Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

‘Nyɛhia Nyɔŋmɔ Suɔmɔ Lɛ Mli’

 YITSO 5

Bɔ ni Ooofee Otsi Ohe Kɛjɛ Je lɛ He

Bɔ ni Ooofee Otsi Ohe Kɛjɛ Je lɛ He

“Nyɛjɛɛɛ je lɛŋ.”—YOHANE 15:19.

1. Mɛni Yesu ma nɔ mi yɛ gbi gbɛkɛ ni enɔ jetsɛremɔ lɛ agbe lɛ lɛ mli?

YƐ GBI gbɛkɛ ni enɔ jetsɛremɔ lɛ agbe Yesu lɛ mli lɛ, Yesu tsɔɔ akɛ esumɔɔ ni nibii aya nɔ jogbaŋŋ aha esɛɛnyiɛlɔi lɛ wɔsɛɛ. Esɔle yɛ sane nɛɛ po he eha e-Tsɛ lɛ akɛ: “Mibiii akɛ ojie amɛ kɛjɛ je lɛ mli, shi moŋ akɛ ojie amɛ kɛjɛ mɔ fɔŋ lɛ dɛŋ ni oto amɛ shweshweeshwe. Amɛjɛɛɛ je lɛ mli, tamɔ bɔ ni mi hu mijɛɛɛ je lɛ mli lɛ.” (Yohane 17:15, 16, Ga Biblia Hee) Yesu tsɔɔ yɛ nii ni ejɛ etsuiŋ ebi lɛ mli akɛ eyɛ suɔmɔ ni mli kwɔ kɛha esɛɛnyiɛlɔi lɛ, ni ákɛ wiemɔi ni ji “nyɛjɛɛɛ je lɛŋ,” ni etsɔ hiɛ ewie nakai gbɛkɛ lɛ he miihia waa. (Yohane 15:19) Ekã shi faŋŋ akɛ Yesu sɛɛnyiɛlɔi lɛ ahe ni amɛaatsi kɛjɛ je lɛ he lɛ kã etsui nɔ waa!

2. Mɛni ji “je lɛ” ni Yesu tsĩ tã lɛ?

2 “Je lɛ” ní Yesu tsĩ tã lɛ kɔɔ adesai fɛɛ ní etsi amɛhe kɛjɛ Nyɔŋmɔ he, ni Satan yeɔ amɛnɔ, ni amɛtsɔmɔ nyɔji amɛha ŋkomeŋfa kɛ henɔwomɔ mumɔ ni Satan woɔ he hewalɛ lɛ. (Yohane 14:30; Efesobii 2:2; 1 Yohane 5:19) Hɛɛ, “je nɛɛ hedɔɔ lɛ Nyɔŋmɔ nyɛ̃ɛ ni.” (Yakobo 4:4) Shi te aaafee tɛŋŋ ni mɛi fɛɛ ni sumɔɔ ni amɛhi Nyɔŋmɔ suɔmɔ lɛ mli lɛ aaahi je lɛŋ ni nakai beaŋ nɔŋŋ lɛ amɛtsi amɛhe kɛjɛ he lɛ? Wɔbaasusu gbɛ̀i enumɔ ahe: anɔkwa ni wɔɔya nɔ wɔye Nyɔŋmɔ Maŋtsɛyeli lɛ ni Kristo yeɔ nɔ lɛ, wɔhe ni wɔkɛwooo maŋkwramɔŋ saji amli, je lɛ mumɔ lɛ ni wɔɔte shi wɔwo, hiɛ ni gboɔ nɔ̃ ni wɔkɛaasaa wɔhe, wɔhiŋmɛii anɔ ni wɔɔha etse, kɛ mumɔŋ tawuu nii lɛ ni wɔɔwo.

 ANƆKWAYELI KƐ HE NI AKƐWOOO MAŊKWRAMƆŊ SAJI AMLI

3. (a) Beni Yesu yɔɔ shikpɔŋ lɛ nɔ lɛ, te ebu maŋkwramɔŋ saji eha tɛŋŋ? (b) Mɛni hewɔ abaanyɛ akɛɛ akɛ Yesu sɛɛnyiɛlɔi ni afɔ amɛ mu lɛ ji Maŋtsɛyeli lɛ najiaŋdamɔlɔi lɛ? (Okɛ shishigbɛ niŋmaa lɛ afata he.)

3 Yɛ nɔ najiaŋ ni Yesu kɛ ehe aaawo maŋkwramɔŋ saji amli beni eyɔɔ shikpɔŋ lɛ nɔ lɛ, ekɛ Nyɔŋmɔ Maŋtsɛyeli lɛ ni ji ŋwɛi nɔyeli ni ebaaye nɔ Maŋtsɛ wɔsɛɛ lɛ shiɛmɔ fee enitsumɔ. (Daniel 7:13, 14; Luka 4:43; 17:20, 21) No hewɔ ni beni Yesu yɔɔ Roma Amralo Pontio Pilato hiɛ lɛ, enyɛ ekɛɛ akɛ: “Mimaŋtsɛyeli lɛ jɛɛɛ je nɛŋ.” (Yohane 18:36) Esɛɛnyiɛlɔi anɔkwafoi lɛ kaseɔ enɔkwɛmɔnɔ lɛ kɛtsɔ anɔkwa ni amɛyeɔ Kristo kɛ e-Maŋtsɛyeli lɛ, kɛ Maŋtsɛyeli nɛɛ ni amɛshiɛɔ amɛtsɔɔ je lɛ nɔ. (Mateo 24:14) Bɔfo Paulo ŋma akɛ: “No hewɔ lɛ wɔji bɔfoi [loo najiaŋdamɔlɔi] yɛ Kristo najiaŋ, . . . wɔdamɔɔ Kristo najiaŋ wɔkpaa nyɛ fai akɛ: nyɛhaa akpataa nyɛ kɛ Nyɔŋmɔ teŋ!” *2 Korintobii 5:20.

4. Mɛɛ gbɛ nɔ anɔkwa Kristofoi fɛɛ etsɔɔ yɛ akɛ amɛyeɔ Nyɔŋmɔ Maŋtsɛyeli lɛ anɔkwa? (Kwɛmɔ akrabatsa ni yitso ji “ Mra Be Mli Kristofoi lɛ Kɛ Amɛhe Wooo Maŋkwramɔŋ Saji Amli” lɛ.)

4 Akɛni maŋ najiaŋdamɔlɔi damɔɔ maji amli ni amɛjɛ lɛ anajiaŋ hewɔ lɛ, amɛkɛ amɛhe wooo maji amli ni amɛsɔmɔɔ yɛ lɛ maŋkwramɔŋ saji amli. Kɛlɛ, amɛfóɔ nɔyelii ni amɛdamɔ amɛnajiaŋ lɛ anɔ̃ mli. Nakai nɔŋŋ eji yɛ Kristo sɛɛnyiɛlɔi ni afɔ amɛ mu ní ‘amɛmaŋ yɔɔ ŋwɛi’ lɛ agbɛfaŋ. (Filipibii 3:20) Yɛ anɔkwale mli lɛ, ekãa ni amɛkɛshiɛɔ Maŋtsɛyeli lɛ eye ebua Kristo “toi krokomɛi” akpekpei abɔ ni ‘akpata amɛkɛ Nyɔŋmɔ teŋ.’ (Yohane 10:16; Mateo 25:31-40) Toi krokomɛi nɛɛ fiɔ Yesu nyɛmimɛi ni afɔ amɛ mu lɛ asɛɛ. Ákɛ mɛi ni efee ekome kɛmiijaje Mesia  Maŋtsɛyeli lɛ, kui enyɔ nɛɛ amli bii lɛ kɛ amɛhe wooo je lɛŋ maŋkwramɔŋ saji amli kwraa.—Kanemɔ Yesaia 2:2-4.

5. Mɛɛ srɔtofeemɔ yɔɔ Kristofoi asafo lɛ kɛ blema Israelbii lɛ ateŋ, ni srɔtofeemɔ nɛɛ haa Kristofoi lɛ feɔ amɛnii yɛ mɛɛ gbɛ nɔ?

 5 Jeee anɔkwa ni anɔkwa Kristofoi yeɔ Kristo lɛ pɛ hewɔ amɛkɛ amɛhe wooo maŋkwramɔŋ saji amli lɛ. Wɔtamɔɔɔ blema Israelbii lɛ ní Nyɔŋmɔ ha amɛ shikpɔŋ pɔtɛɛ ko ni amɛhi nɔ lɛ, ejaakɛ wɔji mɛi ní efee ekome ni yɔɔ maji srɔtoisrɔtoi amli. (Mateo 28:19; 1 Petro 2:9) No hewɔ lɛ, kɛ́ wɔkɛ wɔhe yabɔ maŋ ni wɔyɔɔ mli lɛ maŋkwramɔŋ kuu ko lɛ, wɔnyɛŋ wɔkɛ ekãa ashiɛ Maŋtsɛyeli lɛ he shɛɛ sane lɛ, ni ebaanyɛ efite ekomefeemɔ ni yɔɔ wɔteŋ lɛ. (1 Korintobii 1:10) Kɛfata he lɛ, yɛ ta beaŋ lɛ ebaaha wɔwuu wɔshi wɔnyɛmimɛi ni awo wɔ kita akɛ wɔsumɔ amɛ lɛ. (Yohane 13:34, 35; 1 Yohane 3:10-12) No hewɔ lɛ, yiŋtoo kpakpa hewɔ ni Yesu kɛɛ ekaselɔi lɛ ní amɛkɛ amɛhe akawo tawuu mli lɛ. Ekɛɛ amɛ ni amɛsumɔ amɛhenyɛlɔi po.—Mateo 5:44; 26:52; kwɛmɔ akrabatsa ni yitso ji “ Ani Mikɛ Mihe Wooo Maŋkwramɔŋ Saji Amli?” lɛ.

6. Te ohe nɔ ni ojɔɔ oha Nyɔŋmɔ lɛ saa bɔ ni okɛ Kaisare yeɔ ohaa lɛ he ehaa tɛŋŋ?

6 Ákɛ anɔkwa Kristofoi lɛ, wɔjɔɔ wɔhe nɔ wɔha Nyɔŋmɔ, shi jeee adesa ko, asafo ko ni gbɔmɛi to, loo maŋ ko. Korintobii Aklɛŋklɛŋ Wolo lɛ yitso 6:19, 20 lɛ kɛɛ akɛ: ‘Nyɛjeee nyɛ diɛŋtsɛ nyɛnɔ̃, ejaakɛ ahé nyɛ kɛ jara ni wa.’ No hewɔ lɛ, Yesu sɛɛnyiɛlɔi lɛ kɛ “Kaisare” nii haa Kaisare kɛtsɔ woo ni amɛkɛhaa lɛ, too ni amɛwoɔ, kɛ emlai ni eteee shi ewooo Nyɔŋmɔ mlai lɛ ni amɛyeɔ nɔ lɛ nɔ, ni yɛ nakai beaŋ nɔŋŋ lɛ amɛkɛ ‘Nyɔŋmɔ nii haa Nyɔŋmɔ.’ (Marko 12:17; Romabii 13:1-7) Amɛkɛ ‘Nyɔŋmɔ nii haa Nyɔŋmɔ’ kɛtsɔ já ni amɛjáa lɛ, susuma muu fɛɛ mli ni amɛjɛɔ amɛsumɔɔ lɛ, anɔkwa ni amɛyeɔ lɛ kɛ toiboo ni amɛfeɔ amɛhaa lɛ lɛ nɔ. Kɛ́ ehe bahia ni amɛgboi yɛ Nyɔŋmɔ suɔmɔnaa nifeemɔ hewɔ lɛ, amɛbaafee nakai.—Luka 4:8; 10:27; Kanemɔ Bɔfoi lɛ Asaji 5:29; Romabii 14:8.

 BƆ NI WƆƆFEE WƆTE SHI WƆWO “JE NƐŊ MUMƆ LƐ”

7, 8. Mɛni ji “je nɛŋ mumɔ lɛ,” ni te ‘etsuɔ nii’ yɛ mɛi amli ehaa tɛŋŋ?

7 Gbɛ kroko ni Kristofoi tsɔɔ nɔ amɛtsiɔ amɛhe kɛjɛɔ je lɛ he ji emumɔ gbonyo lɛ ni amɛteɔ shi amɛwoɔ. Paulo ŋma akɛ: “Jeee je nɛŋ mumɔ lɛ wɔná, shi moŋ Mumɔ ni jɛ Nyɔŋmɔ mli lɛ.” (1 Korintobii 2:12) Ekɛɛ Efesobii lɛ akɛ: “Nii ni nyɛnyiɛ yɛ mli sá yɛ je nɛŋ su lɛ naa, yɛ kɔɔyɔɔ mli hewalɛ lɛ nɔ lumɔ lɛ, ni ji mumɔ ni tsuɔ nii ŋmɛnɛŋmɛnɛ yɛ toigbele bii amli lɛ naa lɛ.”—Efesobii 2:2, 3.

8 Je lɛ “kɔɔyɔɔ”, loo mumɔ lɛ ji hewalɛ ni tsirɛɔ mɛi koni amɛgbó Nyɔŋmɔ nɔ toi, ni haa mɛi diɔ “heloo lɛ sɛɛdii nii lɛ kɛ hiŋmɛii lɛ asɛɛdii nii lɛ” asɛɛ lɛ. (1 Yohane 2:16; 1 Timoteo 6:9, 10) Nɔ ni tsɔɔ akɛ je lɛ mumɔ lɛ yɛ “hewalɛ” ji akɛ ehaa enibii feɔ heloo ni yeee emuu lɛ akɔnɔ, eyɛ nigii, enaa baaa shi, ni ehe shi yɛ he fɛɛ he tamɔ kɔɔyɔɔ. Kɛfata he lɛ, ‘etsuɔ nii’ yɛ mɛi amli kɛtsɔ sui gbohii tamɔ ŋkomeŋfa, henɔwomɔ, hiɛjoomɔ, kɛ atuatsemɔ ni ehaa amɛnáa lɛ kɛ agbɛnɛ hu amɛtsui naa sane ni ehaa amɛyeɔ lɛ nɔ. * Kɛ wɔɔwie he yɛ gbɛ kuku nɔ lɛ, je nɛŋ mumɔ lɛ haa Abonsam sui lɛ heɔ shi yɛ gbɔmɛi atsuii amli.—Yohane 8:44; Bɔfoi lɛ Asaji 13:10; 1 Yohane 3:8, 10.

9. Mɛɛ gbɛ̀i anɔ je nɛŋ mumɔ lɛ baanyɛ atsɔ abote wɔjwɛŋmɔ kɛ wɔtsui mli?

9 Ani je nɛŋ mumɔ lɛ baanyɛ ahe shi yɛ ojwɛŋmɔ kɛ otsui mli? Hɛɛ, shi ja ohaaa ohiɛ ahi ohe nɔ. (Kanemɔ Abɛi 4:23) Bei pii lɛ hewalɛ ni enáa yɛ mɛi anɔ lɛ jeɔ shishi yɛ gbɛ nigii nɔ, ekolɛ kɛtsɔ mɛi ni amɛhiɛ tsɔɔ akɛ amɛji gbɔmɛi kpakpai shi yɛ anɔkwale mli lɛ amɛbɛ suɔmɔ kɛha Yehowa ni akɛbɔɔ lɛ nɔ. (Abɛi 13:20; 1 Korintobii 15:33) Agbɛnɛ hu woji ni esaaa, Internet lɛ nɔ hei ni bɔlɛnamɔ he mfonirii  loo hemɔkɛyeli kwalɔi ahe saji yɔɔ, hiɛtserɛjiemɔ gbohii, kɛ shwɛmɔi ni ashiɔ akaŋ waa yɛ mli, kɛ nɔ fɛɛ nɔ ni Satan loo je lɛ susumɔi jieɔ kpo yɛ mli lɛ baanyɛ aha oná mumɔ gbonyo nɛɛ.

10. Te wɔɔfee tɛŋŋ wɔte shi wɔwo je nɛŋ mumɔ lɛ?

10 Te wɔbaafee tɛŋŋ wɔte shi wɔwo je nɛŋ mumɔ ni yɔɔ nigii lɛ ni wɔhi Nyɔŋmɔ suɔmɔ lɛ mli lɛ? Gbɛ pɛ ni wɔbaanyɛ wɔtsɔ nɔ wɔfee nakai ji gbɛjianɔi ní Yehowa eto koni  eha wekukpãa kpakpa ahi wɔkɛ lɛ teŋ lɛ ni wɔkɛaatsu nii jogbaŋŋ, kɛ sɔlemɔ ni wɔɔsɔle daa kɛbi mumɔ krɔŋkrɔŋ lɛ nɔ. Yehowa yɛ hewalɛ kwraa fe Abonsam loo jeŋ fɔŋ ni yɔɔ Satan kudɔmɔ shishi lɛ. (1 Yohane 4:4) Belɛ, kwɛ bɔ ni ehe hiaa akɛ wɔtsi wɔbɛŋkɛ Yehowa yɛ sɔlemɔ mli!

HIƐ NI GBOƆ NƆ̃ NI WƆKƐAASAA WƆHE

11. Mɛɛ gbɛ nɔ je nɛŋ mumɔ lɛ ená shishitoo mlai ni kudɔɔ atadewoo nɔ hewalɛ yɛ?

11 Mɔtadewoo, ehesaamɔ kɛ efalefalefeemɔ ji kponɔgbɛ okadi ni tsɔɔ mumɔ ni kudɔɔ lɛ. Yɛ maji pii amli lɛ, shishitoo mlai ni kudɔɔ atadewoo lɛ eba shi aahu akɛ tɛlivishiŋ nɔ nifeemɔ nɔkwɛlɔ ko kɛɛ akɛ eshwɛ fioo ni anaŋ nɔ ko ni baaha ayɔse ashawo yei. Gbekɛbii yei bibii po saa amɛhe yɛ nakai gbɛ nɔ, ni adafitswaa wolo ko kɛɛ akɛ “amɛwoɔ atadei ni haa anaa amɛgbɔmɔtso lɛ hei babaoo.” Hesaamɔ basabasa ni tsɔɔ atuatsemɔ su kɛ bulɛ ni abɛ lɛ ji hesaamɔ gbɛ kroko ni miihe shi.

12, 13. Mɛɛ shishitoo mlai esa akɛ ekudɔ wɔtadewoo kɛ hesaamɔ?

12 Ákɛ Yehowa tsuji lɛ, wɔmiisumɔ akɛ wɔsaa wɔhe jogbaŋŋ, ni tsɔɔ akɛ wɔwo atadei ni he tse, nɔ ni yɔɔ hiŋmɛi nɔ, ni sa kɛha he ni wɔyaa kɛ he ni wɔyɔɔ lɛ, ni enɛ ja gbɛ. Be fɛɛ be lɛ esa akɛ wɔkɛ “hiɛ ni gboɔ nɔ̃ kɛ jwɛŋmɔ ni sa” awula wɔhe, hesaamɔ ni kɛ́ akɛ “nitsumɔi kpakpai” fata he lɛ, ebafeɔ nɔ ni sa kɛha hii kɛ yei fɛɛ “ni tsɔɔ amɛhe akɛ Nyɔŋmɔ jálɔi lɛ.” Esaaa akɛ oti ni wɔkɛsaa wɔhe lɛ feɔ mɛi ajwɛŋmɔ ní wɔɔgbala kɛba wɔnɔ, shi moŋ esa akɛ eha ‘wɔhi Nyɔŋmɔ suɔmɔ lɛ mli.’ (1 Timoteo 2:9, 10; Yuda 21) Hɛɛ, wɔmiisumɔ ni wɔhewulamɔ ni yɔɔ fɛo fe fɛɛ lɛ afee ‘wɔtsuiiaŋ gbɔmɔ ni aŋɔtee lɛ, ni ji nɔ ni jara wa yɛ Nyɔŋmɔ hiɛ’ lɛ.—1 Petro 3:3, 4.

13 Ha ehi ojwɛŋmɔ mli hu akɛ atadei ni wɔwoɔ kɛ wɔhesaamɔ baanyɛ aná bɔ ni mɛi buɔ anɔkwa jamɔ amɛhaa lɛ nɔ hewalɛ. Kɛ́ akɛ Hela wiemɔ ni atsɔɔ shishi akɛ  “hiɛ ni gboɔ nɔ̃” lɛ tsu nii kɛkɔ jeŋba he lɛ, etsɔɔ mɛi ahenumɔi kɛ amɛsusumɔi ni ajwɛŋɔ he dani akpɛɔ yiŋ. No hewɔ lɛ, oti ni esa akɛ ema wɔhiɛ ji ni wɔsusu mɛi krokomɛi ahenilei ahe babaoo fe hegbɛ ni wɔyɔɔ akɛ wɔsaa wɔhe yɛ gbɛ ko nɔ lɛ. Nɔ ni he hiaa fe fɛɛ lɛ, wɔmiisumɔ ni wɔfee nibii ni kɛ woo baaha Yehowa kɛ ewebii lɛ, wɔkɛ wɔhe atsɔɔ akɛ Nyɔŋmɔ sɔɔlɔi, ní ‘wɔfee nɔ fɛɛ nɔ kɛwo Nyɔŋmɔ hiɛ nyam.’—1 Korintobii 4:9; 10:31; 2 Korintobii 6:3, 4; 7:1.

Ani mihesaamɔ kɛ woo haa Yehowa?

14. Yɛ wɔhesaamɔ kɛ falefalefeemɔ gbɛfaŋ lɛ, mɛɛ saji esa akɛ wɔbi wɔhe?

14 Wɔtadewoo, hesaamɔ, kɛ falefalefeemɔ he hiaa waa beni wɔkɛ wɔhe woɔ shiɛmɔ nitsumɔ lɛ mli loo beni wɔyaa Kristofoi akpee lɛ. Bi ohe akɛ: ‘Ani mihesaamɔ kɛ bɔ ni mikwraa migbɔmɔtso lɛ mihaa lɛ gbalaa mɛi ajwɛŋmɔ kɛbaa minɔ bɔ ni esaaa? Ani egbaa mɛi krokomɛi anaa? Ani mibuɔ hegbɛ ni miyɔɔ yɛ mihesaamɔ kɛ migbɔmɔtso lɛ kwramɔ mli lɛ akɛ ehe hiaa fe mihe ni aaasa kɛha sɔɔmɔ hegbɛi yɛ asafo lɛ mli?’—Lala 68:7; Filipibii 4:5; 1 Petro 5:6.

15. Mɛni hewɔ Nyɔŋmɔ Wiemɔ lɛ woko mlai pɔtɛɛ yɛ atadewoo, hesaamɔ, kɛ falefalefeemɔ he lɛ?

15 Biblia lɛ woko mlai pɔtɛɛ yɛ Kristofoi atadewoo, amɛhesaamɔ, kɛ falefalefeemɔ he. Yehowa sumɔɔɔ ni enyɛɔ wɔnɔ ni wɔfee nɔ ko loo ejwɛŋ eha wɔ. Yɛ no najiaŋ lɛ,  eesumɔ ni wɔtsɔmɔ mɛi ni edara yɛ mumɔŋ ní kɛ Biblia mli shishitoo mlai susuɔ nii ahe, mɛi ní “fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.” (Hebribii 5:14) Nɔ ni he hiaa fe fɛɛ lɛ, eesumɔ ni suɔmɔ, ni ji suɔmɔ kɛha Nyɔŋmɔ kɛ naanyo gbɔmɔ lɛ akudɔ wɔ. (Kanemɔ Marko 12:30, 31) Gbɛ̀i srɔtoi babaoo yɛ ni wɔbaanyɛ wɔtsɔ nɔ wɔwo atadei ni wɔsaa wɔhe beni wɔkɛ shishitoo mlai nɛɛ tsuɔ nii lɛ. Anaa enɛ yɛ atadei fɛfɛji srɔtoisrɔtoi ni Yehowa webii ni yɔɔ miishɛɛ lɛ woɔ kɛyaa he fɛɛ he ni amɛbuaa amɛhe naa yɛ shikpɔŋ lɛ nɔ lɛ.

WƆHIŊMƐII ANƆ NI WƆƆHA ‘ETSE’

16. Mɛɛ srɔtofeemɔ yɔɔ je lɛŋ mumɔ lɛ kɛ Yesu tsɔɔmɔ lɛ teŋ, ni mɛɛ saji esa akɛ wɔbi wɔhe?

16 Je lɛ mumɔ lɛ lakaa mɛi akpekpei abɔ ni enyɛɔ amɛnɔ, ni amɛdiɔ shika kɛ heloonaa nibii asɛɛ akɛ nɔ ni baaha  amɛná miishɛɛ. Kɛlɛ, Yesu kɛɛ akɛ: “Jeee gbɔmɔ nii ni ená ni eteke nɔ lɛ mli ewala yɔɔ.” (Luka 12:15) Yesu etsɔɔɔ akɛ mɔ akaye ŋɔɔmɔ yɛ shihilɛ mli, shi moŋ eetsɔɔ akɛ mɛi ni ji “mumɔ lɛŋ ohiafoi lɛ [loo mɛi ni le akɛ Nyɔŋmɔ he miihia amɛ]” kɛ mɛi ni yaa nɔ amɛhaa amɛhiŋmɛii anɔ ‘tseɔ,’ ni tsɔɔ akɛ amɛkɛ amɛjwɛŋmɔ maa mumɔŋ nibii anɔ lɛ náa anɔkwa miishɛɛ yɛ shihilɛ mli. (Mateo 5:3; 6:22, 23) Bi ohe akɛ: ‘Ani miheɔ nɔ ni Yesu tsɔɔ lɛ miyeɔ lɛɛlɛŋ, loo “malemɔ tsɛ” lɛ náa minɔ hewalɛ? (Yohane 8:44) Mɛni miwiemɔi, otii ni mikɛmamɔ mihiɛ, nibii ni mikɛyeɔ klɛŋklɛŋ gbɛhe, kɛ bɔ ni mibaa mijeŋ mihaa lɛ haa anaa yɛ mihe?’—Luka 6:45; 21:34-36; 2 Yohane 6.

17. Tsĩi sɛɛnamɔi ni mɛi ni haa amɛhiŋmɛii anɔ tseɔ lɛ anine shɛɔ nɔ lɛ ekomɛi atã.

17 Yesu kɛɛ akɛ: “Abu nilee bem yɛ enitsumɔi lɛ anaa.” (Mateo 11:19, Ga Biblia Hee) Susumɔ sɛɛnamɔi ni mɛi ni yaa nɔ amɛhaa amɛhiŋmɛii anɔ tseɔ lɛ anine shɛɔ nɔ lɛ ekomɛi ahe okwɛ. Maŋtsɛyeli sɔɔmɔ nitsumɔ lɛ haa amɛtsui nyɔɔ amɛmli diɛŋtsɛ. (Mateo 11:29, 30) Amɛfeee yeyeeye yɛ gbɛ ni esaaa nɔ, ni no hewɔ lɛ amɛyeɔ amɛhe kɛjɛɔ jwɛŋmɔŋ kɛ henumɔŋ piŋmɔi babaoo ahe. (Kanemɔ 1 Timoteo 6:9, 10) Akɛni amɛmii shɛɔ shihilɛ mli hiamɔ nii ni amɛyɔɔ lɛ ahe hewɔ lɛ, amɛnáa be babaoo amɛhaa amɛweku lɛ kɛ nanemɛi Kristofoi. Enɛ haa amɛwɔ shɛɔ amɛnaa. (Jajelɔ 5:11) Akɛni amɛfeɔ mɛi ejurɔ bɔ ni amɛaanyɛ hewɔ lɛ, amɛnáa miishɛɛ babaoo ni jɛɔ nɔhamɔ mli baa lɛ eko. (Bɔfoi lɛ Asaji 20:35) Ni amɛyɛ ‘hiɛnɔkamɔ ní eteke nɔ,’ toiŋjɔlɛ kɛ miishɛɛ. (Romabii 15:13; Mateo 6:31, 32) Nɔ ko bɛ ni kɛ jɔɔmɔi nɛɛ yeɔ egbɔ!

NYƐHIƐA “TAWUU NII LƐ FƐƐ MLI”

18. Te Biblia lɛ wie wɔhenyɛlɔ lɛ, gbɛ̀i ni ekɛtsuɔ nii, kɛ mple ni wɔshiɔ lɛ he eha tɛŋŋ?

18 Abuɔ mɛi ni yaa nɔ amɛhiɔ Nyɔŋmɔ suɔmɔ lɛ mli lɛ ahe kɛjɛɔ mɔdɛŋ ni Satan, mɔ ni sumɔɔɔ akɛ Kristofoi náa  miishɛɛ kɛ naanɔ wala lɛ bɔɔ koni eha amɛkajá Nyɔŋmɔ lɛ he. (1 Petro 5:8) Paulo kɛɛ akɛ: “Jeee heloo kɛ lá wɔkɛna nɔmɔ lɛ, shi moŋ wɔkɛ onukpayelii kɛ hegbɛi kɛ je nɛŋ lumɛi ni yɔɔ benɛ be duŋ lɛ mli lɛ, kɛ mumɔi fɔji asafo ni yɔɔ ŋwɛiniiaŋ lɛ.” (Efesobii 6:12) Wiemɔ ni ji “nɔmɔ” ni akɛtsu nii lɛ tsɔɔ akɛ mɔ ni wɔkɛnɔɔ lɛ damɔ wɔhiɛ kpaakpa ni eteko ehe. Kɛfata he lɛ, wiemɔi ni ji “onukpayelii,” “hegbɛi,” kɛ “je nɛŋ lumɛi” ni akɛtsu nii lɛ tsɔɔ akɛ aje gbɛ ato tutuamɔi ni mumɔi fɔji lɛ kɛbaa wɔnɔ lɛ ahe gbɛjianɔ jogbaŋŋ.

19. Tsɔɔmɔ Kristofoi amumɔŋ tawuu nii lɛ mli.

19 Yɛ emuu ni wɔyeee kɛ wɔfatɔi lɛ fɛɛ sɛɛ lɛ, wɔbaanyɛ wɔye omanye. Yɛ mɛɛ gbɛ nɔ? Kɛtsɔ “Nyɔŋmɔ tawuu nii lɛ fɛɛ” mli ni wɔɔhiɛ lɛ nɔ. (Efesobii 6:13) Efesobii 6:14-18 lɛ wie wɔtawuu nii lɛ ahe akɛ: “No hewɔ lɛ nyɛdamɔa shi, ni nyɛkɛ anɔkwale afĩa nyɛhɛ, ni nyɛwoa jalɛ dama lɛ, ni nyɛkɛ hejɔlɛ sanekpakpa lɛ he saamɔ-kɛ-too awoa nyɛnaji; fɛɛ sɛɛ lɛ nyɛhiɛa hemɔkɛyeli tsɛ̃ŋ lɛ mli, nɔ̃ ni nyɛkɛaanyɛ mɔ fɔŋ lɛ gãimlibii ní tsoɔ lɛ fɛɛ nyɛgbe lɛ; ni walaheremɔ dadefai [loo hiɛnɔkamɔ] lɛ hu nyɛbua, kɛ mumɔŋ klante ni ji Nyɔŋmɔ wiemɔ lɛ; ni nyɛkɛ sɔlemɔ kɛ faikpamɔ fɛɛ asɔlea daa yɛ mumɔ mli.”

20. Mɛɛ srɔtofeemɔ yɔɔ ta ni wɔwuɔ lɛ kɛ asraafoi anɔ̃ lɛ teŋ?

20 Akɛni Nyɔŋmɔ ji mɔ ni kɛ mumɔŋ tawuu nii lɛ ha wɔ hewɔ lɛ, kɛ́ wɔhiɛ mli daa lɛ wɔnine enyɛŋ shi kɔkɔɔkɔ. Ákɛ mɛi ni tamɔɔɔ asraafoi ni hiɔ shi be kpalaŋŋ ni amɛwuuu ta lɛ, Kristofoi miiwu wala kɛ gbele ta ko ni baaya nɔ daa kɛyashi Nyɔŋmɔ aaakpata Satan je lɛ hiɛ ni ekɛ mumɔi fɔji fɛɛ awo bu kwɔŋkwɔŋ lɛ mli lɛ. (Kpojiemɔ 12:17; 20:1-3) No hewɔ lɛ, kɛ́ okɛ gbɔjɔmɔi loo akɔnɔi gbohii ko miishi mple lɛ onijiaŋ akaje wui, ejaakɛ ja wɔ fɛɛ ‘wɔgbala’ wɔhe mai dani wɔbaanyɛ wɔya nɔ wɔye Yehowa anɔkwa. (1 Korintobii 9:27) Hɛɛ, esa akɛ egba wɔnaa moŋ kɛ́ wɔkpa mple lɛ shii!

21. Mɛɛ gbɛ pɛ nɔ wɔbaanyɛ wɔtsɔ wɔye omanye yɛ wɔmumɔŋ tawuu lɛ mli?

 21 Kɛfata he lɛ, wɔnyɛŋ wɔye omanye yɛ wɔhewalɛ naa. No hewɔ lɛ, Paulo kai wɔ akɛ ehe miihia ni wɔtsi wɔbɛŋkɛ Yehowa yɛ sɔlemɔ mli “daa yɛ mumɔ mli.” Yɛ nakai beaŋ nɔŋŋ lɛ, esa akɛ wɔbo Yehowa toi kɛtsɔ e-Wiemɔ lɛ kasemɔ kɛ wɔnyɛmimɛi ‘tabilɔi’ krokomɛi ni wɔkɛaabɔ be fɛɛ be ni wɔɔná hegbɛ lɛ nɔ, ejaakɛ jeee wɔ pɛ wɔwuɔ ta lɛ! (Filemon 2; Hebribii 10:24, 25) Jeee omanye pɛ mɛi ni yeɔ anɔkwa yɛ nibii nɛɛ fɛɛ amli lɛ baaye, shi moŋ amɛbaanyɛ amɛkɛ ekãa babaoo afã amɛhemɔkɛyeli lɛ he kɛ́ ate shi awo enɛ lɛ.

SAAMƆ OHE OTO KƐFÃ OHEMƆKƐYELI LƐ HE

22, 23. (a) Mɛni hewɔ esa akɛ wɔsaa wɔhe wɔto be fɛɛ be kɛfã wɔhemɔkɛyeli lɛ he, ni mɛɛ sanebimɔi esa akɛ wɔbi wɔhe? (b) Mɛɛ sane abaasusu he yɛ yitso ni nyiɛ sɛɛ lɛ mli?

22 Yesu kɛɛ akɛ: ‘Akɛni nyɛjɛɛɛ je lɛŋ hewɔ je lɛ nyɛ̃ɔ nyɛ lɛ.’ (Yohane 15:19) No hewɔ lɛ, esa akɛ Kristofoi asaa amɛhe amɛto kɛfã amɛhemɔkɛyeli lɛ he yɛ bulɛ kɛ mlijɔlɛ mli. (Kanemɔ 1 Petro 3:15) Bi ohe akɛ: ‘Ani minuɔ nɔ hewɔ ni be komɛi lɛ Yehowa Odasefoi feɔ amɛnii yɛ gbɛ ni mɛi babaoo nyaaa he nɔ lɛ shishi? Kɛ́ ehe bahia ni makɔ gbɛ ni tamɔ nɛkɛ lɛ, ani miyiŋ tsɔɔ jogbaŋŋ akɛ nɔ ni Biblia lɛ kɛ tsulɔ kuu lɛ kɛɔ lɛ ji nɔ ni ja? (Mateo 24:45; Yohane 17:17) Ni kɛ́ ehe bahia ni mafee nɔ ni ja yɛ Yehowa hiɛ lɛ, ani mifee klalo akɛ mafee nakai ni miyɛ he miishɛɛ hu akɛ eeesoro mi yɛ je lɛ he?’—Lala 34:3; Mateo 10:32, 33.

23 Shi bei pii lɛ, wɔkɛ shwelɛ ni wɔyɔɔ akɛ wɔtsi wɔhe kɛjɛ je lɛ he lɛ he kai ni yɔɔ nigii waa lɛ kpeɔ. Ákɛ nɔkwɛmɔnɔ lɛ, taakɛ atsĩ tã kɛtsɔ hiɛ lɛ, Abonsam bɔɔ mɔdɛŋ akɛ elaka Yehowa tsuji koni amɛkɛ je lɛ abɔ kɛtsɔ je lɛ hiɛtserɛjiemɔi anɔ. Te wɔɔfee tɛŋŋ wɔhala hiɛtserɛjiemɔ kpakpa ni baaha wɔná miishɛɛ ni eha wɔhenilee he atse lɛ? Abaasusu sane nɛɛ he yɛ yitso ni nyiɛ sɛɛ lɛ mli.

^ kk. 3 Kɛjɛ afi 33 Ŋ.B. Pentekoste gbi lɛ nɔ kɛbaa nɛɛ lɛ, Kristo miisɔmɔ akɛ esɛɛnyiɛlɔi ni afɔ amɛ mu ni yɔɔ shikpɔŋ lɛ nɔ lɛ anɔ Maŋtsɛ. (Kolosebii 1:13) Awó Kristo “je nɛŋ maŋtsɛyeli” lɛ nɔ maŋtsɛ yɛ afi 1914. No hewɔ lɛ, Kristofoi ni afɔ amɛ mu lɛ sɔmɔɔ akɛ Mesia Maŋtsɛyeli lɛ najiaŋdamɔlɔi.—Kpojiemɔ 11:15.

^ kk. 8 Kwɛmɔ Reasoning From the Scriptures lɛ baafa 389-393 ni Yehowa Odasefoi fee lɛ.

^ kk. 65 Kwɛmɔ Saji Krokomɛi ni Fata He, ni yitso ji “Aflaŋaa Ŋamɔ, Oshikifɔɔ, kɛ Maŋ Sɔɔmɔ” lɛ.

Ekrokromɛi Hu Nɛ

Amɛkɛ Anɔkwayeli Fĩɔ Nyɔŋmɔ Nɔyeli lɛ Pɛ Sɛɛ

Mɛi ni akpaaa amɛ gbɛ lɛ emi yiwaa ni tamɔ “faa” ni akɛba Yehowa Odasefoi anɔ akɛni amɛkɛ amɛhe wooo maŋkwramɔ saji amli lɛ hewɔ lɛ.

Esa akɛ Wɔfee Krɔŋkrɔŋ yɛ Wɔjeŋba Fɛɛ Mli

Mɛɛ tsakpaa yɔɔ saji ahe ni aŋmɛŋ kɛsaŋ, nii ni hi fe fɛɛ ni akɛaahã Yehowa, kɛ mumɔŋ niyenii kpakpa ni aaaye lɛ teŋ?

Bo Yehowa Gbee Toi yɛ He Fɛɛ He ni Oyɔɔ

Kwɛmɔ bɔ ni ehe hiaa waa ni wɔbo Yehowa toi ni wɔkɛ lɛ agba sane hu. Nikasemɔ nɛɛ baaye abua wɔ ni wɔna nɔ ni wɔbaanyɛ wɔfee koni Satan kɛ agbɛnɛ, sui gbohii ni yɔɔ wɔhe lɛ akagbala wɔjwɛŋmɔ kɛmiije Yehowa gbɛtsɔɔmɔi lɛ ahe.