Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Nyɔŋmɔ Maŋtsɛyeli lɛ Ebɔi Nɔyeli

 YITSO 14

Amɛkɛ Anɔkwayeli Fĩɔ Nyɔŋmɔ Nɔyeli lɛ Pɛ Sɛɛ

Amɛkɛ Anɔkwayeli Fĩɔ Nyɔŋmɔ Nɔyeli lɛ Pɛ Sɛɛ

YITSO NƐƐ MLI SANE

Akɛni Nyɔŋmɔ webii kɛ anɔkwayeli fĩɔ Maŋtsɛyeli lɛ sɛɛ hewɔ lɛ, amɛkã he amɛjeee je lɛ fã

1, 2. (a) Mɛɛ shishitoo mla Yesu sɛɛnyiɛlɔi lɛ ehi shi yɛ naa kɛbashi ŋmɛnɛ? (b) Mɛɛ gbɛ nɔ henyɛlɔi eka akɛ amɛbaabule wɔshishi, ni mɛni ejɛ mli kɛba?

YESU damɔ Pilato, Yudafoi amaŋ lɛ kojolɔ kpanaa ni yɔɔ mɛi anɔ hewalɛ waa lɛ hiɛ ewie shishitoo mla ko ni kudɔ enɔkwa sɛɛnyiɛlɔi lɛ yɛ no beaŋ aahu kɛbashi ŋmɛnɛ lɛ he. Ewie akɛ: “Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ, mimaŋtsɛyeli lɛ jɛɛɛ biɛ.” (Yoh. 18:36) Pilato hã agbe Yesu, kɛ̃lɛ, kunimyeli lɛ sɛɛ etsɛɛɛ. Atee Yesu shi. Roma Nɔyelɔi ni he wala lɛ bɔ mɔdɛŋ koni amɛkpãta Kristo sɛɛnyiɛlɔi lɛ ahiɛ, shi amɛyayeee omanye. Kristofoi lɛ shiɛ Maŋtsɛyeli sane lɛ kɛkpele no beaŋ je lɛŋ fɛɛ.—Kol. 1:23.

2 Be ni ato Maŋtsɛyeli lɛ shishi yɛ afi 1914 sɛɛ lɛ, asraafoi anɔyelii komɛi ni he wala lɛ ka akɛ amɛbaabule Nyɔŋmɔ webii lɛ ashishi kwraa. Shi amɛteŋ mɔ ko kwraa yeko omanye. Nɔyelii kɛ maŋkwramɔŋ gbɛjianɔtoi komɛi ka akɛ amɛbaanyɛ wɔnɔ koni wɔfĩ amɛsɛɛ yɛ amɛtai lɛ amli. Shi amɛyanyɛɛɛ wɔmli amɛgbala. Ŋmɛnɛ lɛ, Maŋtsɛyeli lɛ shishi bii lɛ ekpele je lɛŋ maji srɔtoi lɛ fɛɛ anɔ. Fɛɛ sɛɛ lɛ, wɔfee ekome akɛ jeŋ muu fɛɛ nyɛmifeemɔ asafo, ni wɔkã he wɔfĩii je lɛŋ maŋkwramɔ gbɛjianɔtoi lɛ eko kwraa sɛɛ. Ekomefeemɔ ni yɔɔ wɔteŋ lɛ maa nɔ mi akɛ Nyɔŋmɔ Maŋtsɛyeli lɛ miiye nɔ, ni ákɛ Maŋtsɛ Yesu Kristo kã he eetsɔɔ eshishi bii lɛ gbɛ, eeye eebua amɛ ni amɛmiifee tsakemɔi, ni eebu amɛhe. Hã wɔsusu gbɛ nɔ ni etsɔ efee nakai, kɛ kunim ni ehã wɔye yɛ saneyelihei ni wajeɔ wɔhemɔkɛyeli be mli ni wɔkã he wɔhiɔ shi akɛ mɛi ni “jɛɛɛ je lɛ mli” lɛ he wɔkwɛ.—Yoh. 17:14.

Sane ko ni He Bahia Waa

3, 4. (a) Be ni afɔ Maŋtsɛyeli lɛ, mɛɛ nibii tee nɔ? (b) Ani Nyɔŋmɔ webii lɛ enu afã ko sɛɛ ni afĩii lɛ shishi jogbaŋŋ yɛ be fɛɛ mli? Tsɔɔmɔ mli.

3 Be ni afɔ Maŋtsɛyeli lɛ sɛɛ lɛ, ta te shi yɛ ŋwɛi, ni ashɛ Satan afɔ̃ shikpɔŋ lɛ nɔ. (Kanemɔ Kpojiemɔ 12:7-10, 12.) Ta ko hu fɛ yɛ shikpɔŋ lɛ nɔ, ni no baka Nyɔŋmɔ webii lɛ afaishitswaa lɛ waa. Amɛtswa amɛfai shi akɛ amɛbaakase Yesu koni amɛtsi amɛhe kɛjɛ je lɛ he. Kɛ̃lɛ, shishijee lɛ, amɛyanuuu nɔ ni maŋkwramɔ saji ni amɛbaatsi amɛhe kɛjɛ he lɛ biɔ yɛ amɛdɛŋ lɛ shishi jogbaŋŋ.

 4 Ákɛ nɔkwɛmɔnɔ lɛ, Millennial Dawn wolo * Kpo 6 ni akala yɛ afi 1904 lɛ wo Kristofoi ŋaa akɛ amɛkɛ amɛhe akawo tai amli. Kɛ̃lɛ, etsɔɔ mli akɛ, kɛ́ anyɛ Kristofonyo ko nɔ awo asraafoi anitsumɔ mli lɛ, esa akɛ ebi ni ahã lɛ nitsumɔ ni haŋ ekɛ ehe awo ta mli. Kɛ́ akpɛlɛɛɛ nɔ, ni akɛ lɛ wo tayaa mli lɛ, esa akɛ ekwɛ jogbaŋŋ koni ekagbe gbɔmɔ. Be ni Herbert Senior ni hi Britain ni abaptisi lɛ yɛ afi 1905 lɛ wieɔ shihilɛ ni tee nɔ no beaŋ lɛ he lɛ, ekɛɛ akɛ: “Nyɛmimɛi lɛ enaaa nɔ ni esa akɛ amɛfee yɛ nakai shihilɛ lɛ he, ejaakɛ akɛ gbɛtsɔɔmɔ pɔtɛɛ ko hãaa ni tsɔɔ akɛ asraafoi anitsumɔ mli ni amɛkɛ amɛhe baawo shi amɛyaaa ta lɛ ja loo ejaaa.”

5. September 1, 1915 Buu-Mɔɔ lɛ bɔi wɔshishinumɔ lɛ tsakemɔ yɛ mɛɛ gbɛ nɔ?

5 Kɛ̃lɛ, September 1, 1915 Buu-Mɔɔ lɛ bɔi tsakemɔi afeemɔ yɛ bɔ ni wɔnuɔ sane nɛɛ shishi wɔhãa lɛ mli. Buu-Mɔɔ lɛ wie sane ni je kpo yɛ Studies in the Scriptures lɛ mli lɛ he akɛ: “Kɛ́ wɔkɛ wɔhe wo asraafoi anitsumɔ mli po ni wɔyaaa ta lɛ, aso etsɔŋ akɛ wɔmiiku wɔ-Kristofoi ashishitoo mlai lɛ amli?” Ni kɛ́ akɛɛ bo akɛ, kɛ́ owooo asraafoi atade ni okɛ ohe awo asraafoi anitsumɔ lɛ mli lɛ, abaatswa bo tu hu? Buu-Mɔɔ lɛ tsɔɔ akɛ: “Ani ebahiŋ moŋ akɛ obaaye Toiŋjɔlɛ Lumɔ lɛ anɔkwa ni okagbo egbɛtsɔɔmɔi lɛ anɔ toi koni agbe bo, moŋ fe ni obaatsu nii ohã shikpɔŋ nɛɛ nɔ maŋtsɛmɛi koni ofĩ amɛsɛɛ ni no atsɔɔ yɛ gbɛ ko nɔ akɛ ooku wɔ-Ŋwɛi Maŋtsɛ lɛ tsɔɔmɔi lɛ amli? Yɛ gbelei enyɔ nɛɛ ateŋ lɛ, wɔbaasumɔ klɛŋklɛŋ nɔ lɛ—wɔbaasumɔ ni wɔgbo yɛ anɔkwa ni wɔye wɔ-Ŋwɛi Maŋtsɛ lɛ hewɔ.” Wiemɔ ni kɔneɔ mɔ yiŋ nɛɛ fɛɛ sɛɛ lɛ, Buu-Mɔɔ lɛ mu naa akɛ: “Enɛ jeee fãmɔ. Eji ŋaawoo kɛkɛ.”

6. Mɛni okase yɛ Nyɛminuu Herbert Senior nɔkwɛmɔnɔ lɛ mli?

6 Nyɛmimɛi komɛi na nɔ ni ataoɔ atsɔɔ lɛ jogbaŋŋ agbɛnɛ, ni amɛsaa amɛhe amɛto nɔ ni baajɛ mli aba. Herbert Senior ni wɔtsĩ etã mra mli lɛ wie akɛ: “Bɔ ni mina sane lɛ ji akɛ, srɔto ko bɛ tayaa nibii ni abaajie kɛjɛ meelei amli [ni tsɔɔ akɛ ayako ta] lɛ kɛ nakai tayaa nibii lɛ nɔŋŋ ni akɛbaawo tui amli kɛtswia mɛi lɛ ateŋ.” (Luka 16:10) Akɛni Nyɛminuu Senior henilee eŋmɛɛɛ lɛ gbɛ akɛ ekɛ ehe awo asraafoi anitsumɔ mli hewɔ lɛ, ayawo lɛ tsuŋ. Awo ekɛ nyɛmimɛi hii 4 komɛi atsuŋ kɛfata mɛi 16 ni jɛ jamɔi krokomɛi amli ni amɛhenilee eŋmɛɛɛ amɛ gbɛ ni amɛkɛ amɛhe awo asraafoi anitsumɔ mli ahe yɛ Richmond tsuŋwoohe ni yɔɔ Britain lɛ, sɛɛ mli lɛ abale tsuŋwoohe nɛɛ akɛ Richmond 16. Eshɛ he ko lɛ, akɛ Herbert kɛ mɛi krokomɛi ni tamɔ lɛ nɔŋŋ yadamɔɔ ta naa nigii yɛ France. Afã koni atswiaa amɛ tu yɛ jɛmɛ. Ato ekɛ mɛi krokomɛi srɛnɛɛ yɛ he ko ni atswiaa mɛi tu yɛ, shi agbeee amɛ. Moŋ lɛ, atse be ni amɛbaaye yɛ tsuŋwoo mli lɛ nɔ kɛba afii nyɔŋma.

“Mibayɔse akɛ, esa akɛ Nyɔŋmɔ webii lɛ kɛ mɛi fɛɛ ahi shi yɛ toiŋjɔlɛ mli, yɛ ta beaŋ po.”—Simon Kraker (Kwɛmɔ kuku 7 lɛ)

7. Mɛni Nyɔŋmɔ webii lɛ bayɔse be ni Jeŋ Ta II lɛ heɔ aje shishi lɛ?

7 Be ni Jeŋ Ta II lɛ fɛ lɛ, no mli lɛ Yehowa webii akɛ kuu lɛ ebayɔse nɔ ni afã ko sɛɛ ni afĩii lɛ tsɔɔ lɛ faŋŋ, kɛ nɔ ni ebiɔ ni afee kɛkase Yesu. (Mat. 26:51-53; Yoh. 17:14-16; 1 Pet. 2:21) Ákɛ  nɔkwɛmɔnɔ lɛ, akala sane ko ni he hiaa waa ni yitso ji “Afã ko Sɛɛ ni Afĩii” lɛ yɛ November 1, 1939 Buu-Mɔɔ lɛ mli, sane lɛ kɛɛ akɛ: “Mla ni sa akɛ ekudɔ Yehowa webii ni ekɛ amɛ ekpaŋ lɛ ji, amɛkwɛ ni amɛkafĩ afã ko sɛɛ yɛ gbɛ ko kwraa nɔ yɛ maji ni kɛ amɛhe wuɔ ta lɛ ateŋ.” Simon Kraker, ni sɛɛ mli lɛ esɔmɔ yɛ nitsumɔhe yitso ni yɔɔ Brooklyn, New York lɛ wie sane nɛɛ he akɛ: “Mibayɔse akɛ, esa akɛ Nyɔŋmɔ webii lɛ kɛ mɛi fɛɛ ahi shi yɛ toiŋjɔlɛ mli, yɛ ta beaŋ po.” Akɛ nakai mumɔŋ niyenii lɛ hã yɛ ebe naa, ni eye ebua kɛsaa Nyɔŋmɔ webii lɛ kɛhã tutuamɔ ni naa wa ni amɛkɛbaakpe yɛ Maŋtsɛyeli lɛ sɛɛ ni amɛfĩɔ lɛ hewɔ.

Amɛkɛ Yiwaa ni Tamɔ “Faa” ko Kpe

8, 9. Bɔfo Yohane gbalɛ lɛ ba mli yɛ mɛɛ gbɛ nɔ?

8 Bɔfo Yohane gba akɛ, Maŋtsɛyeli lɛ fɔmɔ yɛ afi 1914 sɛɛ lɛ, drako lɛ, ni ji Satan Abonsam baaka akɛ ebaabule mɛi fɛɛ ni fĩɔ Nyɔŋmɔ Maŋtsɛyeli lɛ sɛɛ lɛ ashishi kɛtsɔ mfonirifeemɔŋ faa ko ni ebaafɛ̃ kɛjɛ edaaŋ lɛ nɔ. * (Kanemɔ Kpojiemɔ 12:9, 15.) Mɛɛ gbɛ nɔ Yohane gbalɛ nɛɛ tsɔ eba mli? Kɛjɛ afi 1920 kɛbaa nɛɛ, Nyɔŋmɔ webii lɛ kɛ shiteekɛwoo ni naa wa wawai ekpe. Awo Nyɛminuu Kraker tsuŋ yɛ Nyɔŋmɔ Maŋtsɛyeli lɛ sɛɛ ni efiɔ lɛ hewɔ taakɛ afee nyɛmimɛi krokomɛi babaoo ni hi  Amerika Kooyigbɛ yɛ jeŋ ta ni ji enyɔ beaŋ lɛ. Anɔkwa, be ni ta lɛ yaa nɔ lɛ, mɛi ni jamɔ saji ahewɔ lɛ amɛkɛ amɛhe wooo ta lɛ mli ni no hã awo amɛ tsuŋ yɛ Amerika lɛ amlijaa etɛ mli enyɔ ji Yehowa Odasefoi.

9 Abonsam kɛ ehefatalɔi lɛ tswa amɛfai shi akɛ amɛbaafite anɔkwa ni Maŋtsɛyeli lɛ shishi bii lɛ yeɔ lɛ, ekɔɔɔ he eko he ni amɛyɔɔ. Yɛ Afrika, Yuropa, kɛ Amerika niiaŋ fɛɛ lɛ, akpala amɛ kɛtee saneyelihei kɛ kojolɔi ahiɛ. Akɛni amɛtswa amɛfai shi akɛ amɛbaaya nɔ amɛhi shi akɛ mɛi ni fĩii afã ko sɛɛ hewɔ lɛ, awo amɛ tsuŋ, ayi amɛ, ni apilapila amɛ. Yɛ Germany lɛ, awa Nyɔŋmɔ webii lɛ ayi gbeyeigbeyei akɛni amɛkɛ woo ni esaaa ni Hitler biɔ lɛ hãaa lɛ, ni amɛkɛ amɛhe wooo ta lɛ mli lɛ hewɔ. Awowoo mɛi aaafee 6,000 tsuŋ yɛ nsarai srɔtoi amli yɛ Nazi beaŋ, Odasefoi fe 1,600 ni ji Germanbii kɛ mɛi ni jeee Germanbii gboi yɛ amɛyiwalɔi lɛ adɛŋ. Enɛ fɛɛ sɛɛ po lɛ, Abonsam nyɛɛɛ abule Nyɔŋmɔ webii lɛ ashishi kwraa.—Mar. 8:34, 35.

‘Shikpɔŋ lɛ Mi Faa Lɛ’

10. Mɛni “shikpɔŋ lɛ” damɔ shi kɛhã, ni mɛɛ gbɛ nɔ eye ebua Nyɔŋmɔ webii lɛ?

10 Bɔfo Yohane gbalɛ ni aŋma afɔ̃ shi lɛ tsɔɔ akɛ “shikpɔŋ lɛ,” ni damɔ shi kɛhã je nɛŋ nibii ni abuɔ waa lɛ, baami yiwaa ni tamɔ “faa lɛ,” ni tsɔɔ akɛ ebaaye ebua Nyɔŋmɔ webii lɛ. Ani gbalɛ lɛ fã nɛɛ eba mli? Afii nyɔŋmai komɛi ni nyiɛ Jeŋ Ta II lɛ sɛɛ lɛ, “shikpɔŋ lɛ” eye ebua Mesia Maŋtsɛyeli lɛ sɛɛfilɔi anɔkwafoi lɛ shii abɔ. (Kanemɔ Kpojiemɔ 12:16.) Ákɛ nɔkwɛmɔnɔ lɛ, saneyelihei wuji srɔtoi efã hegbɛ ni Yehowa Odasefoi yɔɔ akɛ amɛkpoɔ asraafoi anitsumɔ, loo kɛ́ abi ni amɛkɛ amɛhe awo maŋhedɔɔ nifeemɔi amli lɛ amɛkpoɔ lɛ he. Klɛŋklɛŋ lɛ, susumɔ kunimyeli kpelei ni Yehowa ehã ewebii lɛ eye yɛ saji ni kɔɔ asraafoi anitsumɔ he lɛ he okwɛ.—Lala 68:21.

11, 12. Mɛɛ sane Nyɛminuu Sicurella kɛ Nyɛminuu Thlimmenos kɛkpe, ni mɛni jɛ mli kɛba?

11 Amerika. Anthony Sicurella ji bii ekpaa ateŋ mɔ kome, ni amɛfɔlɔi ji Odasefoi. Abaptisi lɛ be ni eye afii 15. Be ni eye afii 21 lɛ, eyaŋma egbɛ́i yɛ maŋ lɛ nitsumɔhe ni kwɛɔ mɛi ni eshɛ kɛhã asraafoi anitsumɔ lɛ nɔ lɛ akɛ jamɔŋ sɔɔlɔ. Afii enyɔ sɛɛ, yɛ afi 1950 lɛ, esaa ekɛ egbɛ́i yahã kɛtsake tsutsu nɔ lɛ kɛtsɔɔ akɛ ehenilee eŋmɛɛɛ lɛ gbɛ ni ekɛ ehe awo asraafoi anitsumɔ mli. Eyɛ mli akɛ niiamlitaomɔ nitsumɔhe lɛ (Federal Bureau of Investigation) amaniɛbɔɔ lɛ tsɔɔ akɛ amɛnaaa naagba ko yɛ Anthony yiŋkpɛɛ lɛ he moŋ, shi nitsumɔhe ni kwɛɔ saneyeli nɔ (Department of Justice) lɛ ekpɛlɛɛɛ eyiŋkpɛɛ lɛ nɔ. Atee saneyelihe lɛ shii abɔ yɛ sane nɛɛ he, ni naagbee lɛ Amerika Saneyelihe Wulu fe fɛɛ lɛ bo Nyɛminuu Sicurella sane lɛ toi, etswa saneyelihe fioo lɛ yiŋkpɛɛ lɛ efɔ̃, ni abu Nyɛminuu Sicurella bem. Bɔ ni abua sane lɛ ahã lɛ ye ebua kɛgba gbɛ ehã Amerika maŋbii krokomɛi ni amɛhenilee eŋmɛɛɛ amɛ gbɛ koni amɛkɛ amɛhe awo asraafoi anitsumɔ mli lɛ.

 12 Greece. Yɛ afi 1983 lɛ, amɔ Nyɛminuu Iakovos Thlimmenos akɛ eetse atua akɛni esumɔɔɔ ni ewoɔ asraafoi atade lɛ hewɔ, ni awo lɛ tsuŋ. Sɛɛ mli be ni ajie lɛ lɛ, eŋma wolo kɛyabi nitsumɔ akɛ shika he nitsulɔ, shi akpɛlɛɛɛ ewolo lɛ nɔ kɛ mlitsɔɔmɔ akɛ awo lɛ tsuŋ pɛŋ akɛ awuiyelɔ. Ekɛ sane lɛ tee Greece saneyelihei srɔtoi shi abu lɛ fɔ, sɛɛ mli lɛ ekɛtee Yuropabii Asaneyelihe ni Ayeɔ Hegbɛi ni Adesai Yɔɔ lɛ Ahe Saji lɛ koni asaa akwɛ mli. Yɛ afi 2000 lɛ, Saneyelihe lɛ Akuashɔŋ ni naa shɛɔ kojolɔi 17 lɛ bua sane lɛ akɛ nyɛmi nuu lɛ yeɔ bem, ni amɛkɛtsɔɔ akɛ abɛ hegbɛ ni abuɔ mɔ ko ni sumɔɔɔ ni ekɛ ehe woɔ asraafoi anitsumɔ mli lɛ akɛ awuiyelɔ. Dani aye sane nɛɛ, no mli lɛ abu nyɛmimɛi 3,500 kɛ sɛɛ ni yɔɔ Greece lɛ fɔ akɛ awuiyelɔi akɛni awo amɛ tsuŋ akɛ mɛi ni fĩii afã ko sɛɛ lɛ hewɔ. Bemyeli nɛɛ sɛɛ lɛ, Greece nɔyeli lɛ wo mla hee kɛtsɔɔ akɛ nakai nyɛmimɛi 3,500 kɛ sɛɛ lɛ jeee awuiyelɔi dɔŋŋ. Kɛfata he lɛ, ama mla ko ni awo afii fioo komɛi ni tsɔ hiɛ ni hãa Greece maŋbii fɛɛ hegbɛ akɛ, amɛbaanyɛ amɛhala nitsumɔ kroko kɛsɔmɔ maŋ lɛ kɛye asraafoi anitsumɔ lɛ najiaŋ lɛ nɔ mi be ni asusu Greece Maŋ Mla lɛ he ekoŋŋ lɛ.

“Dani mabote saneyelihe lɛ, misɔle waa mihã Yehowa, ni no sɛɛ lɛ minu he akɛ ehã miŋmɛ dɛmm.”—Ivailo Stefanov (Kwɛmɔ kuku 13)

13, 14. Mɛɛ nibii osusuɔ akɛ wɔbaanyɛ wɔkase yɛ Ivailo Stefanov kɛ Vahan Bayatyan sane lɛ mli?

13 Bulgaria. Afi 1994 lɛ, aŋma Nyɛminuu Ivailo Stefanov ni eye afii 19 lɛ gbɛ́i yɛ asraafoi anitsumɔ lɛ mli. Ekɛɛ ekɛ ehe woŋ asraafoi anitsumɔ lɛ loo emli nifeemɔi srɔtoi lɛ eko kwraa mli. Akɛɛ abaawo lɛ tsuŋ nyɔji 18, shi ekɛ amɛ eyakpãaa gbee, akɛni ehenilee eŋmɛɛɛ lɛ gbɛ koni ekɛ ehe awo asraafoi anitsumɔ mli lɛ hewɔ. Sɛɛ mli lɛ, akɛ esane lɛ tee Yuropa Saneyelihe Wulu fe fɛɛ lɛ. Dani abaaye sane lɛ yɛ afi 2001 lɛ, Bulgaria nɔyeli lɛ kɛ Nyɛminuu Stefanov ba gbeekpamɔ koni aŋmɛɛ sane lɛ he. Aŋmɛɛ Nyɛminuu Stefanov he, ni no sɛɛ hu lɛ ahã Bulgariabii fɛɛ ni sumɔɔɔ asraafoi anitsumɔ lɛ hegbɛ koni amɛhala nitsumɔ kroko. *

14 Armenia. Afi 2001 lɛ, Nyɛminuu Vahan Bayatyan bashɛ afi ni maŋ lɛ biɔ ni akɛ he awo asraafoi anitsumɔ mli lɛ. * Akɛni ehã ale akɛ ehenilee eŋmɛɛɛ lɛ gbɛ ni etsu nitsumɔ nɛɛ hewɔ lɛ amɔ lɛ, ni ekɛ sane lɛ tee maŋ lɛ saneyelihei srɔtoi lɛ amli, shi fɛɛ bu lɛ fɔ. Yɛ September 2002 lɛ, eje afii enyɔ kɛ fã tsuŋwoo lɛ shishi, shi be ni esɔmɔ nyɔji nyɔŋma kɛ fã sɛɛ lɛ, ajie lɛ. Nakai be lɛ mli lɛ, ebi koni Yuropa Saneyelihe Wulu lɛ akwɛ esane lɛ mli ahã lɛ, ni amɛkpɛlɛ nɔ. Kɛ̃lɛ, yɛ October 27, 2009 lɛ saneyelihe nɛɛ bu lɛ fɔ̃. Bɔ ni abua sane lɛ hã nyɛmimɛi ni yɔɔ Armenia ni akɛ sane nɛɛ miiye amɛ lɛ nu he akɛ amɛnine enyɛ shi kwraa. Shi Yuropa Saneyelihe Wulu lɛ Akuashɔŋ lɛ kwɛ bɔ ni abua sane lɛ ahã lɛ mli ekoŋŋ. Yɛ July 7, 2011 lɛ, Saneyelihe lɛ bua akɛ Vahan Bayatyan yeɔ bem. Enɛ ji klɛŋklɛŋ kwraa ni Yuropabii Asaneyelihe lɛ yɔse akɛ esa akɛ mla ni kɔɔ hegbɛ ni mɔ yɔɔ akɛ etsɔɔ esusumɔ, ejieɔ ehenilee kpo, ni edɔmɔɔ jamɔ  ni esumɔɔ lɛ aŋmɛ gbɛ ni kɛ́ mɔ ko jamɔŋ hemɔkɛyeli hewɔ lɛ ehenilee eŋmɛɛɛ lɛ gbɛ ni ekɛ ehe awo asraafoi anitsumɔ mli lɛ, ahã lɛ nitsumɔ kroko. Jeee Yehowa Odasefoi pɛ ná sane ni abua nɛɛ he sɛɛ, shi mɛi akpekpei ohai komɛi ni yɔɔ maji ni kɛ amɛhe edɔmɔ Yuropa Kuu lɛ hu ná he sɛɛ. *

Be ni ECHR lɛ bu nyɛmimɛi ni yɔɔ Armenia lɛ bem lɛ, ajie amɛ yɛ tsuŋwoohe lɛ

Maŋhedɔɔ Nifeemɔi Ahe Saji ni Te Shi

15. Mɛni hewɔ Yehowa webii kpoɔ akɛ amɛkɛ amɛhe baawo maŋhedɔɔ nifeemɔi amli lɛ?

15 Jeee asraafoi anitsumɔ ni Yehowa webii lɛ kpoɔ lɛ pɛ amɛkɛtsɔɔ akɛ amɛkpɛtɛɔ Mesia Maŋtsɛyeli lɛ he, moŋ lɛ amɛjɛɔ bulɛ mli amɛkpoɔ maŋhedɔɔ nifeemɔi hu. Titri lɛ, kɛjɛ Jeŋ Ta II lɛ nɔ kɛbaa nɛɛ, maŋhedɔɔ mumɔ egbɛ eshwã je lɛŋ fɛɛ. Yɛ maji babaoo anɔ lɛ, abiɔ ni mɛi atsɔɔ akɛ amɛfĩɔ amɛjakumaŋ lɛ sɛɛ kɛtsɔ nɔ ni Blɔfomɛi tsɛɔ lɛ plɛj lɛ, jakumaŋ lalai, loo jakumaŋ aflaŋaa ŋamɔ nɔ. Kɛ̃lɛ, yɛ wɔgbɛfaŋ lɛ, Yehowa pɛ wɔtuɔ wɔhe wɔhãa. (2 Mose 20:4, 5) Enɛ hewɔ lɛ wɔkɛ yiwai babaoo ekpe. Fɛɛ sɛɛ po lɛ, Yehowa etsɔ “shikpɔŋ lɛ” nɔ emi  yiwai nɛɛ ekomɛi. Hã wɔkwɛ kunimyelii ni sa kadimɔ waa ni Yehowa etsɔ Kristo nɔ ehã wɔye yɛ enɛ mli lɛ ateŋ ekomɛi.—Lala 3:9.

16, 17. Mɛɛ sane Lillian kɛ William Gobitas kɛkpe, ni mɛni okase yɛ mli?

16 Amerika. Afi 1940 lɛ, Amerika Saneyelihe Wulu fe fɛɛ lɛ ye sane ko ni abale lɛ akɛ Minersville School District v. Gobitis lɛ, kojolɔi kpaanyɔ tsɔɔ akɛ Yehowa Odasefoi lɛ yeɔ fɔ ni mɔ kome kɛɛ amɛyeee fɔ. Akɛni Lillian Gobitas * ni eye afii 12 kɛ enyɛminuu William ni eye afii 10 lɛ miisumɔ ni amɛya nɔ amɛye Yehowa anɔkwa hewɔ lɛ, amɛkpɛlɛɛɛ ni amɛŋaa aflaŋaa lɛ, ni amɛkɛɛɛ plɛj lɛ hu. Enɛ hã ashwie amɛ yɛ skul lɛ. Amɛsane lɛ yashɛ Saneyelihe Wulu lɛ hiɛ, ni Saneyelihe lɛ bua akɛ nɔ ni skul nɔkwɛlɔi lɛ fee lɛ ja yɛ maŋ lɛ mla naa, ejaakɛ amɛmiitao “maŋ lɛ ekomefeemɔ.” Bɔ ni amu sane lɛ naa lɛ hã ababɔi nyɛmimɛi lɛ ayiwaa dɛŋdɛŋ agbɛnɛ. Ashwie Odasefoi abii krokomɛi hu yɛ skul srɔtoi amli, Odasefoi ni tsuɔ nii hu anitsumɔi ŋmɛɛ amɛ, ni mɛi tutuaa Odasefoi kɛpilaa amɛ musuŋshaa nɔ. Wolo ko (The Lustre of Our Country) wie akɛ “yi ni awa Yehowa Odasefoi kɛjɛ afi 1941 kɛyashi afi 1943 lɛ ji jamɔŋ yiwaa ni naa wa fe fɛɛ yɛ afi 1900 afiiaŋ yɛ Amerika yinɔsane mli.”

17 Nyɔŋmɔ henyɛlɔi lɛ akunimyeli lɛ sɛɛ eyatsɛɛɛ kwraa. Yɛ afi 1943 lɛ, Saneyelihe Wulu lɛ ye sane ko ni tamɔ Gobitis nɔ lɛ nɔŋŋ. Awo sane lɛ gbɛ́i akɛ West Virginia State Board of Education v. Barnette. Shi enɛ mli lɛ, abu Yehowa Odasefoi lɛ bem. Enɛ bafee klɛŋklɛŋ kwraa ni Amerika Saneyelihe Wulu lɛ tsake sane ko ni amɛ diɛŋtsɛ amɛye lɛ hiɛ yɛ be kukuoo tamɔ nɛkɛ mli. Odasefoi akunimyeli nɛɛ sɛɛ lɛ, bɔ ni awaa Yehowa webii ni yɔɔ Amerika maji lɛ amli lɛ ayi lɛ nɔ bagbɔ kwraa agbɛnɛ. Kunimyeli nɛɛ hu bawaje mla naa hegbɛi ni Amerika maŋbii yɔɔ lɛ jogbaŋŋ.

18, 19. Mɛni Pablo Barros kɛɛ no ye bua lɛ ni efĩ shi, ni mɛni Yehowa tsuji krokomɛi baanyɛ afee kɛkase lɛ?

18 Argentina. Afi 1976 lɛ, ashwie Pablo Barros ni eye afii kpaanyɔ lɛ kɛ enyɛmi Hugo Barros ni eye afii kpawo lɛ yɛ skul akɛ amɛkɛ amɛhe wooo aflaŋaa ŋamɔ nifeemɔ lɛ mli. Be ko po lɛ, skul nɔkwɛlɔ lɛ tsi Pablo yisɛɛ ni eka eyiteŋ atswɛrɛ. Be ni akpa skul lɛ, nɔkwɛlɔ lɛ hã Pablo kɛ enyɛmi lɛ mɛ ŋmɛlɛtswaa kome kɛsusumɔ akɛ, ebaanyɛ amɛnɔ koni amɛkɛ amɛhe awo maŋkwramɔ nifeemɔi amli. Be ni Pablo wieɔ shihilɛ ni naa wa nɛɛ he lɛ, ekɛɛ akɛ: “Kɛjeee Yehowa yelikɛbuamɔ naa kulɛ, minyɛŋ makpee minɔ ni anyɛ koni maŋmɛɛ minɔkwayeli lɛ he lɛ naa kɔkɔɔkɔ.”

19 Be ni akɛ sane lɛ tee saneyelihe lɛ, kojolɔ lɛ fĩ yiŋ ni skul lɛ kpɛ kɛshwie Pablo kɛ Hugo lɛ sɛɛ. Kɛ̃lɛ, amɛkɛ sane lɛ tee Argentina Saneyelihe Wulu fe fɛɛ lɛ koni akwɛ mli ekoŋŋ. Yɛ afi 1979 lɛ, nakai Saneyelihe Wulu lɛ tswa saneyelihe fioo lɛ yiŋkpɛɛ lɛ efɔ̃, ni etsɔɔ mli akɛ: “Nakai toigbalamɔ lɛ [gbekɛbii  lɛ ashwiemɔ] teɔ shi ewoɔ maŋ mla ni ŋmɛɔ mɔ fɛɛ mɔ gbɛ akɛ ekase nii lɛ (Article 14), kɛ sɔ̃ ni kã Jakumaŋ lɛ nɔ akɛ ekwɛ ni gbekɛbii fɛɛ anyɛ aya skul lɛ (Article 5).” Yehowa Odasefoi abii aaafee 1,000 sɔŋŋ ná nakai kunimyeli lɛ he sɛɛ. Akpa mɛi ni kulɛ aashwie amɛ lɛ shwiemɔ, ni amɛteaŋ mɛi ni ashwie amɛ momo, taakɛ eji yɛ Pablo kɛ Hugo gbɛfaŋ lɛ, ahé amɛ yɛ skul ekoŋŋ.

Gbekɛbii ni ji Odasefoi babaoo eye anɔkwa yɛ kai amli

20, 21. Mɛɛ gbɛ nɔ Roel kɛ Emily Embralinag sane lɛ wajeɔ ohemɔkɛyeli?

20 Philippines. Afi 1990 lɛ, ashwie Roel Embralinag, * ni eye afii 9 lɛ kɛ enyɛmi yoo Emily ni eye afii 10 lɛ kɛ Odasefoi abii krokomɛi aaashɛ 66 yɛ skul akɛni amɛŋaaa aflaŋaa hewɔ. Leonardo ni ebii ji Roel kɛ Emily lɛ bɔ mɔdɛŋ shii abɔ ekɛ skul tsɔɔlɔi lɛ yasusu sane lɛ he, shi eyayeee omanye. Be ni sane lɛ je fule lɛ, Leonardo bi koni Saneyelihe Wulu fe fɛɛ lɛ akwɛ sane lɛ mli ekoŋŋ. No beaŋ lɛ, Leonardo bɛ shika, ni ebɛ lɔya ko hu ni baadamɔ sane lɛ naa ahã lɛ. Amɛweku lɛ kɛ hiɛdɔɔ sɔle kɛtao Yehowa dɛŋ gbɛtsɔɔmɔ. No beaŋ fɛɛ lɛ, aaye gbekɛbii lɛ ahe fɛo  ni aajɛjɛi amɛ. Leonardo nu he akɛ enyɛŋ eye kunim kɔkɔɔkɔ, ejaakɛ atsɔseko lɛ akɛ mlalelɔ.

21 Sɛɛ mli lɛ, Nyɛminuu Felino Ganal, lɔyafonyo ni be ko lɛ etsuɔ nii ehãa mla nitsumɔhe ko ni ehé gbɛ́i waa yɛ maŋ lɛ mli lɛ badamɔ sane lɛ naa ehã weku lɛ. Be ni sane lɛ te shi lɛ, no mli lɛ Nyɛminuu Ganal eshi mla nitsumɔ lɛ ni ebatsɔ Yehowa Odasefonyo. Be ni sane lɛ bashɛ Saneyelihe Wulu fe fɛɛ lɛ hiɛ lɛ, kojolɔi lɛ fɛɛ mu sane naa akɛ Odasefoi lɛ yeɔ bem, ni amɛfo fãmɔ akɛ ashwie gbekɛbii lɛ yɛ skul lɛ mli. Shi kome ekoŋŋ lɛ, mɛi ni ka akɛ amɛbaafite Nyɔŋmɔ webii anɔkwayeli lɛ eyayeee omanye.

Afã ko Sɛɛ ni Wɔfĩii lɛ kɛ Ekomefeemɔ Ba

22, 23. (a) Mɛni hewɔ wɔye saneyeli mli kunim srɔtoi ni sa kadimɔ waa lɛ? (b) Mɛni he odase wɔjeŋ muu fɛɛ nyɛmifeemɔ ni hiɔ shi yɛ toiŋjɔlɛ mli lɛ yeɔ?

22 Mɛni hewɔ Yehowa webii eye kunimii ni sa kadimɔ babaoo yɛ saneyelihei nakai lɛ? Wɔwooo maŋkwralɔi ayiŋ. Kɛ̃lɛ, kojolɔi ni jwɛŋmɔŋ kã shi ebu wɔhe kɛjɛ shiteekɛwolɔi ni waa wɔyi lɛ adɛŋ yɛ majimaji anɔ kɛ saneyelihei srɔtoi amli, ni yɛ no feemɔ mli lɛ, akɛtsake maŋ mlai ahiɛ kɛgba sa efɔ̃ shi. Ŋwanejee ko kwraa bɛ he akɛ, Kristo efi wɔmɔdɛŋbɔi lɛ asɛɛ ni wɔye kunim srɔtoi nɛɛ. (Kanemɔ Kpojiemɔ 6:2.) Mɛni hewɔ wɔkɛ saji ni tamɔ nakai lɛ yaa saneyelihei lɛ? Jeee wɔyiŋtoo ji akɛ wɔbaatsake maji amlai. Moŋ lɛ, oti ni ma wɔhiɛ ji, koni wɔnyɛ wɔya nɔ wɔsɔmɔ wɔ-Maŋtsɛ, Yesu Kristo, ni mɔ ko gbaaa wɔnaa.—Bɔf. 4:29.

23 Yɛ jeŋ ni maŋkwramɔŋ bei egbala mli, ni hetsɛ̃ ni naa wawai efite lɛ nɛɛ mli lɛ, wɔ-Maŋtsɛ Yesu Kristo, ni miiye nɔ lɛ ejɔɔ mɔdɛŋ ni esɛɛnyiɛlɔi ni yɔɔ je lɛŋ fɛɛ lɛ bɔɔ koni amɛkafĩ afã ko sɛɛ kɔkɔɔkɔ lɛ nɔ. Mɔdɛŋ ni Satan bɔɔ ni ekɛ mligbalamɔ aba wɔteŋ koni enyɛ eye wɔnɔ lɛ fɛɛ efee shwɛm. Maŋtsɛyeli lɛ ebua mɛi ni sumɔɔɔ ni ‘amɛkaseɔ tawuu dɔŋŋ’ lɛ anaa. Bɔ ni wɔjeŋ muu fɛɛ nyɛmifeemɔ lɛ hiɔ shi yɛ toiŋjɔlɛ mli lɛ po lɛ hãa mɛi anaa kpɛɔ amɛhe pam—ekɛ odase ni anyɛŋ aje he ŋwane hãa kɛmaa nɔ mi akɛ Nyɔŋmɔ Maŋtsɛyeli lɛ miiye nɔ lɛɛlɛŋ!—Yes. 2:4.

^ kk. 4 Ale wolo nɛɛ hu akɛ The New Creation. Sɛɛ mli lɛ, atsake Millennial Dawn wolo kpoi lɛ gbɛ́i ni atsɛ lɛ Studies in the Scriptures.

^ kk. 8 Kɛhã gbalɛ nɛɛ hesusumɔ lɛ, kwɛmɔ wolo ni ji Kpojiemɔ—Enaagbee Kwraa lɛ Ebɛŋkɛ!, yitso 27, baafa 184-186 lɛ.

^ kk. 13 Kɛfata he lɛ, gbeekpamɔ nɛɛ bi koni Bulgaria nɔyeli lɛ ahã mɛi ni amɛhenilee eŋmɛɛɛ amɛ gbɛ akɛ amɛkɛ amɛhe awo asraafoi anitsumɔ mli lɛ anyɛ ahala nitsumɔ kroko amɛtsu yɛ mɛi ni jeee asraafoi anɔkwɛmɔ shishi.

^ kk. 14 Kɛ́ ootao sane muu lɛ fɛɛ lɛ, kwɛmɔ “European Court Upholds the Right to Conscientious Objection,” ni yɔɔ November 1, 2012, Blɔfo Buu- Mɔɔ lɛ.

^ kk. 14 Armenia nɔyeli lɛ kɛ afii 20 kɛ sɛɛ ewo Odasefoi oblahii 450 kɛ sɛɛ tsuŋ. Aŋmɛɛ hii nɛɛ ateŋ mɛi ni shwɛ lɛ ahe yɛ November afi 2013.

^ kk. 16 Saneyelihe lɛ spɛliii weku lɛ gbɛ́i jogbaŋŋ yɛ amɛwoji lɛ amli.

^ kk. 20 Saneyelihe lɛ spɛli weku lɛ gbɛ́i akɛ Ebralinag amɛwo amɛwoji lɛ amli.