Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Nyɔŋmɔ Maŋtsɛyeli lɛ Ebɔi Nɔyeli

 YITSO 11

Jeŋba Tsakemɔi ni kɛ Nyɔŋmɔ Krɔŋŋfeemɔ Kpãa Gbee

Jeŋba Tsakemɔi ni kɛ Nyɔŋmɔ Krɔŋŋfeemɔ Kpãa Gbee

YITSO NƐƐ MLI SANE

Bɔ ni Maŋtsɛ lɛ eye ebua eshishi bii lɛ koni amɛhi shi yɛ Nyɔŋmɔ jeŋba he mlai lɛ anaa

Feemɔ ohe mfoniri okwɛ ni ootsɔ agbo ko mli kɛmiibote Yehowa mumɔŋ sɔlemɔwe kpele lɛ kpo lɛ nɔ

1. Mɛni Ezekiel na ni hãa wɔnaa kpɛɔ wɔhe?

NI KƐ́ oná niiashikpamɔ ko tamɔ gbalɔ Ezekiel ni hi shi aaafee afii 2,500 ni eho nɛɛ nɔ lɛ eko hu? Feemɔ enɛ he mfoniri okwɛ: Oobɛŋkɛ sɔlemɔtsu kpele ko ni kpɛlɛɔ kaŋkaŋ. Ŋwɛibɔfo ko ni he wa yɛ jɛmɛ ni kɛ bo baaya shisharamɔ yɛ he fɛfɛo nɛɛ! Okwɔ atrakpoi kpawo ni kɛ mɔ yaa agbói etɛ lɛ ateŋ ekome naa. Agbói nɛɛ hã onaa kpɛ ohe pam. Amɛnɔkwɔlɔmɔ ji mitai 30. Be ni obote agbó lɛ mli lɛ, ona akɛ bulɔi atsũi yɛ jɛmɛ. Aye tɛŋ tsei samai fɛfɛji awo akulashiŋi lɛ ahe.—Ezek. 40:1-4, 10, 14, 16, 22; 41:20.

2. (a) Sɔlemɔwe ni yɔɔ ninaa lɛ mli lɛ damɔ shi kɛhã mɛni? (Kwɛmɔ shishigbɛ niŋmaa lɛ hu.) (b) Mɛni wɔbaanyɛ wɔkase yɛ sɔlemɔwe lɛ shinaa lɛ naa nibii lɛ ahe?

2 Enɛ ji mumɔŋ sɔlemɔtsu lɛ he ninaa lɛ. Ezekiel tsɔɔ ninaa nɛɛ mli fitsofitso aahu akɛ, egbalɛ wolo lɛ yitso 40 kɛyashi 48 lɛ mli fɛɛ eyi kɛ amaniɛbɔɔ nɛɛ. Sɔlemɔwe nɛɛ damɔ shi kɛhã gbɛjianɔ ni Yehowa eto kɛhã jamɔ krɔŋŋ. Ehe nibii lɛ fɛɛ eko hiɛ shishinumɔ ko kɛhã wɔ diɛŋtsɛ, yɛ bɔ ni wɔjáa Nyɔŋmɔ wɔhãa yɛ naagbee gbii nɛɛ amli lɛ. * Mɛni agbói ni nɔ kwɔlɔ lɛ damɔ shi kɛhã? Amɛkaiɔ wɔ akɛ, esa akɛ mɛi ni kɛ amɛhe badɔ̃mɔɔ gbɛjianɔ ni Yehowa eto kɛhã jamɔ krɔŋŋ lɛ ahi shi yɛ Nyɔŋmɔ jalɛ mlai ni nɔ kwɔlɔ lɛ anaa. Tɛŋ tsei ni akpɛ yɛ gbogboi lɛ ahe lɛ hu maa enɛ nɔ mi, ejaakɛ yɛ Biblia lɛ mli lɛ bei komɛi lɛ, akɛ tɛŋ tsei damɔɔ shi ahãa jalɛnifeemɔ. (Lala 92:13) Mɛni bulɔi atsũi lɛ hu tsɔɔ? Ekã shi faŋŋ akɛ, aŋmɛɛɛ mɛi ni kɛ Nyɔŋmɔ mlai tsuuu nii lɛ agbɛ koni amɛbote he fɛfɛo nɛɛ, ni ji anɔkwa jamɔ krɔŋŋ ni hãa wala lɛ mli.—Ezek. 44:9.

3. Mɛni hewɔ ehe bahia ni aya nɔ atsuu Kristo sɛɛnyiɛlɔi lɛ ahe lɛ?

3 Te Ezekiel ninaa lɛ eba mli ehã tɛŋŋ? Taakɛ wɔna yɛ wolo nɛɛ Yitso 2 lɛ mli lɛ, Yehowa tsɔ Kristo nɔ etsuu ewebii lɛ ahe yɛ gbɛ krɛdɛɛ ko nɔ kɛjɛ afi 1914 kɛyashi afi 1919 mra beaŋ. Ani akɛ hetsuumɔ lɛ yawa jɛmɛ kɛkɛ? Kɔkɔɔkɔ! Yɛ afii 100 ni eho lɛ mli fɛɛ lɛ, Kristo etee nɔ ekwɛ koni akɛ Yehowa jeŋba he mlai ni yɔɔ krɔŋŋ lɛ atsu nii. Enɛ tsɔɔ akɛ atee nɔ atsuu ewebii lɛ ahe. Mɛni hewɔ? Ejaakɛ Kristo etee nɔ ebua esɛɛnyiɛlɔi lɛ anaa kɛje jeŋ ni jeŋba sha eyi mli obɔ nɛɛ mli, shi Satan kpako mɔdɛŋ ni ebɔɔ akɛ ebaagbala amɛ kɛwo jeŋ nɛŋ jeŋba sha lɛ mli ekoŋŋ lɛ  kɔkɔɔkɔ. (Kanemɔ 2 Petro 2:20-22.) Hã wɔpɛi shihilɛ mli hei etɛ ni atee nɔ aye abua anɔkwa Kristofoi koni amɛhiɛ jeŋba hetsemɔ mli lɛ amli wɔkwɛ. Klɛŋklɛŋ lɛ, wɔbaasusu tsakemɔi komɛi ni afee yɛ jeŋba gbɛfaŋ lɛ ahe, kɛkɛ lɛ wɔbaasusu gbɛjianɔ ni he hiaa ni ato koni akɛtse asafo lɛ he lɛ he, naagbee lɛ wɔbaasusu weku gbɛjianɔtoo lɛ he.

Tsakemɔi ni Afee yɛ Jeŋba Mli Kɛbashi Ŋmɛnɛ

4, 5. Mɛɛ ŋaa Satan ejɛ jeeŋmɔ ekɛtsu nii, ni mɛni ejɛ mli kɛba?

4 Yehowa webii lɛ etee nɔ amɛnya jeŋba mli hetsemɔ he. No hewɔ lɛ, amɛtee nɔ amɛkɛ gbɛtsɔɔmɔi ni mli kã shi faŋŋ ni akɛhãa yɛ sane nɛɛ he lɛ etsu nii. Susumɔ nɔkwɛmɔ nii fioo komɛi ahe okwɛ.

5 Bɔlɛnamɔ jeŋba sha. Yehowa to wu kɛ ŋa teŋ bɔlɛnamɔ he gbɛjianɔ akɛ efee nɔ ni he tse ni miishɛɛ yɔɔ mli. Satan náa he miishɛɛ waa akɛ ebaatsake bɔ ni ato koni akɛ nikeenii nɛɛ atsu nii ahã lɛ hiɛ kɛfee nɔ ko ni yɔɔ nyaŋemɔ; ekɛkaa Yehowa webii lɛ bɔ ni afee ni Nyɔŋmɔ hiɛ duromɔ aŋmɛɛ amɛ. Satan kɛ nakai ŋaa lɛ tsu nii yɛ Bileam beaŋ tɔ̃ɔ ni eye omanye, ni ekã he ekɛmiitsu nii waa yɛ naagbee gbii nɛɛ amli fe be fɛɛ ni eho.—4 Mose 25:1-3, 9; Kpoj. 2:14.

6. Mɛɛ kitã akala yɛ Buu-Mɔɔ lɛ mli, mɛɛ gbɛ nɔ atsɔ akɛtsu nii, ni mɛni hewɔ sɛɛ mli lɛ ebafee tamɔ mɛi adaŋ kotsa kɛkɛ lɛ? (Kwɛmɔ shishigbɛ niŋmaa lɛ hu.)

6 Bɔ ni afee ni aku Satan ŋaa nɛɛ naa lɛ, June 15, 1908 Buu-Mɔɔ lɛ kala kitã ko ni shiwoo ni nyiɛ sɛɛ nɛɛ yɔɔ mli lɛ: “Kɛ́ nuu ji mi lɛ, be fɛɛ be kɛ he fɛɛ he ni miyɔɔ lɛ, kɛ́ teemɔŋ tete lɛ, maba mijeŋ jogbaŋŋ yɛ mikɛ yei asharamɔ mli taakɛ mafee kɛ́ miyɛ mɛi ateŋ lɛ; kɛ́ yoo ji mi hu lɛ, maba mijeŋ yɛ nakai gbɛ nɔŋŋ nɔ.” * Eyɛ mli ákɛ akɛ kitã nɛɛ fiii mɛi anɔ moŋ, kɛ̃lɛ mɛi babaoo kɛtsu nii ni amɛkɛ amɛgbɛi hã koni akala yɛ The Watch Tower lɛ mli kɛma nɔ mi. Afii komɛi asɛɛ lɛ, ana akɛ eyɛ mli akɛ kitã nɛɛ eye ebua mɛi babaoo moŋ nɛ, kɛ̃lɛ etamɔ nɔ ni yɛ mɛi komɛi agbɛfaŋ lɛ, ebafee daŋ kotsa ko kɛkɛ; no hewɔ lɛ amɛkɛtsuuu nii. Fɛɛ sɛɛ lɛ, atee nɔ akɛ jeŋba he shishitoo mlai ni nɔkwɔlɔ ni kitã lɛ damɔ shi kɛhã lɛ tsu nii.

7. Mɛɛ naagba Buu-Mɔɔ lɛ wie he yɛ afi 1935, ni mɛɛ shishitoo mla esaa ema nɔ mi?

7 Satan tee nɔ ewo etutuamɔ lɛ mli la moŋ. March 1, 1935 Buu-Mɔɔ lɛ wie naagba ni miikwɔ tso yɛ Nyɔŋmɔ webii ateŋ lɛ he kpetekplee. Ekã shi faŋŋ akɛ, mɛi komɛi yasusu akɛ shiɛmɔ nitsumɔ lɛ mli ni amɛkɛ amɛhe woɔ lɛ tsɔɔ akɛ, yɛ gbɛ ko nɔ lɛ, ehe ehiaaa ni amɛhiɔ shi yɛ Yehowa jeŋba he mlai lɛ anaa yɛ amɛshihilɛ mli. Buu-Mɔɔ lɛ gba mli kpoo ekɛɛ: “Esa akɛ mɔ fɛɛ mɔ akai akɛ, jeee shiɛmɔ nitsumɔ lɛ ni wɔkɛ wɔhe woɔ mli lɛ pɛ ji nɔ ni abiɔ ni wɔfee. Yehowa Odasefoi ji Yehowa najiaŋdamɔlɔi, ni sɔ̃ kã amɛnɔ akɛ amɛhã ana amɛ akɛ Yehowa kɛ emaŋtsɛyeli lɛ he najiaŋdamɔlɔi kpakpai.” Kɛkɛ ni sane lɛ kɛ ŋaawoo ni yɔɔ faŋŋ ni kɔɔ bɔ ni sa akɛ aba jeŋ ahã yɛ gbalashihilɛ kɛ bɔlɛnamɔ he lɛ hã, ni akɛye abua Nyɔŋmɔ webii lɛ koni ‘amɛtsĩ amɛhe kɛjɛ bɔlɛnamɔ jeŋba sha he.’—1 Kor. 6:18.

8. Mɛni hewɔ Buu-Mɔɔ lɛ etee nɔ ema Hela wiemɔ kɛhã bɔlɛnamɔ jeŋba sha lɛ shishinumɔ lɛ nɔ mi shii abɔ lɛ?

 8 Nyɛsɛɛ afii nɛɛ nɔŋŋ lɛ, Buu-Mɔɔ lɛ etee nɔ ewie shishinumɔ ni ja ni yɔɔ wiemɔ por·neiʹa ni akɛtsu nii kɛhã bɔlɛnamɔ jeŋba sha yɛ Hela Ŋmalɛi lɛ amli lɛ ahe shii abɔ. Eshishinumɔ lɛ yaa shɔŋŋ fe bɔlɛnamɔ ŋmiiŋmi pɛ. Por·neiʹa kɔɔ nyenyeŋtswibɔi loo jeŋba sha nifeemɔi srɔtoi fɛɛ ni yaa nɔ yɛ tuutuu yei loo ashawo yei awe lɛ he. Enɛ ehã abu Kristo sɛɛnyiɛlɔi lɛ ahe kɛjɛ bɔlɛnamɔ he haomɔi ni eŋɔ mɛi babaoo anom yɛ je lɛŋ ŋmɛnɛ lɛ he.—Kanemɔ Efesobii 4:17-19.

9, 10. (a) Mɛɛ jeŋba Buu-Mɔɔ lɛ wie he yɛ afi 1935? (b) Mɛni ji Biblia lɛ tsɔɔmɔ ni ŋmɛɔ pɛpɛɛpɛ yɛ dãanumɔ he?

9 Dãanumɔ shɛii kɛ dãatɔɔ. March 1, 1935 Buu-Mɔɔ lɛ wie jeŋba he sane kroko hu he ekɛɛ: “Abayɔse hu akɛ mɛi komɛi kɛ amɛhe woɔ shiɛmɔ nitsumɔ lɛ mli, loo amɛtsuɔ asafo lɛ sɔi krokomɛi ahe nii be ni amɛnu dãa. Mɛɛ shihilɛ mli Ŋmalɛi lɛ kpɛlɛɔ nɔ akɛ abaanyɛ anu dãa? Ani ebaafee nɔ ni ja akɛ mɔ ko baanu dãa bɔ ni baasa esɔɔmɔ yɛ Nuŋtsɔ lɛ gbɛjianɔtoo lɛ mli lɛ he?”

10 Sanebimɔ nɛɛ hetoo lɛ hãa anaa bɔ ni Nyɔŋmɔ Wiemɔ lɛ ŋmɛɔ pɛpɛɛpɛ yɛ dãa ni wa numɔ he. Biblia lɛ eguuu wein kɛ dãa ni wa krokomɛi ni anuɔ fioo lɛ, moŋ lɛ, ekɛ hiɛdɔɔ wieɔ eshiɔ dãanumɔ shɛii kɛ dãatɔɔ. (Lala 104:14, 15; 1 Kor. 6:9, 10) Ajɛ jeeŋmɔ ahã Nyɔŋmɔ webii lɛ ena hiɛdɔɔ ni yɔɔ dãa ni anuɔ kɛtsuɔ asafoŋ sɔ̃i ahe nii lɛ ahe yɛ amaniɛbɔɔ ni kɔɔ Aaron bihii ni tee afɔleshãa be ni awoko amɛ kitã, ní Nyɔŋmɔ tswa amɛ nɔ ni amɛgboi lɛ he. Amɛgbele sɛɛ etsɛɛɛ nɔŋŋ lɛ, Nyɔŋmɔ wo mla akɛ osɔfoi lɛ ateŋ mɔ ko kwraa akanu dãa be ni eyaa sɔlemɔwe lɛ eyatsu esɔɔmɔ krɔŋŋ lɛ; enɛ hãa wɔnaa nɔ ni ekolɛ no hã amɛyafee nɔ ko ni ejaaa kwraa be ni awoko amɛ kitã lɛ. (3 Mose 10:1, 2, 8-11) Ŋmɛnɛ lɛ, akɛni Kristo sɛɛnyiɛlɔi lɛ kɛ shishitoo mla nɛɛ tsuɔ nii hewɔ lɛ, amɛkwɛɔ jogbaŋŋ koni amɛkanu dãa kɛyatsu amɛsɔɔmɔ krɔŋŋ lɛ fã ko kwraa he nii.

11. Dãanumɔ shɛii kɛ dãatɔɔ ni atee nɔ agbala mli ahã Nyɔŋmɔ webii lɛ efee jɔɔmɔ kɛhã amɛ yɛ mɛɛ gbɛ nɔ?

11 Nyɛsɛɛ afii nɛɛ amli lɛ, atee nɔ aye abua Kristo sɛɛnyiɛlɔi lɛ ni amɛnu saji ni kɔɔ dãanumɔ shɛii loo dãatɔɔ ni anyɛɛɛ akpa lɛ he lɛ shishi jogbaŋŋ. Eŋɔɔ wɔnaa waa akɛ kɛtsɔ mumɔŋ niyenii ni baa yɛ ebe naa lɛ nɔ lɛ, aye abua mɛi babaoo ni amɛnyɛ amɛtsu shihilɛ ni amɛyaje mli lɛ he nii, ni amɛbafee mɛi ni bulɛ yɔɔ amɛhe ekoŋŋ. Aye abua mɛi babaoo hu ni amɛjo naagba nɛɛ naa foi kwraa. Ehe ehiaaa ni mɔ ko ŋmɛɔ gbɛ ni dãanumɔ shɛii shɔ̃ɔ ebulɛ, eweku, kɛ nɔ ni fe fɛɛ lɛ, esɔɔmɔ hegbɛ ni eyɔɔ yɛ Yehowa jamɔ krɔŋŋ lɛ mli lɛ yɛ edɛŋ.

“Aso osusuɔ akɛ wɔbaanu tawa he fũ loo nɔ ko ni buleɔ mɔ lɛ he fũ yɛ wɔ-Nuŋtsɔ lɛ daŋ?”—C. T. Russell

12. Te Kristo tsuji lɛ bu tawa kɛnitsumɔ amɛhã tɛŋŋ dani naagbee gbii lɛ po je shishi?

12 Tawa kɛnitsumɔ. Kristo tsuji lɛ bɔi tawa kɛ ehenɔi kɛnitsumɔ guu po dani naagbee gbii nɛɛ je shishi. Afii saŋŋ komɛi ni eho lɛ, nyɛmi nuu ko ni hiɛ efã ni atsɛɔ lɛ Charles Capen lɛ wie be klɛŋklɛŋ kwraa ni ekɛ Charles Taze Russell kpe yɛ afi 1800 afii lɛ naagbee gbɛ lɛ he. No mli lɛ, Capen ni eye afii 13 lɛ kɛ enyɛmimɛi hii etɛ komɛi tara Bible House ni yɔɔ Allegheny, yɛ Pennsylvania lɛ atrakpoi lɛ anɔ. Be ni Russell ho amɛhe lɛ, ebi amɛ akɛ: “Oblahii, ani nyɛmiishɛre zigaret? Miinu fũ ko he tamɔ mɔ ko miishɛre  tawa.” Amɛhã ená nɔmimaa akɛ amɛshɛreee zigaret. Ekã shi faŋŋ akɛ, sane ni ebi amɛ lɛ hã amɛna esusumɔ yɛ tawa kɛ ehenɔi lɛ ashɛremɔ he. Nyɛminuu Russell wie 2 Korintobii 7:1 lɛ he yɛ August 1, 1895 Buu-Mɔɔ mli akɛ: “Minaaa gbɛ nɔ ni Kristofonyo ko baatsɔ ená tawa kɛ ehenɔi lɛ ashɛremɔ he sɛɛ loo ekɛwo Nyɔŋmɔ hiɛ nyam. . . . Aso osusuɔ akɛ wɔbaanu tawa he fũ loo nɔ ko ni buleɔ mɔ lɛ he fũ yɛ wɔ-Nuŋtsɔ lɛ daŋ?”

13. Mɛɛ jeŋba tsakemɔ tee nɔ yɛ afi 1973 lɛ?

13 Yɛ afi 1935 lɛ, Buu-Mɔɔ lɛ tsɛ tawa akɛ “jwɛi ni he tseee,” ni ewie akɛ kɛ́ mɔ ko kpeɔ tawa loo eshɛreɔ lɛ, aŋmɛŋ lɛ gbɛ ni eya nɔ esɔmɔ akɛ Betel weku lɛ mlinyo, ni enyɛŋ esɔmɔ hu akɛ Yehowa gbɛjianɔtoo lɛ najiaŋdamɔlɔ akɛ gbɛgbalɔ loo nɔkwɛlɔ gbɛfalɔ. Yɛ afi 1973 lɛ, atee nɔ akɛ gbɛtsɔɔmɔ kroko hu ni kɔɔ enɛ he lɛ hã. June 1 Buu-Mɔɔ lɛ tsɔɔ mli akɛ, kɛ́ mɔ ko kã he ekɛ ehe woɔ nifeemɔ ni nyɛɔ egbeɔ mɔ, ni buleɔ mɔ, ni etsɔɔɔ suɔmɔ hu nɛɛ mli lɛ, anyɛŋ akɛɛ akɛ eji Yehowa Odasefonyo ni yɔɔ shidaamɔ kpakpa yɛ asafo lɛ mli. No sɛɛ lɛ, abi koni ashwie mɛi fɛɛ ni kpaaa tawa kɛnitsumɔ yɛ gbɛ ni ejaaa nɔ nɛɛ kɛjɛ asafo lɛ mli. * Kristo etsɔ gbɛ kroko ni he hiaa hu nɔ etsuu esɛɛnyiɛlɔi lɛ ahe.

14. Mɛni ji Nyɔŋmɔ gbɛtsɔɔmɔ yɛ lá he, ni te fee tɛŋŋ ni lá ni agbalaa awoɔ mɔ mli lɛ bahé shi waa lɛ?

14 Lá ni akɛtsuɔ nii yɛ gbɛ ni ejaaa nɔ. Noa beaŋ lɛ, Nyɔŋmɔ wie akɛ eji tɔ̃mɔ akɛ abaaye lá. Ema sane nɛɛ nɔŋŋ nɔ mi yɛ Mla ni ekɛhã Israel maŋ lɛ mli, ni nakai nɔŋŋ hu efã Kristofoi asafo lɛ akɛ ‘amɛhi lá’ loo amɛtsi amɛhe kɛjɛ he. (Bɔf. 15:20, 29; 1 Mose 9:4; 3 Mose 7:26) Dɔlɛ sane ji akɛ, yɛ wɔbei nɛɛ amli lɛ, Satan etsɔ gbɛ ko nɔ ni eehã mɛi babaoo miiku Nyɔŋmɔ mla nɛɛ mli. Yɛ afii 1800 afiiaŋ lɛ, no mli lɛ datrɛfoi miika lá ni agbalaa awoɔ mɔ mli lɛ amɛmiikwɛ, ni be ni amɛbayɔse akɛ ayɛ lá henɔi srɔtoi lɛ, lá ni agbalaa awoɔ mɔ mli nɛɛ bahé shi kwraa agbɛnɛ. Yɛ afi 1937 lɛ, abɔi mɛi alá gbalamɔ kɛtoo, kɛkɛ ni Jeŋ Ta II lɛ bawo nifeemɔ nɛɛ mli hewalɛ waa agbɛnɛ. Etsɛɛɛ kɛkɛ ni lá ni agbalaa awoɔ mɔ mli lɛ bahé shi yɛ je lɛŋ fɛɛ.

15, 16. (a) Mɛɛ shidaamɔ Yehowa Odasefoi kɔ yɛ lá ni agbalaa awoɔ mɔ mli lɛ he? (b) Mɛɛ yelikɛbuamɔ ni kɔɔ lá ni agbalaa awoɔ mɔ mli kɛ bɔ ni atsaa mɔ ni akɛ lá tsuuu nii lɛ he akɛhã Kristo sɛɛnyiɛlɔi lɛ, ni mɛni ejɛ mli kɛba?

15 Mra mli tɔ̃ɔ yɛ afi 1944 lɛ, Buu-Mɔɔ lɛ tsɔɔ akɛ, lá ni agbalaa awoɔ mɔ mli lɛ ji gbɛ kroko ni atsɔɔ nɔ ayeɔ lá. Awaje nakai Ŋmalɛ naa shidaamɔ lɛ, ni ahã efee faŋŋ yɛ afi ni nyiɛ sɛɛ lɛ mli. Be ni shɛɔ afi 1951 lɛ, akala lá he sanebimɔi babaoo kɛ amɛhetoi yɛ wɔwoji lɛ amli, koni eye ebua Nyɔŋmɔ webii lɛ ní amɛle bɔ ni amɛkɛ datrɛfoi baaye ahã. No mli lɛ, yɛ jeŋ fɛɛ lɛ, Kristo anɔkwa kaselɔi lɛ kɛ ekãa miikɔ shidaamɔ ni ja yɛ lá he, ni bei pii lɛ mɛi yeɔ amɛhe fɛo, afeɔ amɛ niseniianii, ni bei komɛi po lɛ, awaa amɛ yi. Shi Kristo tee nɔ ehã esafo lɛ kɛ yelikɛbuamɔ ni he hiaa lɛ hã nyɛmimɛi lɛ. Apɛi lá sane lɛ mli fitsofitso, ni akala he saji awo wɔwoji lɛ amli.

16 Yɛ afi 1979 lɛ, ahã asafoŋ onukpai komɛi bɔi helatsamɔhei asaramɔ koni amɛye amɛbua datrɛfoi ní amɛnu wɔshidaamɔ yɛ lá he, Ŋmalɛ naa yiŋtoo ni wɔyɔɔ yɛ lá he, kɛ nibii ni abaanyɛ akɛtsu nii kɛye lá najiaŋ yɛ helatsamɔ mli lɛ shishi. Yɛ afi 1980 lɛ, atsɔse asafoŋ onukpai yɛ Amerika maŋtiasei 39 amli kɛhã  nitsumɔ nɛɛ. Be ni be shwieɔ mli lɛ, Gbɛtsɔɔmɔ Kuu lɛ kpɛlɛ ni ato Ajinafoi Akuu ni Kɛ Helatsamɔhei Shãraa srɔtoi yɛ je lɛŋ fɛɛ. Ani mɔdɛŋbɔɔ nɛɛ eye omanye yɛ afii ni eho lɛ amli? Ŋmɛnɛ lɛ, helatsamɔ nitsulɔi akpei nyɔŋmai komɛi—ni datrɛfoi kɛ amɛhenɔi fɛɛ fata he lɛ—kɛ Yehowa Odasefoi ni yaa helatsamɔhei lɛ kpãa gbee, ni amɛkpɛlɛɔ wɔshidaamɔ akɛ wɔsumɔɔɔ ni ahã wɔ lá lɛ nɔ. Helatsamɔhei babaoo tsaa mɛi ní amɛhãaa mɛi lɛ lá, amɛteaŋ ekomɛi po eyɔse akɛ no ji helatsamɔ gbɛ ni hi fe fɛɛ. Aso kɛ́ osusu gbɛi ni Yesu etsɔ nɔ ebu esɛɛnyiɛlɔi lɛ ahe kɛje mɔdɛŋ ni Satan bɔɔ koni ebule amɛ lɛ ahe lɛ, omii shɛɛɛ ohe?—Kanemɔ Efesobii 5:25-27.

Helatsamɔhei babaoo tsaa mɛi ni amɛkɛ lá tsuuu nii yɛ enɛ feemɔ mli, amɛteaŋ ekomɛi po eyɔse akɛ no ji helatsamɔ gbɛ ni hi fe fɛɛ

17. Mɛni wɔbaanyɛ wɔfee kɛtsɔɔ akɛ wɔhiɛ sɔɔ bɔ ni Kristo etee nɔ eye ebua esɛɛnyiɛlɔi ni amɛfee tsakemɔi lɛ?

17 Ehi jogbaŋŋ akɛ wɔbaabi wɔhe akɛ, ‘Ani mihiɛ sɔɔ gbɛ ni Kristo tsɔɔ nɔ eyeɔ ebuaa esɛɛnyiɛlɔi lɛ ni amɛfee tsakemɔi, ni ji tsɔsemɔ ni ekɛhãa wɔ koni wɔhi shi yɛ Yehowa jeŋba he mlai ni nɔ bɛ lɛ anaa lɛ?’ Kɛ́ nakai lɛ, belɛ nyɛhãa wɔjwɛŋmɔ ahiaa nɔ akɛ Satan kã he eebɔ mɔdɛŋ ehã wɔku Nyɔŋmɔ jeŋba he mlai lɛ amli, koni ekɛjie wɔ kɛjɛ Yehowa kɛ Yesu masɛi. Yehowa gbɛjianɔtoo lɛ yaa nɔ ekɛ kɔkɔbɔi kɛ kaimɔi kpakpai ni kɔɔ jeŋ nɛɛ jeŋba gbohii lɛ ahe lɛ hãa wɔ be fɛɛ be. Nyɛhãa wɔhiɛ ahiaa wɔhe nɔ  daa gbi, no ji wɔkwɛ wɔhe nɔ jogbaŋŋ ni wɔkɛ ŋaawoo kpakpai nɛɛ atsu nii.—Abɛi 19:20.

Abu Asafo lɛ He Koni Jeŋba Gbohii Akagbe He Guɔ

18. Mɛɛ kaimɔ ni mli kã shi Ezekiel ninaa lɛ kɛhãa wɔ yɛ mɛi ni jeɔ gbɛ amɛtseɔ Nyɔŋmɔ gbɛtsɔɔmɔi lɛ ahiɛ atua lɛ ahe?

18 Afee tsakemɔ kroko hu yɛ jeŋba gbɛfaŋ, no ji gbɛ ni akɔ koni akɛhã asafo lɛ he atse be fɛɛ be lɛ. Dɔlɛ sane ji akɛ, jeee mɛi fɛɛ ní kpɛlɛɔ Yehowa jeŋba he mlai anɔ, ní amɛjɔɔ amɛhe nɔ amɛhãa Nyɔŋmɔ lɛ yaa nɔ amɛhiɔ shi yɛ amɛyiŋkpɛɛ lɛ naa. Mɛi komɛi tsakeɔ amɛjwɛŋmɔ sɛɛ mli, ni amɛkɛ kuɛŋtimɔ tseɔ shishitoo mlai nɛɛ ahiɛ atua. Mɛni ebiɔ ni afee mɛi ni tamɔ nakai lɛ? Wɔnaa nɔ ni esa akɛ afee amɛ lɛ yɛ Ezekiel ninaa ni kɔɔ mumɔŋ sɔlemɔwe lɛ ni wɔsusu he yɛ yitso nɛɛ shishijee gbɛ lɛ mli. Bɛ okaiɔ agbói ni nɔ kwɔlɔ lɛ? Bulɔi atsũi yɛ agbói lɛ eko fɛɛ eko naa. Bulɔi lɛ buɔ sɔlemɔwe lɛ naa, ekolɛ koni akɛtsĩ ‘tsui mli foolɔi’ loo mɛi ni afolɔko amɛtsuii ketia lɛ gbɛ ní amɛkanyɛ amɛbote sɔlemɔwe lɛ. (Ezek. 44:9) Enɛ hãa wɔnaa faŋŋ akɛ, jamɔ krɔŋŋ ji hegbɛ ni akɛhãa mɛi pɛ ni bɔɔ mɔdɛŋ akɛ amɛbaahi shi yɛ Yehowa jeŋba he mlai ni he tse lɛ anaa lɛ. Nakai nɔŋŋ eji yɛ ekome ni afeɔ kɛjáa Nyɔŋmɔ akɛ Kristofoi lɛ gbɛfaŋ ŋmɛnɛ, jeee mɔ fɛɛ mɔ kɛkɛ náa hegbɛ nɛɛ.

19, 20. (a) Mɛɛ gbɛ nɔ Kristo etee nɔ eye ebua esɛɛnyiɛlɔi lɛ fiofio ni amɛtsake bɔ ni amɛtsuɔ efɔŋfeemɔ ni yɔɔ hiɛdɔɔ he nii amɛhãa lɛ mli? (b) Mɛɛ yiŋtoi etɛ ahewɔ ashwieɔ efɔŋfeelɔi ni tsakeee amɛtsui lɛ kɛjɛɔ asafo lɛ mli lɛ?

19 Yɛ afi 1892 tɔ̃ɔ lɛ, Buu-Mɔɔ lɛ wie akɛ, “eji wɔsɔ̃ akɛ wɔbaashwie mɛi (ni ji Kristofoi) ni tsɔɔ gbɛ tɛ̃ɛ loo gbɛ nigii nɔ amɛkɛɔ akɛ Kristo kɛ ehe hãaa akɛ kpɔmɔnɔ kɛhã mɛi fɛɛ lɛ.” (Kanemɔ 2 Yohane 10.) Yɛ afi 1904 lɛ, wolo ni ji The New Creation lɛ tsɔɔ mli akɛ, mɛi ni kãa he amɛkɛ amɛhe woɔ jeŋba gbohii amli lɛ kɛ asafo lɛ jeŋba hetsemɔ lɛ woɔ oshara mli. No beaŋ lɛ, asafo muu lɛ fɛɛ kpeɔ kɛfeɔ nɔ ko ni atsɛɔ lɛ asafoŋ saneyeli kɛpɛiɔ saji ni kɔɔ efɔŋfeemɔi ni yɔɔ hiɛdɔɔ ahe lɛ amli. Kɛ̃lɛ, shihilɛ nɛɛ efɔɔɔ kaa yɛ no beaŋ. Yɛ afi 1944 lɛ, Buu-Mɔɔ lɛ tsɔɔ mli akɛ, nyɛmimɛi hii ni akɛ sɔ̃i ewo amɛdɛŋ lɛ pɛ esa akɛ amɛtsu saji ni tamɔ nɛkɛ lɛ ahe nii. Afi 1952 mli dani akala gbɛtsɔɔmɔ ni damɔ Biblia lɛ nɔ ni akɛbaatsu saji ni ebiɔ akɛ saneyeli ajinafoi akui atsu he nii lɛ yɛ Buu-Mɔɔ lɛ mli, sane nɛɛ tsɔɔ yiŋtoo titrii hewɔ ni ashwieɔ mɛi ni tsakeee amɛtsui lɛ kɛjɛɔ asafo lɛ mli lɛ, afeɔ nakai kɛtseɔ asafo lɛ he.

20 Kɛjɛ no nɔ kɛbaa nɛɛ, Kristo etee nɔ eye ebua esɛɛnyiɛlɔi lɛ ni amɛhã bɔ ni atsuɔ efɔŋfeemɔi ni yɔɔ hiɛdɔɔ he nii ahãa lɛ efee faŋŋ, ni amɛfee tsakemɔi hu yɛ mli. Atsɔseɔ Kristofoi asafoŋ onukpai lɛ jogbaŋŋ koni amɛtsu saji ni amɛyeɔ lɛ he nii bɔ pɛ ni Yehowa taoɔ, ni amɛŋmɛ pɛpɛɛpɛ yɛ jalɛ kɛ mɔbɔnalɛ mli. Ŋmɛnɛ lɛ wɔnaa, kɛ́ hooo kwraa lɛ, yiŋtoi etɛ ahewɔ ni ashwieɔ efɔŋfeelɔ ni tsakeee etsui lɛ kɛjɛɔ asafo lɛ mli lɛ: (1) koni akagbe Yehowa gbɛ́i lɛ he guɔ, (2) koni akɛbu asafo lɛ he kɛjɛ nibii ni jɛɔ efɔŋfeemɔ ni yɔɔ hiɛdɔɔ mli kɛbaa lɛ ahe, kɛ (3) koni no aye abua efɔŋfeelɔ lɛ ní kɛ́ ebaahi lɛ etsake etsui.

21. Te gbɛjianɔ ni ato akɛ ashwie efɔŋfeelɔi ni tsakeee amɛtsui lɛ eye ebua Nyɔŋmɔ webii lɛ ehã tɛŋŋ?

 21 Ani oona bɔ ni ŋmɛnɛ lɛ shwiemɔ gbɛjianɔtoo lɛ efee jɔɔmɔ ehã Kristo sɛɛnyiɛlɔi lɛ? Yɛ blema Israel lɛ, bei pii lɛ efɔŋfeelɔi náa maŋ lɛ nɔ hewalɛ gbonyo, ni bei komɛi po lɛ amɛyi faa kwraa fe mɛi ni sumɔɔ Yehowa ní bɔɔ mɔdɛŋ akɛ amɛbaafee nɔ ni ja lɛ. No tsɔɔ akɛ, bei pii lɛ, maŋ lɛ kɛ heguɔgbee baa Yehowa gbɛ́i lɛ nɔ, ni no hãaa amɛná ehiɛ duromɔ. (Yer. 7:23-28) Shi ŋmɛnɛ lɛ, Yehowa kɛ hii kɛ yei ni yeɔ emlai anɔ ni efee kome akɛ maŋ lɛ miitsu nii. Akɛni ajieɔ efɔŋfeelɔi ni ekpiliŋ amɛtsui lɛ yɛ wɔteŋ hewɔ lɛ, aŋmɛɛɛ amɛ gbɛ ní amɛbatsɔmɔ Satan dɛŋdade koni ekɛfite asafo lɛ, ni ekɛwo he muji. Moŋ lɛ, akwɛɔ koni amɛkaná asafo lɛ nɔ hewalɛ. No hewɔ lɛ ákɛ kuu lɛ, wɔnáa nɔmimaa akɛ wɔbaaya nɔ wɔná Yehowa hiɛ duromɔ. Kaimɔ akɛ Yehowa wo shi akɛ: “Tawuu nii ní asɔ̃ɔ ashiɔo lɛ eko eko nyɛŋ nɔ ko afee.” (Yes. 54:17) Ani wɔkɛ anɔkwayeli fĩɔ asafoŋ onukpai ni sɔ̃ ni tsii kã amɛnɔ akɛ amɛtsu saneyeli he nii lɛ asɛɛ?

Amɛwó Wekui Fɛɛ Atsɛ lɛ Hiɛnyam

22, 23. Mɛni hewɔ wɔhiɛ sɔɔ wɔnyɛmimɛi Kristofoi ni hi shi yɛ afi 1900 afii lɛ mra beaŋ lɛ waa lɛ? Kɛ̃lɛ, mɛni yɔɔ ni tsɔɔ akɛ shwɛ amɛ pɛpɛɛpɛ-ŋmɛɛ fioo yɛ bɔ ni amɛtsu weku saji ahe nii amɛhã lɛ he?

22 Gbɛ ni ji etɛ ni Kristo sɛɛnyiɛlɔi lɛ etee nɔ amɛná tsakemɔi ni afeɔ lɛ he sɛɛ lɛ kɔɔ gbalashihilɛ kɛ weku shihilɛ he. Aso atsake wɔsusumɔi yɛ weku he yɛ afii ni eho lɛ amli? Hɛɛ. Ákɛ nɔkwɛmɔnɔ lɛ, kɛ́ wɔkane Nyɔŋmɔ webii ni hi shi yɛ afi 1900 afii lɛ shishijee gbɛ lɛ ahe saji lɛ, wɔhiɛ sɔɔ amɛhekɛafɔleshãa mumɔ lɛ waa, ni ehãa wɔnaa kpɛɔ wɔhe pam. Wɔhiɛ sɔɔ bɔ ni amɛhã amɛsɔɔmɔ krɔŋŋ lɛ fee nɔ titri ni he hiaa amɛ fe nɔ fɛɛ nɔ yɛ amɛshihilɛ mli lɛ. Nakai beaŋ nɔŋŋ lɛ, wɔnaa hu akɛ ehe bahia ni amɛŋmɛ pɛpɛɛpɛ yɛ amɛshihilɛ mli. Yɛ mɛɛ gbɛ nɔ?

23 No beaŋ lɛ, efɔɔ kaa akɛ, nyɛmimɛi kpɛlɛɔ ni atsuɔ amɛ kɛshiɔ amɛmaŋ kɛyaa hei ni yɔɔ shɔŋŋ koni amɛyashiɛ loo amɛyasɔmɔ akɛ nɔkwɛlɔi gbɛfãlɔi, ni amɛyayeɔ nyɔji saŋŋ dani amɛkuɔ amɛsɛɛ. Kɛfata he lɛ, ajieee gbalashihilɛ yi tsɔ ahãaa nyɛmimɛi lɛ, ni afeɔ lɛ bɔ ni tekeɔ nɔ ni Ŋmalɛi lɛ tsɔɔ lɛ, ni nɔ ko fioo pɛ awieɔ yɛ bɔ ni abaafee atswa Kristofoi agbalashihilɛ ama shi lɛ he. Ani nakai nɔŋŋ shihilɛ lɛ ji yɛ Kristo sɛɛnyiɛlɔi lɛ ateŋ ŋmɛnɛ? Dabi!

Aŋmɛɛɛ gbɛ ni mɔ ko ahã teokrase sɔ̃i ahe nitsumɔ ahã eku ehiɛ eshwie eweku sɔ̃i anɔ

24. Mɛɛ gbɛ nɔ Kristo tsɔ eye ebua enɔkwafoi lɛ ni amɛŋmɛ pɛpɛɛpɛ yɛ gbalashihilɛ kɛ weku shihilɛ he?

24 Ŋmɛnɛ lɛ, aŋmɛɛɛ gbɛ ni mɔ ko ahã teokrase sɔ̃i ahe nitsumɔ ahã eku ehiɛ eshwie eweku sɔ̃i anɔ. (Kanemɔ 1 Timoteo 5:8.) Kɛfata he lɛ, Kristo etee nɔ ekwɛ koni esɛɛnyiɛlɔi anɔkwafoi ni yɔɔ shikpɔŋ nɛɛ nɔ lɛ anine ashɛ Ŋmalɛ naa ŋaawoi ni yeɔ buaa jogbaŋŋ yɛ gbalashihilɛ kɛ weku shihilɛ mli lɛ anɔ be fɛɛ be. (Efe. 3:14, 15) Yɛ afi 1978 lɛ, afee wolo ko ni ji Oweku Shihilɛ Ni Oooha Efee Miishɛɛ. Afii 18 sɛɛ lɛ, afee wolo ni ji Nɔ Diɛŋtsɛ ni Kɛ Weku Miishɛɛ Baa. Kɛfata he lɛ, atee nɔ aŋmala saji srɔtoi yɛ Buu-Mɔɔ lɛ mli koni eye ebua gbalashihilɛ mli hefatalɔi ni amɛkɛ Ŋmalɛ mli shishitoo mlai atsu nii yɛ amɛgbalashihilɛi amli.

25-27. Mɛɛ gbɛ nɔ atee nɔ atsu gbekɛbii ni eye afii srɔtoi lɛ ahiamɔ nii ahe nii yɛ afii ni eho lɛ amli kɛbashi ŋmɛnɛ?

25 Ni gbekɛbii agbɛfaŋ hu? Yɛ afii ni eho lɛ amli fɛɛ lɛ, atee nɔ asusu amɛhiamɔ nii ahe jogbaŋŋ. Kɛjɛ blema tɔ̃ɔ lɛ, Yehowa  gbɛjianɔtoo lɛ etee nɔ eto nibii kpakpai ahe gbɛjianɔ ehã gbekɛbii ni eye afii srɔtoi, ni nɔ ni kulɛ ebaa fiofio lɛ ebafa babaoo amrɔ nɛɛ, ni ebaa nɔtonɔto. Ákɛ nɔkwɛmɔnɔ lɛ, “Juvenile Bible Study” (Biblia Mli Nikasemɔ Kɛhã Gbekɛbii) lɛ pue yɛ The Golden Age lɛ mli kɛjɛ afi 1919 kɛyashi afi 1921. No sɛɛ lɛ, afee The Golden Age ABC wolo lɛ yɛ afi 1920, kɛ wolo ni ji Children yɛ afi 1941. Afi 1970 lɛ, afee woji ni ji Tsɔɔlɔ Kple lɛ Toiboo, Your Youth—Getting the Best out of It, Mi-Wolo ni Gbaa Biblia Mli Saji. Yɛ afi 1982 lɛ, akɛ saji ni baa kɛtsaraa nɔ ni ji “Young People Ask” lɛ bɔi Awake! lɛ mli woo, no mli ajɛ ni afee wolo ni ji Young People Ask—Answers That Work, yɛ afi 1989 lɛ.

Be ni mɛi anine shɛ wolo lɛ ni ji Mi-Biblia mli Nikasemɔi lɛ anɔ yɛ Germany kpee wulu nɛɛ shishi lɛ, amɛmii shɛ amɛhe waa

26 Ŋmɛnɛ lɛ, wɔyɛ Young People Ask wolo nɛɛ kpoi enyɔ ni yɔɔ ebe naa, ni akã he aŋmalaa esaji ni tsara nɔ lɛ awoɔ wɔ-Wɛb saiti ni ji jw.org lɛ nɔ. Kɛfata he lɛ, wɔyɛ wolo ni ji Kasemɔ Nii Kɛjɛ Tsɔɔlɔ Kpele lɛ Ŋɔɔ. Afee nibii srɔtoi babaoo awo wɔ-Wɛb saiti lɛ nɔ kɛhã gbekɛbii, ekomɛi ji Biblia mli mɛi ahe saji, Biblia mli nifeemɔi kɛhã gbekɛbii bibii kɛ gbekɛbii ni hiɛ efã, alabaaloo (puzzles), vidioi, Biblia mli saji ni atɛŋ, kɛ Biblia mli nikasemɔi hu kɛhã gbekɛbii  ni eye afii etɛ loo mɛi ni shɛɛɛ nakai. Wɔnaa faŋŋ akɛ, kɛjɛ be ni Kristo bua gbekɛbii lɛ anaa kɛba eŋɔɔ yɛ klɛŋklɛŋ afii 100 lɛ mli kɛbashi ŋmɛnɛ lɛ, esusumɔ yɛ gbekɛbii ahe lɛ tsakeko kwraa. (Mar. 10:13-16) Eesumɔ ni gbekɛbii ni yɔɔ wɔteŋ lɛ anu he akɛ asumɔɔ amɛ naakpa, ni akɛ mumɔŋ niyenii kpakpai lɛɔ amɛ.

27 Kɛfata he lɛ, Yesu miisumɔ ni abu gbekɛbii lɛ ahe kɛjɛ osharai ahe. Be ni jeŋ ni jeŋba ekpɔtɔ nɛɛ eshiu kɛbote efitemɔ mli vii nɛɛ, gbekɛbii aniseniianifeemɔ ebahé shi kwraa fe tsutsu lɛ. Enɛ hewɔ lɛ, afee woji ni shishinumɔ yɔɔ mlɛo ni wieɔ saji ahe tɛ̃ɛ ni baaye abua fɔlɔi ni amɛkɛbu amɛbii lɛ ahe kɛjɛ yiwalɛ nifeemɔi ahe. *

28. (a) Taakɛ wɔnaa yɛ sɔlemɔwe ni yɔɔ Ezekiel ninaa lɛ mli lɛ, kɛ́ wɔmiisumɔ ni wɔkɛ wɔhe awo anɔkwa jamɔ mli lɛ, mɛni ebiɔ ni wɔfee? (b) Mɛni otswa ofai shi akɛ obaafee?

28 Kwɛmɔ bɔ ni Kristo etee nɔ eye ebua esɛɛnyiɛlɔi lɛ ni amɛfee tsakemɔi, bɔ ni etsɔse amɛ ni amɛnáa bulɛ amɛhãa Yehowa jeŋba he mlai ni nɔ kwɔlɔ lɛ, bɔ ni amɛhiɔ shi yɛ naa, kɛ bɔ ni amɛnáa he sɛɛ amɛhãa; kɛ́ ojwɛŋ nɔ lɛ, ani omii shɛɛɛ ohe? Susumɔ sɔlemɔwe lɛ ni Ezekiel na yɛ ninaa mli lɛ he ekoŋŋ okwɛ. Kaimɔ egbói ni nɔ kwɔlɔ lɛ. Anɔkwa sane ji akɛ, ejeee sɔlemɔwe diɛŋtsɛ, moŋ lɛ eji mumɔŋ nɔ. Fɛɛ sɛɛ lɛ, ani wɔnaa akɛ eji nɔ ko ni yɔɔ diɛŋtsɛ? Jeee Maŋtsɛyeli Asa lɛ nɔ kɛkɛ ni wɔyaa, wɔ-Biblia ni wɔgbeleɔ, loo mɛi ashinai ni wɔtswaa yɛ shiɛmɔ nitsumɔ lɛ mli lɛ kɛkɛ nɔ wɔtsɔɔ kɛboteɔ mli. Nomɛi lɛ, amɛji hiɛaŋhiɛaŋ nifeemɔi ni kɔɔ nibii ni anaa ni wɔfeɔ lɛ ahe. Osatofo baanyɛ afee nibii nɛɛ fɛɛ ni jeee ja ebote Yehowa sɔlemɔwe lɛ mli dã. Kɛ̃lɛ, kɛ́ wɔfeɔ nibii nɛɛ fɛɛ, ni nakai beaŋ nɔŋŋ lɛ wɔhiɔ shi yɛ Yehowa jeŋba he mlai ni nɔ kwɔlɔ lɛ anaa, ni wɔjɛɔ tsui kpakpa mli wɔkɛ wɔhe woɔ jamɔ krɔŋŋ mli lɛ, no tsɔɔ akɛ wɔbote nakai he ni yɔɔ krɔŋŋ fe hei fɛɛ—Yehowa Nyɔŋmɔ gbɛjianɔtoo kɛhã jamɔ krɔŋŋ—lɛ mli ni wɔmiisɔmɔ yɛ jɛmɛ! Esa akɛ wɔhiɛ asɔ hegbɛ fɛfɛo nɛɛ be fɛɛ be. Esa akɛ wɔya nɔ wɔfee nɔ fɛɛ nɔ ni wɔbaanyɛ koni wɔhi shi yɛ Yehowa jeŋba he tɛi lɛ anaa bɔ ni kɛ ekrɔŋŋfeemɔ lɛ baakpã gbee!

^ kk. 2 Yɛ afi 1932 lɛ, wolo ni ji Vindication, Kpo 2 lɛ tsɔɔ klɛŋklɛŋ kwraa akɛ, Biblia gbalɛi ni wieɔ Nyɔŋmɔ webii lɛ ni abaahã amɛku amɛsɛɛ kɛya amɛjakumaŋ ekoŋŋ lɛ ná wɔŋmɛnɛ beaŋ mlibaa yɛ mumɔŋ Israel nɔ, shi jeee heloonaa Israel. Nakai gbalɛi lɛ hãa wɔnaa akɛ abaato jamɔ krɔŋŋ shishi ekoŋŋ. March 1, 1999 Buu-Mɔɔ lɛ tsɔɔ mli akɛ, sɔlemɔwe ni yɔɔ Ezekiel ninaa lɛ mli lɛ ji jamɔ krɔŋŋ ni abaasaa ato shishi lɛ he gbalɛ ko, no hewɔ lɛ, ebaaná emlibaa ni he hiaa waa yɛ mumɔŋ yɛ naagbee gbii lɛ amli.

^ kk. 6 Nakai kitã lɛ eŋmɛɛɛ gbɛ ni nuu kɛ yoo pɛ ahi tsũ kome mli, ja amɛgbele shinaa lɛ waa bɔ ni mɛi ni hoɔ lɛ baana amɛ—aloo ja amɛji gbalashihilɛ mli hefatalɔi loo weku kɔkrɔɔ mli bii kpaakpa. Atee nɔ akɛ afii abɔ kɛɛ kitã nɛɛ mli wiemɔi lɛ yɛ Betel weku lɛ gbɛjianɔ ni amɛto kɛkwɛɔ Ŋmalɛ lɛ mli daa leebi lɛ shishi.

^ kk. 13 Nibii ni fata tawa ni akɛtsuɔ nii yɛ gbɛ ni ejaaa nɔ lɛ he ji eshɛremɔ, etaa, kɛ edumɔ kɛhã nibii nɛɛ.

^ kk. 27 Ákɛ nɔkwɛmɔnɔ lɛ, kwɛmɔ Kasemɔ Nii Kɛjɛ Tsɔɔlɔ Kpele lɛ Ŋɔɔ wolo lɛ yitso 32; kɛ sane ni ji “Keep Your Children Safe!” ni yɔɔ October 2007 Awake! lɛ mli lɛ.

Ekrokromɛi Hu Nɛ

BUU-MƆƆ—NIKASEMƆ NƆ

Nɔ Hewɔ ni Esa akɛ Wɔfee Krɔŋkrɔŋ

Ani 3 Mose lɛ kanemɔ nyaraa ohiɛ loo ehãa oyiŋ futuɔ bo? Nibii kpakpai ni awie yɛ 3 Mose lɛ baanyɛ aye abua bo ni ojá Yehowa yɛ gbɛ krɔŋkrɔŋ nɔ.