Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Sanekpakpa ni Jɛ Nyɔŋmɔ Ŋɔɔ!

 NIKASEMƆ 3

Ani Sanekpakpa lɛ Jɛ Nyɔŋmɔ Ŋɔɔ Lɛɛlɛŋ?

Ani Sanekpakpa lɛ Jɛ Nyɔŋmɔ Ŋɔɔ Lɛɛlɛŋ?

1. Namɔ ji Biblia lɛ Ŋmalɔ?

Aŋma sanekpakpa ni ji akɛ adesai baahi shi kɛya naanɔ yɛ shikpɔŋ lɛ nɔ lɛ yɛ Biblia lɛ mli. (Lala 37:29) Woji bibii 66 yɔɔ mli. Nyɔŋmɔ kɛ hii anɔkwafoi aaafee 40 tsu nii kɛŋma. Mose ŋmala klɛŋklɛŋ woji enumɔ lɛ aaafee afii 3,500 ni eho nɛ. Bɔfo Yohane ŋma naagbee wolo lɛ nɔ ni fa fe afii 1,900 ni eho nɛ. Namɔ susumɔi Biblia ŋmalɔi lɛ ŋmala amɛshwie shi lɛ? Nyɔŋmɔ tsɔ emumɔ krɔŋkrɔŋ lɛ nɔ ekɛ Biblia ŋmalɔi lɛ wie. (2 Samuel 23:2) Amɛŋmala Nyɔŋmɔ susumɔi, shi jeee amɛ diɛŋtsɛ amɛsusumɔi. No hewɔ lɛ, Yehowa ji Biblia lɛ Ŋmalɔ.Kanemɔ 2 Timoteo 3:16; 2 Petro 1:20, 21.

2. Te wɔɔfee tɛŋŋ wɔná nɔmimaa akɛ Biblia lɛ ja?

Wɔle akɛ Biblia lɛ jɛ Nyɔŋmɔ ŋɔɔ, ejaakɛ Biblia lɛ gbaa nibii ni baaba wɔsɛɛ lɛ fitsofitso. Adesa ko nyɛŋ afee nakai. (Yoshua 23:14) Nyɔŋmɔ Ofe lɛ pɛ baanyɛ ana nɔ ni baaba adesai anɔ wɔsɛɛ.Kanemɔ Yesaia 42:9; 46:10.

Wɔkpaa gbɛ akɛ wolo ni jɛ Nyɔŋmɔ ŋɔɔ lɛ baafee srɔto, ni nakai pɛpɛɛpɛ eji. Atsɔɔ Biblia lɛ shishi kɛtee wiemɔi ohai abɔ mli ni ajara akpekpe toi akpei abɔ aha mɛi. Eyɛ mli akɛ Biblia lɛ etsɛ waa moŋ, shi ekɛ adebɔɔ nibii ahe nilee ni ja kpãa gbee. Agbɛnɛ hu, mɛi 40 ni ŋmala lɛ eteee shi amɛwooo amɛhe. * Kɛfata he lɛ, nibii ni Biblia lɛ wieɔ yɛ suɔmɔ he lɛ maa nɔ mi akɛ ejɛ Nyɔŋmɔ ni yɔɔ suɔmɔ lɛ ŋɔɔ, ni ekã he ehaa mɛi tsakeɔ amɛtsɔmɔɔ gbɔmɛi kpakpai. Anɔkwa saji nɛɛ kɔneɔ mɛi akpekpei abɔ yiŋ akɛ Biblia lɛ ji Nyɔŋmɔ Wiemɔ.Kanemɔ 1 Tesalonikabii 2:13.

 3. Mɛni he Biblia lɛ wieɔ?

Biblia lɛ gbalaa jwɛŋmɔ kɛyaa sanekpakpa ni ji akɛ Nyɔŋmɔ yɛ yiŋtoo kpakpa kɛha adesai lɛ nɔ. Ŋmalɛi lɛ tsɔɔ bɔ ni fee ni hegbɛ ni adesai ná yɛ shishijee mli akɛ amɛhi paradeiso yɛ shikpɔŋ lɛ nɔ lɛ ŋmɛɛ amɛ, kɛ bɔ ni yɛ naagbee lɛ abaaha shikpɔŋ lɛ atsɔ paradeiso ekoŋŋ.Kanemɔ Kpojiemɔ 21:4, 5.

Mlai, shishitoo mlai, kɛ ŋaawoi hu yɛ Nyɔŋmɔ Wiemɔ lɛ mli. Kɛfata he lɛ, bɔ ni Nyɔŋmɔ kɛ adesai ye eha he amaniɛbɔi yɛ Biblia lɛ mli—ni amaniɛbɔi nɛɛ haa wɔnaa nɔ̃ Nyɔŋmɔ ni eji. No hewɔ lɛ, Biblia lɛ baanyɛ aye abua bo ni ole Nyɔŋmɔ. Etsɔɔ bɔ ni ooofee otsɔ enaanyo.Kanemɔ Lala 19:8, 12; Yakobo 2:23; 4:8.

4. Te ooofee tɛŋŋ onu Biblia lɛ shishi?

Wolo nɛɛ baatsɔ gbɛ ni Yesu tsɔ nɔ etsɔɔ nii lɛ nɔŋŋ nɔ eye ebua bo koni onu Biblia lɛ shishi. Yesu tsɛɔ Biblia mli ŋmalɛi ayisɛɛ, ni ‘etsɔɔ nakai ŋmalɛi lɛ ashishi.’Kanemɔ Luka 24:27, 45.

Nibii ni haa mɔ náa miishɛɛ waa lɛ ateŋ ekome ji sanekpakpa ni jɛ Nyɔŋmɔ ŋɔɔ lɛ. Kɛlɛ, mɛi komɛi nyaaa sanekpakpa lɛ he, ni mɛi komɛi po amli fuɔ yɛ he. Kaaha no je onijiaŋ wui. Ja oná ole Nyɔŋmɔ jogbaŋŋ dani obaaná naanɔ wala.Kanemɔ Yohane 17:3.

 

^ kk. 3 Kwɛmɔ wolo bibioo ni ji Wolo Kɛha Gbɔmɛi Fɛɛ lɛ.