Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

‘Nyɛhia Nyɔŋmɔ Suɔmɔ Lɛ Mli’

 SAJI KROKOMƐI NI FATA HE

Mɛɛ Be Esa akɛ Ahà Yi nɔ, ni Mɛni Hewɔ?

Mɛɛ Be Esa akɛ Ahà Yi nɔ, ni Mɛni Hewɔ?

Mɛɛ Nyɔŋmɔjamɔŋ nifeemɔi amli esa akɛ yoo ni ji Kristofonyo lɛ ahà eyi nɔ, ni mɛni hewɔ? Nyɛhaa wɔsusua nɔ ni akɛ mumɔ tsirɛ bɔfo Paulo ni ewie yɛ sane nɛɛ he lɛ he wɔkwɛa. Ekɛ gbɛtsɔɔmɔ ni baanyɛ aye abua wɔ koni wɔnyɛ wɔkpɛ yiŋ kpakpai ni woɔ Nyɔŋmɔ hiɛ nyam ha yɛ sane nɛɛ he. (1 Korintobii 11:3-16) Paulo tsɔɔ nibii etɛ ni esa akɛ wɔsusu he: (1) nifeemɔi ni kɛ́ yoo ko kɛ́ ehe miiwo mli lɛ esa akɛ ehà eyi nɔ, (2) shihilɛi amli ni esa akɛ efee nakai, kɛ (3) yiŋtoi ahewɔ ni esa akɛ ekɛ shishitoo mla nɛɛ atsu nii.

Nifeemɔi lɛ. Paulo tsi nifeemɔi enyɔ tã: sɔlemɔ kɛ gbalɛ. (1 Korintobii 11:4, 5) Sɔlemɔ ji jamɔ mli nifeemɔ ni ajɛɔ bulɛ ni mli kwɔ mli akɛ Yehowa gbaa sane. Ŋmɛnɛ lɛ, kɛ́ Kristofonyo ni abaptisi lɛ lɛ miigbála Biblia mli tsɔɔmɔi lɛ ateŋ eko mli eetsɔɔ mɔ ko loo mɛi lɛ, no tsɔɔ akɛ eegba. Ani Paulo miitsɔɔ akɛ, be fɛɛ be ni yoo aaasɔle loo eeetsɔɔ Biblia mli anɔkwale lɛ, esa akɛ ehà eyi nɔ? Dabi. Shihilɛ mli ni esɔleɔ loo etsɔɔ nii yɛ lɛ baatsɔɔ nɔ ni esa akɛ efee.

 Shihilɛi lɛ. Paulo wiemɔi lɛ tsɔɔ akɛ eewie shihilɛi enyɔ he—weku mli kɛ asafoŋ. Ekɛɛ akɛ: “Yoo fɛɛ yoo hu yitso ji nuu . . . Yoo fɛɛ yoo ní sɔleɔ aloo gbaa ní eyitso kã efolo lɛ, lɛ hu eegbe eyitso +lɛ he guɔ.” (1 Korintobii 11:3, 5) Wu lɛ ji mɔ ni Yehowa eto akɛ weku lɛ yitso. Kɛ́ yoo ko miitsu sɔ̃i ni Yehowa kɛfɔ ewu lɛ nɔ lɛ he nii, ni efeee nɔ ko kɛjieee bulɛ kpo etsɔɔɔ ewu lɛ yitsoyeli lɛ, eegbe ewu lɛ yitsoyeli lɛ he guɔ. Ákɛ nɔkwɛmɔnɔ lɛ, kɛ́ ehe bahia ni yoo ko akwɛ Biblia mli nikasemɔ nɔ be mli ni ewu tá nikasemɔ lɛ mli loo eyɛ jɛmɛ lɛ, ehàa eyi nɔ kɛtsɔɔ bulɛ ni eyɔɔ kɛha ewu yitsoyeli lɛ. Yoo lɛ hàa eyi nɔ kɛ́ abaptisi ewu lɛ loo abaptisiko lɛ, ejaakɛ wu lɛ ji weku lɛ yitso. * Nakai nɔŋŋ kɛ́ eesɔle loo eetsɔɔ nii be mli ni ebinuu ni ji gbekɛ yɛ mla naa shi abaptisi lɛ lɛ yɔɔ jɛmɛ lɛ ebaahà eyi nɔ, jeee kɛ susumɔ akɛ ebinuu lɛ ji weku lɛ yitso, shi moŋ yɛ hegbɛ ni akɛha hii ni abaptisi amɛ yɛ Kristofoi asafo lɛ mli lɛ hewɔ.

Wiemɔ ni Paulo wie akɛ, “kɛji mɔ ko miisumɔ akɛ eeefee ehe beilɔ [loo naataalɔ yɛ enɛ he] lɛ, wɔ lɛ wɔfeee nakai, ni Nyɔŋmɔ asafoi lɛ hu efeee nakai” lɛ haa wɔnaa akɛ asafo lɛ mli ji shihilɛ ni ji enyɔ lɛ. (1 Korintobii 11:16) Hii ni abaptisi amɛ ji mɛi ni nyiɛɔ hiɛ yɛ Kristofoi asafo lɛ mli. (1 Timoteo 2:11-14; Hebribii 13:17) Hii pɛ ji mɛi ni Nyɔŋmɔ efã akɛ ahole amɛ onukpai kɛ asafoŋ sɔɔlɔi koni amɛkwɛ Nyɔŋmɔ tooku lɛ nɔ. (Bɔfoi lɛ Asaji 20:28) Shi bei komɛi lɛ, ehe bahiaa ni Kristofoi yei atsu sɔ̃i komɛi ni hii ni abaptisi amɛ ni shɛɔ taomɔ nii komɛi ahe lɛ pɛ tsuɔ he nii lɛ ahe nii. Ákɛ nɔkwɛmɔnɔ lɛ, ekolɛ ehe baahia ni ekwɛ kpee kɛha shiɛmɔyaa nɔ akɛni hii ni abaptisi amɛ ni sa ni baakwɛ nɔ bɛ jɛmɛ lɛ hewɔ. Aloo ekolɛ ebaakwɛ shĩa Biblia mli nikasemɔ ko nɔ be mli ni nuu ni abaptisi lɛ yɛ jɛmɛ. Akɛni nifeemɔ nɛɛ fata Kristofoi asafo lɛ nitsɔɔmɔ nitsumɔ lɛ he hewɔ lɛ, esa akɛ ehà eyi nɔ kɛtsɔɔ akɛ eetsu nitsumɔ ko ni esa akɛ nuu atsu.

Shi jamɔ mli nifeemɔi krokomɛi babaoo yɛ ni kɛ́ yoo kɛ ehe miiwo mli lɛ, ehe ehiaaa ni ehà eyi nɔ. Ákɛ nɔkwɛmɔnɔ lɛ, ehe ehiaaa ni ehà eyi nɔ kɛ eeha sane hetoo yɛ Kristofoi akpeei ashishi,  ekɛ ewu loo nuu kroko ni abaptisi lɛ miitsu shĩa kɛ shĩa shiɛmɔ nitsumɔ lɛ, loo ekɛ ebii ni abaptisiko amɛ lɛ efee ekome kɛmiisɔle loo kɛmiikase nii lɛ. Yɛ anɔkwale mli lɛ, ekolɛ nyɛmi yoo ko yɛ sanebimɔi krokomɛi yɛ sane nɛɛ he, ni kɛ́ eyiŋ etɛ̃ɛɛ lɛ yɛ shihilɛ ko ni kɔɔ sane nɛɛ he lɛ, ebaanyɛ etao saji amli efata enɛ he. * Kɛ́ enɛ fɛɛ sɛɛ lɛ eyiŋ etɛ̃ɛɛ lɛ ni kɛlɛ ehà eyi nɔ yɛ ehenilee hewɔ lɛ, ejeee tɔmɔ.

Yiŋtoi ni yɔɔ sɛɛ. Wɔnaa yiŋtoi enyɔ hewɔ ni esa akɛ Kristofoi ni ji yei lɛ ahà amɛyi nɔ lɛ yɛ 1 Korintobii 11:10 lɛ, jɛmɛ kaneɔ akɛ: “Esa akɛ yoo aná hewalɛ he okadi ko yɛ eyiteŋ yɛ ŋwɛi bɔfoi lɛ ahewɔ.” Klɛŋklɛŋ lɛ kadimɔ wiemɔ ni ji “hewalɛ he okadi ko” lɛ. Kɛ́ yoo ko hà eyi nɔ lɛ ekɛtsɔɔ akɛ ekpɛlɛɔ hegbɛ ni Yehowa kɛha hii ni abaptisi amɛ ni yɔɔ asafo lɛ mli lɛ nɔ. No hewɔ lɛ, ekɛtsɔɔ akɛ esumɔɔ Yehowa Nyɔŋmɔ ni eyeɔ lɛ anɔkwa. Wɔnaa yiŋtoo ni ji enyɔ lɛ yɛ wiemɔi ni ji “yɛ ŋwɛibɔfoi lɛ ahewɔ” lɛ mli. Mɛɛ gbɛ nɔ yei ayi nɔ ni amɛhàa lɛ náa mumɔŋ bɔɔ nii hewalɔi nɛɛ anɔ hewalɛ yɛ?

Kɛ́ mɛi ni yɔɔ Yehowa gbɛjianɔtoo lɛ mli yɛ ŋwɛi kɛ shikpɔŋ lɛ nɔ lɛ ba amɛhe shi amɛha emli hegbɛi ni Nyɔŋmɔ eto lɛ, ŋwɛibɔfoi lɛ kaseɔ nɔ ko kɛjɛɔ mli. Agbɛnɛ hu, amɛkaseɔ nɔ ko kɛjɛɔ nɔkwɛmɔnii kpakpai ni adesai ni yeee emuu lɛ feɔ yɛ enɛ gbɛfaŋ lɛ mli. Nɔ hewɔ ji akɛ esa akɛ amɛ hu amɛba amɛhe shi amɛha gbɛjianɔi ni Yehowa toɔ lɛ—nɔ ko ni be ko ni eho lɛ ŋwɛibɔfoi babaoo nyɛɛɛ amɛfee lɛ. (Yuda 6) Agbɛnɛ, ekolɛ ŋwɛibɔfoi lɛ baana akɛ Kristofonyo yoo ko yɛ niiashikpamɔ babaoo, nilee babaoo, kɛ hiɛshikamɔ babaoo fe nuu ko ni abaptisi lɛ ni yɔɔ asafo lɛ mli, shi fɛɛ sɛɛ lɛ ekɛ miishɛɛ baa ehe shi ehaa hegbɛ ni nuu  lɛ yɔɔ lɛ. Yɛ shihilɛi komɛi amli lɛ ebaanyɛ eba lɛ akɛ yoo nɛɛ ji Kristofonyo ni afɔ lɛ mu ni ji Kristo nanemɛi niyelɔi lɛ ateŋ mɔ kome. Yoo nɛɛ baaná hegbɛ ni nɔ kwɔ fe nɔ ni ŋwɛibɔfoi lɛ yɔɔ lɛ, ni ekɛ Kristo baaye maŋtsɛ yɛ ŋwɛi wɔsɛɛ. Mɛɛ nɔkwɛmɔnɔ kpakpa enɛ ji kɛha ŋwɛibɔfoi lɛ nɛkɛ! Hɛɛ, eji hegbɛ kpele kɛha nyɛmimɛi yei fɛɛ akɛ amɛaatsɔ anɔkwa ni amɛyeɔ kɛ amɛhe shi ni amɛbaa yɛ ŋwɛibɔfoi anɔkwafoi akpekpei abɔ hiɛ lɛ nɔ amɛtsɔɔ akɛ amɛji humii ni feɔ toiboo!

^ kk. 3 Esaaa akɛ yoo ni ji Kristofonyo lɛ sɔleɔ ni anuɔ kɛ́ ewu ni ji Kristofonyo lɛ yɛ jɛmɛ, ja yɛ shihilɛi krɛdɛi komɛi amli, tamɔ kɛ́ hela ko ha nuu lɛ tɔ mu nɛkɛ.

^ kk. 2 Kɛ́ ootao enɛ he saji babaoo lɛ, ofainɛ kwɛmɔ February 15, 2015, Buu-Mɔɔ lɛ baafa 30 lɛ; July 15, 2002, Blɔfo Buu-Mɔɔ lɛ baafa 26-27 lɛ; kɛ February 15, 1977, The Watchtower lɛ baafa 125-128 lɛ.