Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Sanekpakpa ni Jɛ Nyɔŋmɔ Ŋɔɔ!

 NIKASEMƆ 2

Namɔ Ji Nyɔŋmɔ?

Namɔ Ji Nyɔŋmɔ?

1. Mɛni hewɔ esa akɛ wɔjá Nyɔŋmɔ?

Anɔkwa Nyɔŋmɔ lɛ ji mɔ ni bɔ nibii fɛɛ. Ebɛ shishijee ni ebɛ naagbee hu. (Lala 90:2) Sanekpakpa ni yɔɔ Biblia lɛ mli lɛ jɛ eŋɔɔ. (1 Timoteo 1:11) Akɛni Nyɔŋmɔ ni ha wɔ wala hewɔ lɛ, esa akɛ wɔjá lɛ pɛ.Kanemɔ Kpojiemɔ 4:11.

2. Te Nyɔŋmɔ tamɔ tɛŋŋ?

Adesa ko enako Nyɔŋmɔ pɛŋ ejaakɛ Nyɔŋmɔ lɛ Mumɔ ni, ni tsɔɔ akɛ wala ni eyɔɔ lɛ nɔ kwɔ kwraa fe bɔɔ nii ni yɔɔ shikpɔŋ lɛ nɔ lɛ anɔ̃. (Yohane 1:18; 4:24) Ni kɛlɛ, nibii ni Nyɔŋmɔ bɔ lɛ haa wɔnaa esui. Akɛ nɔkwɛmɔnɔ lɛ, aduawai kɛ fɔfɔi srɔtoisrɔtoi ni efee lɛ haa wɔnaa akɛ eyɛ suɔmɔ kɛ nilee. Jeŋ muu lɛ fɛɛ dalɛ haa wɔnaa akɛ eyɛ hewalɛ.Kanemɔ Romabii 1:20.

Kɛ́ wɔkane Biblia lɛ, wɔbaanyɛ wɔle Nyɔŋmɔ sui lɛ ahe nii babaoo. Akɛ nɔkwɛmɔnɔ lɛ, Biblia lɛ haa wɔleɔ nibii ni Nyɔŋmɔ sumɔɔ kɛ nibii ni esumɔɔɔ, bɔ ni ekɛ mɛi yeɔ ehaa, kɛ bɔ ni etsuɔ shihilɛi srɔtoi ahe nii ehaa.Kanemɔ Lala 103:7-10.

3. Ani Nyɔŋmɔ yɛ gbɛ́i?

Yesu kɛɛ akɛ: ‘Wɔtsɛ ni yɔɔ ŋwɛi, ogbɛ́i lɛ he atse.’ (Mateo 6:9) Eyɛ mli akɛ Nyɔŋmɔ yɛ gbɛnaa gbɛ́i pii moŋ, shi eyɛ gbɛ́i kome pɛ. Wiemɔ fɛɛ wiemɔ kɛ bɔ ni amɛtsɛɔ gbɛ́i lɛ amɛhaa. Yɛ Ga mli lɛ, atsɛɔ lɛ “Yehowa.” Shi mɛi komɛi hu tsɛɔ lɛ “Yahweh.”Kanemɔ Lala 83:19.

Ajie Nyɔŋmɔ gbɛ́i lɛ kɛjɛ Bibliai babaoo amli ni akɛ gbɛnaa gbɛ́i ni ji Nuŋtsɔ loo Nyɔŋmɔ eto najiaŋ. Shi beni aŋma Biblia lɛ, Nyɔŋmɔ gbɛ́i lɛ je kpo yɛ mli aaafee shii 7,000. Beni Yesu tsɔɔ mɛi Nyɔŋmɔ he nii lɛ, ejie Nyɔŋmɔ gbɛ́i lɛ shi etsɔɔ amɛ.Kanemɔ Yohane 17:26.

 4. Ani Yehowa susuɔ wɔhe?

Nyɔŋmɔ miifee nibii ni wɔbaaná he sɛɛ kɛya naanɔ, tamɔ tsɛ ni yɔɔ suɔmɔ nɛɛ

Ani anɔkwale ni eji akɛ adesai babaoo miipiŋ lɛ tsɔɔ akɛ Yehowa ji Nyɔŋmɔ ni susuuu wɔhe? Mɛi komɛi wieɔ akɛ ehaa wɔpiŋɔ koni ekɛka wɔ ekwɛ, shi ebɛ mli nakai.Kanemɔ Yakobo 1:13.

Nyɔŋmɔ bɔ adesai koni amɛ diɛŋtsɛ amɛhala nɔ ni amɛsumɔɔ, ni ekɛ no wo amɛhiɛ nyam. Ani wɔhiɛ esɔɔɔ hegbɛ ni wɔná akɛ wɔ diɛŋtsɛ wɔhala akɛ wɔbaasɔmɔ Nyɔŋmɔ lɛ? (Yoshua 24:15) Shi akɛni mɛi pii halaa akɛ amɛbaafee mɛi krokomɛi nibii fɔji hewɔ lɛ, piŋmɔi efa babaoo. Jalɛ sane ni ayeee nɛɛ dɔɔ Yehowa.Kanemɔ 1 Mose 6:5, 6.

Yehowa ji Nyɔŋmɔ ni susuɔ wɔhe. Eesumɔ ni wɔmii ashɛ wɔhe. Etsɛŋ, ebaajie piŋmɔ kɛ mɛi ni haa apiŋɔ lɛ fɛɛ. Ni kɛlɛ, eyɛ yiŋtoo kpakpa hewɔ ni eŋmɛ piŋmɔ gbɛ be kukuoo lɛ. Wɔbaakase nakai yiŋtoo lɛ he nii yɛ Nikasemɔ 8 lɛ mli.Kanemɔ 2 Petro 2:9; 3:7, 13.

5. Te wɔɔfee tɛŋŋ wɔtsi wɔbɛŋkɛ Nyɔŋmɔ kpaakpa?

Yehowa fɔ̃ɔ wɔ nine ni wɔtsi wɔbɛŋkɛ lɛ kɛtsɔ wiemɔ ni wɔkɛ lɛ aaawie yɛ sɔlemɔ mli lɛ nɔ. Eyɛ wɔteŋ mɔ fɛɛ mɔ he miishɛɛ. (Lala 65:3; 145:18) Eesumɔ ni ekɛ wɔhe eshai ake wɔ. Enaa mɔdɛŋ ni wɔbɔɔ akɛ wɔsa ehiɛ lɛ kɛ́ bei komɛi lɛ wɔtɔ̃ɔ po. No hewɔ lɛ, yɛ emuu ni wɔyeee lɛ fɛɛ sɛɛ lɛ, wekukpaa kpakpa baanyɛ ahi wɔ kɛ Nyɔŋmɔ teŋ.Kanemɔ Lala 103:12-14; Yakobo 4:8.

Akɛni Yehowa eha wɔ wala hewɔ lɛ, esa akɛ wɔsumɔ lɛ fe mɔ fɛɛ mɔ. (Marko 12:30) Kɛ́ okase Nyɔŋmɔ he nii babaoo, ni ofee nibii ni etaoɔ ni ofee lɛ, no tsɔɔ akɛ osumɔɔ lɛ, ni obaatsi obɛŋkɛ lɛ kpaakpa.Kanemɔ 1 Timoteo 2:4; 1 Yohane 5:3.

Ekrokomɛi Hu Nɛ

SANEKPAKPA NI JƐ NYƆŊMƆ ŊƆƆ!

Ani Nyɔŋmɔ yɛ Gbɛ́i?

Nyɔŋmɔ yɛ gbɛnaa gbɛ́i pii, ekomɛi ji Ofe, Bɔlɔ, kɛ Nuŋtsɔ. Shi atsĩ Nyɔŋmɔ diɛŋtsɛ gbɛ́i lɛ tã shii 7,000 kɛ sɛɛ yɛ Biblia lɛ mli.