Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

‘Nyɛhia Nyɔŋmɔ Suɔmɔ Lɛ Mli’

 SAJI KROKOMƐI NI FATA HE

Bɔ ni Esa akɛ Akɛ Mɔ ko ni Ashwie lɛ lɛ Aye Aha

Bɔ ni Esa akɛ Akɛ Mɔ ko ni Ashwie lɛ lɛ Aye Aha

Kɛ́ ashwie wɔwekunyo ko loo mɔ ko ni wɔkɛ lɛ shɛɔ hulu wɔɔ ni efee esha ní etsakeee etsui kɛjɛ asafo lɛ mli lɛ, edɔɔ wɔ waa. Bɔ ni wɔfeɔ wɔnii wɔhaa yɛ gbɛtsɔɔmɔ ni Biblia lɛ kɛhaa yɛ sane nɛɛ he lɛ baanyɛ atsɔɔ nɔ̃ suɔmɔ ni wɔyɔɔ kɛha Nyɔŋmɔ kɛ wekukpãa ni kã wɔkɛ Nyɔŋmɔ teŋ. * Nyɛhaa wɔsusua saji komɛi ni abaanyɛ abi yɛ sane nɛɛ he lɛ he wɔkwɛa.

Te esa akɛ wɔkɛ mɔ ko ni ashwie lɛ lɛ aye aha tɛŋŋ? Biblia lɛ kɛɔ akɛ: “Nyɛkɛ amɛ akabɔ: kɛji mɔ ko ni atsɛɔ lɛ nyɛmi lɛ ji ajwamaŋbɔlɔ loo hiɛjoolɔ loo wɔŋjalɔ loo mɔjɛlɔ loo daatɔlɔ loo amimyelɔ lɛ, lɛ lɛ nyɛkɛ lɛ akayea nii tete.” (1 Korintobii 5:11) Beni Biblia lɛ wieɔ bɔ ni esa akɛ wɔkɛ mɔ ni “ehiii Kristo tsɔɔmɔ lɛ mli lɛ” aye aha lɛ he lɛ, ekɛɛ akɛ: “Nyɛkaherea lɛ kɛbaa nyɛwe, ni nyɛkaflaa lɛ tete; ejaakɛ mɔ ni flaa lɛ lɛ, ekɛ lɛ feɔ ekome yɛ enitsumɔi fɔji lɛ amli.” (2 Yohane 9-11) Esaaa akɛ wɔkɛ mɔ ni ashwie lɛ lɛ susuɔ Nyɔŋmɔjamɔŋ saji ahe, ni asaŋ esaaa akɛ wɔkɛ lɛ bɔɔ naanyo. Aŋma yɛ September 15, 1981, The Watchtower lɛ baafa 25 lɛ mli akɛ: “Wiemɔ folo tamɔ ‘te oyɔɔ tɛŋŋ’ kɛkɛ ni oookɛɛ mɔ ko lɛ baanyɛ afee klɛŋklɛŋ nifeemɔ ni baaha okɛ lɛ agba sane, ni ebaanyɛ eha okɛ mɔ lɛ abɔ naanyo po. Ani wɔbaasumɔ ni wɔfee nɔ ko ni baanyɛ eha wɔkɛ mɔ ko ni ashwie lɛ lɛ abɔ naanyo?”

Ani ehe miihia ni wɔkɛ amɛ akabɔ kwraa? Hɛɛ, yɛ yiŋtoi srɔtoi ahewɔ. Klɛŋklɛŋ lɛ, kɛ́ wɔfee nakai lɛ etsɔɔ akɛ wɔyeɔ Nyɔŋmɔ kɛ e-Wiemɔ lɛ anɔkwa. Jeee be ni eyɔɔ mlɛo kɛha wɔ akɛ wɔɔbo Yehowa toi lɛ pɛ wɔboɔ lɛ toi, shi wɔfeɔ nakai yɛ be mli ni nakai feemɔ wa hu. Suɔmɔ ni wɔyɔɔ kɛha Nyɔŋmɔ lɛ tsirɛɔ wɔ ni wɔbo ekitai lɛ fɛɛ atoi, ejaakɛ wɔle akɛ eyeɔ jalɛ sane ni eyɛ suɔmɔ, ni emlai lɛ ahe yɛ sɛɛnamɔ waa kɛha wɔ. (Yesaia 48:17; 1 Yohane 5:3) Nɔ ni ji enyɔ lɛ, kɛ́ wɔkɛ eshafeelɔ ni tsakeee etsui lɛ ebɔɔɔ lɛ, ejeŋba gbonyo lɛ nyɛɛɛ atsɛŋe wɔ kɛ mɛi krokomɛi  ni yɔɔ asafo lɛ mli lɛ, ni efiteee wekukpãa ni kã wɔkɛ Nyɔŋmɔ teŋ lɛ, ni ehaa awieɔ asafo lɛ he ekpakpa. (1 Korintobii 5:6, 7) Nɔ ni ji etɛ lɛ, kɛ́ wɔkɛ Biblia mli shishitoo mlai tsu nii kɛmɔ shi lɛ, ebaanyɛ eye ebua mɔ ni ashwie lɛ lɛ po. Kɛ́ wɔfi yiŋ ni saneyeli ajinafoi akuu lɛ ekpɛ lɛ sɛɛ lɛ, ebaanyɛ ená eshafeelɔ ni yelikɛbuamɔ ni onukpai lɛ kɛha lɛ lɛ fɛɛ sɛɛ lɛ etsakeee etsui lɛ nɔ hewalɛ kpakpa. Akɛni wekukpãa kpakpa ni kã ekɛ esuɔlɔi lɛ ateŋ lɛ eŋmɛɛ lɛ hewɔ lɛ, ekolɛ no baaye abua lɛ ni ‘ehiɛ atserɛ lɛ,’ ni ena hiɛdɔɔ ni yɔɔ esha ni efee lɛ he, koni ekɔ gbɛ̀i ni baaha ená ekɛ Yehowa teŋ wekukpãa ekoŋŋ.—Luka 15:17.

Ni kɛ́ ashwie wɔwekunyo ko hu? Yɛ shihilɛ ni tamɔ nɛkɛ mli lɛ, wekukpãa gbagbalii ni kã wɔkɛ wɔwekunyo lɛ teŋ lɛ baanyɛ aka suɔmɔ ni wɔyɔɔ kɛha Yehowa mlai lɛ. Te esa akɛ wɔkɛ wɔwekunyo ko ni ashwie lɛ lɛ aye aha tɛŋŋ? Wɔnyɛŋ wɔwie shihilɛ fɛɛ shihilɛ ni ekolɛ enɛ kɛbaaba lɛ he yɛ wolo nɛɛ mli, shi nyɛhaa wɔsusua shihilɛi enyɔ komɛi ni he hiaa lɛ ahe wɔkwɛa.

Yɛ shihilɛi komɛi amli lɛ, ekolɛ wekunyo ni ashwie lɛ lɛ kɛ wɔ yɛ shĩa kome mli ni efata weku kɔkrɔɔ lɛ he. Akɛni shwiemɔ ni ashwie lɛ lɛ etsɔɔɔ akɛ ejeee weku kɔkrɔɔ lɛ mlinyo dɔŋŋ hewɔ lɛ, ebaanyɛ ekɛ ehe awo weku lɛ daa gbi nifeemɔi amli. Shi gbɛ ni ekɔ lɛ tsɔɔ akɛ efite Nyɔŋmɔjamɔ mli wekukpãa ni kã ekɛ eweku lɛ mli bii ni ji Odasefoi lɛ ateŋ be ko ni eho lɛ. No hewɔ lɛ, weku lɛ mli bii ni yeɔ Yehowa anɔkwa lɛ haŋ wekunyo ni ashwie lɛ lɛ awie yɛ amɛ-Nyɔŋmɔjamɔŋ nifeemɔi ashishi. Ákɛ nɔkwɛmɔnɔ lɛ, weku kɔkrɔɔ lɛ mlinyo ni ashwie lɛ lɛ baanyɛ eta weku Biblia mli nikasemɔ ni afeɔ lɛ mli, shi enyɛŋ ekɛ ehe awo mli. Shi kɛ́ mɔ ni ashwie lɛ lɛ ji gbekɛ yɛ mla naa lɛ, eji fɔlɔi lɛ asɔ̃ lolo akɛ amɛtsɔse lɛ ni amɛkɛ gbɛtsɔɔmɔ aha lɛ. No hewɔ lɛ, fɔlɔi ni yɔɔ suɔmɔ lɛ baanyɛ amɛkɛ lɛ akase Biblia lɛ. *Abɛi 6:20-22; 29:17.

Yɛ shihilɛi krokomɛi amli lɛ, wekunyo ni ashwie lɛ lɛ fataaa weku kɔkrɔɔ lɛ he ni ekɛ amɛ bɛ shĩa kome mli hu. Eyɛ mli akɛ ekolɛ ehe baahia ni ekɛ weku lɛ mli bii lɛ ashara yɛ weku  saji komɛi ni he hiaa ni efɔɔɔ kaa ahe moŋ, shi esaaa akɛ afeɔ enɛ nɔtonɔto. Weku mli bii ni ji Kristofoi ni yeɔ Yehowa anɔkwa lɛ taoŋ naajiemɔi ni baaha efee tamɔ nɔ ni tɔmɔ ko bɛ he akɛ amɛkɛ amɛwekunyo ko ni ashwie lɛ ni kɛ amɛ bɛ shĩa kome mli lɛ baashara. Yɛ no najiaŋ lɛ, anɔkwa ni amɛyeɔ Yehowa kɛ esafo lɛ baaha amɛkɛ Ŋmalɛ mli gbɛtsɔɔmɔ ni kɔɔ bɔ ni esa ákɛ akɛ mɔ ko ni ashwie lɛ lɛ aye aha lɛ he lɛ atsu nii. Anɔkwayeli gbɛ ni tamɔ nɛkɛ ni amɛaakɔ lɛ tsɔɔ akɛ amɛmiisumɔ mɔ ni efee esha lɛ ekpakpa, ni no baanyɛ aye abua lɛ koni toigbalamɔ ni akɛha lɛ lɛ awo yibii kpakpai. *Hebribii 12:11.

^ kk. 1 Biblia mli shishitoo mlai ni kɔɔ sane nɛɛ he lɛ kɔɔ mɛi ni kɛɔ akɛ amɛkɛ asafo lɛ ebɔɔɔ dɔŋŋ lɛ hu ahe.

^ kk. 2 Kɛ́ ootao saji babaoo ni kɔɔ bɔ ni esa ákɛ akɛ mɔ ko ni ji gbekɛ yɛ mla naa ni ashwie lɛ lɛ aye aha lɛ he lɛ, kwɛmɔ October 1, 2001, Buu-Mɔɔ lɛ baafa 16-17 kɛ November 15, 1988, The Watchtower lɛ baafa 20 lɛ.

^ kk. 3 Kɛ́ ootao saji babaoo ni kɔɔ bɔ ni esa ákɛ akɛ wekunyo ko ni ashwie lɛ lɛ aye aha lɛ he lɛ, kanemɔ Ŋmalɛ mli ŋaawoo ni yɔɔ April 15, 1988, The Watchtower lɛ baafa 26-31 lɛ kɛ September 15, 1981 nɔ̃ lɛ baafa 26-31 lɛ.

 

Ekrokromɛi Hu Nɛ

Kpɛlɛmɔ Yehowa Tsɔsemɔ Nɔ Daa

Mɛɛ gbɛ nɔ eshafeelɔ ni etsake etsui lɛ naìa Nyɔŋmɔ tsɔsemɔ ni suɔmɔ yɔɔ mli lɛ he sɛɛ?