Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Sanekpakpa ni Jɛ Nyɔŋmɔ Ŋɔɔ!

 NIKASEMƆ 8

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

1. Te fee tɛŋŋ efɔŋfeemɔ je shishi?

Nyɔŋmɔ eŋmɛ adesai agbɛ ni amɛye nɔ be kpalaŋŋ kɛtsɔɔ akɛ amɛnyɛŋ amɛtsu adesai anaagbai ahe nii

Efɔŋfeemɔ je shishi yɛ shikpɔŋ lɛ nɔ beni Satan male klɛŋklɛŋ kwraa lɛ. Shishijee lɛ, Satan ji bɔfo ni eye emuu, shi “edamɔɔɔ anɔkwale lɛ mli.” (Yohane 8:44) Nyɔŋmɔ pɛ ji mɔ ni esa akɛ ajá, shi Satan ná shwelɛ akɛ ajá lɛ moŋ. Satan laka Hawa, ni ji klɛŋklɛŋ yoo lɛ, ni ekɔne eyiŋ koni ebo lɛ moŋ toi fe Nyɔŋmɔ. Adam yafata Hawa he kɛgbo Nyɔŋmɔ nɔ toi. Piŋmɔ kɛ gbele jɛ nɔ ni Adam fee lɛ mli kɛba.Kanemɔ 1 Mose 3:1-6, 19.

Satan tsɔ kɛɛmɔ ni ekɛɛ Hawa akɛ egbo Nyɔŋmɔ nɔ toi lɛ nɔ etse Nyɔŋmɔ nɔyeli lɛ loo hegbɛ ni Nyɔŋmɔ yɔɔ akɛ Ofe lɛ hiɛ atua. Adesai babaoo eyafata Satan he ni amɛkpoo Nyɔŋmɔ akɛ amɛ-Nɔyelɔ. No hewɔ lɛ, Satan ebatsɔ “je lɛŋ lumɔ lɛ.”Kanemɔ Yohane 14:30; 1 Yohane 5:19.

2. Ani Nyɔŋmɔ ebɔɔɔ ade jogbaŋŋ?

Nyɔŋmɔ bɔ ade jogbaŋŋ. Nyɔŋmɔ bɔ adesai kɛ ŋwɛi bɔfoi lɛ bɔ ni amɛbaanyɛ amɛbo lɛ toi kɛwula shi. (5 Mose 32:4, 5) Nyɔŋmɔ bɔ wɔ bɔ ni wɔ diɛŋtsɛ wɔbaanyɛ wɔkpɛ yiŋ akɛ wɔbaafee ekpakpa loo efɔŋ. Nyɛmɔ nɛɛ haa wɔnáa hegbɛ koni wɔkɛtsɔɔ kɛji wɔsumɔɔ Nyɔŋmɔ loo wɔsumɔɔɔ lɛ.Kanemɔ Yakobo 1:13-15; 1 Yohane 5:3.

3. Mɛni hewɔ Nyɔŋmɔ eŋmɛ piŋmɔ gbɛ kɛbashi ŋmɛnɛ?

Yehowa eŋmɛ enɔyeli lɛ hiɛ atua ni atse lɛ gbɛ kɛyaashi be ko. Mɛni hewɔ? Bɔni afee ni ekɛha ana akɛ kɛ́ ehe bɛ nɔyeli ko mli lɛ, mɛi naŋ he sɛɛ. (Jajelɔ 7:29; 8:9) Afii 6,000 ni adesai kɛye amɛhe nɔ lɛ eha anɔkwa  sane nɛɛ efee faŋŋ. Adesai nɔyelɔi nyɛko afo ta, awuiyeli, efɔŋfeemɔ, kɛ hela sɛɛ.Kanemɔ Yeremia 10:23; Romabii 9:17.

Adesa nɔyeli he baaa sɛɛnamɔ, shi Nyɔŋmɔ nɔyeli lɛ he baa sɛɛnamɔ kɛhaa mɛi ni kpɛlɛɔ nɔ lɛ. (Yesaia 48:17, 18) Etsɛŋ, Yehowa baakpata adesa nɔyelii fɛɛ hiɛ. Mɛi ni kpɛlɛɔ Nyɔŋmɔ nɔyeli lɛ nɔ lɛ pɛ baahi shikpɔŋ lɛ nɔ.—Yesaia 11:9.Kanemɔ Daniel 2:44.

4. Mɛɛ hegbɛ wɔná yɛ Nyɔŋmɔ tsuishitoo lɛ hewɔ?

Satan tsɔɔ akɛ adesai sɔmɔɔ Yehowa yɛ nibii kpakpai ni amɛnáa lɛ pɛ ahewɔ. Ani obaasumɔ ni oha ana akɛ eji amalelɔ? Obaanyɛ ofee nakai! Nyɔŋmɔ tsui shi ni eto lɛ haa wɔ fɛɛ wɔnáa hegbɛ koni wɔkɛtsɔɔ kɛji wɔkpɛlɛɔ Nyɔŋmɔ nɔyeli nɔ loo adesa nɔyeli nɔ. Bɔ ni wɔhiɔ shi wɔhaa lɛ tsɔɔ nɔ ni wɔkpɛlɛɔ nɔ.Kanemɔ Hiob 1:8-12; Abɛi 27:11.

5. Te wɔɔfee tɛŋŋ wɔkpɛlɛ Nyɔŋmɔ nɔ akɛ wɔ-Nɔyelɔ?

Yiŋ ni wɔkpɛɔ lɛ tsɔɔ kɛji wɔmiisumɔ ni Nyɔŋmɔ afee wɔ-Nɔyelɔ

Kɛ́ wɔtao anɔkwa jamɔ ni atsɔɔ yɛ e-Wiemɔ ni ji Biblia lɛ mli, ni wɔhi shi yɛ naa lɛ, no tsɔɔ akɛ wɔkpɛlɛɔ Nyɔŋmɔ nɔ akɛ wɔ-Nɔyelɔ. (Yohane 4:23) Taakɛ Yesu fee lɛ, kɛ́ wɔkɛ wɔhe wooo maŋkwramɔŋ saji amli ni wɔwuuu ta lɛ, no tsɔɔ akɛ wɔkpoɔ Satan akɛ wɔnɔyelɔ.Kanemɔ Yohane 17:14.

Satan kɛ hewalɛ ni eyɔɔ lɛ tsuɔ nii kɛwoɔ nifeemɔi gbohii ni yeɔ mɔ awui ahe hewalɛ. Kɛ́ wɔkpoo nakai nifeemɔi lɛ, ekolɛ wɔnanemɛi kɛ wɔwekumɛi lɛ ekomɛi baaye wɔhe fɛo, loo amɛbaate shi amɛwo wɔ. (1 Petro 4:3, 4) Belɛ esa akɛ wɔkpɛ wɔyiŋ. Ani wɔkɛ mɛi ni sumɔɔ Nyɔŋmɔ baabɔ? Ani wɔbaaye emlai ni nilee yɔɔ mli ni tsɔɔ akɛ esumɔɔ wɔ lɛ anɔ? Kɛ́ wɔfee nakai lɛ, wɔhaa anaa akɛ nɔ ni Satan wie akɛ mɔ ko boŋ Nyɔŋmɔ toi yɛ shihilɛi ni mli wawai amli lɛ ji amale.Kanemɔ 1 Korintobii 6:9, 10; 15:33.

Suɔmɔ ni Nyɔŋmɔ sumɔɔ adesai lɛ maa nɔ mi akɛ bɔ fɛɛ bɔ ni fee lɛ efɔŋfeemɔ kɛ piŋmɔ sɛɛ baafo. Mɛi ni kɛ amɛnifeemɔi tsɔɔ akɛ amɛheɔ enɛ amɛyeɔ lɛ baahi shikpɔŋ lɛ nɔ kɛya naanɔ.Kanemɔ Yohane 3:16.

 

Ekrokromɛi Hu Nɛ

Mɛni Hewɔ Nyɔŋmɔ Ŋmɛɔ Piŋmɔ Gbɛ?

Mɛi babaoo susuɔ akɛ Nyɔŋmɔ ji mɔ ni hɔ piŋmɔi fɛɛ ni yaa nɔ yɛ je lɛŋ lɛ sɛɛ. Te osusuɔ tɛŋŋ? Kanemɔ koni ole nɔ ni Nyɔŋmɔ susumɔ yɛ nɔ hewɔ ni mɛi piŋɔ lɛ he.