Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kuu Osɛɛ Kɛba Yehowa Ŋɔɔ

Wolo ni Jɛ Gbɛtsɔɔmɔ Kuu lɛ Dɛŋ

Wolo ni Jɛ Gbɛtsɔɔmɔ Kuu lɛ Dɛŋ

Naanyo héyelilɔ ni asumɔɔ:

Taakɛ ole lɛ, mɛi ashihilɛ he sane titri ji nɔ ni yɔɔ Biblia lɛ mli. Mɛi nɛɛ ateŋ mɛi babaoo ji hii kɛ yei anɔkwafoi ni kɛ naagbai tamɔ nɔ ni wɔkɛkpeɔ ŋmɛnɛ lɛ nɔŋŋ kpe, ni amɛyɛ “henumɔi tamɔ wɔ nɔŋŋ.” (Yakobo 5:17) Amɛteŋ mɛi komɛi hao ni amɛfee yeyeeye yɛ naagbai ni amɛkɛkpe lɛ ahewɔ. Mɛi krokomɛi hu yɛ ni amɛwekumɛi loo nanemɛi héyelilɔi fee amɛ nibii ni dɔ amɛ waa. Ni mɛi komɛi hu yɛ ni amɛhenilee yi amɛ yɛ amɛtɔmɔi ahewɔ.

Shihilɛi nɛɛ hã amɛteŋ mɛi komɛi kplaŋ kɛje Yehowa he. Shi ani amɛkwa lɛ kwraa? Dabi. Amɛteŋ mɛi babaoo sɔle taakɛ lalatsɛ lɛ sɔle lɛ, akɛ: “Midũ gbɛ tamɔ too ni elaaje: taomɔ otsulɔ; ejaakɛ okitai lɛ, mihiɛ kpaaa nɔ.” (Lala 119:176) Ani bo hu onuɔ he nakai?

Yehowa hiɛ kpaaa etsuji ni kplaŋɔ kɛjeɔ etooku lɛ he lɛ anɔ. Moŋ lɛ, etaoɔ amɛ, ni bei pii lɛ, efeɔ nakai kɛtsɔɔ amɛnanemɛi héyelilɔi anɔ. Akɛ nɔkwɛmɔnɔ lɛ, susumɔ bɔ ni Yehowa ye bua etsulɔ Hiob lɛ he okwɛ. Hiob kɛ naagbai pii kpe; enibii ahiɛ kpãtã, esuɔlɔi gboi, ni hela ko ni naa wa waa mɔ lɛ. Agbɛnɛ hu, mɛi ni kulɛ esa akɛ amɛwo lɛ hewalɛ lɛ moŋ wie wiemɔi ni yɔɔ dɔlɛ amɛshi lɛ. Eyɛ mli akɛ eshɛ he ko ni Hiob ná jwɛŋmɔ ni ejaaa yɛ Yehowa he moŋ, shi ekwaaa Yehowa. (Hiob 1:22; 2:10) Mɛɛ gbɛ nɔ Yehowa tsɔ eye ebua lɛ ni edamɔ enaji anɔ ekoŋŋ?

Gbɛ kome ni Yehowa tsɔ nɔ eye ebua Hiob ji kɛtsɔ enaanyo héyelilɔ ko ni atsɛɔ lɛ Elihu lɛ nɔ. Be ni Hiob wieɔ enaagbai lɛ ahe lɛ, Elihu bo lɛ toi, ni no tsirɛ lɛ ni ewie etsɔɔ lɛ. Mɛni ekɛɛ lɛ? Elihu ewieee Hiob hiɛ nyanyaanya, ni ewieee nibii ni baawo lɛ hiɛgbele loo ni baahã ehenilee abu lɛ fɔ koni ekɛ no ajaje ejwɛŋmɔ. Elihu ebuuu ehe akɛ ehi fe Hiob. Moŋ lɛ, Nyɔŋmɔ mumɔ lɛ tsirɛ lɛ ni ewie akɛ: “Mikɛo ye egbɔ yɛ Mawu gbɛfaŋ; mi hu sũ nɔŋŋ akɛshɔ̃ mi.” Kɛkɛ ni ekɛ wiemɔi nɛɛ hã Hiob tsui, akɛ: “Mihe ŋmiŋmi akawo ohe gbeyei; ni minine hu etsiŋ yɛ onɔ.” (Hiob 33:6, 7) Yɛ nɔ najiaŋ ni Elihu baawule Hiob fala lɛ mli lɛ, ejɛ suɔmɔ mli ewo lɛ ŋaa, ni ewo lɛ hewalɛ.

Ofainɛ, hã ehi ojwɛŋmɔ mli akɛ, Elihu nɔkwɛmɔnɔ lɛ sɛɛ wɔnyiɛ kɛfee wolo nɛɛ. Klɛŋklɛŋ kwraa lɛ, wɔsusu mɛi komɛi ni ekplaŋ lɛ ashihilɛ kɛ nibii ni amɛwie lɛ ahe jogbaŋŋ. (Abɛi 18:13) No sɛɛ lɛ, wɔsɔle, ni wɔkɛ hiɛdɔɔ susu Biblia mli nɔkwɛmɔnii ni tsɔɔ bɔ ni Yehowa ye bua etsuji ni hi shi yɛ blema ni kɛ shihilɛi ni tamɔ nakai kpe lɛ ahe. Naagbee lɛ, wɔbua Biblia mli nɔkwɛmɔnii nɛɛ, kɛ mɛi komɛi ni kplaŋ yɛ ŋmɛnɛŋmɛnɛ beiaŋ lɛ aniiashikpamɔi anaa ni wɔkɛfee wolo nɛɛ. Wɔmiiwo bo hewalɛ ni okase wolo nɛɛ. Ofainɛ, ná nɔmimaa akɛ wɔsumɔɔ osane waa.

Yehowa Odasefoi Agbɛtsɔɔmɔ Kuu