Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

‘Nyɛhia Nyɔŋmɔ Suɔmɔ Lɛ Mli’

 YITSO 7

Ani Obuɔ Wala Taakɛ Nyɔŋmɔ Buɔ Wala Lɛ?

Ani Obuɔ Wala Taakɛ Nyɔŋmɔ Buɔ Wala Lɛ?

“Bo oŋɔɔ wala nubu yɔɔ.”—LALA 36:10.

1, 2. Mɛni Nyɔŋmɔ kɛduro wɔ ni he hiaa waa ŋmɛnɛ, ni mɛni hewɔ ehe hiaa waa lɛ?

WƆŊWƐI Tsɛ lɛ kɛ nɔ ko ni he hiaa waa eduro wɔ—no ji wala ni wɔyɔɔ akɛ adesai ni susuɔ nii ahe ni baanyɛ ajie esui lɛ akpo lɛ. (1 Mose 1:27) Nikeenii ni he hiaa waa nɛɛ haa wɔnyɛɔ wɔnaa sɛɛnamɔi ni yɔɔ Biblia mli shishitoo mlai ahe. Kɛ́ wɔkɛ shishitoo mlai nɛɛ tsu nii lɛ, wɔbaanyɛ wɔdara yɛ mumɔŋ akɛ mɛi ni sumɔɔ Yehowa ní ‘wɔhenumɔ nii lɛ ele ekpakpa kɛ efɔŋ mlikpamɔ.’—Hebribii 5:14.

2 Nyɛmɔ ni wɔyɔɔ ni haa wɔnyɛɔ wɔsusuɔ Biblia mli shishitoo mlai ahe lɛ he miihia waa ŋmɛnɛ, ejaakɛ nibii ni ehe miihia ni wɔkpɛ wɔyiŋ yɛ he yɛ shihilɛ mli lɛ efa babaoo aahu akɛ anyɛŋ awo mla yɛ eko fɛɛ eko he. Enɛ jeɔ kpo faŋŋ yɛ helatsamɔ saji amli, titri lɛ tsofai ni akɛ lá mli nibii fee kɛ helatsamɔ mli nifeemɔi ni kɔɔ lá he lɛ ahe lɛ. Mɛi fɛɛ ni miisumɔ ni amɛbo Yehowa toi lɛ haa sane nɛɛ he hiaa amɛ. Kɛfata he lɛ, kɛ́ wɔnuɔ Biblia mli shishitoo mlai ni kɔɔ sane nɛɛ he lɛ shishi lɛ, esa akɛ wɔnyɛ wɔkpɛ yiŋ kpakpai ni gbaŋ wɔhenilee naa ni baaha wɔhi Nyɔŋmɔ suɔmɔ lɛ mli. (Abɛi 2:6-11) Ha wɔsusu shishitoo mlai nɛɛ ekomɛi ahe wɔkwɛ.

WALA KƐ LÁ YƐ KRƆŊKRƆŊ

3, 4. Mɛɛ be aha efee faŋŋ yɛ Ŋmalɛi lɛ amli akɛ lá yɛ krɔŋkrɔŋ, ni mɛɛ shishitoo mlai anɔ edamɔ?

3 Beni Kain gbe Habel lɛ sɛɛ etsɛɛɛ nɔŋŋ ni Yehowa ha ana akɛ wala kɛ lá yɛ krɔŋkrɔŋ, ni agbɛnɛ hu tsakpãa ni he hiaa waa kã wala kɛ lá teŋ. Nyɔŋmɔ kɛɛ Kain akɛ: “Onyɛmi lɛ lá  gbee miibolɔ miitsɛ́ mi kɛmiijɛ shikpɔŋ sũ lɛ mli!” (1 Mose 4:10) Yɛ Yehowa hiɛ lɛ, Habel lá lɛ damɔ shi ha wala ni atsɔ yiwaa nɔ aha eje edɛŋ lɛ. Belɛ abaanyɛ akɛɛ akɛ, Habel lá lɛ bo tsɛ́ Nyɔŋmɔ koni etɔ owele.—Hebribii 12:24.

4 Yɛ Nu Afua ni ba yɛ Noa wala beaŋ lɛ sɛɛ lɛ, Nyɔŋmɔ ŋmɛ adesai agbɛ koni amɛye kooloi shi jeee kooloi alá. Nyɔŋmɔ kɛɛ akɛ: “Shi loo kɛ elá ni ji esusuma lɛ, nyɛkayea. Shi anɔkwa mabi nyɛlá hu shi yɛ nyɛsusumai ahewɔ.” (1 Mose 9:4, 5) Kita nɛɛ kɔɔ Noa seshibii ni hi shi yɛ nakai beaŋ kɛbashi ŋmɛnɛ lɛ fɛɛ ahe. Emaa shishinumɔ ni yɔɔ wiemɔi ni Nyɔŋmɔ kɛ Kain wie mra mli lɛ sɛɛ lɛ nɔ mi akɛ, lá feɔ adebɔɔ nibii fɛɛ asusumai loo amɛwala he mfoniri. Nakai kita lɛ hu tsɔɔ faŋŋ akɛ Yehowa ni ji wala Halɔ lɛ baagbala mɛi fɛɛ ni ebuuu wala kɛ lá lɛ atoi.—Lala 36:10.

5, 6. Mɛɛ gbɛ nɔ Mose Mla lɛ ha ana akɛ wala yɛ krɔŋkrɔŋ ni ejara wa waa? (Kwɛmɔ akrabatsa ni yitso ji “ Ná Bulɛ Oha Kooloi Awala” lɛ hu.)

5 Anaa anɔkwa saji enyɔ ni be hooo nɛɛ hu yɛ Mose Mla lɛ mli. Aŋma yɛ 3 Mose 17:10, 11 lɛ akɛ: “Ni mɔ fɛɛ mɔ . . . ni yeɔ lá fɛɛ lá lɛ, majie mihiɛ maka nakai susuma lɛ, ni mafo lɛ kɛaajɛ emaŋ lɛ teŋ mashɛ mafɔ. Ejaakɛ heloo lɛ wala yɛ elá lɛ mli, ni mi lɛ miŋɔha nyɛ yɛ afɔleshãa latɛ lɛ nɔ, koni aŋɔkpãtã ahã nyɛsusumai lɛ; ejaakɛ lá akɛkpãtãa ahaa susuma.” *—Kwɛmɔ akrabatsa ni yitso ji “ Bɔ ni Lá Kpãtãa Wɔkɛ Nyɔŋmɔ Teŋ,” lɛ.

6 Kɛ́ akɛ kooloo ni agbe lɛ lá tsuuu nii yɛ afɔleshãa latɛ lɛ nɔ lɛ, atsiɔ ashwieɔ shikpɔŋ. No hewɔ lɛ yɛ mfonirifeemɔŋ lɛ, akɛ wala lɛ kuɔ sɛɛ haa wala Halɔ lɛ. (5 Mose 12:16; Ezekiel 18:4) Shi kadimɔ akɛ, ehe ehiaaa ni Israelbii lɛ abɔ mɔdɛŋ akɛ amɛbaajie lá lɛ fɛɛ kɛjɛ kooloo ni amɛgbe lɛ loo lɛ  mli ni eko akashwɛ yɛ mli. Kɛ́ afo kooloo lɛ sɛ̃ yɛ gbɛ kpakpa nɔ, ni afɔse elá lɛ ashwie shi jogbaŋŋ lɛ, Israelnyo fɛɛ Israelnyo baanyɛ aye ní ehenilee gbaaa enaa, ejaakɛ elá lɛ ní afɔse ashwie shi jogbaŋŋ lɛ tsɔɔ akɛ abu Wala Halɔ lɛ.

7. Mɛɛ gbɛ nɔ David tsɔɔ akɛ enaa lá akɛ nɔ ko ni yɔɔ krɔŋkrɔŋ?

7 David ni ji ‘nuu ní Nyɔŋmɔ yɔɔ ehe tsui’ lɛ nu shishitoo  mlai ní yɔɔ mla ni Nyɔŋmɔ wo ni kɔɔ lá he lɛ mli lɛ ashishi. (Bɔfoi lɛ Asaji 13:22) Be ko beni kumai miiye lɛ waa lɛ, hii ní kɛ lɛ yɔɔ lɛ ateŋ mɛi etɛ gbá kɛtsɔ henyɛlɔi lɛ ŋsra lɛ mli ekãa naa, ni amɛyayɛ nu kɛjɛ nubu ko mli amɛbaha lɛ. Te David fee enii yɛ amɛnifeemɔ lɛ he eha tɛŋŋ? Ekɛɛ akɛ: “Ani jeee hii ní shɛrɛ amɛhe amɛshwie lɛ alá nɛ?” Yɛ David hiɛ lɛ, nu lɛ ji hii etɛ lɛ alá ní feɔ amɛwala he mfoniri lɛ yɛ gbɛ ko nɔ. No hewɔ lɛ, yɛ bɔ ni kumai yeɔ lɛ lɛ fɛɛ sɛɛ lɛ, ‘efɔse nu lɛ eshwie shi eha Yehowa.’—2 Samuel 23:15-17.

8, 9. Ani Nyɔŋmɔ susumɔ yɛ wala kɛ lá he lɛ tsake be mli ni ato Kristofoi asafo lɛ shishi lɛ? Tsɔɔmɔ mli.

8 Beni akɛ famɔ ha Noa yɛ lá he lɛ sɛɛ aaafee afii 2,400 lɛ, kɛ beni afee Mla kpaŋmɔ lɛ sɛɛ aaafee afii 1,500 lɛ, Yehowa kɛ mumɔ tsirɛ mra be mli Kristofoi asafo lɛ nɔyeli kuu lɛ ni amɛŋma akɛ: “Esa Mumɔ krɔŋkrɔŋ lɛ hiɛ ni esa wɔ hu wɔhiɛ akɛ, wɔkɛ jatsu ko akafɔ nyɛnɔ dɔŋŋ, akɛ ja nii ni he hiaa nɛɛ nɔŋŋ: akɛ nyɛhi looi ni agbe aha wɔji kɛ lá kɛ kooloi ni ashɔtɔ kɛ ajwamaŋbɔɔ.”—Bɔfoi lɛ Asaji 15:28, 29.

9 Ekã shi faŋŋ akɛ mra be mli nɔyeli kuu lɛ yɔse akɛ lá yɛ krɔŋkrɔŋ ni kɛ akɛtsu nii yɛ gbɛ ni ejaaa nɔ lɛ eji esha taakɛ wɔŋjamɔ loo ajwamaŋbɔɔ ji lɛ nɔŋŋ. Anɔkwa Kristofoi ni yɔɔ ŋmɛnɛ lɛ hiɛ nakai susumɔ lɛ nɔŋŋ mli. Kɛfata he lɛ, yɛ nɔ najiaŋ ní amɛaakpa gbɛ akɛ awo mlai pɔtɛɛ komɛi aha amɛ lɛ, amɛsusuɔ Biblia mli shishitoo mlai ahe ní amɛkɛtsuɔ nii, ni no haa amɛyiŋkpɛi yɛ lá he lɛ saa Yehowa hiɛ.

LÁ KƐ NITSUMƆ YƐ HELATSAMƆ MLI

Te magbála yiŋ ní mikpɛ yɛ nibii ni anáa kɛjɛɔ nibii titrii ejwɛ ni feɔ lá lɛ mli matsɔɔ datrɛfonyo ko maha tɛŋŋ?

10, 11. (a) Mɛni ji Yehowa Odasefoi asusumɔ yɛ lá kɛ́ nibii titrii ejwɛ ní feɔ lá lɛ ní agbalaa awoɔ mɔ mli lɛ ahe? (b) Mɛɛ saji ni kɔɔ lá he Kristofoi baanyɛ aná susumɔi srɔtoi yɛ he?

10 Yehowa Odasefoi nuɔ shishi akɛ ‘lá ní aaahi’ lɛ tsɔɔ akɛ esaaa akɛ amɛheɔ lá, amɛhaa lá loo amɛjieɔ ní akɛto koni sɛɛ mli lɛ akɛha amɛ. Kɛfata he lɛ, amɛkɛ lá fãi titrii ejwɛ ni ji wala yibii yɛji, wala yibii tsuji, platelets, kɛ plasma tsuuu nii yɛ helatsamɔ mli, ejaakɛ amɛbuɔ Nyɔŋmɔ mla lɛ.

 11 Ŋmɛnɛ lɛ, abaanyɛ ajie nibii krokomɛi kɛjɛ nibii titrii ejwɛ ní feɔ lá lɛ amli koni akɛtsu nii yɛ gbɛ̀i srɔtoi anɔ. Ani Kristofonyo ko baanyɛ akpɛlɛ ní akɛ nibii ní ajie kɛjɛ nibii titrii ejwɛ ní feɔ lá lɛ amli lɛ atsa lɛ? Ani enaa nibii ní ajie kɛjɛ nibii titrii ejwɛ ní feɔ lá lɛ amli lɛ akɛ eji “lá”? Mɔ fɛɛ mɔ baakpɛ eyiŋ yɛ sane nɛɛ mli. Yɛ helatsamɔ mli nifeemɔi tamɔ hemodilution, cell salvage, hemodialysis ní akɛ helatsɛ lɛ lá etooo shi akɛtsuɔ nii amrɔ nɔŋŋ lɛ agbɛfaŋ lɛ, mɔ fɛɛ mɔ baakpɛ eyiŋ akɛ ebaakpɛlɛ nɔ loo ekpɛlɛŋ nɔ.—Kwɛmɔ Saji Krokomɛi ni Fata He ni yitso ji “Nibii ni Anáa Kɛjɛɔ Nibii Titrii Ejwɛ ni Feɔ Lá lɛ Mli kɛ Opireshɛn Mli Nifeemɔi” lɛ.

12. Te esa akɛ wɔna saji ní ebiɔ ní wɔjɛ wɔhenilee mli wɔkpɛ wɔyiŋ yɛ he lɛ wɔha tɛŋŋ, ní te esa akɛ wɔfee wɔnii yɛ he wɔha tɛŋŋ?

12 Kɛ́ ashi aha aŋkroaŋkroi ní amɛkpɛ amɛyiŋ yɛ sane ko he lɛ, ani no tsɔɔ akɛ Yehowa baakpɛlɛ yiŋ fɛɛ yiŋ ní amɛbaakpɛ lɛ nɔ? Dabi, ejaakɛ wɔsusumɔi kɛ wɔyiŋtoi ahe hiaa lɛ.  (Kanemɔ Abɛi 17:3; 21:2; 24:12) No hewɔ lɛ, kɛ́ wɔsɔle kɛtao saji amli yɛ tsofa ko loo helatsamɔ mli nifeemɔ ko he lɛ sɛɛ lɛ, esa akɛ wɔbo wɔhenilee ní wɔkɛ Biblia lɛ etsɔse lɛ lɛ toi. (Romabii 14:2, 22, 23) Esaaa akɛ wɔhaa mɛi krokomɛi kpɛɔ yiŋ amɛhaa wɔ, loo amɛnyɛɔ wɔnɔ koni wɔkɛ amɛ akpɛ yiŋ kome, ni asaŋ esaaa akɛ wɔbiɔ amɛ akɛ, “Mɛni obaafee kɛ́ oyɛ shihilɛ ní miyɔɔ mli nɛɛ mli lɛ?” Yɛ saji nɛɛ amli lɛ, esa akɛ Kristofonyo fɛɛ Kristofonyo ‘atere lɛ diɛŋtsɛ ejatsu.’ *Galatabii 6:5; Romabii 14:12; kwɛmɔ akrabatsa ni yitso ji “ Ani Mibuɔ Lá akɛ Eyɛ Krɔŋkrɔŋ?” lɛ.

YEHOWA MLAI LƐ TSƆƆ AKƐ EJI TSƐ NI YƆƆ SUƆMƆ

13. Mɛni Yehowa mlai lɛ kɛ eshishitoo mlai lɛ haa anaa yɛ ehe? Okɛ enɛ he nɔkwɛmɔnɔ aha.

13 Mlai kɛ shishitoo mlai ni yɔɔ Biblia lɛ mli lɛ haa wɔnaa akɛ Yehowa ji Mlawolɔ ni le nii waa kɛ Tsɛ ni yɔɔ suɔmɔ ni jɛɔ etsuiŋ tɔ̃ɔ esusuɔ ebii ahilɛkɛhamɔ he. (Lala 19:8-12) Eyɛ mli akɛ famɔ ni ji ‘ahi lá’ lɛ jeee hewalɛnamɔ he gbɛtsɔɔmɔ moŋ, shi ebuɔ wɔhe kɛjɛɔ la hemɔ he naagbai ahe. (Bɔfoi lɛ Asaji 15:20) Yɛ anɔkwale mli lɛ, datrɛfoi babaoo naa opireshinfeemɔ ni akɛ lá tsuuu nii yɛ mli lɛ akɛ ŋmɛnɛŋmɛnɛ beaŋ helatsamɔ mli nifeemɔ “ni nɔ bɛ.” Kɛha anɔkwa Kristofoi lɛ, susumɔi ní tamɔ nɛkɛ ní mɛi náa lɛ maa nɔ mi akɛ Yehowa ji Tsɛ ni yɔɔ suɔmɔ, ni anyɛɛɛ enilee lɛ sɛɛ mo aja.—Kanemɔ Yesaia 55:9; Yohane 14:21, 23.

14, 15. (a) Mɛɛ mlai haa anaa akɛ Nyɔŋmɔ sumɔɔ ewebii lɛ? (b) Mɛɛ shihilɛi amli obaanyɛ okɛ shishitoo mlai ni hã awo shweshweeshwe shihilɛ he kitai nɛɛ atsu nii?

14 Mlai ni Nyɔŋmɔ wo blema Israelbii lɛ babaoo tsɔɔ akɛ esumɔɔ amɛ. Ákɛ nɔkwɛmɔnɔ lɛ, akɛni Israelbii lɛ fɔɔ nifeemɔ yɛ amɛtsũi ayiteŋ hewɔ lɛ, ewo amɛ kita akɛ amɛfo afabaŋ kɛbɔle amɛtsũi lɛ ayiteŋ koni amɛkɛjo osharai anaa foi.  (5 Mose 22:8; 1 Samuel 9:25, 26; Nehemia 8:16; Bɔfoi lɛ Asaji 10:9) Nyɔŋmɔ wo kitã hu akɛ awo tsina ní shiɔ mɛi lɛ tsuŋ. (2 Mose 21:28, 29, Ga Biblia Hee) Kɛ́ mɔ ko kɛ kitai nɛɛ tsuuu nii lɛ, no tsɔɔ akɛ esusuuu mɛi krokomɛi ahe kwraa ni nɔ ni baanyɛ ajɛ mli kɛba ji láyisɔyeli.

15 Mɛɛ shihilɛi amli obaanyɛ okɛ shishitoo mlai ni hã awo kitai nɛɛ atsu nii? Ekomɛi ji bɔ ni okudɔɔ otsɔne kɛ bɔ ni okwɛɔ nɔ ohaa, bɔ ni okwɛɔ okooloi anɔ ohaa, bɔ ni ojieɔ ohiɛtserɛ ohaa, kɛ onitsumɔhe kɛ oshĩa shikamɔ. Yɛ maji komɛi amli lɛ, nɔ ni gbeɔ oblahii kɛ oblayei waa ji osharai ni tsɔnei náa, ejaakɛ bei pii lɛ amɛkɛ amɛhe woɔ osharai amli yakatswaa. Shi oblahii kɛ oblayei ni miisumɔ ni amɛhi Nyɔŋmɔ suɔmɔ lɛ mli lɛ buɔ wala waa, ni amɛbɔɔɔ mɔdɛŋ akɛ amɛkɛ nibii ni he yɔɔ oshara lɛ aaashwɛ koni amɛkɛná amɛhewɔŋ miishɛɛ. Amɛkpɛlɛɛɛ susumɔ ní nilee bɛ mli ni ji akɛ oshara ko nyɛŋ ashara oblahii kɛ oblayei lɛ nɔ. Yɛ no najiaŋ lɛ amɛkpoɔ shihilɛ ni baanyɛ aye amɛ awui, ni no haa amɛnáa miishɛɛ akɛ oblahii kɛ oblayei.—Jajelɔ 11:9, 10.

16. Mɛɛ Biblia mli shishitoo mla kɔɔ hɔjiemɔ he? (Kwɛmɔ shishigbɛ niŋmaa lɛ hu.)

16 Gbekɛ ni ahiɛ lɛ hɔ po wala jara wa waa yɛ Nyɔŋmɔ hiɛ. Yɛ blema Israel lɛ, kɛ́ mɔ ko pila yoohɔlɔ ni yoohɔlɔ lɛ loo gbekɛ ní ehiɛ lɛ hɔ lɛ gbo lɛ, Nyɔŋmɔ naa mɔ ni fee nakai lɛ akɛ gbɔmɔgbelɔ ni no hewɔ lɛ esa akɛ mɔ lɛ aŋɔ ‘esusuma eto susuma najiaŋ.’ * (Kanemɔ 2 Mose 21:22, 23) No hewɔ lɛ, feemɔ bɔ ni Yehowa baanu he eha kɛ́ ena akɛ yɛ hejɔlɛ ni mɛi taoɔ amɛná loo bɔlɛnamɔ mli jeŋba shara ni ehe shi hewɔ lɛ, amɛjeɔ gbɛ amɛjieɔ hɔi babaoo lɛ he mfoniri okwɛ.

17. Te ooofee tɛŋŋ oshɛje mɔ ko ni kpɔ hɔ dani ebale Nyɔŋmɔ shishitoo mlai lɛ mii?

 17 Ni kɛ́ yoo ko kpɔ hɔ dani ebale Biblia mli anɔkwale lɛ hu? Ani Nyɔŋmɔ enaŋ lɛ mɔbɔ? Ebaana lɛ mɔbɔ! Yɛ  anɔkwale mli lɛ, kɛ́ mɔ ko etsake etsui lɛɛlɛŋ lɛ, Yehowa baadamɔ Yesu lá ni afɔse ashwie shi lɛ nɔ ekɛfa lɛ. (Lala 103:8-14; Efesobii 1:7) Hɛɛ, Kristo diɛŋtsɛ kɛɛ akɛ: “Mibaaa jalɔi atsɛmɔ, shi moŋ eshafeelɔi ha tsuitsakemɔ.”—Luka 5:32.

KAABƐ MƆ OWO OMLI!

18. Mɛɛ gbɛ nɔ Biblia lɛ haa wɔnaa nɔ ni haa agbeɔ mɛi babaoo lɛ?

18 Yɛ awui ni Yehowa sumɔɔɔ ni wɔyeɔ mɛi krokomɛi lɛ sɛɛ lɛ, eesumɔ ni wɔfã nyɛ̃ɛ ni ji nɔ ni haa agbeɔ mɛi babaoo lɛ kɛ eshishi fɛɛ kɛjɛ wɔtsui mli. Bɔfo Yohane ŋma akɛ: “Mɔ fɛɛ mɔ ni nyɛɔ enyɛmi lɛ, gbɔmɔgbelɔ ji lɛ.” (1 Yohane 3:15) Jeee suɔmɔ pɛ mɔ ni nyɛɔ enyɛmi lɛ bɛ kɛha lɛ, shi moŋ ená ni enyɛmi lɛ egbo. Ekolɛ nibii ní ebaafee ni akɛbaana akɛ enyɛɔ enyɛmi lɛ ji enaa ní eeefolɔ yɛ gbɛ ni ehiii kwraa nɔ loo eeewie wiemɔi ní kɛ́ eji anɔkwale lɛ no baatsɔɔ akɛ esa akɛ Yehowa agbala enyɛmi lɛ toi lɛ eshi lɛ. (3 Mose 19:16; 5 Mose 19:18-21; Mateo 5:22) No hewɔ lɛ, kwɛ bɔ ni ehe hiaa waa akɛ wɔɔfã nyɛ̃ɛ ní ekolɛ wɔná kɛha mɔ ko lɛ kɛ eshishi fɛɛ kɛjɛ wɔtsui mli!—Yakobo 1:14, 15; 4:1-3.

19. Te mɔ ni kɛ Biblia mli shishitoo mlai tsuɔ nii lɛ naa ŋmalɛi tamɔ Lala 11:5Filipibii 4:8, 9 lɛ ehaa tɛŋŋ?

19 Mɛi ni buɔ wala taakɛ Yehowa buɔ wala ní amɛmiisumɔ ní amɛhi Nyɔŋmɔ suɔmɔ lɛ mli lɛ hu kpoɔ yiwalɛ nifeemɔi fɛɛ. Lala 11:5 lɛ kɛɔ akɛ: ‘Mɔ ni sumɔɔ yiwalɛ lɛ, Yehowa susuma nyɛ̃ɔ lɛ.’ Jeee Nyɔŋmɔ sui lɛ ahe nii pɛ wɔkaseɔ yɛ ŋmalɛ nɛɛ mli; wɔnaa shishitoo mla ní náa bɔ ni wɔhiɔ shi wɔhaa lɛ nɔ hewalɛ hu yɛ mli. Etsirɛɔ mɛi ni sumɔɔ Nyɔŋmɔ lɛ ní amɛkpoo hiɛtserɛjiemɔi fɛɛ ni baanyɛ eha amɛsumɔ yiwalɛ nifeemɔ lɛ. Nakai nɔŋŋ wiemɔ ni ji akɛ Yehowa ji “hejɔlɛ Nyɔŋmɔ” lɛ tsirɛɔ etsuji lɛ ni amɛhaa susumɔi ní adɔɔ he, ajieɔ yi, ní haa mɔ baa ejeŋ jogbaŋŋ ni kɛ toiŋjɔlɛ baa lɛ yiɔ amɛjwɛŋmɔ kɛ amɛtsuii amli obɔ.—Filipibii 4:8, 9.

 OKƐ GBƐJIANƆTOI NI YEƆ LÁ YI SƆ̃ LƐ AKABƆ KWRAA

20-22. Te Kristofoi feɔ amɛnii yɛ je lɛ he amɛhaa tɛŋŋ, ni mɛni hewɔ amɛfeɔ nakai lɛ?

20 Yɛ Nyɔŋmɔ hiɛ lɛ Satan jeŋ muu lɛ fɛɛ eye lá yi sɔ̃. Je nɛŋ nɔyelii lɛ ní akɛ kooloi awuiyelɔi feɔ amɛhe mfoniri yɛ Ŋmalɛi lɛ amli lɛ egbe mɛi akpekpei abɔ ní Yehowa tsuji babaoo fata he. (Daniel 8:3, 4, 20-22; Kpojiemɔ 13:1, 2, 7, 8) Je nɛŋ jarayelɔi kɛ adebɔɔ he nilelɔi ená nii waa, ejaakɛ amɛkɛ nɔyelɔi ní feɔ amɛnii tamɔ kooloi lɛ efee ekome ni amɛfee tawuu nibii ní kpataa nii ahiɛ waa. Kwɛ bɔ ni eji anɔkwale akɛ, “jeŋ muu lɛ fɛɛ kã mɔ fɔŋ lɛ mli”!—1 Yohane 5:19.

21 Akɛni Yesu sɛɛnyiɛlɔi lɛ ‘jɛɛɛ je lɛŋ’ ni amɛkɛ amɛhe wooo je nɛŋ maŋkwramɔŋ saji kɛ tawuu amli kwraa hewɔ lɛ, amɛyeee lá yi sɔ̃ akɛ asafo kɛ agbɛnɛ hu akɛ aŋkroaŋkroi. * (Yohane 15:19; 17:16) Ni akɛni amɛkaseɔ Kristo hewɔ lɛ, kɛ́  awa amɛ yi lɛ amɛkɛ basabasafeemɔ fãaa amɛhe. Yɛ no najiaŋ lɛ, amɛjieɔ suɔmɔ kpo amɛtsɔɔ amɛhenyɛlɔi lɛ, ni amɛsɔleɔ amɛhaa amɛ po.—Mateo 5:44; Romabii 12:17-21.

22 Nɔ ni fe fɛɛ lɛ, anɔkwa Kristofoi tsiɔ amɛhe kwraa kɛjɛɔ mɛi ni eye lá yi sɔ̃ fe fɛɛ ni ji apasa jamɔi fɛɛ ni yɔɔ je lɛŋ ni atsɛɔ amɛ akɛ “Babilon kpeteŋkpele” lɛ he. Nyɔŋmɔ Wiemɔ lɛ kɛɔ akɛ, “emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ nɔ lɛ alá lɛ yɛ.” No hewɔ lɛ abɔɔ wɔ kɔkɔ akɛ: “Nyɛjea emli, mimaŋ.”—Kpojiemɔ 17:6; 18:2, 4, 24.

23. Mɛni Babilon Kpeteŋkpele lɛ mli ni akɛɛ wɔje lɛ tsɔɔ?

23 Wɔhe ní wɔbaatsi kwraa kɛjɛ Babilon Kpeteŋkpele lɛ he lɛ biɔ babaoo fe wɔgbɛi ni aaajie kɛjɛ apasa jamɔ ko woji amli kɛkɛ. Kɛfata he lɛ, esa akɛ wɔnyɛ̃ nifeemɔi fɔji ní apasa jalɔi kpɛlɛɔ nɔ loo amɛwoɔ efeemɔ he hewalɛ lɛ—nifeemɔi tamɔ jeŋba shara, he ni akɛwoɔ maŋkwramɔŋ saji amli, kɛ hiɛkɔɔ ní akɛtiuɔ ninamɔ sɛɛ. (Kanemɔ Lala 97:10; Kpojiemɔ 18:7, 9, 11-17) Kwɛ bɔ ni bei pii lɛ nifeemɔi nɛɛ haa ashwieɔ lá shi!

24, 25. (a) Mɛni nɔ Nyɔŋmɔ baanyɛ adamɔ ana mɔ ko ni eye lá yi sɔ̃ ní etsake etsui lɛ mɔbɔ? (b) Mɛɛ gbɛjianɔ ato yɛ blema Israel ni feɔ enɛ he mfoniri?

24 Beni wɔbaleko anɔkwa jamɔ lɛ, no mli lɛ wɔteŋ mɔ fɛɛ mɔ yeɔ lá yi sɔ̃, ejaakɛ wɔfi Satan je lɛ sɛɛ yɛ gbɛ ko nɔ. Shi, akɛni wɔtsake wɔjeŋba, wɔná hemɔkɛyeli yɛ Kristo kpɔ̃mɔ afɔleshãa lɛ mli, ní wɔjɔɔ wɔhe nɔ wɔha Nyɔŋmɔ hewɔ lɛ, Nyɔŋmɔ naa wɔ mɔbɔ ni ebaa wekukpãa ní kã wɔkɛ lɛ teŋ lɛ yi. (Bɔfoi lɛ Asaji 3:19) Akɛ blema Israel abobaa maji lɛ fee yibaamɔ nɛɛ he mfoniri.—4 Mose 35:11-15; 5 Mose 21:1-9.

25 Te gbɛjianɔtoo nɛɛ tsu nii eha tɛŋŋ? Kɛ́ Israelnyo ko nine yakpa yɛ mɔ ko nɔ ní mɔ lɛ gbo lɛ, esa akɛ ejo foi kɛya abobaa maji lɛ ateŋ ekome mli. Kɛ́ maŋ lɛ nɔ kojolɔi lɛ kojo sane lɛ, esa akɛ mɔ ni ejeee gbɛ egbe gbɔmɔ nɛɛ ahi abobaa maŋ lɛ mli kɛyashi osɔfonukpa lɛ aaagbo. No sɛɛ lɛ, eyɛ hegbɛ akɛ ehiɔ he fɛɛ he ní esumɔɔ. Eji Nyɔŋmɔ mɔbɔnalɛ kɛ bɔ ni adesa wala jara wa ha lɛ he nɔkwɛmɔnɔ ni sa kadimɔ jogbaŋŋ! Ŋmɛnɛ lɛ, taakɛ eji yɛ blema Israel abobaa maji lɛ  amli lɛ, Nyɔŋmɔ eto gbɛjianɔ kɛtsɔ Kristo kpɔ̃mɔ afɔleshãa lɛ nɔ, ní ekɛbaa wɔyi kɛjɛ gbele mli, ejaakɛ wɔjeee gbɛ wɔku Nyɔŋmɔ mla ni kɔɔ bɔ ni wala kɛ lá yɔɔ krɔŋkrɔŋ ha lɛ he lɛ mli. Ani ohiɛ sɔɔ gbɛjianɔtoo nɛɛ waa? Mɛɛ gbɛ nɔ obaanyɛ otsɔ otsɔɔ akɛ ohiɛ sɔɔ? Gbɛ kome ji, kɛtsɔ mɛi anine ní ooofɔ́ ní amɛkpɛlɛ gbɛjianɔ ni Nyɔŋmɔ eto kɛhã yibaamɔ lɛ nɔ, titri lɛ akɛni “amanehulu babaoo” lɛ miibɛŋkɛ oyayaayai lɛ hewɔ.—Mateo 24:21; 2 Korintobii 6:1, 2.

SHIƐMƆ MAŊTSƐYELI SHƐƐ SANE LƐ KƐTSƆƆ AKƐ WALA JARA WA KƐHA BO

26-28. Mɛɛ gbɛ nɔ nitsumɔ ní akɛwo wɔdɛŋ ŋmɛnɛ lɛ tamɔ gbalɔ Ezekiel nɔ lɛ nɔŋŋ, ni te wɔɔfee tɛŋŋ wɔhi Nyɔŋmɔ suɔmɔ lɛ mli lɛ?

26 Nitsumɔ ní akɛwo Nyɔŋmɔ webii adɛŋ ŋmɛnɛ lɛ haa wɔkaiɔ blema gbalɔ Ezekiel, mɔ ni Yehowa to lɛ bulɔ eha Israel we lɛ koni ebɔ amɛ kɔkɔ lɛ. Nyɔŋmɔ kɛɛ lɛ akɛ: “Bó midaaŋ wiemɔ lɛ toi, ní obɔ amɛ kɔkɔ oha mi.” Eji Ezekiel tsuuu nitsumɔ ní akɛwo edɛŋ lɛ kulɛ, abaabi mɛi ní akpata amɛhiɛ beni agbala Yerusalembii lɛ atoi lɛ alá shi yɛ edɛŋ. (Ezekiel 33:7-9) Shi Ezekiel fee toiboo ni eyeee lá yi sɔ̃.

27 Ŋmɛnɛ lɛ, etsɛŋ ni wɔbaana Satan jeŋ muu lɛ fɛɛ naagbee. No hewɔ lɛ, Yehowa Odasefoi naa akɛ eji sɔ̃ ní kã amɛnɔ kɛ agbɛnɛ hu hegbɛ ni amɛná akɛ amɛjaje Nyɔŋmɔ “oweletɔɔ gbi” lɛ kɛfata Maŋtsɛyeli shɛɛ sane lɛ he. (Yesaia 61:2; Mateo 24:14) Ani okɛ ohe woɔ nitsumɔ ní he hiaa nɛɛ mli kɛmɔɔ shi? Bɔfo Paulo kɛ hiɛdɔɔ tsu eshiɛmɔ nitsumɔ lɛ. No hewɔ ni enyɛ ekɛɛ akɛ: “Miyeee nyɛteŋ mɔ ko mɔ ko lá yi sɔ̃; ejaakɛ mijaje Nyɔŋmɔ yiŋtoo muu lɛ fɛɛ mitsɔɔ nyɛ ni mishiuuu eko nɔ.” (Bɔfoi lɛ Asaji 20:26, 27) Mɛɛ nɔkwɛmɔnɔ kpakpa ni esa akɛ wɔkase po nɛ!

28 Shi yɛ anɔkwale mli lɛ kɛ́ wɔɔhi Yehowa ni ji wɔtsɛ lɛ suɔmɔ ni haa mɔ tsui nyɔɔ emli lɛ mli lɛ, esa akɛ wɔfee babaoo fe wala kɛ lá ní wɔɔsusu he taakɛ Yehowa susuɔ he lɛ. Esa akɛ wɔya nɔ wɔhiɛ hetsemɔ mli, loo wɔfee krɔŋkrɔŋ yɛ ehiɛ, taakɛ wɔbaana yɛ yitso ní nyiɛ sɛɛ lɛ mli lɛ.

^ kk. 5 Beni adebɔɔ nibii ahe nilee adafitswaa wolo ko (Scientific American) wieɔ wiemɔ ni Nyɔŋmɔ wie akɛ “heloo lɛ wala yɛ elá lɛ mli” lɛ he lɛ, ekɛɛ akɛ, “Eyɛ mli akɛ lá feɔ wala he mfoniri moŋ, shi abaanyɛ akɛɛ akɛ lá ji wala diɛŋtsɛ: kɛ́ mɔ ko wala yibii yɛji lɛ kɛ wala yibii tsuji lɛ fɛɛ tsuuu nii jogbaŋŋ lɛ enyɛŋ ehi wala mli.”

^ kk. 12 Kwɛmɔ August 2006 Awake! lɛ baafa 3-12 ni Yehowa Odasefoi fee lɛ.

^ kk. 16 Hebri wiemɔ he nilelɔi kɛɔ akɛ bɔ ni aŋma wiemɔi ni yɔɔ 2 Mose 21:23 lɛ aha lɛ hewɔ lɛ, “etamɔ nɔ ni anyɛŋ akɛɛ akɛ wiemɔi ni akɛtsu nii lɛ kɔɔ pilamɔ ni apila yoohɔlɔ lɛ pɛ he.” Kadimɔ hu akɛ, Biblia lɛ ekɛɛɛ akɛ yɛ sane nɛɛ mli lɛ Yehowa kwɛɔ nyɔji abɔ ni hɔ lɛ eye dani ekojoɔ sane lɛ.

^ kk. 21 Kwɛmɔ Yitso 5 ni hiɛ saneyitso akɛ “Bɔ ni Ooofee Otsi Ohe Kɛjɛ Je lɛ He” lɛ.

^ kk. 70 Enɛ he sane fitsofitso yɛ Saji Krokomɛi ni Fata He ni He ni yitso ji “Nibii ni Anáa Kɛjɛɔ Nibii Titrii Ejwɛ ni Feɔ Lá lɛ Mli kɛ Opireshɛn Mli Nifeemɔi” lɛ.

Ekrokromɛi Hu Nɛ

BUU-MƆƆ—NIKASEMƆ NƆ

Nɔ Hewɔ ni Esa akɛ Wɔfee Krɔŋkrɔŋ

Ani 3 Mose lɛ kanemɔ nyaraa ohiɛ loo ehãa oyiŋ futuɔ bo? Nibii kpakpai ni awie yɛ 3 Mose lɛ baanyɛ aye abua bo ni ojá Yehowa yɛ gbɛ krɔŋkrɔŋ nɔ.