Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Sanekpakpa ni Jɛ Nyɔŋmɔ Ŋɔɔ!

 NIKASEMƆ 11

Mɛɛ Gbɛ nɔ Wɔnáa Biblia mli Shishitoo Mlai Ahe Sɛɛ?

Mɛɛ Gbɛ nɔ Wɔnáa Biblia mli Shishitoo Mlai Ahe Sɛɛ?

1. Mɛni hewɔ gbɛtsɔɔmɔ he hiaa wɔ?

Mɛɛ gbɛ nɔ Biblia mli shishitoo mlai haaa wɔfee nibii ni kɛ wɔ loo mɛi awala baawo oshara mli?—LALA 36:10.

Wɔ-Bɔlɔ lɛ le nii kwraa fe wɔ. Akɛ Tsɛ ni yɔɔ suɔmɔ lɛ, esusuɔ wɔhe. Ebɔɔɔ wɔ akɛ wɔ diɛŋtsɛ wɔtsɔɔ wɔhe gbɛ. (Yeremia 10:23) No hewɔ lɛ, taakɛ fɔlɔi agbɛtsɔɔmɔ he hiaa amɛbi lɛ, nakai nɔŋŋ Nyɔŋmɔ gbɛtsɔɔmɔ he hiaa wɔ fɛɛ. (Yesaia 48:17, 18) Biblia mli shishitoo mlai lɛ tsɔɔ wɔ gbɛ, ni nakai gbɛtsɔɔmɔ lɛ ji nikeenii ni jɛ Nyɔŋmɔ ŋɔɔ.Kanemɔ 2 Timoteo 3:16.

Yehowa mlai kɛ eshishitoo mlai lɛ tsɔɔ wɔ shihilɛ gbɛ ni hi fe fɛɛ amrɔ nɛɛ, ni etsɔɔ wɔ bɔ ni wɔɔfee wɔná jɔɔmɔi kɛya naanɔ wɔsɛɛ. Akɛni Nyɔŋmɔ ji mɔ ni bɔ wɔ hewɔ lɛ, esa jogbaŋŋ akɛ wɔbo egbɛtsɔɔmɔi lɛ atoi, ni wɔkɛjie hiɛsɔɔ kpo.Kanemɔ Lala 19:8, 12; Kpojiemɔ 4:11.

2. Mɛni ji Biblia mli shishitoo mlai?

Biblia mli shishitoo mlai ji anɔkwa saji ni he hiaa waa ni anyɛɔ akɛtsuɔ nii yɛ shihilɛi srɔtoisrɔtoi amli. Nɔ ni tamɔɔɔ nakai lɛ, akɛ mlai tsuɔ nii yɛ shihilɛi pɔtɛi komɛi pɛ amli. (5 Mose 22:8) Esa akɛ wɔsusu nii ahe jogbaŋŋ koni wɔna bɔ ni esa akɛ wɔkɛ shishitoo mla ko atsu nii yɛ shihilɛ pɔtɛɛ ko mli. (Abɛi 2:10-12) Akɛ nɔkwɛmɔnɔ lɛ, Biblia lɛ tsɔɔ akɛ wala ji nikeenii ni jɛ Nyɔŋmɔ ŋɔɔ. Shishitoo mla nɛɛ baanyɛ akudɔ wɔ yɛ wɔnitsumɔhe, wɔshĩa, kɛ beni wɔmiifã gbɛ. Ehaaa wɔfee nibii ni kɛ wɔ loo mɛi krokomɛi awala baawo oshara mli.Kanemɔ Bɔfoi lɛ Asaji 17:28.

3. Mɛɛ shishitoo mlai enyɔ he hiaa fe fɛɛ?

Yesu wie shishitoo mlai enyɔ komɛi ni he hiaa fe fɛɛ lɛ ahe. Klɛŋklɛŋ nɔ lɛ  haa anaa yiŋtoo hewɔ ni abɔ adesa—ní ele Nyɔŋmɔ, esumɔ lɛ, ní ekɛ anɔkwayeli asɔmɔ lɛ. Esa akɛ wɔkɛ klɛŋklɛŋ shishitoo mla nɛɛ atsu nii yɛ yiŋ fɛɛ ni wɔkpɛɔ lɛ mli. (Abɛi 3:6) Mɛi ni hiɔ shi yɛ shishitoo mla nɛɛ naa lɛ baatsɔmɔ Nyɔŋmɔ nanemɛi, ni amɛbaaná anɔkwa miishɛɛ kɛ naanɔ wala.Kanemɔ Mateo 22:36-38.

Shishitoo mla ni ji enyɔ lɛ baanyɛ aye abua wɔ koni toiŋjɔlɛ ahi wɔkɛ mɛi ateŋ. (1 Korintobii 13:4-7) Kɛ́ wɔkɛ mɛi ye tamɔ bɔ ni Nyɔŋmɔ kɛ mɛi yeɔ ehaa lɛ, belɛ wɔkɛ shishitoo mla ni ji enyɔ nɛɛ miitsu nii.Kanemɔ Mateo 7:12; 22:39, 40.

4. Mɛɛ gbɛ nɔ wɔnáa Biblia mli shishitoo mlai ahe sɛɛ?

Biblia mli shishitoo mlai haa wekui naa bɔ ni suɔmɔ baanyɛ afee amɛ ekome. (Kolosebii 3:12-14) Agbɛnɛ hu, Nyɔŋmɔ Wiemɔ lɛ tsɔɔ wɔ shishitoo mla kroko—akɛ akatse gbãla, ni ekɛ enɛ buɔ wekui ahe.Kanemɔ 1 Mose 2:24.

Kɛ́ wɔkɛ Biblia mli shishitoo mlai tsu nii lɛ, ebaanyɛ eha wɔhi shi jogbaŋŋ, ni wɔtoiŋ hu baajɔ wɔ. Akɛ nɔkwɛmɔnɔ lɛ, bei pii lɛ nitsumɔtsɛmɛi sumɔɔ nitsulɔi ni kɛ Biblia mli shishitoo mla ni kɔɔ anɔkwayeli kɛ mɔdɛŋbɔɔ he lɛ tsuɔ nii. (Abɛi 10:4, 26; Hebribii 13:18) Agbɛnɛ hu, Nyɔŋmɔ Wiemɔ lɛ tsɔɔ wɔ akɛ wɔha wɔmii ashɛ shihilɛ mli hiamɔ nii ni wɔyɔɔ lɛ ahe, ní wɔbu naanyo ni wɔkɛ Nyɔŋmɔ aaabɔ lɛ akɛ ehe hiaa kwraa fe heloonaa nibii.Kanemɔ Mateo 6:24, 25, 33; 1 Timoteo 6:8-10.

Kɛ́ wɔkɛ Biblia mli shishitoo mlai tsu nii lɛ, ebaanyɛ eha wɔná gbɔmɔtsoŋ hewalɛ kpakpa. (Abɛi 14:30; 22:24, 25) Akɛ nɔkwɛmɔnɔ lɛ, kɛ́ wɔye Nyɔŋmɔ mla ni kɔɔ dãatɔɔ he lɛ nɔ lɛ, ebuɔ wɔhe kɛjɛɔ gbele helai kɛ osharai ahe. (Abɛi 23:20) Yehowa ŋmɛɔ wɔ gbɛ ni wɔnu dãa, shi esaaa akɛ wɔnuɔ lɛ babaoo. (Lala 104:15; 1 Korintobii 6:10) Kɛ́ wɔkudɔ wɔnifeemɔi kɛ wɔsusumɔi jogbaŋŋ taakɛ Nyɔŋmɔ shishitoo mlai lɛ tsɔɔ wɔ lɛ, wɔnáa he sɛɛ. (Lala 119:97-100) Kɛlɛ, jeee sɛɛ ni anɔkwa Kristofoi baaná hewɔ amɛkɛ Nyɔŋmɔ shishitoo mlai lɛ tsuɔ nii. Amɛfeɔ nakai koni amɛkɛwo Yehowa hiɛ nyam.Kanemɔ Mateo 5:14-16.

 

Ekrokromɛi Hu Nɛ

Ní Aaahi Shi yɛ Gbɛ ni Saa Nyɔŋmɔ Hiɛ lɛ Nɔ

Abaanyɛ ahi shi bɔ ni saa Yehowa hiɛ. Yɛ anɔkwale mli lɛ, obaanyɛ otsɔ enaanyo.

Buu Wala Taakɛ Nyɔŋmɔ Buɔ lɛ Lɛ

Te Nyɔŋmɔ naa hɔkpɔmɔ, lá ni agbalaa awoɔ mɔ mli, kɛ kooloo hu wala ehãa tɛŋŋ?

Biblia Nikasemɔ ni Aheee Nɔ Ko

Bi koni akɛ bo akase Biblia lɛ yaka. Abaafee lɛ be ni osumɔɔ kɛ he ni osumɔɔ.