Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Saji 10 ni Oblahii kɛ Oblayei Biɔ lɛ Ahetoo

 SANEBIMƆ 1

Namɔ Mi Ji?

Namɔ Mi Ji?

NƆ HEWƆ NI EHE HIAA

Kɛ́ ole mɔ ni oji kɛ nibii ni oheɔ oyeɔ lɛ, ebaaye ebua bo ni okpɛ yiŋ ni ja be ni aanyɛ onɔ koni ofee nɔ ko ni esaaa.

MƐNI OBAAFEE?

Feemɔ shihilɛ nɛɛ he mfoniri okwɛ: Karen tee paati ko shishi, aaafee minitii nyɔŋma mli nɔŋŋ kɛkɛ ni enu omaŋfo ko gbee yɛ esɛɛ akɛ:

“Mɛni hewɔ okome odamɔ biɛ?”

Karen fo ehe ni ena enaanyo Jessica ní ehiɛ dãa tɔi enyɔ ni efamɔ naa momo yɛ edɛŋ. Karen yɔse akɛ eji dãa ni naa wa. Jessica kpã ekome mli ehã Karen ni ekɛɛ: “Bɛ jeee gbekɛ ji bo, kɛ́ onu dãa fioo lɛ bɛ jeee nɔ ko?”

Karen sumɔɔɔ ni eheɔ, shi enaanyo ji Jessica. Agbɛnɛ hu, esumɔɔɔ ni Jessica naa lɛ akɛ ehiɛ gbeleko. Kɛfata he lɛ, Jessica baa ejeŋ jogbaŋŋ. No hewɔ lɛ kɛ́ eenu dãa lɛ, belɛ naagba tsɔ ko bɛ he. Karen shwie eyiŋ akɛ, ‘Bɛ dãa kɛkɛ ni, jeee wii kɛ ehenɔi lɛ eko ni.’

Bo ji Karen kulɛ, mɛni obaafee?

SUSUMƆ HE JOGBAŊŊ DÃ!

Yɛ shihilɛ tamɔ nɛkɛ mli lɛ, esa akɛ ole mɔ tuuntu ni oji dani obaanyɛ okpɛ yiŋ ni ja. Kɛ́ ole mɔ tuuntu ni oji lɛ, no tsɔɔ akɛ ole sui ni oyɔɔ kɛ nibii ni oheɔ oyeɔ. Enɛɛmɛi ni obaale lɛ baaye abua bo koni bo diɛŋtsɛ okudɔ oshihilɛ, moŋ fe ni obaahã mɛi krokomɛi akudɔ bo.—1 Korintobii 9:26, 27.

Te obaafee tɛŋŋ ole mɔ tuuntu ni oji lɛ? Sanebimɔi ni nyiɛ sɛɛ nɛɛ ahetoo ni obaahã lɛ baaye abua bo.

 1 MƐƐ NYƐMƆI MIYƆƆ?

Kɛ́ ole onyɛmɔi kɛ sui kpakpai ni oyɔɔ lɛ, ebaahã hekɛnɔfɔɔ ni oyɔɔ yɛ omli lɛ mli awa.

BIBLIA MLI NƆKWƐMƆNƆ: Bɔfo Paulo ŋma akɛ: “Kɛ́ mihe esako yɛ wiemɔ mli po lɛ, ekã shi faŋŋ akɛ, miyɛ nilee.” (2 Korintobii 11:6) Akɛni Paulo kase Ŋmalɛi lɛ ni enu shishi jogbaŋŋ hewɔ lɛ, be ni mɛi komɛi te shi amɛwo lɛ lɛ, enyɛ efi shi. Eŋmɛɛɛ gbɛ ni nibii gbohii ni amɛwie yɛ ehe lɛ aje enijiaŋ wui.2 Korintobii 10:10; 11:5.

PƐIMƆ OMLI OKWƐ: Ŋmaa nyɛmɔ ko ni oyɔɔ loo nɔ ko ni ole feemɔ jogbaŋŋ.

Agbɛnɛ ŋmaa su kpakpa ko ni oyɔɔ. (Akɛ nɔkwɛmɔnɔ lɛ, ani osusuɔ mɔ he? ofeɔ ejurɔ? abaanyɛ amu afɔ onɔ? oyeɔ obe nɔ?)

2 MƐƐ GBƆJƆMƆI MIYƆƆ?

Kɛ́ wɔkudɔɔɔ wɔgbɔjɔmɔi, ni wɔhã amɛná wɔnɔ hewalɛ lɛ, ebaanyɛ efite bɔ ni mɛi le wɔ amɛhã lɛ.

BIBLIA MLI NƆKWƐMƆNƆ: Paulo yɔse egbɔjɔmɔi. Eŋma akɛ: “Mimligbɛ gbɔmɔ lɛ náa Nyɔŋmɔ mla lɛ he miishɛɛ jogbaŋŋ, shi minaa mla kroko yɛ migbɔmɔtso lɛ mli ní wuɔ shiɔ mijwɛŋmɔ mla lɛ, ni eŋɔɔ mi nom ehãa esha mla.”Romabii 7:22, 23.

PƐIMƆ OMLI OKWƐ: Mɛɛ gbɔjɔmɔ esa akɛ oye nɔ?

 3 MƐƐ OTII MIKƐMAMƆ MIHIƐ?

Ani obaawo taksi ni okɛɛ draiva lɛ akɛ ekɛ bo abɔle shi yɛ he kome sɔŋŋ kɛyashi epɛtro lɛ fɛɛ baatã? Ebaafee nɔ ni nilee bɛ mli, ni eji nyɔmɔbɔɔ folo hu!

Mɛni enɛ tsɔɔ? Kɛ́ okɛ otii mamɔ ohiɛ lɛ, ehãaa onyiɛ je lɛŋ kɛkɛ tamɔ mɔ ko ni leee he ni eyaa. Yɛ ogbɛfaŋ lɛ, ole he tuuntu ni oyaa kɛ bɔ ni obaafee oshɛ jɛmɛ.

BIBLIA MLI NƆKWƐMƆNƆ: Paulo ŋma akɛ: “Bɔ ni midaa foi lɛ, midaaa lɛ tamɔ nɔ ni oti ko emaaa mihiɛ.” (1 Korintobii 9:26) Nɔ najiaŋ ni Paulo baanyiɛ je lɛŋ kɛkɛ lɛ, ekɛ otii mamɔ ehiɛ, ni efee nibii ni baahã eshɛ nakai otii lɛ ahe.—Filipibii 3:12-14.

PƐIMƆ OMLI OKWƐ: Ŋmalamɔ otii etɛ ni obaasumɔ ni oshɛ he yɛ afi mli.

4 MƐNI MIHEƆ MIYEƆ?

Kɛ́ okpɛ mli akɛ obaahi shi yɛ sui kpakpai ni oyɔɔ kɛ nibii ni oheɔ oyeɔ lɛ anaa lɛ, obafeɔ tamɔ tso ko ni shishifã emɔ shi jogbaŋŋ, ni nyɛɔ ekpeɔ ahum ni naa wa waa naa

 

Kɛ́ obɛ nɔmimaa yɛ nibii ni oheɔ oyeɔ lɛ ahe lɛ, onyɛŋ okpɛ yiŋ ni ja. Ni taakɛ obisaŋkoto feɔ lɛ, obaatsake ohe owo shihilɛ fɛɛ shihilɛ mli koni osa onanemɛi ahiɛ, ni no baatsɔɔ faŋŋ akɛ oleee mɔ tuuntu ni oji.

Shi, kɛ́ ohãa nibii ni oheɔ oyeɔ lɛ kudɔɔ bo lɛ, onyɛɔ ohiɔ shi yɛ nibii ni ole akɛ eja lɛ anaa—ni mɛi anifeemɔ naŋ onɔ hewalɛ.

BIBLIA MLI NƆKWƐMƆNƆ: Gbalɔ Daniel “kpɛ mli yɛ etsui mli” akɛ ebaaye Nyɔŋmɔ mlai lɛ anɔ—ekolɛ no mli lɛ eji oblanyo—eyɛ mli akɛ no mli lɛ atse lɛ kɛje eweku lɛ he moŋ. (Daniel 1:8) No hã enyɛ ehi shi yɛ nibii ni ele akɛ eja lɛ anaa. Enɛ tsɔɔ akɛ, Daniel hi shi yɛ nibii ni eheɔ eyeɔ lɛ anaa.

PƐIMƆ OMLI OKWƐ: Mɛɛ nibii oheɔ oyeɔ? Akɛ nɔkwɛmɔnɔ lɛ: Ani oheɔ oyeɔ akɛ Nyɔŋmɔ yɛ? Kɛ́ nakai ni lɛ, mɛni hewɔ? Mɛni hãa oheɔ oyeɔ akɛ eyɛ?

Ani oheɔ oyeɔ akɛ jeŋba he mlai ni Nyɔŋmɔ kɛhã lɛ yɛ kɛhã ohilɛkɛhamɔ? Kɛ́ nakai ni lɛ, mɛni hewɔ?

Be ni yi aaawula shi aahu lɛ, te nibii enyɔ nɛɛ ateŋ nɔ ni obaasumɔ ni otsɔ—tso ko nɔ baa ni ekpɔ egbee shi, ni kɔɔyɔɔ fɛɛ kɔɔyɔɔ woɔ lɛ kɛyaa, aloo tso ni nyɛɔ ekpeɔ ahum ni naa wa waa po naa? Kaaŋmɛɛ osui kpakpai lɛ kɛ nibii ni oheɔ oyeɔ lɛ ahe, ni obaatamɔ tso ni kpeɔ ahum naa lɛ. No baaye abua bo ni ohã sanebimɔ ni ji, Namɔ mi ji? lɛ hetoo.