Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 1

Nɔ Hewɔ Ni Yesu Ji Tsɔɔlɔ Kpele Lɛ

Nɔ Hewɔ Ni Yesu Ji Tsɔɔlɔ Kpele Lɛ

YƐ NƆ ni fe afii akpei enyɔ ni eho nɛ lɛ, afɔ bi krɛdɛɛ ko, ni beni eda lɛ ebatsɔ gbɔmɔ ni fe mɔ fɛɛ mɔ ni ehi shi pɛŋ. Mɔ ko mɔ ko bɛ ni yɛ kɔɔyɔŋ lɛlɛ loo lɔle yɛ nakai blema gbii lɛ amli. Nibii tamɔ tɛlivishiŋ, kɔmpiuta, kɛ Internet bɛ.

Awo gbekɛ lɛ gbɛi akɛ Yesu. Ebatsɔ gbɔmɔ ni le nii fe mɔ fɛɛ mɔ ni ehi shikpɔŋ nɔ pɛŋ. Yesu batsɔ tsɔɔlɔ ni he esa fe fɛɛ hu. Etsɔɔ nibii ni amɛshishinumɔ wa lɛ amli yɛ gbɛ̀i ni haa efeɔ mlɛo koni anu shishi lɛ nɔ.

Yesu tsɔɔ mɛi anii yɛ he fɛɛ he ni ekɛ amɛ aaakpe yɛ. Etsɔɔ amɛ nii yɛ ŋshɔnaa kɛ lɛji amli. Etsɔɔ amɛ nii yɛ shiai amli kɛ beni efãa gbɛ. Yesu bɛ lɔle, ni ekɛ bɔɔs loo oketeke efãaa gbɛ. Yesu nyiɛ kɛtee hei srɔtoi, ni eetsɔɔ mɛi anii.

Wɔkaseɔ nibii pii kɛjɛɔ mɛi krokomɛi aŋɔɔ. Shi wɔbaanyɛ wɔkase nibii ni he hiaa fe fɛɛ lɛ kɛjɛ Tsɔɔlɔ Kpele lɛ, ni ji Yesu ŋɔɔ. Anaa Yesu wiemɔi lɛ yɛ Biblia lɛ mli. Kɛji akɛ wɔbo nakai wiemɔi lɛ atoi kɛjɛ Biblia lɛ mli lɛ, etamɔ nɔ ni Yesu kɛ wɔ miiwie nɔŋŋ.

Mɛni hewɔ Yesu ji Tsɔɔlɔ Kpele ni tamɔ nakai lɛ? Yiŋtoo kome ji akɛ mɔ ko tsɔɔ Yesu diɛŋtsɛ nii. Ni ele bɔ ni ehe hiaa ni abo sane toi. Shi namɔ toi Yesu bo? Namɔ tsɔɔ lɛ nii?— E-Tsɛ tsɔɔ lɛ nii. Ni Yesu Tsɛ ji Nyɔŋmɔ.

Dani Yesu aaaba shikpɔŋ nɔ akɛ gbɔmɔ lɛ, ekɛ Nyɔŋmɔ hi ŋwɛi. No hewɔ lɛ, Yesu yɛ srɔto yɛ gbɔmɛi krokomɛi ahe, ejaakɛ gbɔmɔ  ko ehiko ŋwɛi pɛŋ dani abafɔ́ lɛ yɛ shikpɔŋ nɔ. Yesu ji Bi kpakpa, mɔ ni bo e-Tsɛ toi beni eyɔɔ ŋwɛi lɛ. No hewɔ lɛ, Yesu nyɛ etsɔɔ mɛi nɔ ni ekase kɛjɛ Nyɔŋmɔ ŋɔɔ lɛ. Obaanyɛ okase Yesu kɛji akɛ obo otsɛ kɛ onyɛ toi.

Yiŋtoo kroko hewɔ hu ni Yesu ji Tsɔɔlɔ Kpele lɛ ji akɛ, esumɔɔ gbɔmɛi. Eesumɔ ni eye ebua mɛi ni amɛkase Nyɔŋmɔ he nii. Yesu sumɔɔ onukpai, shi esumɔɔ gbekɛbii hu. Ni gbekɛbii sumɔɔ ni amɛba Yesu ŋɔɔ ejaakɛ ekɛ amɛ wieɔ ni eboɔ amɛ toi.

Mɛni hewɔ gbekɛbii sumɔɔ ni amɛhi Yesu masɛi lɛ?

Gbi ko lɛ fɔlɔi komɛi kɛ amɛbii bibii ba Yesu ŋɔɔ. Shi Yesu nanemɛi lɛ susu akɛ Tsɔɔlɔ Kpele lɛ bɛ dekã kwraa ni ekɛ gbekɛbii lɛ aaagba sane. No hewɔ lɛ, enanemɛi lɛ kɛɛ amɛ akɛ amɛya. Shi mɛni Yesu kɛɛ?— Yesu kɛɛ amɛ akɛ: “Nyɛhaa gbekɛbii lɛ abaa miŋɔɔ, ni nyɛkatsĩa amɛ gbɛ.” Hɛɛ, Yesu miisumɔ ni gbekɛbii bibii lɛ aba eŋɔɔ. No hewɔ lɛ, eyɛ mli akɛ Yesu ji gbɔmɔ ni le nii waa ni ehe hiaa waa moŋ, shi ená be ni ekɛtsɔɔ gbekɛbii bibii anii.—Marko 10:13, 14.

 Ani ole nɔ hewɔ ni Yesu tsɔɔ gbekɛbii anii ni ebo amɛ toi lɛ? Yiŋtoo kome ji akɛ, eesumɔ ni eha amɛná miishɛɛ kɛtsɔ saji ni egba amɛ yɛ Nyɔŋmɔ, ni ji eŋwɛi Tsɛ lɛ he lɛ nɔ. Te obaafee tɛŋŋ oha mɛi aná miishɛɛ lɛ?— Kɛtsɔ saji ni okase yɛ Nyɔŋmɔ he lɛ ní obaagba amɛ lɛ nɔ.

Be ko lɛ, Yesu kɛ gbekɛ bibioo ko tsu nii ni ekɛtsɔɔ E-nanemɛi lɛ nikasemɔ ko ni he hiaa. Eha gbekɛ lɛ badamɔ E-kaselɔi, ni ji E-sɛɛnyiɛlɔi lɛ ateŋ. Kɛkɛ ni Yesu kɛɛ akɛ esa akɛ nɛkɛ onukpai nɛɛ atsake amɛsubaŋ ni amɛtsɔmɔ tamɔ gbekɛ bibioo nɛɛ.

Mɛni gbekɛbii ni amɛdara kɛ onukpai baanyɛ akase yɛ gbekɛ bibioo he?

Mɛni Yesu tsɔɔ beni ekɛɛ nakai lɛ? Ani ole nɔ ni nuu ni eda, aloo gbekɛ ni eda fioo baafee koni etsɔ tamɔ gbekɛ bibioo lo?— Ojogbaŋŋ, gbekɛ bibioo bɛ nilee tamɔ mɔ ni eda lɛ, no hewɔ lɛ eesumɔ ni ekase nii. No hewɔ lɛ, Yesu miitsɔɔ akɛ, ehe miihia ni ekaselɔi lɛ aba amɛhe shi, tamɔ gbekɛbii bibii feɔ lɛ. Hɛɛ, wɔ fɛɛ wɔbaanyɛ wɔkase nibii pii kɛjɛ mɛi krokomɛi adɛŋ. Ni esa akɛ wɔ fɛɛ wɔna akɛ Yesu tsɔɔmɔi lɛ he hiaa waa fe wɔ diɛŋtsɛ wɔsusumɔi.—Mateo 18:1-5.

Yiŋtoo kroko hu hewɔ ni Yesu tsɔ̃ Tsɔɔlɔ Kpele nakai lɛ ji akɛ ele bɔ ni ehaa saji feɔ miishɛɛ sane kɛhaa mɛi. Etsɔɔ saji amli yɛ gbɛ ni mli kã shi faŋŋ ni waaa nɔ. Ewie loofɔji kɛ fɔfɔii kɛ nibii krokomɛi ni anaa lɛ he koni ekɛye ebua mɛi ni amɛnu saji komɛi ni kɔɔ Nyɔŋmɔ he lɛ shishi.

 Gbi ko beni Yesu yɔɔ gɔŋ ko he lɛ, gbɔmɛi pii ba eŋɔɔ. Yesu ho eta shi ni ewie loo eshiɛ etsɔɔ amɛ, taakɛ obaanyɛ ona yɛ biɛ lɛ. Atsɛɔ nɛkɛ wiemɔ nɛɛ akɛ Gɔŋ nɔ Shiɛmɔ. Ekɛɛ akɛ: ‘Nyɛkwɛa ŋwɛi loofɔji lɛ jogbaŋŋ. Amɛduuu nii. Amɛbuaaa nii anaa amɛwooo aboŋoi amli. Shi Nyɔŋmɔ ni yɔɔ ŋwɛi lɛ lɛɔ amɛ. Ani nyɛjara waaa fe amɛ?’

Mɛɛ nikasemɔ Yesu tsɔɔ beni ewie loofɔji kɛ fɔfɔii ahe lɛ?

Yesu kɛɛ hu akɛ: ‘Nyɛkasea nii kɛjɛa ŋa nɔ fɔfɔii lɛ ahe. Amɛkwɛ̃ɔ shi amɛtsuuu nii. Ni kwɛ bɔ ni amɛyɔɔ fɛo ha! Shi Maŋtsɛ Salomo niiatsɛ lɛ tete ewulaaa tamɔ ŋa nɔ fɔfɔii lɛ. No hewɔ lɛ, kɛji akɛ Nyɔŋmɔ kwɛɔ fɔfɔii ni kwɛ̃ɔ lɛ nɛkɛ lɛ, ani ekwɛŋ nyɛ hu lo?’—Mateo 6:25-33.

Ani onuɔ nii ni Yesu tsɔɔ lɛ shishi?— Esumɔɔɔ ni wɔhao wɔhe yɛ he ni wɔɔná niyenii yɛ wɔye loo he ni wɔɔná atadei yɛ wɔwo lɛ he. Nyɔŋmɔ le akɛ nɛkɛ nibii nɛɛ fɛɛ he miihia wɔ. Yesu ekɛɛɛ akɛ wɔkatsu nii koni wɔná niyenii kɛ atade. Shi ekɛɛ akɛ esa akɛ wɔkɛ  Nyɔŋmɔ aye klɛŋklɛŋ gbɛhe. Kɛ wɔfee nakai lɛ, Nyɔŋmɔ baakwɛ koni wɔná niyenii wɔye kɛ atadei ni wɔbaawo. Ani oheɔ enɛ oyeɔ lo?—

Beni Yesu wie egbe naa lɛ, mɛni mɛi lɛ susu?— Biblia lɛ kɛɔ akɛ amɛnaa kpɛ amɛhe yɛ gbɛ ni etsɔɔ nɔ etsɔɔ nii lɛ he. Eyɛ miishɛɛ waa akɛ aaabo lɛ toi. Nɔ ni ekɛɛ lɛ ye ebua mɛi koni amɛfee nɔ ni ja.—Mateo 7:28.

 No hewɔ lɛ, ehe miihia waa ni wɔkase nii kɛjɛ Yesu ŋɔɔ. Ani ole gbɛ ni wɔbaanyɛ wɔtsɔ nɔ wɔfee nakai lo?— Ojogbaŋŋ, áŋmala ewiemɔi lɛ yɛ wolo ko mli. Ani ole nakai wolo lɛ?— No ji Ŋmalɛ Krɔŋkrɔŋ lɛ. Enɛ tsɔɔ akɛ wɔbaanyɛ wɔbo Yesu toi kɛtsɔ toiboo ni wɔbaafee wɔha saji ni wɔkaneɔ yɛ Biblia lɛ mli lɛ nɔ. Yɛ anɔkwale mli lɛ, miishɛɛ sane ko yɛ Biblia lɛ mli ni kɔɔ bɔ ni Nyɔŋmɔ diɛŋtsɛ kɛɛ wɔ akɛ wɔbo Yesu toi lɛ he. Nyɛhaa wɔkwɛa nɔ ni ba.

Gbi ko lɛ Yesu ŋɔ enanemɛi lɛ ateŋ mɛi etɛ efata ehe kɛtee gɔŋ ko ni nɔ kwɔ nɔ. Amɛgbɛi ji Yakobo, Yohane, kɛ Petro. Wɔbaakase nibii babaoo ni kɔɔ nɛkɛ hii nɛɛ ahe yɛ sɛɛ mli, ejaakɛ mɛi etɛ lɛ fɛɛ ji Yesu nanemɛi ni bɛŋkɛ lɛ kpaakpa. Shi, yɛ nɛkɛ be krɛdɛɛ nɛɛ mli lɛ, Yesu hiɛ je shishi ekpɛ́ waa diɛŋtsɛ. Ni etadei lɛ kpɛ́ kaŋkaŋ tamɔ la, taakɛ obaanyɛ ona yɛ mfoniri lɛ mli lɛ.

“Mɔnɛ ji misuɔmɔ bi . . . Nyɛboa lɛ toi!”

Yɛ no sɛɛ lɛ, Yesu kɛ enanemɛi lɛ nu gbee ko ni jɛ ŋwɛi. Gbee lɛ kɛɛ akɛ: “Mɔnɛ ji misuɔmɔ bi ní mináa ehe tsui lɛ; nyɛboa lɛ toi!” (Mateo 17:1-5) Ani ole mɔ gbee ní nakai gbee lɛ ji?— Nyɔŋmɔ gbee ni! Hɛɛ, Nyɔŋmɔ ji mɔ ni kɛɛ akɛ esa akɛ amɛbo e-Bi lɛ toi lɛ.

Ni wɔ ni wɔyɔɔ amrɔ nɛɛ hu? Ani wɔbaafee toiboo wɔha Nyɔŋmɔ ni wɔbo e-Bi, Tsɔɔlɔ Kpele lɛ toi?— No ji nɔ ni ehe hiaa ni wɔ fɛɛ wɔfee. Ani okaiɔ gbɛ ni wɔbaanyɛ wɔtsɔ nɔ wɔfee enɛ lo?—

Hɛɛ, wɔbaanyɛ wɔbo Nyɔŋmɔ Bi lɛ toi kɛtsɔ Biblia mli saji ni kɔɔ eshihilɛ he lɛ kanemɔ nɔ. Tsɔɔlɔ Kpele lɛ yɛ saji babaoo ni ŋɔɔ waa ni ebaagba wɔ. Obaaná saji ni aŋmala yɛ Biblia lɛ mli nɛɛ ni oookase amɛhe nii lɛ he miishɛɛ. Ni ebaaha oná miishɛɛ hu kɛji akɛ ogba onanemɛi lɛ nibii kpakpai ni okaseɔ lɛ.

Kɛha susumɔi kpakpai babaoo ni kɔɔ nibii kpakpai ni baa kɛjɛɔ Yesu toi ni oboɔ lɛ mli lɛ ahe lɛ, gbelemɔ o-Biblia lɛ ni okane Yohane 3:16; 8:28-30; kɛ Bɔfoi lɛ Asaji 4:12.