Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Saji 10 ni Oblahii kɛ Oblayei Biɔ lɛ Ahetoo

 SANEBIMƆ 9

Ani Nibii Ba Shihilɛ mli Kɛtsɔ Sutsakemɔ Nɔ?

Ani Nibii Ba Shihilɛ mli Kɛtsɔ Sutsakemɔ Nɔ?

NƆ HEWƆ NI EHE HIAA

Kɛ́ sutsakemɔ tsɔɔmɔ lɛ ji anɔkwale lɛ, belɛ, wɔbɛ hiɛnɔkamɔ ko. Shi kɛ́ abɔ ade lɛɛlɛŋ lɛ, no lɛ wɔbaaná sanebimɔi ni kɔɔ wala kɛ wɔsɛɛ he lɛ ahetoo ni ja.

MƐNI OBAAFEE?

Feemɔ shihilɛ nɛɛ he mfoniri okwɛ: Alex yiŋ efutu lɛ. Kɛjɛ egbekɛbiiashi fɛɛ lɛ, eheɔ eyeɔ akɛ Nyɔŋmɔ yɛ, ni lɛ ebɔ nibii fɛɛ. Shi ŋmɛnɛ lɛ, eskul tsɔɔlɔ lɛ miima nɔ mi doo akɛ nibii fɛɛ ba kɛtsɔ sutsakemɔ nɔ, ni akɛ, jeŋ shikpalɔi ema nɔ mi nakai. Alex sumɔɔɔ ni asusuɔ akɛ eleee nii. Ebi ehe akɛ, ‘Kɛ́ jeŋ shikpalɔi ema nɔ mi nakai lɛ, namɔ ji mi ni mawie mashi amɛ?’

Kɛ́ bo ji Alex lɛ, ani obaakpɛlɛ nɔ akɛ abɔɔɔ ade, akɛni nakai ji bɔ ni jeŋ shikpalɔi eŋmala yɛ woji amli lɛ hewɔ?

SUSUMƆ HE JOGBAŊŊ DÃ!

Bei pii lɛ, eyɛ mlɛo akɛ mɛi baatsɔɔ kɛji amɛheɔ amɛyeɔ akɛ nibii ba shihilɛ mli kɛtsɔ sutsakemɔ nɔ loo akɛ abɔ ade, shi amɛleee nɔ tuuntu hewɔ ni amɛheɔ amɛyeɔ.

  • Mɛi komɛi heɔ amɛyeɔ akɛ abɔ ade, akɛni nakai ji bɔ ni atsɔɔ amɛ yɛ amɛjamɔ mli lɛ hewɔ.

  • Mɛi komɛi heɔ amɛyeɔ akɛ nibii ba shihilɛ mli kɛtsɔ sutsakemɔ nɔ, akɛni nakai ji bɔ ni atsɔɔ amɛ yɛ skul lɛ hewɔ.

 SANEBIMƆI EKPAA NI SA AKƐ OSUSU HE

Biblia lɛ kɛɔ akɛ: “Shĩa fɛɛ shĩa lɛ mɔ ko kɛ̃ ma, shi mɔ ni fee nibii fɛɛ ji Nyɔŋmɔ.” (Hebribii 3:4) Ani nilee yɛ mli akɛ obaahe oye?

Kɛ́ mɔ ko kɛɛ Bɔlɔ ko bɛ lɛ, nilee bɛ mli, ejaakɛ etamɔ nɔ ni eekɛɛ akɛ jeee mɔ ko ni ma tsũ ni mashi nɛɛ

SUSUMƆ NI AHIƐ: Jeŋ muu lɛ fɛɛ ba shihilɛ mli kɛkɛ.

1. Mɛni hã eba shihilɛ mli kɛkɛ, loo namɔ hã eba?

2. Te nɔ ni nilee yɔɔ mli lɛ—akɛ nɔ fɛɛ nɔ ba shihilɛ mli kɛkɛ, aloo akɛ mɔ ko ji mɔ ni hã eba?

SUSUMƆ NI AHIƐ: Gbɔmɛi jɛ kooloi amli.

3. Kɛ́ gbɔmɛi jɛ kooloi—tamɔ aduji—amli lɛ, mɛni hewɔ mɔ ni gbɔmɛi yɔɔ jwɛŋmɔ kwraa fe aduji lɛ?

4. Mɛni hewɔ ewa akɛ abaanyɛ ana wala yibii lɛ ateŋ bibioo lɛ po naa jogbaŋŋ lɛ?

SUSUMƆ NI AHIƐ: Ama nɔ mi akɛ nibii fɛɛ ba shihilɛ mli kɛtsɔ sutsakemɔ nɔ.

5. Mɔ ni wieɔ nakai lɛ, ani lɛ diɛŋtsɛ etao nii amli jogbaŋŋ?

6. Mɛi enyiɛ heɔ amɛyeɔ akɛ nibii fɛɛ ba shihilɛ mli kɛtsɔ sutsakemɔ nɔ, akɛni akɛɛ amɛ akɛ mɛi fɛɛ ni hiɛ kã shi lɛ heɔ amɛyeɔ lɛ hewɔ?

“Kɛ́ onyiɛ koo ko mli, ni oyati tso tsũ fɛfɛo ko ni mashi nɔ lɛ, ani obaakɛɛ akɛ: ‘Tsũ nɛɛ yɛ fɛo waa! Ekolɛ tsei lɛ diɛŋtsɛ kɛ amɛhe tsara kɛfee tsũ lɛ’? Ekã shi faŋŋ akɛ okɛŋ nakai! Jwɛŋmɔ bɛ mli kwraa. Kɛ́ nakai lɛ, mɛni hewɔ mɔ esa akɛ wɔhe wɔye akɛ nɔ fɛɛ nɔ ni yɔɔ je nɛŋ lɛ ba shihilɛ mli kɛkɛ?”—Julia.

“Ŋɔɔ lɛ akɛ, mɔ ko kɛɛ bo akɛ nɔ ko fɛ trukaa yɛ nitsumɔ he ko ni aprintiɔ woji yɛ, ni ink ni akɛtsuɔ nii lɛ gbɛ eshwa tsũ lɛ mli fɛɛ, ni aná dishinari. Ani obaahe oye?”—Gwen.

 MƐNI HEWƆ ESA AKƐ OHE OYE AKƐ NYƆŊMƆ YƐ?

Biblia lɛ woɔ bo hewalɛ ni ‘ojwɛŋ nii anɔ.’ (Romabii 12:1) Enɛ tsɔɔ akɛ ohemɔkɛyeli akɛ Nyɔŋmɔ yɛ lɛ akadamɔ nibii nɛɛ anɔ kɛkɛ:

  • HENUMƆ (Minuɔ he kɛkɛ akɛ mɔ ko ni yɔɔ hewalɛ kpele ko yɛ)

  • NƆ NI MƐI KƐƆ (Ajáa Nyɔŋmɔ waa yɛ he ni miyɔɔ lɛ)

  • NƆNYƐƐ (Mifɔlɔi tsɔse mi ní mahe maye akɛ Nyɔŋmɔ yɛ—ehiii mi he nɔ ko feemɔ)

No najiaŋ lɛ, esa akɛ ole nɔ tuuntu hewɔ ni oheɔ oyeɔ akɛ Nyɔŋmɔ yɛ.

“Kɛ́ miyɛ klas ni tsɔɔlɔ lɛ miigbala bɔ ni wɔgbɔmɔtsei lɛ tsuɔ nii ehãa lɛ mli lɛ, ehãa minaa faŋŋ akɛ Nyɔŋmɔ yɛ. Gbɔmɔtso lɛ he nɔ fɛɛ nɔ kɛ nɔ ni etsuɔ, ni bei pii lɛ wɔyɔseee nitsumɔi nɛɛ ekomɛi po. Bɔ ni afee adesa gbɔmɔtso lɛ ahã lɛ yɛ naakpɛɛ waa!”—Teresa.

“Kɛ́ mina ŋwɛitsu ko, loo meele wulu ko, loo lɔle ko lɛ, mibiɔ mihe akɛ, ‘Namɔ fee enɛ?’ Akɛ nɔkwɛmɔnɔ lɛ, mɛi ni hiɛ kã shi pɛ baanyɛ afee lɔle, ejaakɛ ja nibii bibii babaoo ni yɔɔ he lɛ eko fɛɛ eko etsu nii jogbaŋŋ dani lɔle lɛ baanyɛ anyiɛ. Ni kɛ́ mɔ ko ji mɔ ni fee lɔle lɛ, belɛ nakai nɔŋŋ mɔ ko kɛ̃ bɔ adesai.”—Richard.

“Babaoo ni mikase jeŋ shikpamɔ he nii lɛ, babaoo ni mina akɛ tsɔɔmɔ akɛ nibii fɛɛ ba kɛtsɔ sutsakemɔ nɔ lɛ jeee anɔkwale. . . . Yɛ migbɛfaŋ lɛ, jwɛŋmɔ yɛ mli akɛ obaahe oye akɛ Bɔlɔ ko yɛ, fe ní obaahe oye akɛ nibii fɛɛ ba kɛtsɔ sutsakemɔ nɔ.”—Anthony.

SUSUMƆ HE OKWƐ

Yɛ afii pii ni jeŋ shikpalɔi kɛtao nii amli lɛ fɛɛ sɛɛ lɛ, amɛnyɛko amɛgbala susumɔ ni amɛhiɛ akɛ nibii fɛɛ ba kɛtsɔ sutsakemɔ nɔ lɛ mli bɔ ni amɛ fɛɛ amɛbaakpã gbee yɛ he. Ni kɛ́ amɛ ni akpaa gbɛ akɛ amɛle sane nɛɛ mli jogbaŋŋ lɛ po nyɛɛɛ amɛkɛ amɛhe akpã gbee yɛ he lɛ, ani eji tɔmɔ akɛ obaawie oshi?