŋ? Yehowa wo klɛŋklɛŋ nuu, ni ji Adam kita akɛ ekaye tso ko ní yɔɔ abɔɔ ni ji e-Paradeiso shia lɛ mli lɛ nɔ yibii lɛ eko. Shi kɛ́ egbo toi lɛ, mɛni baaba? Nyɔŋmɔ kɛɛ lɛ akɛ: “Gbo ooogbo!” (1 Mose 2:17) Kita ní Nyɔŋmɔ wo nɛɛ kɛ jaramɔ shihilɛ ko baaa Adam, loo eŋa, Hawa nɔ. Ni kɛlɛ, Satan tsɔ̃ Hawa yiŋ akɛ Nyɔŋmɔ miitsĩ amɛnaa yɛ gbɛ ní ejaaa nɔ. Mɛni baaba kɛji eye tso lɛ yibii lɛ eko? Satan kɛɛ Hawa yɛ faŋŋ mli akɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.”—1 Mose 3:1-5, wɔma efã ko nɔ mi.

8. (a) Satan kɛ wiemɔi ní ekɛ Hawa wie lɛ tsɔɔ mɛni? (b) Mɛni mpoa Satan tswa yɛ Nyɔŋmɔ maŋtsɛyeli lɛ he?

 8 Satan kɛ nɛkɛ wiemɔ nɛɛ tsɔɔ akɛ jeee akɛ Yehowa etsĩmɔ sane ko ní he hiaa waa nɔ koni Hawa akale kɛkɛ, shi moŋ E-male etsɔɔ yoo lɛ hu. Satan kwɛ jogbaŋŋ koni ekate shi ewo anɔkwale ní eji akɛ Nyɔŋmɔ ji maŋtsɛ lɛ. Shi etswa ja ní eja gbɛ, kɛ bɔ ni esa, kɛ bɔ ni eji jalɛ maŋtsɛyeli ha lɛ mpoa. Kɛ́ wɔɔkɛɛ yɛ gbɛ kroko nɔ lɛ, ema nɔ mi akɛ Yehowa tsuuu E-maŋtsɛyeli lɛ he nii yɛ jalɛ gbɛ kɛ gbɛ ní hi fe fɛɛ kɛha E-shishi bii lɛ nɔ.

9. (a) Mɛni jɛ toigbele lɛ mli kɛba yɛ Adam kɛ Hawa gbɛfaŋ, ni enɛ tée mɛɛ sanebimɔi ní he hiaa shi? (b) Mɛni hewɔ Yehowa kpataaa atuatselɔi lɛ ahiɛ kɛkɛ lɛ?

9 No hewɔ lɛ, Adam kɛ Hawa fɛɛ gbo Yehowa nɔ toi kɛtsɔ tso ní akɛɛ amɛkaye eyibii lɛ eko lɛ yeli nɔ. Amɛ toigbele lɛ ha amɛbafee mɛi ní esa akɛ amɛná gbele toigbalamɔ, taakɛ Nyɔŋmɔ ewo akpɔ lɛ pɛpɛɛpɛ. Satan amale lɛ tée sanebimɔi komɛi ní he hiaa waa shi. Ani Yehowa yɛ hegbɛ lɛɛlɛŋ akɛ eyeɔ adesai anɔ, aloo ani esa akɛ adesa aye lɛ diɛŋtsɛ ehe nɔ? Ani Yehowa tsuɔ emaŋtsɛyeli lɛ he nii yɛ gbɛ ní hi fe fɛɛ nɔ? Kulɛ Yehowa baanyɛ ekɛ ehewalɛ ní eyɔɔ akɛ ofe lɛ atsu nii ní ekɛkpata atuatselɔi lɛ ahiɛ amrɔ nɔŋŋ. Shi sanebimɔi ní atée amɛ shi lɛ kɔɔ Nyɔŋmɔ nɔyeli he, jeee ehewalɛ he. No hewɔ lɛ Adam, Hawa, kɛ Satan hiɛ ni eeekpata lɛ emaŋ bɔ ni Nyɔŋmɔ nɔyeli lɛ ja ha lɛ nɔ mi. Kɛ́ efee nakai lɛ, ebaanyɛ etswa enɔyeli lɛ mpoa babaoo moŋ. Gbɛ pɛ ní abaanyɛ atsɔ nɔ ana kɛji adesai baanyɛ aye amɛ diɛŋtsɛ amɛhe nɔ yɛ omanyeyeli mli, ní Nyɔŋmɔ he bɛ mli ji ní aŋmɛ gbɛ ní be saŋŋ aho.

10. Mɛni yinɔsane ejie lɛ kpo yɛ adesai anɔyeli he?

10 Mɛni be ní aŋmɛ gbɛ ní eho lɛ ejie lɛ kpo? Gbɔmɛi eka nɔyelii srɔtoi pii amɛkwɛ, yɛ afii akpei abɔ ní eho lɛ fɛɛ mli, tamɔ mɔ kome hewalɛ naa nɔyeli, demokrase, kwasafo nɔyeli, kɛ komunist nɔyeli. Atsɔɔ bɔ ni amɛ fɛɛ amɛji lɛ mli yɛ Biblia mli wiemɔ ní mli kã shi faŋŋ nɛɛ mli, akɛ: “Gbɔmɔ yeɔ enaanyo gbɔmɔ nɔ ni ekɛyeɔ ehe awui.”  (Jajelɔ 8:9) Gbalɔ Yeremia wie kɛ yiŋtoo kpakpa akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.”—Yeremia 10:23.

11. Mɛni hewɔ Yehowa ŋmɛ gbɛ koni adesai aweku lɛ atsɔ amanehulu mli lɛ?

11 Yehowa le kɛjɛ shishijee tɔ̃ɔ akɛ adesai aheyeli, loo amɛ diɛŋtsɛ amɛhe nɔ ní amɛaaye lɛ kɛ amanehulu babaoo baaba. Belɛ, ani gbɛ ní eŋmɛ ní nibii ní anyɛŋ atsĩ naa nɛɛ fɛɛ ba lɛ tsɔɔ jalɛ sane ní eyeee? Dabi kwraa! Ákɛ nɔkwɛmɔnɔ lɛ: Ŋɔɔ lɛ akɛ oyɛ bi ko ní ehe miihia ní afee lɛ opireshɛn ní akɛtsa hela ko ní baanyɛ agbe lɛ. Ole akɛ opireshɛn lɛ baaha obi lɛ anu piŋmɔ he waa, ni enɛ dɔɔ bo waa diɛŋtsɛ. Shi yɛ nakai beaŋ nɔŋŋ lɛ, ole akɛ nakai nifeemɔ lɛ baaha obi lɛ aná gbɔmɔtsoŋ hewalɛnamɔ kpakpa mli ŋɔɔmɔ yɛ sɛɛ mli. Nakai nɔŋŋ Nyɔŋmɔ le—ni egba efɔ̃ shi po—akɛ adesai anɔyeli gbɛ ní eŋmɛ lɛ kɛ piŋmɔ kɛ amanehulu saŋŋ baaba amɛnɔ. (1 Mose 3:16-19) Shi ele hu akɛ heyeli ní sɛɛ tsɛɔ, ní shishinumɔ yɔɔ mli baanyɛ aba kɛji eŋmɛ gbɛ ní adesai fɛɛ na yibii fɔji ní ejɛ atuatsemɔ lɛ mli kɛba lɛ. Nɛkɛ gbɛ nɔ abaanyɛ atsɔ ní ana sane lɛ naa shikome nyɔŋlo, kɛya naanɔi anaanɔ.

Sane ní Kɔɔ Adesai Emuuyeli Mlihiɛmɔ He Lɛ

12. Taakɛ Hiob sane lɛ feɔ he nɔkwɛmɔnɔ lɛ, mɛɛ naafolɔmɔ Satan etée lɛ shi eshi adesai?

12 Nɔ kroko hu yɛ ní kɔɔ sane nɛɛ he. Beni Satan tswaa bɔ ni Nyɔŋmɔ nɔyeli ja ha ní eji jalɛ nɔyeli hu lɛ mpoa lɛ, jeee akɛ egbe Yehowa he guɔ yɛ E-maŋtsɛyeli lɛ gbɛfaŋ kɛkɛ; shi moŋ egbe Nyɔŋmɔ tsuji hu ahe guɔ yɛ amɛ emuuyeli lɛ mlihiɛmɔ gbɛfaŋ. Ákɛ nɔkwɛmɔnɔ lɛ, kadimɔ nɔ ni Satan kɛɛ Yehowa yɛ nuu Hiob ni ji jalɔ lɛ he lɛ: “Ani jeee afãbaŋ ofo owo ekɛ  ewe kɛ nɔ fɛɛ nɔ ní eyɔɔ lɛ he kɛkpe? Ojɔɔ enine naa nitsumɔ nɔ, ni ekooloi eshwere yɛ shikpɔŋ lɛ nɔ. Shi agbɛnɛ kpã onine mli ní ota enii ní eyɔɔ lɛ fɛɛ he; akɛ ekwaŋo yɛ ohiɛ lo!”—Hiob 1:10, 11.

13. Satan kɛ naafolɔmɔi ní ekɛshi Hiob lɛ tsɔɔ mɛni, ni enɛ kɔɔ adesai fɛɛ ahe yɛ mɛɛ gbɛ nɔ?

13 Satan wie akɛ Yehowa kɛ E-hewalɛ ní ekɛbuɔ mɔ he lɛ miitsu nii ní ekɛhé Hiob hetuu-kɛhamɔ lɛ. Enɛ tsɔɔ akɛ, Hiob emuuyeli mlihiɛmɔ lɛ hu jɛ osatofeemɔ mli, ni ákɛ ejáa Nyɔŋmɔ yɛ nɔ ni ebaanyɛ ená kɛjɛ edɛŋ lɛ pɛ hewɔ. Satan ma nɔ mi akɛ kɛ́ Nyɔŋmɔ jie ejɔɔmɔ kɛjɛ Hiob nɔ lɛ, nakai nuu lɛ baalomɔ e-Bɔlɔ lɛ po. Satan le akɛ Hiob yɛ srɔto kwraa ejaakɛ eji mɔ ko ní “kpa ko bɛ ehe ni eja, esheɔ Nyɔŋmɔ gbeyei, ni esɔleɔ ehe yɛ efɔŋ he.” * No hewɔ lɛ kɛ́ Satan nyɛ eku Hiob emuuyeli lɛ mli lɛ, mɛni no baatsɔɔ kɛha adesai ní eshwɛ lɛ? Enɛ hewɔ lɛ Satan miitswa mɛi fɛɛ ní sumɔɔ ní amɛsɔmɔ Nyɔŋmɔ lɛ anɔkwayeli lɛ mpoa. Yɛ anɔkwale mli lɛ, Satan lɛɛ sane lɛ mli, ni ekɛɛ Yehowa akɛ: “Nɔ fɛɛ nɔ ní mɔ ko [jeee Hiob kɛkɛ] yɔɔ lɛ eŋɔhaa yɛ ewala hewɔ!”—Hiob 1:8; 2:4, wɔma efã ko nɔ mi.

14. Mɛni yinɔsane etsɔɔ yɛ Satan naafolɔmɔ ní ekɛshi adesai lɛ gbɛfaŋ?

14 Yinɔsane etsɔɔ akɛ, taakɛ Hiob ji lɛ, mɛi babaoo etee nɔ amɛye Yehowa anɔkwa yɛ kaai ní amɛkɛkpe lɛ fɛɛ sɛɛ—ni amɛha Satan wiemɔ lɛ efee amale. Amɛha Yehowa tsui enya kɛtsɔ anɔkwayeli gbɛ ní amɛkɔ lɛ nɔ, ni enɛ eha Yehowa ená hetoo eha Satan ahorabɔɔ wiemɔi ní ekɛshwãa akɛ adesai baakpa Nyɔŋmɔ sɔɔmɔ kɛ́ amɛyaje jaramɔ shihilɛi amli lɛ. (Hebribii 11:4-38) Hɛɛ, gbɔmɛi ní yɔɔ jalɛ tsuii lɛ ekpoo akɛ amɛaakwa Nyɔŋmɔ. Kɛ́ nɔnyɛɛ shihilɛi ní mli wa fe fɛɛ po miihao amɛ lɛ, amɛkɛ amɛhe fɔ̃ɔ Yehowa nɔ kwraa koni  eha amɛ hewalɛ ní amɛkɛkpee nakai shihilɛ lɛ naa.—2 Korintobii 4:7-10.

15. Mɛɛ sanebimɔ baanyɛ ate shi yɛ Nyɔŋmɔ kojomɔi ní eho kɛ nɔ ni ebaatsu he nii wɔsɛɛ lɛ ahe?

15 Shi jalɛ sane ní Yehowa kɛtsuɔ nii lɛ kɔɔ nibii babaoo he fe maŋtsɛyeli lɛ kɛ adesai emuuyeli mlihiɛmɔ he saji lɛ pɛ he. Biblia lɛ kɛ Yehowa kojomɔi ní kɔɔ aŋkroaŋkroi kɛ jeŋmaji po ahe lɛ he saji ní aŋmala ashwie shi haa wɔ. Kojomɔi ní ebaatsu he nii wɔsɛɛ lɛ ahe gbalɛi hu yɛ mli. Mɛni hewɔ wɔbaanyɛ wɔná hekɛnɔfɔɔ akɛ Yehowa eye jalɛ sane, ni ebaaye jalɛ sane yɛ ekojomɔi amli lɛ?

Nɔ Hewɔ ní Nyɔŋmɔ Jalɛsaneyeli lɛ Nɔ Kwɔ Lɛ

Yehowa ‘kpataŋ jalɔ kɛ gbɔmɔ fɔŋ fɛɛ hiɛ shi kome’ kɔkɔɔkɔ

16, 17. Mɛɛ nɔkwɛmɔnii tsɔɔ akɛ husu yɛ shishinumɔ ní adesai yɔɔ yɛ anɔkwa jalɛsaneyeli he lɛ he?

16 Abaanyɛ awie Yehowa he, yɛ gbɛ ní ja nɔ akɛ: “Egbɛ̀i fɛɛ jalɛ ni.” (5 Mose 32:4) Wɔteŋ mɔ ko mɔ ko nyɛŋ awie nakai yɛ wɔ diɛŋtsɛ wɔhe, ejaakɛ bei pii lɛ, wɔ niiashishinumɔ ní husu yɔɔ he lɛ tsimɔɔ bɔ ni wɔnuɔ nɔ ni ja shishi wɔhaa lɛ nɔ. Ákɛ nɔkwɛmɔnɔ lɛ, susumɔ Abraham he okwɛ. Ekpá Yehowa fai yɛ Sodom hiɛkpatamɔ lɛ hewɔ—yɛ efɔŋfeemɔ ní egbɛ eshwã yɛ jɛmɛ lɛ fɛɛ sɛɛ. Ebi Yehowa akɛ: “Ani oookpata jalɔ kɛ gbɔmɔ fɔŋ fɛɛ hiɛ shikome lo?” (1 Mose 18:23-33) Yɛ anɔkwale mli lɛ, hetoo lɛ ji dabi. Beni Lot ni ji jalɔ lɛ kɛ ebiyei lɛ yashɛ Zoar maŋtiase lɛ mli shweshweeshwe lɛ sɛɛ dani Yehowa “ha swɔɔ kɛ la nɛ” eshwie Sodom nɔ. (1 Mose 19:22-24) Nɔ ni tamɔɔɔ enɛ lɛ, Yona ‘mli wo la waa’ beni Nyɔŋmɔ jie mɔbɔnalɛ kpo etsɔɔ Ninive maŋ lɛ mli bii lɛ. Akɛni Yona etswa amɛhiɛkpatamɔ he adafi momo hewɔ lɛ, kulɛ etsui baanyɔ emli akɛ eeena akɛ akpata amɛhiɛ kwraa—ní bɔ ni amɛjɛ amɛtsui mli amɛshwa amɛhe lɛ kɔɔɔ he eko.—Yona 3:10–4:1.

17 Yehowa ma nɔ mi eha Abraham akɛ bɔ ni E-kɛ jalɛsaneyeli tsuɔ nii ehaa lɛ etsɔɔɔ mɛi fɔji ahiɛkpatamɔ pɛ, shi moŋ jalɔi  ayiwalaheremɔ hu fata he. Yɛ gbɛ kroko nɔ lɛ, ehe bahia ní Yona akase akɛ Yehowa naa mɔbɔ. Kɛ́ mɛi fɔji lɛ tsake amɛgbɛ̀i lɛ, ‘eŋɔfaa mra.’ (Lala 86:5) Ákɛ mɔ ní tamɔɔɔ adesai ní sheɔ gbeyei yɛ amɛgbɛhe hewɔ lɛ, Yehowa tsuuu fɔbuu kojomɔ he nii koni ekɛha mɛi ale kɛkɛ akɛ eyɛ hewalɛ, ni nakai nɔŋŋ hu etsĩii musuŋtsɔlɛ ní eyɔɔ lɛ naa akɛni eeshe gbeyei akɛ mɛi baabu lɛ akɛ egbɔjɔ lɛ hewɔ. Egbɛ ji ní ejie mɔbɔnalɛ kpo be fɛɛ be ní nɔdaamɔ nɔ yɔɔ kɛha nakai feemɔ.—Yesaia 55:7; Ezekiel 18:23.

18. Tsɔɔmɔ kɛjɛ Biblia lɛ mli akɛ Yehowa efeee nii kɛjɛɛɛ henumɔ folo ko kɛkɛ mli.

18 Shi, henumɔi kɛkɛ haaa Yehowa aku ehiɛ eshwie nibii anɔ. Beni emaŋ lɛ kɛ amɛhe yawo wɔŋjamɔ mli vii lɛ, Yehowa kɛ shiŋŋfeemɔ jaje akɛ: “Makojoo yɛ ogbɛ̀i lɛ anaa, ni mikɛ onihii nii lɛ fɛɛ aaaba onɔ! Ni mihiŋmɛi enaŋo mɔbɔ, ni mibaaŋ oyi, shi moŋ maha ogbɛ̀i lɛ aba onɔ.” (Ezekiel 7:3, 4) No hewɔ lɛ kɛ́ adesai kɛ tsuiwalɛ kɔ́ amɛ diɛŋtsɛ amɛgbɛ lɛ, Yehowa kojoɔ amɛ yɛ naa pɛpɛɛpɛ. Shi ekojomɔ lɛ damɔɔ odaseyeli ní ma shi shiŋŋ nɔ. Enɛ hewɔ lɛ, beni Sodom kɛ Gomora he “bolɔmɔ” ní naa wa lɛ yashɛ Yehowa ŋɔɔ lɛ, ejaje akɛ: “Makpeleke shi matee agbɛnɛ, ní mayakwɛ akɛ, bɔ ni bolɔmɔ lɛ ba miŋɔɔ lɛ, amɛfee nakai kwraa lo.” (1 Mose 18:20, 21) Kwɛ bɔ ni wɔbaanyɛ wɔda shi babaoo akɛ Yehowa tamɔɔɔ adesai babaoo ní kɛ oyaiyeli muɔ saji anaa dani amɛnuɔ anɔkwalei lɛ fɛɛ lɛ! Lɛɛlɛŋ, taakɛ Biblia lɛ feɔ Yehowa he mfoniri lɛ, “anɔkwa Mawu ji lɛ, nɔ̃ sha bɛ lɛ.”—5 Mose 32:4.

Ná Yehowa Jalɛsaneyeli lɛ Mli Hekɛnɔfɔɔ

19. Kɛji wɔyɛ bɔ ni Yehowa tsuɔ jalɛsaneyeli he nii ehaa lɛ he sanebimɔi ní shishinumɔ wa lɛ, mɛni wɔbaanyɛ wɔfee?

19 Biblia lɛ haaa sanebimɔ fɛɛ sanebimɔ ní kɔɔ Yehowa nifeemɔi ní eho lɛ ahe lɛ ahetoo; nakai nɔŋŋ hu ekɛ bɔ ni Yehowa baatsu kojomɔ he nii yɛ aŋkroaŋkroi kɛ kui agbɛfaŋ yɛ wɔsɛɛ be mli lɛ mlitsɔɔmɔ fitsofitso fɛɛ haaa. Kɛ́ Biblia mli saji  loo gbalɛi komɛi ní akɛ saji amlitsɔɔmɔ fitsofitso haaa yɛ he lɛ ashishinumɔ wa kɛha wɔ lɛ, wɔbaanyɛ wɔjie anɔkwayeli ní gbalɔ Mika jie lɛ kpo lɛ nɔŋŋ kpo, beni eŋma akɛ: “Mamɛ miyiwalaheremɔ Nyɔŋmɔ lɛ.”—Mika 7:7.

20, 21. Mɛni hewɔ wɔbaanyɛ wɔná hekɛnɔfɔɔ akɛ Yehowa baafee nɔ ni ja be fɛɛ be lɛ?

20 Wɔbaanyɛ wɔná hekɛnɔfɔɔ akɛ Yehowa baafee nɔ ni ja yɛ shihilɛ fɛɛ shihilɛ mli. Kɛ́ efee tamɔ nɔ ni adesa miiku ehiɛ eefɔ̃ jalɛ sane ní ayeee lɛ nɔ po lɛ, Yehowa ewo shi akɛ: “Minɔ̃ ji oweletɔɔ, ni mato najiaŋ.” (Romabii 12:19) Kɛ́ wɔná su ní haa wɔmɛɔ lɛ, no lɛ wɔ hu wɔbaati nɔmimaa wiemɔi ní bɔfo Paulo wie nɛɛ mli, akɛ: “Ani Nyɔŋmɔ yeɔ sane ko ní ejaaa? Dabida!”—Romabii 9:14.

21 Shi amrɔ nɛɛ, wɔyɛ “jaramɔ bei” amli diɛŋtsɛ. (2 Timoteo 3:1) Jalɛ sane ní ayeee lɛ kɛ ‘yiwalɛ nifeemɔi’ kɛ niseniianiifeemɔi babaoo eba. (Jajelɔ 4:1) Shi kɛlɛ, Yehowa tsakeko. Eka he enyɛ̃ɔ jalɛ sane ní ayeee lɛ lolo, ni esusuɔ mɛi ní afeɔ amɛ nakai lɛ ahe waa diɛŋtsɛ. Kɛ́ wɔtee nɔ wɔye Yehowa kɛ emaŋtsɛyeli lɛ anɔkwa lɛ, ebaaha wɔ hewalɛ koni wɔnyɛ wɔkɛŋmɛ wɔtsui shi kɛyashi be ni eto ní ebaajaje saji ní ejaaa lɛ fɛɛ, yɛ e-Maŋtsɛyeli nɔyeli lɛ shishi lɛ baashɛ.—1 Petro 5:6, 7.

^ kk. 13 Yehowa wie yɛ Hiob he akɛ: “Mɔ ko mɔ ko bɛ ní tamɔ lɛ yɛ shikpɔŋ lɛ nɔ.” (Hiob 1:8) Belɛ, ekolɛ eeenyɛ efee akɛ Hiob hi shi yɛ Yosef gbele sɛɛ, dani Mose batsɔ Israel hiɛnyiɛlɔ ní ahala lɛ lɛ. Enɛ hewɔ lɛ, abaanyɛ awie akɛ mɔ ko mɔ ko bɛ ní hiɛɔ emuuyeli mli tamɔ Hiob, yɛ nakai beaŋ.

Ekrokomɛi Hu Nɛ

BUU-MƆƆ

Nyɔŋmɔ Kpata Mɛi Komɛi Ahiɛ—Ani No Tsɔɔ akɛ Eyitsoŋ Wa?

Kɛha sanebimɔ nɛɛ hetoo lɛ, ha wɔsusu Biblia mli nɔkwɛmɔ nii enyɔ ni kɔɔ hiɛkpatamɔ ko ni Nyɔŋmɔ kɛba lɛ ahe—Noa beaŋ Nu Afua lɛ kɛ Kanaanbii lɛ ashishibulemɔ lɛ he.

BUU-MƆƆ

Ani Okɛ Ohe Baafɔ̃ Nyɔŋmɔ Nɔ?

Ba koni obale Nyɔŋmɔ jogbaŋŋ taakɛ oleɔ onaanyo ni onyɛɔ okɛ ohe fɔ̃ɔ enɔ lɛ, koni ona nɔ̃ hewɔ ni obaanyɛ onaì hekɛnɔfɔ̃ɔ akɛ jeee lɛ ekɛ nɔnaa kɛ jalɛsane ni ayeee lɛ baa lɛ. Kanemɔ koni ona bɔ ni kɛ́ ole Nyɔŋmɔ, ni okɛ lɛ bɔ Naanyo lɛ otsui baanyɔ omli aha