Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 7

Toiboo Buɔ Ohe

Toiboo Buɔ Ohe

EJI onyɛɔ ofeɔ nɔ fɛɛ nɔ ni osumɔɔ kulɛ, ani obaasumɔ? Ani bei komɛi lɛ onuɔ he akɛ oná ni kulɛ mɔ ko ekɛɛɛ bo nɔ ni esa akɛ ofee? Agbɛnɛ wiemɔ anɔkwale, kɛɛmɔ mi nɔ ni osusuɔ yɛ he.—

Mɛni hewɔ esa akɛ obo onukpai atoi?

Shi, te nɔ ni hi kɛha bo? Ani nilee yɛ mli diɛŋtsɛ akɛ ooofee nɔ fɛɛ nɔ ni osumɔɔ? Aloo nibii hiɔ moŋ kɛji akɛ obo opapa kɛ omami toi?— Nyɔŋmɔ kɛɔ akɛ esa akɛ obo ofɔlɔi atoi, no hewɔ lɛ yiŋtoo kpakpa yɛ nakai feemɔ lɛ sɛɛ. Ha wɔkwɛ akɛ wɔbaanu yiŋtoo lɛ shishi lo.

Afii enyiɛ oye?— Ani ole afii abɔ ni opapa eye?— Afii enyiɛ omami loo onaa loo onii eye?— Amɛhi shi be kakadaŋŋ fe bo. Ni be babaoo ni mɔ ko kɛhiɔ shi lɛ, be babaoo hu ni enáa ekɛkaseɔ nii. Enuɔ saji babaoo ni enaa nibii babaoo, ni efeɔ nibii babaoo daa afi. No hewɔ lɛ, gbekɛbii baanyɛ akase nii kɛjɛ onukpai aŋɔɔ.

Ani ole mɔ ko ni oye lɛ onukpa?— Ani ole nii waa fe bɔ ni ele?— Mɛni hewɔ ole nii waa fe lɛ lɛ?— Ejaakɛ okɛ be kakadaŋŋ ehi shi fe lɛ. Oná be babaoo okɛkase nii fe mɔ ni oye lɛ onukpa lɛ.

 Namɔ kɛ be kakadaŋŋ ehi shi fe bo loo mi loo mɔ fɛɛ mɔ?— Yehowa Nyɔŋmɔ. Ele babaoo fe bɔ ni ole, ni ele babaoo fe bɔ ni mile. Kɛji akɛ ekɛɛ wɔ akɛ wɔfee nɔ ko lɛ, wɔbaanyɛ wɔle akɛ no ji nɔ ni hi ni esa akɛ wɔfee, eyɛ mli moŋ akɛ ekolɛ ebaafee nɔ ko ni efeemɔ wa. Ani ole akɛ be ko lɛ Tsɔɔlɔ Kpele lɛ po na akɛ ewa akɛ eeefee toiboo?—

Be ko lɛ, Nyɔŋmɔ kɛɛ Yesu ni efee nɔ ko ni wa waa. Yesu sɔle yɛ enɛ he, tamɔ bɔ ni wɔnaa yɛ mfoniri lɛ mli lɛ. Esɔle akɛ: “Kɛji oosumɔ lɛ, jiemɔ kpulu nɛɛ kɛje minɔ!” Yesu kɛ sɔlemɔ nɛɛ tsɔɔ akɛ, jeee be fɛɛ be eyɔɔ mlɛo akɛ aaafee Nyɔŋmɔ suɔmɔnaa nii. Shi, te Yesu gbe esɔlemɔ lɛ naa eha tɛŋŋ? Ani ole?—

Mɛni wɔbaanyɛ wɔkase kɛjɛ Yesu sɔlemɔ lɛ mli?

Yesu gbe naa kɛ wiemɔ nɛɛ, akɛ: “Shi kɛlɛ jeee bɔ ni mi misumɔɔ lɛ, shi moŋ bɔ ni bo osumɔɔ.” (Luka 22:41, 42) Hɛɛ, eesumɔ ni afee Nyɔŋmɔ suɔmɔnaa nii, shi jeee lɛ enɔ̃. Ni etee nɔ efee nɔ ni Nyɔŋmɔ taoɔ fe nɔ ni lɛ Yesu susuɔ akɛ no ji nɔ ni hi fe fɛɛ.

Mɛni wɔbaanyɛ wɔkase kɛjɛ enɛ mli?— Wɔkaseɔ akɛ ehi be fɛɛ be akɛ aaafee nɔ ni Nyɔŋmɔ kɛɔ, eyɛ mli moŋ akɛ ekolɛ efeemɔ wa. Shi, wɔkaseɔ nɔ kroko hu. Ani ole nɔ ni ji?— Wɔkaseɔ akɛ Nyɔŋmɔ kɛ Yesu jeee gbɔmɔ kome too lɛ nɔŋŋ, tamɔ bɔ ni mɛi komɛi kɛɔ lɛ. Yehowa Nyɔŋmɔ ji onukpa, ni ele nii waa fe bɔ ni e-Bi, Yesu le.

Kɛ́ wɔbo Nyɔŋmɔ toi lɛ, belɛ wɔmiitsɔɔ akɛ wɔsumɔɔ lɛ. Biblia lɛ kɛɔ akɛ: “Ejaakɛ enɛ ji Nyɔŋmɔ suɔmɔ lɛ, akɛ wɔye ekitai lɛ anɔ.”—1 Yohane 5:3. No hewɔ lɛ, onuɔ shishi akɛ, ehe miihia ni wɔ fɛɛ wɔbo Nyɔŋmɔ toi. Oosumɔ ni obo lɛ toi, aloo jeee nakai?—

 Ha wɔgbele wɔ-Biblia lɛ ni wɔkwɛa nɔ ni Nyɔŋmɔ kɛɔ gbekɛbii akɛ amɛfee. Wɔbaakane nɔ ni Biblia lɛ kɛɔ lɛ yɛ Efesobii yitso 6, kuku 1, 2,3 lɛ. Ekɛɔ akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli; ejaakɛ enɛ ja. ‘Wo otsɛ kɛ onyɛ,’ no ji klɛŋklɛŋ kita ni hiɛ shiwoo akɛ: ‘koni ahi ahao, ni otsɛ yɛ shikpɔŋ lɛ nɔ.’”

No hewɔ lɛ, oona akɛ Yehowa Nyɔŋmɔ diɛŋtsɛ ji mɔ ni kɛɔ bo akɛ obo otsɛ kɛ onyɛ toi lɛ. Ákɛ, akɛ ‘woo’ aaaha amɛ lɛ tsɔɔ mɛni? Etsɔɔ akɛ esa akɛ okɛ bulɛ krɛdɛɛ ko aha amɛ. Ni Nyɔŋmɔ woɔ shi akɛ, kɛji akɛ obo ofɔlɔi atoi lɛ, ‘ebaahi eha bo.’

Ha magba bo sane ko ni kɔɔ gbɔmɛi komɛi ni ahere amɛyiwala akɛni amɛfee toiboo lɛ ahe sane. Gbɔmɛi nɛɛ hi shi jeeŋmɔ yɛ Yerusalem maŋ kpeteŋkpele lɛ mli. Gbɔmɛi ni yɔɔ nakai maŋtiase lɛ mli lɛ ateŋ mɛi pii booo Nyɔŋmɔ toi, no hewɔ lɛ Yesu bɔ amɛ kɔkɔ akɛ Nyɔŋmɔ baakpata amɛmaŋ lɛ hiɛ. Yesu tsɔɔ amɛ bɔ ni amɛaafee ni amɛje mli kɛji akɛ amɛsumɔɔ nɔ ni ja. Ekɛɛ amɛ akɛ: ‘Kɛ́ nyɛna ni asraafoi ebɔle Yerusalem he fɛɛ kɛkpe lɛ, nyɛlea akɛ efitemɔ lɛ eshɛ. No hewɔ lɛ, be eshɛ ni nyɛkɛaajo foi kɛjɛ Yerusalem kɛya gɔji lɛ anɔ.’—Luka 21:20-22.

Mɛɛ gbɛ nɔ toiboo ni afee kɛha Yesu famɔ lɛ here nɛkɛ gbɔmɛi nɛɛ ayiwala?

Ojogbaŋŋ, taakɛ Yesu kɛɛ lɛ, asraafoi lɛ ba, ni amɛbatutua Yerusalem. Roma asraafoi babɔle maŋ lɛ he fɛɛ kɛkpe. Kɛkɛ ni yɛ yiŋtoo ko hewɔ lɛ, asraafoi lɛ shi amɛtee. Gbɔmɛi lɛ ateŋ mɛi pii susu akɛ oshara lɛ eho. No hewɔ lɛ, amɛhi maŋ lɛ mli. Shi, mɛni Yesu ekɛɛ akɛ esa akɛ amɛfee?— Eji oyɛ Yerusalem kulɛ mɛni obaafee?— Mɛi ni he Yesu wiemɔ lɛ amɛye diɛŋtsɛ lɛ shi amɛshiai ni amɛjo foi kɛtee shɔŋŋ yɛ gɔji lɛ anɔ he ni kɛ Yerusalem teŋ jɛkɛ.

Afi muu ho ni nɔ ko nɔ ko baaa Yerusalem nɔ. Nɔ ko baaa yɛ afi ni ji enyɔ lɛ mli. Nɔ ko baaa yɛ afi ni ji etɛ lɛ mli. Ekolɛ mɛi komɛi basusu akɛ mɛi ni shi maŋ lɛ mli lɛ ji kwashiai. Kɛkɛ ni yɛ afi ni ji ejwɛ lɛ nɔ lɛ, Roma asraafoi lɛ ku amɛsɛɛ amɛba. Kɛkɛ ni  amɛbɔle Yerusalem he kɛkpe. Agbɛnɛ ekpe sɛɛ tsɔ akɛ amɛaajo foi. Asraafoi lɛ kpata maŋtiase lɛ hiɛ yɛ nɛkɛ be nɛɛ mli. Mɛi ni yɔɔ maŋ lɛ mli lɛ ateŋ mɛi pii gboi, ni aŋɔ mɛi ni shwɛ lɛ nom kɛtee.

Shi, mɛni ba mɛi ni bo Yesu toi lɛ anɔ?— Amɛyi ná wala. Amɛyɛ shɔŋŋ yɛ he ni kɛ Yerusalem teŋ jɛkɛ. No hewɔ ni amɛgboiii lɛ. Toiboo bu amɛhe.

Kɛji akɛ ofeɔ toiboo lɛ, ani no baabu bo hu ohe?— Ofɔlɔi baakɛɛ bo akɛ okashwɛ yɛ gbɛjegbɛ nɔ. Mɛni hewɔ amɛkɛɔ nakai?— Ejɛ lɔle ni baanyɛ atswa bo lɛ hewɔ. Shi, obaasusu oyiŋ gbi ko akɛ: ‘Lɔle bɛ gbɛ lɛ nɔ bianɛ. Mipilaŋ. Gbekɛbii krokomɛi shwɛɔ yɛ gbɛjegbɛ lɛ nɔ, ni minako ni amɛteŋ mɔ ko epila dã.’

Mɛni hewɔ esa akɛ obo sane toi kɛ́ onaaa oshara ko po lɛ?

 Nɛkɛ ji bɔ ni mɛi ni yɔɔ Yerusalem lɛ ateŋ mɛi pii susu. Beni Roma asraafoi lɛ shi maŋ lɛ, no mli lɛ ebafee tamɔ nɔ fɛɛ nɔ yɛ shweshweeshwe. Mɛi krokomɛi yɛ maŋ lɛ mli. No hewɔ lɛ, amɛ hu amɛhi shi. Atsɔ hiɛ abɔ amɛ kɔkɔ, shi amɛbooo toi. No hewɔ lɛ amɛgboi.

Nyɛhaa wɔsusua nɔkwɛmɔnɔ kroko hu he wɔkwɛa. Ani okɛ maŋtsesi eshwɛ pɛŋ?— Kɛ́ okpɛ́ la lɛ efeɔ tamɔ shwɛmɔ nii. Shi, oshara yɛ maŋtsesi ni akɛshwɛɔ lɛ he. Shia lɛ fɛɛ baanyɛ ashã, ni obaanyɛ ogbo!

Kaimɔ akɛ, toiboo ni ooofee yɛ bei komɛi amli lɛ kɛkɛ faaa. Shi kɛji akɛ oboɔ sane toi be fɛɛ be lɛ, no baabu ohe diɛŋtsɛ. Ni namɔ ji mɔ ni kɛɔ nyɛ akɛ, “Nyɛ bii lɛ, nyɛboa nyɛfɔlɔi lɛ atoi” lɛ?— Nyɔŋmɔ ji mɔ ni kɛɔ nakai. Ni kaimɔ akɛ, ekɛɛ akɛ esumɔɔ nyɛ.

Agbɛnɛ kanemɔ ŋmalɛi nɛɛ ni tsɔɔ bɔ ni toiboo he hiaa ha lɛ: Abɛi 23:22; Jajelɔ 12:13; Yesaia 48:17, 18; kɛ Kolosebii 3:20.