Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kuu Osɛɛ Kɛba Yehowa Ŋɔɔ

 FàKOME

“Nɔ ni Elaaje lɛ, Matao”

“Nɔ ni Elaaje lɛ, Matao”

Too gwantɛŋ lɛ enaaa he ni etsɔɔ. Ehiɛ jwɛi lɛ kpemɔ fiofio ni tooku lɛ shi lɛ. Amrɔ nɛɛ enaaa tooku lɛ kɛ tookwɛlɔ lɛ fɛɛ, ni je miina. He ni eyaje lɛ yɛ gbeyei waa, ejaakɛ kooloi awuiyelɔi pii yɛ jɛmɛ, ni mɔ ko bɛ ni baabu ehe. Shi trukaa lɛ, enu gbee ko ni ele. Tookwɛlɔ lɛ ni! Tookwɛlɔ lɛ sha foi kɛba eŋɔɔ, ewo lɛ, ekɛ etade lɛ ha ehe, ni ekɛ lɛ tee shĩa.

YEHOWA kɛ ehe toɔ tookwɛlɔ ni tamɔ nɛkɛ he shii abɔ yɛ Biblia lɛ mli. Ekɛɔ wɔ akɛ: “Mi diɛŋtsɛ matao mitoi lɛ, ni makwɛ amɛ.”Ezekiel 34:11, 12, NW.

“Milɛɛhe Toi Lɛ”

Namɛi ji Yehowa toi lɛ? Amɛji mɛi ni sumɔɔ lɛ, ni jáa lɛ lɛ. Biblia lɛ kɛɔ akɛ: “Nyɛbaa, ni wɔbumɔa shi ni wɔjáa lɛ, ni wɔkulaa shi yɛ Yehowa wɔfeelɔ lɛ hiɛ! Ejaakɛ lɛ ji wɔ-Nyɔŋmɔ, ni wɔ lɛ, elɛɛhe lɛ maŋ kɛ edɛŋ toi ji wɔ.” (Lala 95:6, 7) Yehowa jálɔi sumɔɔ ni amɛnyiɛ amɛ-Kwɛlɔ lɛ sɛɛ, tamɔ bɔ ni toi nyiɛɔ tookwɛlɔi asɛɛ lɛ. Shi ani no tsɔɔ akɛ amɛnyɛŋ amɛkplaŋ loo amɛdu gbɛ kɔkɔɔkɔ? Dabi. Bei komɛi lɛ, Nyɔŋmɔ tsuji komɛi shiɔ lɛ, tamɔ bɔ ni ebaa lɛ yɛ ‘toi ni egbɛ eshwa,’ “gwantɛŋi ni elaaje,” loo “gwantɛŋi ni edu gbɛ” agbɛfaŋ lɛ. (Ezekiel 34:12; Mateo 15:24; 1 Petro 2:25) Shi kɛ́ eba lɛ nakai po lɛ, Yehowa kwaaa amɛ, ejaakɛ ele akɛ amɛbaanyɛ amɛku amɛsɛɛ kɛba eŋɔɔ ekoŋŋ.

 Ani onuɔ he akɛ Yehowa ji o-Kwɛlɔ? Mɛɛ gbɛi anɔ Yehowa tsɔɔ ekwɛɔ wɔ ŋmɛnɛ? Susumɔ gbɛi etɛ komɛi ahe okwɛ:

Elɛɔ wɔ yɛ mumɔŋ. Yehowa wie yɛ etoi lɛ ahe akɛ: “Lɛɛhe kpakpa malɛ amɛ yɛ, . . . amɛaabumɔ niyelihe kpakpa yɛ jɛi, ni lɛɛhe ní wo fɔ amɛaaye nii yɛ.” (Ezekiel 34:14) Be fɛɛ be lɛ, Yehowa tsɔɔ gbɛi srɔtoi anɔ ehãa wɔ mumɔŋ niyenii kpakpa yɛ be ni sa mli. Ani okaiii be ko ni osɔle ni Yehowa aye abua bo, kɛ bɔ ni etsɔ maŋshiɛmɔ ko, vidio ko, loo sane ko ni je kpo yɛ asafo lɛ woji lɛ eko mli lɛ nɔ ehã bo hetoo? Ani no hãaa ona faŋŋ akɛ Yehowa susuɔ ohe?

Ebuɔ wɔhe ni eyeɔ ebuaa wɔ. Yehowa ewo shi akɛ: “Nɔ ni edu gbɛ lɛ, mayakpala lɛ; ni nɔ ni epila lɛ, mafi mahã lɛ; helatsɛ lɛ [loo mɔ ni egbɔjɔ lɛ], mawaje lɛ.” (Ezekiel 34:16) Yehowa wajeɔ mɛi ni egbɔjɔ loo amɛhao yɛ naagbai babaoo ni amɛkɛkpeɔ lɛ ahewɔ lɛ. Yehowa fimɔɔ etoi ni epila lɛ apilamɔi, ni tsɔɔ akɛ, kɛ́ etsuji lɛ ateŋ mɔ ko mli fu yɛ nɔ ko ni enaanyo héyelilɔ ko loo mɔ kroko efee loo ewie lɛ he lɛ, Yehowa yeɔ ebuaa lɛ ni eŋmɛɔ mlifu lɛ he. Agbɛnɛ hu, ekpalaa mɛi ni edu gbɛ, ni ekolɛ amɛhenilee miibu amɛ fɔ lɛ, kɛbafataa etooku lɛ he ekoŋŋ.

Etaoɔ wɔ kɛ́ wɔlaaje. Yehowa wie yɛ etoi lɛ ahe akɛ: “Majie amɛ kɛaajɛ he fɛɛ he ní amɛgbɛ amɛshwã kɛtee” lɛ. Ni ekɛfata he akɛ: “Nɔ ni elaaje lɛ, matao.” (Ezekiel 34:12, 16) Yɛ Yehowa hiɛ lɛ, too ni elaaje po yɛ hiɛnɔkamɔ. No hewɔ lɛ, kɛ́ Yehowa toi lɛ eko laaje lɛ, eyɔseɔ ni etaoɔ lɛ, ni kɛ́ ena lɛ lɛ, emii shɛɔ ehe. (Mateo 18:12-14) Etsɛɔ mɛi fɛɛ ni kɛ anɔkwayeli jáa lɛ lɛ akɛ, ‘etoi ni ji elɛɛhe toi.’ (Ezekiel 34:31) Ofata toi nɛɛ ahe.

Yɛ Yehowa hiɛ lɛ, too ni elaaje po yɛ hiɛnɔkamɔ. Etaoɔ too ni elaaje lɛ, ni kɛ́ ena lɛ lɛ, emii shɛɔ ehe

“Feemɔ Wɔgbii lɛ Ehee Tamɔ Blema Lɛ”

Mɛni hewɔ Yehowa diɔ osɛɛ ni ekɛɔ bo akɛ oku osɛɛ kɛba eŋɔɔ lɛ? Eefee nakai ejaakɛ eesumɔ ni oná miishɛɛ. Ewo shi akɛ ebaahã jɔɔmɔi anɛ ashwie etoi lɛ anɔ. (Ezekiel 34:26) Enɛ jeee shiwoo folo ko kɛkɛ. Bo diɛŋtsɛ ona nibii ni tsɔɔ akɛ Yehowa baaye eshiwoo lɛ nɔ.

Ani okaiɔ miishɛɛ ni oná be ni obale Yehowa lɛ? Akɛ nɔkwɛmɔnɔ lɛ, be ni atsɔɔ bo Nyɔŋmɔ gbɛ́i kɛ nɔ hewɔ ni ebɔ adesai lɛ, ani onáaa miishɛɛ? Be ni okɛ onanemɛi Kristofoi feɔ ekome yɛ kpeei bibii kɛ kpeei wuji ashishi lɛ, ani otsui enyɔɔɔ omli? Be ni oyaa shiɛmɔ ni ogbaa mɛi ni yɔɔ wiemɔ lɛ he miishɛɛ lɛ sane kpakpa lɛ, ani omii shɛɛɛ ohe, ni otsui enyɔɔɔ omli?

Omii baanyɛ ashɛ ohe ekoŋŋ. Nyɔŋmɔ tsuji ni hi shi yɛ blema lɛ sɔle akɛ: “Kpalemɔ wɔ kɛba oŋɔɔ, Yehowa, ni wɔɔkpale; feemɔ wɔgbii lɛ ehee tamɔ blema lɛ!” (Yaafo 5:21) Yehowa hã amɛsɔlemɔ lɛ hetoo, ni ehã ewebii lɛ ku amɛsɛɛ amɛbasɔmɔ lɛ kɛ miishɛɛ. (Nehemia 8:17) Yehowa baanyɛ afee nakai nɔŋŋ ehã bo.

Fɛɛ sɛɛ lɛ, ebɛ mlɛo akɛ aaaku sɛɛ aba Yehowa ŋɔɔ. Hã wɔsusu naagbai komɛi ni mɛi ni taoɔ aku amɛsɛɛ lɛ kɛkpeɔ lɛ ahe, kɛ bɔ ni obaafee oye naagbai nɛɛ anɔ.