Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

‘Nyɛhia Nyɔŋmɔ Suɔmɔ Lɛ Mli’

 SAJI KROKOMƐI NI FATA HE

Bɔ ni Aaafee Asaa Bei ni Jɛɔ Nitsumɔ Mli Saji Amli Baa

Bɔ ni Aaafee Asaa Bei ni Jɛɔ Nitsumɔ Mli Saji Amli Baa

Bɔfo Paulo wie Kristofoi ni kɛ amɛhe yayeɔ sane yɛ kojomɔhei lɛ he yɛ 1 Korintobii 6:1-8 lɛ. Eye ŋkɔmɔ akɛ Kristofoi komɛi ni yɔɔ Korinto lɛ kɛ amɛhe “yayeɔ sane yɛ mɛi ni jáaa Nyɔŋmɔ lɛ aŋɔɔ.” (Kuku 1) Paulo wie yiŋtoi kpakpai ahewɔ ni esaaa akɛ Kristofoi kɛ amɛhe yayeɔ sane yɛ maŋ saneyelihei lɛ, shi moŋ amɛkɛ gbɛtsɔɔmɔi ni akɛsaa bei ni akɛha asafo lɛ atsu nii lɛ he. Nyɛhaa wɔsusua yiŋtoi ahewɔ ni akɛ mumɔ tsirɛ Paulo ni ekɛ ŋaawoo nɛɛ ha lɛ ekomɛi ahe, koni no sɛɛ lɛ wɔsusu shihilɛi fioo komɛi ni ŋaawoo nɛɛ kɔɔɔ amɛhe tsɔ lɛ ahe wɔkwɛa.

Kɛ́ nitsumɔ mli saji ha bei ba wɔkɛ nyɛmi ko teŋ lɛ, klɛŋklɛŋ lɛ esa akɛ wɔkɛ ŋaawoo ni Yehowa kɛhaa lɛ atsu he nii, shi esaaa akɛ wɔfeɔ nɔ ni wɔsumɔɔ. (Abɛi 14:12) Taakɛ Yesu tsɔɔ lɛ, ehi jogbaŋŋ akɛ aaasaa bei oya dani nu afe mã. (Mateo 5:23-26) Dɔlɛ sane ji akɛ, Kristofoi komɛi kɛ amɛhe beɔ aahu akɛ, amɛkɛ amɛhe yayeɔ sane yɛ saneyelihei. Paulo kɛɛ akɛ: “Nyɛto kpa momo, akɛni nyɛkɛ nyɛhe yeyeɔ saji saji lɛ.” Mɛni hewɔ? Yiŋtoo titri hewɔ ji akɛ nifeemɔi nɛɛ baanyɛ agbe asafo lɛ kɛ Nyɔŋmɔ ni wɔjáa lɛ lɛ he guɔ. No hewɔ lɛ, wɔkɛ hiɛdɔɔ susuɔ Paulo sanebimɔ lɛ he, ebi akɛ: “Mɛɛba nyɛhaaa aye nyɛ amim moŋ?”—Kuku 7.

Paulo tsɔɔ hu akɛ Nyɔŋmɔ eto gbɛjianɔ fɛfɛo ni akɛsaa bei srɔtoi yɛ asafo lɛ mli. Asafoŋ onukpai ji Kristofoi hii ni Ŋmalɛ mli anɔkwalei eha amɛtsɔmɔ nilelɔi, ni Paulo kɛɛ akɛ ‘amɛbaanyɛ nyɛmimɛi ateŋ amɛkojo’ yɛ “je nɛŋ saji” amli. (Kuku 3-5) Yesu tsɔɔ akɛ kɛ́ eshai ni yɔɔ hiɛdɔɔ tamɔ naafolɔmɔ kɛ ojotswaa ha bei ba lɛ, esa akɛ atsɔ gbɛ̀i etɛ nɔ asaa: klɛŋklɛŋ lɛ, mɛi ni beɔ lɛ pɛ abɔ mɔdɛŋ amɛsaa amɛteŋ; nɔ ni ji enyɔ lɛ, kɛ́ klɛŋklɛŋ nɔ lɛ yeee omanye lɛ akɛ odasefonyo kome loo enyɔ ayatsu he nii; nɔ ni ji etɛ lɛ, kɛ́ enɛ hu yeee omanye lɛ, ayakɛɛ asafo lɛ ni ji onukpai lɛ.—Mateo 18:15-17.

Yɛ anɔkwale mli lɛ, akɛwoko Kristofoi ni ji onukpai lɛ adɛŋ akɛ amɛtsɔɔ nɔ ni esa akɛ mɛi afee yɛ mla naa loo ni  amɛaatsɔɔ bɔ ni esa akɛ mɛi atsu heloonaa nitsumɔ ko amɛha, ni ehe ehiaaa akɛ amɛfeɔ amɛnii yɛ nakai gbɛ nɔ. Amɛwooo mla yɛ bɔ ni esa akɛ nyɛmimɛi lɛ asaa nitsumɔ mli bei ni baa amɛteŋ lɛ he. Yɛ no najiaŋ lɛ, amɛyeɔ amɛbuaa mɛi ni beɔ lɛ koni amɛkɛ Ŋmalɛ lɛ atsu nii ni amɛsaa bei lɛ yɛ toiŋjɔlɛ mli. Yɛ saji ni mli wawai amli lɛ, ekolɛ onukpai lɛ baabi ŋaawoo kɛjɛ kpokpaa nɔkwɛlɔ lɛ loo Yehowa Odasefoi anitsumɔhe nine lɛ dɛŋ. Shi shihilɛi komɛi yɛ ni Paulo ŋaawoo lɛ kɔɔɔ he tsɔ. Mɛni ji shihilɛi nɛɛ ateŋ ekomɛi?

Yɛ shihilɛi komɛi amli lɛ, sane ni akɛyaa saneyelihe lɛ ji nifeemɔ ni naagba bɛ he ni mla biɔ ni afee koni akɛtsu yiŋtoo kpakpa ko ni kɛ toiŋjɔlɛ baaba lɛ he nii. Ákɛ nɔkwɛmɔnɔ lɛ, saneyelihe baanyɛ afee he pɛ ni atseɔ gbala mli, mɛi biɔ ni aha amɛbii abahi amɛŋɔɔ, atsɔɔ shika ni esa akɛ aha gbalashihilɛ mli hefatalɔi ni akɛ amɛ bɛ dɔŋŋ, atsɔɔ inshuɔrans he nyɔmɔwoo ni esa akɛ mɔ ko nine ashɛ nɔ, abuɔ mɔ ko afataa mɛi ni nitsumɔ ko ni egbee shi lɛ hiɛ amɛ nyɔmɔ lɛ he, kɛ he ni atsɔɔ kɛ́ shamaŋsheo ko ji ekpakpa loo ejeee ekpakpa yɛ. Shihilɛi komɛi hu yɛ ni nyɛmi ko baanyɛ anu he akɛ esa akɛ lɛ hu esama mɔ ni yasama lɛ lɛ koni ekɛfã ehe yɛ saneyelihe. *

Yɛ saji ni tamɔ enɛɛmɛi amli lɛ, kɛ́ Kristofoi ni kɛ amɛhe yeɔ sane lɛ kɛ amɛhe beee lɛ, ekolɛ no tsɔɔ akɛ amɛteee shi amɛwooo yiŋtoo ni yɔɔ ŋaawoo ni akɛ mumɔ tsirɛ Paulo ni eŋma lɛ sɛɛ lɛ. * Kɛlɛ, esa akɛ Yehowa gbɛi lɛ he ni aaatse kɛ toiŋjɔlɛ kɛ ekomefeemɔ ni aaahi asafo lɛ mli lɛ afee nɔ titri ni kã Kristofoi atsui nɔ. Suɔmɔ ji nɔ titri ni haa ayɔseɔ Kristo sɛɛnyiɛlɔi lɛ, ni “suɔmɔ . . . epeleee lɛ diɛŋtsɛ enɔ̃.”—1 Korintobii 13:4, 5; Yohane 13:34, 35.

^ kk. 2 Yɛ shihilɛi komɛi ni efɔɔɔ kaa mli lɛ, ekolɛ Kristofonyo ko baafee esha ni teɔ shi ewoɔ maŋ mla eshi nyɛmi ko, tamɔ kabonaatoo, mɔ pilamɔ, gbɔmɔgbee, loo juu. Kɛ́ awó nɔyelɔi lɛ atoi nɔ yɛ shihilɛi ni tamɔ nɛkɛ mli lɛ, ejeee tɔmɔ, eyɛ mli akɛ nakai feemɔ baanyɛ aha akɛ sane lɛ aya saneyelihe moŋ.

^ kk. 3 Kɛ́ ootao enɛ he saji babaoo lɛ, ofainɛ kwɛmɔ March 15, 1997 Buu-Mɔɔ lɛ baafa 17-22 lɛ, kɛ October 15, 1991 nɔ̃ lɛ baafa 25-28 lɛ.