Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 33

Yesu Baanyɛ Abu Wɔhe

Yesu Baanyɛ Abu Wɔhe

Te obuɔ Yesu ohãa tɛŋŋ—ákɛ Maŋtsɛ ni yɔɔ hewalɛ waa loo gbekɛ bibioo ni nyɛɛɛ nɔ ko afee?

BENI Yesu da ni ená ele bɔ ni fee ni abu ehe beni eji gbekɛ bibioo lɛ, ani osusuɔ akɛ esɔle eha Yehowa ni eda lɛ shi?— Mɛni osusuɔ akɛ ekolɛ Yesu baakɛɛ Maria kɛ Yosef yɛ sɛɛ mli beni ená ele akɛ amɛhere eyiwala kɛtsɔ Mizraim ni amɛkɛ lɛ tee lɛ nɔ lɛ?—

Shi, Yesu jeee gbekɛ bibioo dɔŋŋ. Ehiii shikpɔŋ lɛ nɔ po tamɔ bɔ ni efee be ko ni eho lɛ. Shi ani oyoo akɛ ŋmɛnɛ, etamɔ nɔ ni mɛi komɛi susuɔ Yesu he akɛ eji gbekɛ bibioo ni kã kooloi aniyenii anɔ̃ mli?— Anaa enɛ faŋŋ yɛ Blonya be mli, beni anaa Yesu yɛ mfonirii amli yɛ hei pii akɛ gbekɛ bibioo lɛ.

Eyɛ mli akɛ Yesu bɛ shikpɔŋ nɔ dɔŋŋ moŋ, shi ani oheɔ oyeɔ akɛ eyɛ wala mli?— Hɛɛ, átee lɛ shi kɛjɛ gbohii ateŋ, ni amrɔ nɛɛ eji Maŋtsɛ ni he wa waa yɛ ŋwɛi. Mɛni osusuɔ akɛ ebaanyɛ efee ni ekɛbu mɛi ni sɔmɔɔ lɛ lɛ ahe?— Ákɛ nɔkwɛmɔnɔ lɛ, beni Yesu yɔɔ shikpɔŋ nɔ lɛ, etsɔɔ bɔ ni ebaanyɛ ebu mɛi ni sumɔɔ lɛ lɛ ahe. Nyɛhaa wɔkwɛa bɔ ni efee enɛ eha gbi ko beni ekɛ ekaselɔi lɛ yɔɔ lɛlɛ ko mli lɛ.

 No mli lɛ je miihe ana. Yesu etee nɔ etsɔɔ nii gbi muu lɛ fɛɛ yɛ Galilea Ŋshɔ lɛ ni ji kpaakpo agbo ko ni ekɛlɛ feɔ kilomitai 20 kɛ elɛɛmɔ kilomitai 12 lɛ naa. Agbɛnɛ ekɛɛ ekaselɔi lɛ akɛ: “Nyɛhaa wɔyaa kpaakpo lɛ sɛɛgbɛ.” No hewɔ lɛ, amɛyatara lɛlɛ mli ni amɛbɔi kpaakpo lɛ foo. Etɔ Yesu waa, no hewɔ lɛ, etee lɛlɛ lɛ sɛɛgbɛ, ni eyakã sune ko nɔ. Etsɛɛɛ ni ewɔ̀ vii.

Mɛni Yesu kɛɔ kɔɔyɔɔ kɛ ŋshɔkei lɛ?

Kaselɔi lɛ wɔɔɔ bɔni afee ni amɛkudɔ lɛlɛ lɛ kɛtsɔ egbɛ nɔ. Nɔ fɛɛ nɔ tee nɔ jogbaŋŋ yɛ be ko mli, shi kɔɔyɔɔ ko ni naa wa waa tswa waa diɛŋtsɛ. Etee nɔ etswa waa fe beni eje shishi lɛ, ni ŋshɔkei wuji bɔi kuumɔ. Ŋshɔkei lɛ ku kɛbote lɛlɛ lɛ mli, ni lɛlɛ lɛ bɔi yimɔ kɛ nu.

Kaselɔi lɛ she gbeyei akɛ amɛbaashiu. Shi Yesu sheee gbeyei. Ewɔ̀ lolo yɛ lɛlɛ lɛ sɛɛgbɛ. Yɛ naagbee lɛ, kaselɔi lɛ tsĩɛ lɛ, ni amɛkɛɛ akɛ: ‘Tsɔɔlɔ, Tsɔɔlɔ, heremɔ wɔyiwala; wɔmiihe wɔgboi yɛ ahum lɛ hewɔ.’ Kɛkɛ ni Yesu te shi, ni ekɛ kɔɔyɔɔ lɛ kɛ ŋshɔkei lɛ wie. Ekɛɛ akɛ: “Bu onaa ni ofee diŋŋ.”

 Amrɔ nɔŋŋ ni kɔɔyɔɔ lɛ fɔ̃ɔ tswaa, ni kpaakpo lɛ hiɛ fɛɛ fee diŋŋ. Kaselɔi lɛ anaa kpɛ amɛhe. Amɛnako nɔ ko ni tamɔ nɛkɛ dã. Ni amɛkɛɛkɛɛ amɛhe akɛ: “Namɔ po nɛ, ni kɔɔyɔɔ kɛ ŋshɔ tete boɔ lɛ toi nɛɛ?”—Luka 8:22-25; Marko 4:35-41.

Ani ole mɔ ni Yesu ji?— Ani ole he ni enáa ehewalɛ kpele lɛ kɛjɛɔ?— Kulɛ esaaa akɛ kaselɔi lɛ sheɔ gbeyei beni Yesu kɛ amɛ yɔɔ jɛmɛ lɛ, ejaakɛ Yesu jeee gbɔmɔ folo ko kɛkɛ. Ebaanyɛ efee naakpɛɛ nibii ni gbɔmɔ ko nyɛŋ afee. Ha makɛɛ bo nɔ kroko hu ni be ko lɛ efee yɛ ŋshɔ ni tswaa hamahama lɛ hiɛ.

Je etsɛre waa, yɛ gbi kroko nɔ. Beni shɛ gbɛkɛ lɛ, Yesu kɛɛ ekaselɔi lɛ akɛ, amɛbote lɛlɛ mli ni amɛtsɔ ehiɛ kɛya ŋshɔ lɛ sɛɛgbɛ. Kɛkɛ ni Yesu kome too tee gɔŋ lɛ nɔ. Eji he ko ni yɔɔ diŋŋ ni ebaanyɛ esɔle yɛ jɛmɛ eha e-Tsɛ, Yehowa Nyɔŋmɔ.

 Kaselɔi lɛ bote lɛlɛ mli koni amɛfo ŋshɔ lɛ kɛya ŋshɔ lɛ sɛɛgbɛ. Shi etsɛɛɛ ni kɔɔyɔɔ bɔi tswaa. Etee nɔ etswa waa diɛŋtsɛ. Agbɛnɛ je ena. Kɛkɛ ni amɛjie abalaa lɛ, ni amɛbɔi wirimɔ. Shi amɛnyɛɛɛ amɛya amɛhiɛ tsɔ ko, ejaakɛ kɔɔyɔɔ lɛ miitswa kɛmiishi amɛ. Lɛlɛ lɛ miihoso kɛmiiya kɛmiiba yɛ ŋshɔkei wuji lɛ ahewɔ, ni nu miiba lɛlɛ lɛ mli. Hii lɛ bɔ mɔdɛŋ fɛɛ ni amɛaanyɛ koni amɛshɛ ŋshɔ lɛ naa, shi amɛnyɛɛɛ.

Yesu kome too yɛ gɔŋ lɛ nɔ lolo. Etee jɛmɛ etsɛ waa. Shi agbɛnɛ eena akɛ ekaselɔi lɛ yɛ oshara mli yɛ ŋshɔkei wuji lɛ ahewɔ. No hewɔ lɛ, ekpeleke shi kɛjɛ gɔŋ lɛ nɔ kɛba ŋshɔ lɛ naa. Yesu miisumɔ ni eye ebua ekaselɔi lɛ, no hewɔ lɛ ebɔi ŋshɔ ni efee hamahama lɛ hiɛ nyiɛmɔ kɛmiiya amɛŋɔɔ!

Mɛni baaba kɛji akɛ obɔ mɔdɛŋ akɛ obaanyiɛ nu hiɛ?— Obaashiu, ni obaagbo. Shi Yesu yɛ srɔto. Eyɛ hewalɛ krɛdɛɛ ko. Esa akɛ Yesu anyiɛ gbɛ kakadaŋŋ dani eyashɛ lɛlɛ lɛ he. No hewɔ lɛ, aaafee maŋkɛ̃ dani kaselɔi lɛ na ni Yesu nyiɛ nu lɛ hiɛ kɛmiiba amɛŋɔɔ. Shi, amɛnyɛɛɛ amɛhé nɔ ni amɛnaa lɛ amɛye. Amɛshe gbeyei waa, ni amɛbólɔ yɛ gbeyeishemɔ hewɔ. Kɛkɛ ni Yesu kɛɛ amɛ akɛ: “Nyɛnáa tsui, miŋ; nyɛkashea gbeyei!”

Mɛni hewɔ Yesu fee naakpɛɛ nii lɛ?

Beni Yesu bote lɛlɛ lɛ mli pɛ kɛkɛ ni ahum lɛ kpa tswaa. Kaselɔi lɛ anaa kpɛ amɛhe ekoŋŋ. Amɛkula shi yɛ Yesu hiɛ ni amɛkɛɛ akɛ: “Lɛɛlɛŋ, Nyɔŋmɔ bi jio!”—Mateo 14:22-33; Yohane 6:16-21.

Ani kulɛ ebafeŋ miishɛɛ sane akɛ ooohi shi yɛ nakai bei ni eho lɛ amli ni ona nibii ni Yesu fee nɛɛ?— Ani ole nɔ hewɔ ni Yesu fee nakai naakpɛɛ nibii lɛ?— Efee nakai nibii lɛ ejaakɛ esumɔɔ ekaselɔi lɛ, ni eesumɔ ni eye ebua amɛ. Shi efee nakai nibii lɛ hu koni ekɛtsɔɔ hewalɛ kpele ni eyɔɔ ni ekɛbaatsu nii yɛ wɔsɛɛ be mli ákɛ Nyɔŋmɔ Maŋtsɛyeli lɛ Nɔyelɔ lɛ.

Mɛɛ gbɛ nɔ Yesu tsɔɔ ebuɔ esɛɛnyiɛlɔi ahe ŋmɛnɛ?

 Ŋmɛnɛ po, Yesu fɔɔ ehewalɛ lɛ kɛ nitsumɔ, koni ekɛbu esɛɛnyiɛlɔi lɛ ahe kɛjɛ mɔdɛŋ ni Satan bɔɔ, koni eha amɛkpa Nyɔŋmɔ Maŋtsɛyeli lɛ he sane lɛ ni amɛgbaa mɛi krokomɛi lɛ mli. Shi Yesu kɛ ehewalɛ lɛ tsuuu nii koni ekɛbu ekaselɔi lɛ ahe koni amɛhe akaye aloo ní ekɛtsá amɛ kɛ́ amɛhe miiye. Yɛ naagbee lɛ, Yesu bɔfoi lɛ fɛɛ po gboi. Agbe Yohane nyɛmi nuu Yakobo, ni awo Yohane diɛŋtsɛ tsuŋ.—Bɔfoi lɛ Asaji 12:2; Kpojiemɔ 1:9.

Nakai nɔŋŋ eji ŋmɛnɛ. Kɛ́ gbɔmɛi sɔmɔɔ Yehowa aloo amɛfeee nakai hu lɛ, amɛ fɛɛ amɛhe baanyɛ aye ni amɛbaagboi. Shi, etsɛŋ, nibii baafee srɔto yɛ be mli ni Yesu yeɔ nɔ akɛ Nyɔŋmɔ Maŋtsɛyeli lɛ nɔ Maŋtsɛ lɛ. No mli lɛ, ehe ebahiaŋ ni mɔ ko ashe gbeyei, ejaakɛ Yesu kɛ ehewalɛ lɛ baatsu nii koni ehe aba sɛɛnamɔ kɛha mɛi fɛɛ ni boɔ lɛ toi lɛ.—Yesaia 9:5, 6.

Ŋmalɛi krokomɛi ni tsɔɔ akɛ Yesu ni ji mɔ ni Nyɔŋmɔ feɔ lɛ Nɔyelɔ yɛ Nyɔŋmɔ Maŋtsɛyeli lɛ mli lɛ yɛ hewalɛ kpele lɛ ji Daniel 7:13, 14; Mateo 28:18; kɛ Efesobii 1:20-22.