Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Sanekpakpa ni Jɛ Nyɔŋmɔ Ŋɔɔ!

 NIKASEMƆ 9

Te Oweku lɛ Aaafee Tɛŋŋ Aná Miishɛɛ?

Te Oweku lɛ Aaafee Tɛŋŋ Aná Miishɛɛ?

1. Mɛni hewɔ ja nuu ekpee yoo dani miishɛɛ baahi amɛweku shihilɛ mli lɛ?

Sanekpakpa lɛ jɛ Yehowa, miishɛɛ Nyɔŋmɔ lɛ, ni sumɔɔ ni miishɛɛ ahi wekui amli lɛ ŋɔɔ. (1 Timoteo 1:11) Lɛ eto gbalashihilɛ shishi. Ja nuu ekpee yoo dani miishɛɛ baahi amɛweku shihilɛ mli, ejaakɛ no haa weku lɛ feɔ shweshweeshwe kɛha bii atsɔsemɔ.

Te Nyɔŋmɔ buɔ gbalashihilɛ ehaa tɛŋŋ? Eesumɔ ni nuu kɛ yoo lɛ ahi shi daa. Esa akɛ Kristofoi aye maŋ mla ákɛ akɛ gbalashihilɛ awo mla shishi lɛ nɔ. (Luka 2:1, 4, 5) Yehowa miisumɔ ni wumɛi kɛ ŋamɛi aye amɛhe anɔkwa. (Hebribii 13:4) Enyɛɔ gbalatsemɔ. (Maleaki 2:16) Shi eŋmɛɔ Kristofoi agbɛ ni amɛtse gbãla ni amɛkɛ mɔ kroko ahi shi kɛ́ amɛhefatalɔ lɛ bɔ ajwamaŋ.Kanemɔ Mateo 19:3-6, 9.

2. Te esa akɛ wu kɛ ŋa kɛ amɛhe aye aha tɛŋŋ?

Yehowa bɔ nuu kɛ yoo koni amɛye amɛbua amɛhe yɛ gbalashihilɛ mli. (1 Mose 2:18) Akɛni wu lɛ ji weku lɛ yitso hewɔ lɛ, lɛ tsutsu esa akɛ eha eweku lɛ amɛheloonaa hiamɔ nii, ní etsɔɔ amɛ Nyɔŋmɔ he nii. Esa akɛ esumɔ eŋa lɛ ní ekɛ ehe ashã afɔle eha lɛ. Esa akɛ wumɛi kɛ ŋamɛi asumɔ amɛhe, ní amɛjie bulɛ kpo amɛtsɔɔ amɛhe. Akɛni wumɛi kɛ ŋamɛi fɛɛ yeee emuu hewɔ lɛ, esa akɛ amɛkɛ tɔmɔi akekee amɛhe, ni no titri baaha miishɛɛ ahi amɛgbalashihilɛ lɛ mli.Kanemɔ Efesobii 4:31, 32; 5:22-25, 33; 1 Petro 3:7.

3. Kɛ́ miishɛɛ bɛ nyɛgbãla lɛ mli lɛ, ani esa akɛ oshi ohefatalɔ lɛ?

Kɛ́ nyɛkɛ naagbai miikpe yɛ nyɛgbãla lɛ mli lɛ, esa akɛ nyɛ fɛɛ nyɛbɔ mɔdɛŋ nyɛjie suɔmɔ kpo nyɛtsɔɔ nyɛhe. (1 Korintobii  13:4, 5) Nyɔŋmɔ Wiemɔ lɛ ejieee yi akɛ kɛ́ mɔ kɛ naagbai ni akɛkpeɔ yɛ gbalashihilɛ mli miikpe lɛ, etse ehe.Kanemɔ 1 Korintobii 7:10-13.

4. Bii, mɛni Nyɔŋmɔ taoɔ ni nyɛná?

Yehowa miitao ni nyɛná miishɛɛ. Ekɛ gbɛtsɔɔmɔi ni hi fe fɛɛ ni baaha nyɛná miishɛɛ yɛ nyɛblahiiaŋ loo nyɛblayeiaŋ lɛ haa nyɛ. Eetao ni nyɛná nilee kɛ niiashikpamɔ ní nyɛfɔlɔi yɔɔ lɛ he sɛɛ. (Kolosebii 3:20) Agbɛnɛ hu, Yehowa ji nyɛ-Bɔlɔ, ni eesumɔ ni nyɛfee lɛ kɛ e-Bi lɛ suɔmɔnaa nii koni nyɛná miishɛɛ.Kanemɔ Jajelɔ 11:9–12:1; Mateo 19:13-15; 21:15, 16.

5. Fɔlɔi, te nyɛbii lɛ aaafee tɛŋŋ aná miishɛɛ?

Esa akɛ nyɛtsu nii waa koni nyɛná niyenii, shihilɛhe, kɛ hehaanii nyɛha nyɛbii lɛ. (1 Timoteo 5:8) Shi bɔni afee ni nyɛbii lɛ aná miishɛɛ lɛ, ehe miihia hu ni nyɛtsɔɔ amɛ ni amɛsumɔ Nyɔŋmɔ, ní amɛkase nii kɛjɛ eŋɔɔ. (Efesobii 6:4) Nɔkwɛmɔnɔ ni nyɛfeɔ kɛtsɔɔ akɛ nyɛsumɔɔ Nyɔŋmɔ lɛ baanyɛ aná nyɛbi lɛ tsui nɔ hewalɛ waa. Kɛ́ nyɛjɛ Nyɔŋmɔ Wiemɔ lɛ mli nyɛtsɔɔ nyɛbi lɛ nii lɛ, ebaanyɛ eha esusu nii ahe yɛ gbɛ kpakpa nɔ.Kanemɔ 5 Mose 6:4-7; Abɛi 22:6.

Kɛ́ nyɛwo nyɛbii lɛ hewalɛ ni nyɛjie amɛyi lɛ, amɛnáa he sɛɛ waa. Jajemɔ kɛ kãmɔ hu he miihia amɛ. Tsɔsemɔ ni tamɔ nɛkɛ lɛ baabu amɛhe kɛjɛ nifeemɔi ni haŋ amɛná miishɛɛ lɛ ahe. (Abɛi 22:15) Kɛlɛ, esaaa akɛ nyɛkɛ yiwalɛ tsɔseɔ amɛ.Kanemɔ Kolosebii 3:21.

Yehowa Odasefoi feɔ woji babaoo ni ato he gbɛjianɔ titri koni eye ebua fɔlɔi kɛ gbekɛbii. Ajɛɔ Biblia lɛ mli aŋmalaa woji nɛɛ.Kanemɔ Lala 19:8, 12.

 

Ekrokromɛi Hu Nɛ

Hã Nyɔŋmɔ Awa Bo ni Miishɛɛ Ahi Ogbãla lɛ Mli

Sanebimɔi enyɔ komɛi baanyɛ aye abua bo ni ohã ogbalashihilɛ asɔ fe tsutsu lɛ.

Bɔ ni Atsuɔ Naagbai Ahe Nii Ahãa

Gbɛ nɔ ni atsɔɔ atsuɔ saji ahe nii lɛ baanyɛ ahã gbãla asɔ ni miishɛɛ ahi mli, aloo efee ahuntoo nɔ, ni miishɛɛ bɛ mli.

Bɔ ni Ooofee Oha Miishɛɛ Ahi Oweku Shihilɛ Mli

Suɔmɔ ni Yesu jie lɛ kpo lɛ ji nɔkwɛmɔnɔ ni esa akɛ wumɛi, ŋamɛi, fɔlɔi, kɛ gbekɛbii fɛɛ akase. Mɛni wɔkaseɔ yɛ nɔ ni efee lɛ mli?