Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Ani Obaasumɔ ní Ole Anɔkwale Lɛ?

Ani Obaasumɔ ní Ole Anɔkwale Lɛ?

ANƆKWALE ni kɔɔ mɛni he? Anɔkwale ni kɔɔ sanebimɔi komɛi ni he hiaa jogbaŋŋ ni adesai biɔ lɛ ahe. Ekolɛ osusu sanebimɔi ni nyiɛ sɛɛ nɛɛ ekomɛi ahe pɛŋ:

  • Ani Nyɔŋmɔ susuɔ wɔhe lɛɛlɛŋ?

  • Ani ta kɛ amanehulu sɛɛ baafo be ko?

  • Mɛni baa wɔnɔ kɛ́ wɔgboi?

  • Ani hiɛnɔkamɔ ko yɛ kɛha mɛi ni egboi lɛ?

  • Mɛɛ gbɛ nɔ matsɔ masɔle ní Nyɔŋmɔ abo mi toi?

  • Te mafee tɛŋŋ maná miishɛɛ yɛ shihilɛ mli?

Nɛgbɛ obaaná sanebimɔi nɛɛ ahetoo yɛ? Kɛ́ otee wojiatoohei loo hei ni ahɔ̃ɔ woji yɛ lɛ, ekolɛ obaana woji babaoo ni atsɔɔ akɛ ehaa sanebimɔi nɛɛ ahetoo. Shi bei pii lɛ, nibii ni aŋmala yɛ wolo ko mli lɛ teɔ shi woɔ nɔ ní aŋma yɛ ekroko mli. Woji lɛ ekomɛi hu feɔ tamɔ ehi yɛ be ni aŋma lɛ mli, shi eyeee be ko ni ebe hoɔ, kɛkɛ lɛ atsake hiɛ loo akɛ ekroko eye najiaŋ.

Shi kɛlɛ, wolo ko yɛ ni abaanyɛ akɛ he afɔ̃ hetooi ni yɔɔ mli lɛ anɔ. Eji wolo ni saji ni yɔɔ mli lɛ fɛɛ ja. Yesu Kristo kɛɛ Nyɔŋmɔ yɛ sɔlemɔ mli akɛ: “Owiemɔ lɛ anɔkwaleŋ.” (Yohane 17:17) Ŋmɛnɛ, wɔle nakai Wiemɔ lɛ akɛ Ŋmalɛ Krɔŋkrɔŋ lɛ. Obaana sanebimɔi ni abi kɛtsɔ hiɛ lɛ ahetooi ni ja, ni mli kã shi faŋŋ ní Biblia lɛ kɛha yɛ baafai ni nyiɛ sɛɛ nɛɛ amli.

 Ani Nyɔŋmɔ Susuɔ Wɔhe Lɛɛlɛŋ?

NƆ̃ HEWƆ NI ABIƆ SANE NƐƐ: Wɔyɛ jeŋ ko ni awuiyeli kɛ jalɛsane ni ayeee eyi mli obɔ mli. Jamɔi babaoo tsɔɔ akɛ amanehulu ni baa wɔnɔ lɛ ji Nyɔŋmɔ suɔmɔnaa nii.

NƆ NI BIBLIA LƐ TSƆƆ: Nyɔŋmɔ kɛ efɔŋ baaa mɔ ko nɔ kɔkɔɔkɔ. Hiob 34:10 lɛ kɛɔ akɛ: “Enɛ akagbale Mawu akɛ eeefee nɔ̃ fɔŋ, kɛ Ofe lɛ hu akɛ eeefee nɔ ko ní ejaaa gbɛ!” Nyɔŋmɔ yɛ yiŋtoo ni suɔmɔ yɔɔ mli kɛha adesai. Enɛ hewɔ ni Yesu tsɔɔ wɔ ni wɔsɔle akɛ: “Wɔ-Tsɛ ni yɔɔ ŋwɛi, . . . omaŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:9, 10) Nyɔŋmɔ sumɔɔ wɔsane aahu akɛ efee nɔ fɛɛ nɔ ni esa akɛ efee koni eha eyiŋtoo lɛ anyɛ aba mli.—Yohane 3:16.

Kwɛmɔ ŋmalɛi nɛɛ hu: 1 Mose 1:26-28; Yakobo 1:13; kɛ 1 Petro 5:6, 7.

Ani Ta kɛ Amanehulu Sɛɛ Baafo Be Ko?

NƆ̃ HEWƆ NI ABIƆ SANE NƐƐ: Ta kã he eekpata adesai babaoo ahiɛ. Amanehulu ni baa adesai anɔ lɛ saa wɔteŋ mɔ fɛɛ mɔ he.

NƆ NI BIBLIA LƐ TSƆƆ: Nyɔŋmɔ egba akɛ be ko baaba ní ebaaha toiŋjɔlɛ ahi shikpɔŋ lɛ fɛɛ nɔ. Yɛ e-Maŋtsɛyeli ni ji ŋwɛi nɔyeli lɛ shishi lɛ, mɛi ‘ekaseŋ tawuu dɔŋŋ.’ Yɛ no najiaŋ lɛ, amɛkɛ “amɛklantei aaasɔ̃ kɔii.” (Yesaia 2:4) Nyɔŋmɔ baaha jalɛsane ní ayeee kɛ amanehulu fɛɛ sɛɛ afo. Biblia lɛ kɛ shiwoo nɛɛ haa akɛ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii [ni jalɛsane ni ayeee kɛ amanehulu ni yɔɔ ŋmɛnɛ lɛ fata he] lɛ eho etee.”—Kpojiemɔ 21:3, 4.

Kwɛmɔ ŋmalɛi nɛɛ hu: Lala 37:10, 11; 46:10; kɛ Mika 4:1-4.

Mɛni Baa Wɔnɔ Kɛ́ Wɔgboi?

NƆ̃ HEWƆ NI ABIƆ SANE NƐƐ: Jamɔi ni yɔɔ je lɛŋ lɛ babaoo tsɔɔ akɛ nɔ ko yɛ gbɔmɔ mli ni yaa nɔ ehiɔ shi yɛ gbɔmɔ lɛ gbele sɛɛ. Mɛi komɛi heɔ amɛyeɔ akɛ gbohii lɛ baanyɛ aye hiɛkalɔi awui aloo ákɛ Nyɔŋmɔ kɛ mɛi fɔji woɔ hɛl la ko mli kɛgbalaa amɛtoi, ni toigbalamɔ nɛɛ yaa nɔ kɛyaa naanɔ.

NƆ NI BIBLIA LƐ TSƆƆ: Kɛ́ adesai gboi lɛ, amɛbɛ shihilɛ mli dɔŋŋ. Jajelɔ 9:5 lɛ kɛɔ akɛ: “Gbohii lɛ, amɛleee nɔ ko nɔ ko.” Akɛni gbohii lɛ nyɛŋ ale nɔ ko, ni amɛnyɛŋ amɛnu nii ahe hu hewɔ lɛ, amɛnyɛŋ amɛye hiɛkalɔi awui, ni asaŋ amɛnyɛŋ amɛye amɛbua hiɛkalɔi hu.—Lala 146:3, 4.

Kwɛmɔ ŋmalɛi nɛɛ hu: 1 Mose 3:19 kɛ Jajelɔ 9:6, 10.

 Ani Hiɛnɔkamɔ Ko yɛ Kɛha Gbohii Lɛ?

NƆ̃ HEWƆ NI ABIƆ SANE NƐƐ: Wɔmiisumɔ ni wɔhi shi, ni wɔmiisumɔ ni wɔkɛ wɔsuɔlɔi aná wala mli ŋɔɔmɔ. Ejeee tɔmɔ akɛ wɔbaashwe ni wɔna wɔsuɔlɔi ni egboi lɛ ekoŋŋ.

NƆ NI BIBLIA LƐ TSƆƆ: Abaatee mɛi ni egboi lɛ ateŋ mɛi babaoo shi. Yesu wo shi akɛ: ‘Mɛi ni yɔɔ gbohiiabui loo kaimɔi bui lɛ amli lɛ aaaje kpo.’ (Yohane 5:28, 29) Yɛ Nyɔŋmɔ shishijee yiŋtoo lɛ kɛ gbeekpãmɔ naa lɛ, mɛi ni abaatee amɛ shi akɛ adesai lɛ baaná hegbɛ ní amɛhi shi yɛ paradeiso shikpɔŋ nɔ. (Yesaia 65:21-25) Nɔ ni fata nɛkɛ shiwoo ni baaba mli wɔsɛɛ nɛɛ he ji gbɔmɔtsoŋ hewalɛnamɔ ni yeɔ emuu kɛ naanɔ wala kɛha adesai ni feɔ toiboo lɛ. Biblia lɛ kɛɔ akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29.

Kwɛmɔ ŋmalɛi nɛɛ hu: Hiob 14:14, 15; Luka 7:11-17; kɛ Bɔfoi lɛ Asaji 24:15.

Mɛɛ Gbɛ nɔ Matsɔ Masɔle ni Nyɔŋmɔ Abo Mi Toi?

NƆ̃ HEWƆ NI ABIƆ SANE NƐƐ: Kɛ́ hooo kwraa lɛ, jamɔi fɛɛ amlibii sɔleɔ. Shi kɛlɛ, mɛi pii nuɔ he akɛ ahaaa amɛsɔlemɔi lɛ ahetoo.

NƆ NI BIBLIA LƐ TSƆƆ: Yesu tsɔɔ wɔ akɛ kɛ́ wɔmiisɔle lɛ, esaaa akɛ wɔtĩɔ wiemɔ kome too lɛ nɔŋŋ mli shii abɔ. Ekɛɛ akɛ: “Shi kɛ́ nyɛmiisɔle lɛ, nyɛkawiea trilii.” (Mateo 6:7) Kɛ́ wɔmiitao ni Nyɔŋmɔ abo wɔsɔlemɔi atoi lɛ, belɛ esa akɛ wɔsɔle yɛ gbɛ ni ekpɛlɛɔ nɔ lɛ nɔ. Bɔni afee ni wɔnyɛ wɔfee nakai lɛ, ebiɔ ni wɔkase nɔ ni Nyɔŋmɔ suɔmɔnaa nii ji, ni wɔsɔle yɛ naa. Yohane Klɛŋklɛŋ Wolo 5:14 lɛ feɔ lɛ faŋŋ akɛ: ‘Kɛji wɔba nɔ ko yɛ Nyɔŋmɔ suɔmɔ naa lɛ, eboɔ wɔ toi.’

Kwɛmɔ ŋmalɛi nɛɛ hu: Lala 65:3; Yohane 14:6, 14; kɛ 1 Yohane 3:22.

Te Mafee Tɛŋŋ Maná Miishɛɛ yɛ Shihilɛ Mli?

NƆ̃ HEWƆ NI ABIƆ SANE NƐƐ: Mɛi pii susuɔ akɛ shika, gbɛihemɔ, loo hefɛo baaha amɛná miishɛɛ. No hewɔ lɛ, amɛtiuɔ nibii nɛɛ asɛɛ, shi amɛnine shɛɛɛ miishɛɛ ni amɛtaoɔ lɛ nɔ.

NƆ NI BIBLIA LƐ TSƆƆ: Yesu tsɔɔ nɔ diɛŋtsɛ ni kɛ miishɛɛ baa, beni ekɛɛ akɛ: “Mɛi ni hiɛ yɔɔ amɛmumɔŋ hiamɔ nii anɔ lɛ yɛ miishɛɛ” lɛ. (Mateo 5:3, NW) Wɔbaanyɛ wɔná anɔkwa miishɛɛ kɛ́ wɔto gbɛjianɔ kɛtsu wɔhiamɔ nii ni fe fɛɛ—ni ji shwelɛ ni wɔyɔɔ akɛ wɔbaale anɔkwalei ni kɔɔ Nyɔŋmɔ kɛ eyiŋtoo kɛha wɔ lɛ ahe nii lɛ. Nakai anɔkwalei lɛ yɛ Biblia lɛ mli. Kɛ́ wɔle nakai anɔkwalei lɛ, ebaaye ebuɔ wɔ ni wɔyoo nibii ni he hiaa diɛŋtsɛ kɛ nibii ni he ehiaaa lɛ hu. Kɛ́ wɔha Biblia mli anɔkwalei kudɔ wɔ beni wɔkpɛɔ wɔyiŋ kɛ beni wɔfeɔ nibii krokomɛi lɛ, ehaa wɔnáa miishɛɛ yɛ shihilɛ mli.—Luka 11:28.

Kwɛmɔ ŋmalɛi nɛɛ hu: Abɛi 3:5, 6, 13-18 kɛ 1 Timoteo 6:9, 10.

 Saji ni wɔsusu he kuku kɛtsɔ hiɛ nɛɛ ji sanebimɔi ekpaa ni Biblia lɛ eha hetoo. Ani oosumɔ ni ole babaoo ofata he? Kɛ́ ofata “mɛi ni hiɛ yɔɔ amɛmumɔŋ hiamɔ nii anɔ lɛ” ahe lɛ, ekã shi faŋŋ akɛ obaasumɔ. Ekolɛ osusuɔ sanebimɔi tamɔ nɔ ni nyiɛ sɛɛ nɛɛ ahe: ‘Kɛ́ Nyɔŋmɔ susuɔ wɔhe lɛ, mɛni hewɔ eŋmɛ efɔŋfeemɔ kɛ nɔnaa babaoo gbɛ yɛ yinɔsane mli fɛɛ lɛ? Te mafee tɛŋŋ maha miweku lɛ shihilɛ afee nɔ ni hi jogbaŋŋ?’ Biblia lɛ kɛ sanebimɔi nɛɛ kɛ sanebimɔi krokomɛi babaoo ahetoo ni mɔɔ shi, ni haa mɔ tsui nyɔɔ emli haa.

Shi ŋmɛnɛ, mɛi babaoo shashaoɔ shi akɛ amɛaakwɛ Biblia lɛ mli. Amɛnaa Biblia lɛ akɛ eji wolo ko ní emli nibii fá babaoo, ní bei komɛi lɛ eshishinumɔ wa. Ani obaasumɔ ni aye abua bo kɛna hetooi lɛ yɛ Biblia lɛ mli? Yehowa Odasefoi yɛ dɛŋdadei enyɔ ni baanyɛ aye abua bo.

Klɛŋklɛŋ lɛ, ato wolo ni ji Mɛni Biblia lɛ Tsɔɔ Diɛŋtsɛ? lɛ he gbɛjianɔ ní akɛye abua mɛi ni bɛ dekã lɛ ní amɛná hetooi ni yɔɔ faŋŋ ni Biblia lɛ kɛhaa yɛ sanebimɔi ni he hiaa lɛ ahe. Nɔ ni ji enyɔ lɛ ji shĩa Biblia mli nikasemɔ ni akɛ mɛi feɔ ní aheee nɔ ko. Odasefonyo ko ni yɔɔ okutso lɛ mli ni baanyɛ atsɔɔ Biblia lɛ mli jogbaŋŋ lɛ baanyɛ aba oshĩa loo he kroko ni baahi aha bo koni daa otsi lɛ ekɛ bo abasusu Biblia lɛ he be fioo. Mɛi akpekpei abɔ ená enɛ he sɛɛ yɛ jeŋ fɛɛ. Amɛteŋ mɛi babaoo kɛ miishɛɛ ewie akɛ: “Mina anɔkwale lɛ!”

Jwetri ko bɛ ní abaanyɛ aná fe enɛ. Biblia mli anɔkwalei lɛ haa wɔyeɔ wɔhe kɛjɛɔ apasa hemɔkɛyeli, yiŋfutumɔ, kɛ gbeyeishemɔ ni esaaa lɛ ahe. Ehaa wɔnáa hiɛnɔkamɔ, yiŋtoo, kɛ miishɛɛ. Yesu kɛɛ akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:32.

Ekrokromɛi Hu Nɛ

Mɛni Hewɔ Esa akɛ Okase Biblia Lɛ?

Biblia lɛ miiye miibua mɛi akpekpei komɛi ni yɔɔ jeŋ fɛɛ lɛ kɛmiiná shihilɛ mli sanebimɔi titrii lɛ ahetoo. Ani obaasumɔ ni ofata mɛi nɛɛ ahe?

Ani Nyɔŋmɔ Ji Hewalɛ ko ni Nuuu He Ehaaa Mɔ?

Biblia lɛ kɛɔ akɛ Nyɔŋmɔ bɔ nibii fɛɛ, shi ani esusuɔ wɔhe?

Kɛ́ Ogbo lɛ, Mɛni Baa?

Ani gbohii lɛ le nibii ni yaa nɔ yɛ shihilɛ mli?

Mɛni Ji Gbohiiashitee Lɛ?

Onaa baakpɛ ohe yɛ mɛi ni abaatee amɛshi kɛba wala mli lɛ he.

Mɛni Hewɔ Esa akɛ Masɔle? Ani Nyɔŋmɔ Baabo Mi Toi?

Kɛ́ Nyɔŋmɔ baahã osɔlemɔi lɛ ahetoo loo ehãŋ hetoo lɛ, edamɔ bo onɔ titri.