Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Sanekpakpa ni Jɛ Nyɔŋmɔ Ŋɔɔ!

 NIKASEMƆ 14

Mɛni Hewɔ Nyɔŋmɔ Yɔɔ Asafo Lɛ?

Mɛni Hewɔ Nyɔŋmɔ Yɔɔ Asafo Lɛ?

1. Mɛni hewɔ Nyɔŋmɔ to blema Israelbii lɛ ahe gbɛjianɔ akɛ asafo lɛ?

Nyɔŋmɔ to Abraham ni eji weku yitso lɛ seshibii lɛ ahe gbɛjianɔ efee amɛ maŋ, ni eha amɛ mlai. Etsɛ maŋ lɛ “Israel,” ni ekɛ anɔkwa jamɔ kɛ ewiemɔ lɛ wo amɛ pɛ amɛdɛŋ. (Lala 147:19, 20) No hewɔ lɛ, maji srɔtoi fɛɛ anɔ bii baanyɛ aná jɔɔmɔi kɛtsɔ Israel maŋ lɛ nɔ.Kanemɔ 1 Mose 22:18.

Nyɔŋmɔ hala Israelbii lɛ koni amɛtsɔmɔ edasefoi. Bɔ ni amɛhi shi amɛha yɛ blema lɛ haa wɔnaa akɛ kɛ́ wɔye Nyɔŋmɔ mlai anɔ lɛ, wɔbaaná he sɛɛ. (5 Mose 4:6) No hewɔ lɛ, kɛtsɔ Israelbii lɛ anɔ lɛ, mɛi krokomɛi baanyɛ abale anɔkwa Nyɔŋmɔ lɛ.Kanemɔ Yesaia 43:10, 12.

2. Mɛni hewɔ ato anɔkwa Kristofoi ahe gbɛjianɔ akɛ asafo lɛ?

Sɛɛ mli lɛ, Yehowa kpoo Israel maŋ lɛ, ni ekɛ Kristofoi asafo lɛ ye najiaŋ. (Mateo 21:43; 23:37, 38) Amrɔ nɛɛ, anɔkwa Kristofoi ji mɛi ni sɔmɔɔ akɛ odasefoi amɛhaa Yehowa, shi jeee Israelbii lɛ.Kanemɔ Bɔfoi lɛ Asaji 15:14, 17.

Yesu to esɛɛnyiɛlɔi lɛ ahe gbɛjianɔ koni amɛshiɛ ni amɛfee kaselɔi yɛ jeŋmaji fɛɛ amli. (Mateo 10:7, 11; 24:14; 28:19, 20) Amrɔ nɛɛ je lɛ yɛ enaagbee be lɛ mli, ni nitsumɔ nɛɛ miihe aba enaagbee. Yehowa ebua mɛi akpekpei abɔ ni jɛ maji fɛɛ amli lɛ anaa efee amɛ ekome yɛ anɔkwa jamɔ mli, ni nɔ ko ni tamɔ nɛkɛ bako pɛŋ yɛ yinɔsane mli. (Kpojiemɔ 7:9, 10) Ato anɔkwa Kristofoi ahe gbɛjianɔ akɛ asafo koni amɛwowoo amɛhe hewalɛ ni amɛye amɛbua amɛhe. Yɛ jeŋ fɛɛ lɛ, akɛ Biblia mli tsɔsemɔ kome too lɛ nɔŋŋ haa amɛ yɛ amɛkpeei ashishi.Kanemɔ Hebribii 10:24, 25.

 3. Te fee tɛŋŋ Yehowa Odasefoi je shishi yɛ ŋmɛnɛŋmɛnɛ beaŋ?

Yɛ afi 1870 afii lɛ amli lɛ, Biblia kaselɔi akuu fioo ko bɔi Biblia mli anɔkwalei ni atsimɔ nɔ be kakadaŋŋ lɛ ashishinumɔ ekoŋŋ. Amɛle akɛ Yesu to Kristofoi asafo lɛ he gbɛjianɔ koni amɛshiɛ, no hewɔ lɛ amɛbɔi Maŋtsɛyeli lɛ shiɛmɔ yɛ jeŋ fɛɛ. Yɛ afi 1931 lɛ, amɛŋɔ gbɛ́i Yehowa Odasefoi lɛ amɛfɔ̃ amɛnɔ.Kanemɔ Bɔfoi lɛ Asaji 1:8; 2:1, 4; 5:42.

4. Te ato Yehowa Odasefoi lɛ ahe gbɛjianɔ aha tɛŋŋ?

Yɛ klɛŋklɛŋ afii 100 lɛ mli lɛ, gbɛtsɔɔmɔ kuu ko ní kpɛlɛɔ Yesu nɔ akɛ asafo lɛ Yitso lɛ ji mɛi ni kwɛ Kristofoi asafoi ni yɔɔ shikpɔji babaoo anɔ lɛ nɔ. (Bɔfoi lɛ Asaji 16:4, 5) Nakai nɔŋŋ ŋmɛnɛ lɛ, Gbɛtsɔɔmɔ Kuu, ni ji onukpai ni edara yɛ mumɔŋ, ji mɛi ni kwɛɔ Yehowa Odasefoi ni yɔɔ jeŋ fɛɛ lɛ anɔ. Gbɛtsɔɔmɔ Kuu lɛ kwɛɔ Yehowa Odasefoi anitsumɔhe niji ni tsɔɔ Biblia kasemɔ woji ashishi, amɛprintiɔ, ní amɛjaraa yɛ wiemɔi ni fa fe 600 mli lɛ anɔ. Enɛ haa Gbɛtsɔɔmɔ Kuu lɛ nyɛɔ ekɛ Ŋmalɛ naa hewalɛwoo kɛ gbɛtsɔɔmɔ haa asafoi ni fa fe 100,000 ni yɔɔ jeŋ fɛɛ lɛ. Hii ni shɛɔ Ŋmalɛ naa taomɔ nii ahe sɔmɔɔ akɛ onukpai, loo nɔkwɛlɔi yɛ asafo fɛɛ asafo mli. Hii nɛɛ jɛɔ suɔmɔ mli amɛkwɛɔ Nyɔŋmɔ asafoku lɛ nɔ.Kanemɔ 1 Petro 5:2, 3.

Ato Yehowa Odasefoi lɛ ahe gbɛjianɔ koni amɛshiɛ sanekpakpa lɛ ní amɛfee kaselɔi. Wɔshiɛɔ yɛ shĩa fɛɛ shĩa taakɛ bɔfoi lɛ fee lɛ. (Bɔfoi lɛ Asaji 20:20) Agbɛnɛ hu, wɔkɛ mɛi ni sumɔɔ anɔkwale lɛ lɛɛlɛŋ lɛ kaseɔ Biblia lɛ. Shi Yehowa Odasefoi jeee asafo ko kɛkɛ ni ato amɛhe gbɛjianɔ. Wɔji weku, ni wɔyɛ Tsɛ ni sumɔɔ wɔ. Nyɛmimɛi hii kɛ yei ji wɔ, ni wɔsumɔɔ wɔhe. (2 Tesalonikabii 1:3) Akɛni ato Yehowa webii lɛ ahe gbɛjianɔ koni amɛfee Nyɔŋmɔ suɔmɔnaa nii, ní amɛye amɛbua mɛi krokomɛi hewɔ lɛ, amɛji weku ni yɔɔ miishɛɛ fe fɛɛ yɛ shikpɔŋ lɛ nɔ.Kanemɔ Lala 33:12; Bɔfoi lɛ Asaji 20:35.

 

Ekrokromɛi Hu Nɛ

Hii Nyɔŋmɔ Suɔmɔ lɛ Mli

Mɛni obaanyɛ ofee kɛtsɔɔ akɛ osumɔɔ nibii fɛɛ ni Nyɔŋmɔ efee lɛ, ni ohiɛsɔɔ hu?