Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

‘Nyɛhia Nyɔŋmɔ Suɔmɔ Lɛ Mli’

 SAJI KROKOMƐI NI FATA HE

Nɔ ni Biblia lɛ Kɛɔ Yɛ Gbalamlitsemɔ kɛ Mligbalamɔ He

Nɔ ni Biblia lɛ Kɛɔ Yɛ Gbalamlitsemɔ kɛ Mligbalamɔ He

Yehowa miikpa gbɛ akɛ mɛi ni ebote gbalashihilɛ mli lɛ aye gbalashihilɛ he kitã ni amɛkã amɛhe lɛ nɔ. Beni Yehowa feɔ klɛŋklɛŋ nuu kɛ yoo lɛ ekome kɛha gbalashihilɛ lɛ, ekɛɛ akɛ: ‘Nuu aaakpɛtɛ eŋa he, ni amɛaatsɔ̃ heloo kome.’ Sɛɛ mli lɛ, Yesu Kristo tĩ wiemɔ nɛɛ mli ekoŋŋ ni ekɛfata he akɛ: “No hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.” (1 Mose 2:24; Mateo 19:3-6) Enɛ tsɔɔ akɛ Yehowa kɛ Yesu buɔ gbalashihilɛ akɛ wala beaŋ fɛɛ wekukpãa, ni gbele pɛ gbalaa mli. (1 Korintobii 7:39) Akɛni gbalashihilɛ ji gbɛjianɔtoo ni yɔɔ krɔŋkrɔŋ hewɔ lɛ, esaaa akɛ abuɔ gbalamlitsemɔ akɛ shwɛmɔ nɔ ko. Yɛ anɔkwale mli lɛ, Yehowa nyɛɔ gbala mli  ni atseɔ yɛ gbɛ ni kɛ Ŋmalɛ lɛ kpãaa gbee nɔ lɛ.—Maleaki 2:15, 16.

Mɛɛ gbalamlitsemɔ kɛ Ŋmalɛ lɛ kpãa gbee? Ojogbaŋŋ, Yehowa nyɛɔ ajwamaŋbɔɔ kɛ gbalashihilɛ mli hefatalɔi asɛɛ ni ajeɔ akɛ mɛi krokomɛi náa bɔlɛ lɛ. (1 Mose 39:9; 2 Samuel 11:26, 27; Lala 51:6) Ehiɔ ajwamaŋbɔɔ aahu akɛ eŋmɛɔ gbɛ ni adamɔ nɔ atse gbala mli. (Kɛ́ ootao ona nɔ ni ji ajwamaŋbɔɔ lɛ, kwɛmɔ sane mlitsɔɔmɔ ni akɛha yɛ wolo nɛɛ Yitso 9, kuku 7 lɛ.) Yehowa kɛ hegbɛ eha hefatalɔ ni yeee fɔ́ lɛ koni lɛ ekpɛ eyiŋ kɛji akɛ ekɛ ehefatalɔ ni yeɔ fɔ́ lɛ baahi shi loo ekɛ lɛ baatse gbala. (Mateo 19:9) No hewɔ lɛ, kɛ́ hefatalɔ ni yeee fɔ́ lɛ kpɛ eyiŋ akɛ ebaatse gbala lɛ, Yehowa mli fuŋ lɛ. Kɛlɛ, Kristofoi asafo lɛ wooo mɔ ko hewalɛ koni etse gbala loo ekatse gbala. Yɛ anɔkwale mli lɛ, shihilɛi komɛi baanyɛ aha hefatalɔ ni yeee fɔ́ lɛ aya nɔ ekɛ hefatalɔ ni yeɔ fɔ́ lɛ ahi shi, titri lɛ kɛ́ eshwa ehe lɛɛlɛŋ. Shi yɛ shihilɛ fɛɛ shihilɛ mli lɛ, esa akɛ hefatalɔ ni Ŋmalɛ lɛ kɛɔ akɛ ebaanyɛ etse gbala lɛ akpɛ lɛ diɛŋtsɛ eyiŋ, ni ekpɛlɛ nɔ fɛɛ nɔ ni ekolɛ ebaajɛ eyiŋkpɛɛ lɛ mli aba lɛ nɔ.—Galatabii 6:5.

Nɔ ni efɔɔɔ kaa ji akɛ Kristofoi komɛi gbalaa amɛmli loo amɛtseɔ gbala be mli ni amɛhefatalɔi lɛ ebɔko ajwamaŋ. Biblia lɛ kɛɔ akɛ mɔ ni yɔɔ shihilɛ ni tamɔ nɛkɛ mli lɛ ‘ahi shi nakai, ni ekagba, aloo ekɛ lɛ ayakpata.’ (1 Korintobii 7:11) Kristofonyo ni yɔɔ shihilɛ nɛɛ mli lɛ nyɛŋ ekɛ mɔ kroko abote gbalashihilɛ mli. (Mateo 5:32) Susumɔ shihilɛi ni efɔɔɔ kaa ni mɛi komɛi edamɔ nɔ amɛgbala mli nɛɛ he okwɛ.

Kɛ́ nuu je gbɛ ekwɛɛɛ eweku. Kɛ́ wu lɛ baanyɛ akwɛ eweku lɛ, shi eje gbɛ ekpoo enɛ feemɔ lɛ, ebaanyɛ eha eweku lɛ aye ohia futaa, ni amɛnaŋ shihilɛ mli nibii ni he hiaa titri lɛ. Biblia lɛ kɛɔ akɛ: “Kɛ́ mɔ ko kwɛɛɛ . . . eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.” (1 Timoteo 5:8) Kɛ́ wu lɛ tsakeee gbɛ ni ekɔ nɛɛ lɛ, ŋa lɛ baanyɛ akpɛ eyiŋ kɛji akɛ esa akɛ ekɛ lɛ agbala mli yɛ mla naa koni ekɛ ebii lɛ aná shihilɛ kpakpa. Shi kɛ́ ŋa ko bɔ Kristofoi onukpai lɛ akɛ ewu ni ji Kristofonyo lɛ kwɛɛɛ eweku lɛ, esa akɛ onukpai lɛ apɛi sane nɛɛ  mli jogbaŋŋ. Abaanyɛ ashwie mɛi ni kwɛɛɛ amɛwekui lɛ kɛjɛ asafo lɛ mli.

Niseniianifeemɔ. Ekolɛ gbalashihilɛ mli hefatalɔ ni waa ehefatalɔ yi lɛ baafee lɛ niseniianii aahu akɛ ehefatalɔ lɛ gbɔmɔtsoŋ hewalɛnamɔ kɛ wala baayaje oshara mli po. Kɛ́ gbalashihilɛ mli hefatalɔ ni yi wa lɛ ji Kristofonyo lɛ, esa akɛ asafoŋ onukpai lɛ atao sane lɛ mli. Kɛ́ mɔ ko mli fuɔ waa loo eji awuiyelɔ lɛ, abaanyɛ ashwie lɛ kɛjɛ asafo lɛ mli.—Galatabii 5:19-21.

Mɔ kɛ Nyɔŋmɔ teŋ wekukpãa ni yajeɔ oshara kpele mli. Ekolɛ hefatalɔ ko baaya nɔ efee nii ni baaha ehefatalɔ lɛ akanyɛ ekɛ ehe wo anɔkwa jamɔ mli loo ebaanyɛ enɔ po koni egbo Nyɔŋmɔ mlai lɛ anɔ toi yɛ gbɛ̀i komɛi anɔ. Esa akɛ hefatalɔ ni yajeɔ oshara shihilɛ ni tamɔ nɛkɛ mli lɛ akwɛ akɛ mligbalamɔ yɛ mla naa lɛ ji gbɛ pɛ ni ebaanyɛ etsɔ nɔ ‘ebo Nyɔŋmɔ moŋ toi fe gbɔmɛi’ lo.—Bɔfoi lɛ Asaji 5:29.

Yɛ shihilɛi fɛɛ ni efɔɔɔ kaa tamɔ nɔ ni wɔsusu he kɛtsɔ hiɛ lɛ amli lɛ, esaaa akɛ mɔ ko nyɛɔ hefatalɔ ni yeee fɔ́ lɛ nɔ koni ekɛ ehefatalɔ lɛ agbala mli loo ekɛ lɛ ahi shi. Eyɛ mli akɛ nanemɛi ni edara yɛ mumɔŋ kɛ asafoŋ onukpai baanyɛ amɛkɛ yelikɛbuamɔ kɛ Biblia mli ŋaawoo aha moŋ, shi amɛnyɛŋ amɛle nɔ fɛɛ nɔ ni yaa nɔ yɛ gbalashihilɛ mli hefatalɔi lɛ ateŋ. Yehowa pɛ baanyɛ ale enɛ. Yɛ anɔkwale mli lɛ, kɛ́ ŋa ko ni ji Kristofonyo lɛ wo egbalashihilɛ mli saji ahe koni ana akɛ enaagba lɛ ji hiɛdɔɔ sane bɔni afee ni ekɛ ewu agbala mli loo wu lɛ hu fee nakai nɔŋŋ lɛ, ewooo Nyɔŋmɔ loo amɛgbalashihilɛ lɛ hiɛ nyam. Kɛ́ mɔ ko tsɔ ŋaa ni ekɛ ehefatalɔ gbala mli lɛ, Yehowa le, ekɔɔɔ he eko bɔ ni ekolɛ mɔ lɛ baabɔ mɔdɛŋ ni ekɛto. Yɛ anɔkwale mli lɛ, “nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiŋmɛiiaŋ.” (Hebribii 4:13) Shi kɛ́ Kristofonyo ko kɛ be kakadaŋŋ ehi shi yɛ shihilɛ ni yɔɔ oshara waa mli, ni naagbee lɛ ekpɛ eyiŋ akɛ ekɛ ehefatalɔ lɛ baagbala mli lɛ, esaaa akɛ mɔ ko wieɔ shiɔ lɛ. Nɔ ni he hiaa fe fɛɛ ji akɛ “wɔ fɛɛ wɔbaadamɔ Nyɔŋmɔ kojomɔ sɛi lɛ hiɛ.”—Romabii 14:10-12, Ga Biblia Hee.