Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 44

Esa Akɛ Wɔnanemɛi Asumɔ Nyɔŋmɔ

Esa Akɛ Wɔnanemɛi Asumɔ Nyɔŋmɔ

NANEMƐI ji gbɔmɛi ni wɔsumɔɔ ni wɔkɛ amɛ awie ni wɔkɛ amɛ ahi shi. Shi ehe miihia ni wɔná nanemɛi kpakpai. Namɔ osusuɔ akɛ eji naanyo kpakpa ni fe fɛɛ ni wɔbaanyɛ wɔná?— Hɛɛ, Yehowa Nyɔŋmɔ.

Ani wɔbaanyɛ wɔtsɔmɔ Nyɔŋmɔ nanemɛi diɛŋtsɛ?— Ojogbaŋŋ, Biblia lɛ kɛɔ akɛ Abraham, nuu ko ni hi shi jeeŋmɔ be ko lɛ ji ‘Yehowa naanyo.’ (Yakobo 2:23) Ani ole nɔ hewɔ?— Biblia lɛ haa hetoo akɛ Abraham bo Nyɔŋmɔ toi. Beni akɛɛ lɛ akɛ eyafee nɔ ko ni efeemɔ wa po lɛ, ebo toi. No hewɔ lɛ, kɛ wɔbaatsɔ Yehowa naanyo lɛ, belɛ esa akɛ wɔfee nɔ ni esumɔɔ, tamɔ bɔ ni Abraham fee lɛ, kɛ agbɛnɛ tamɔ bɔ ni Tsɔɔlɔ Kpele lɛ efee be fɛɛ be lɛ.—1 Mose 22:1-14; Yohane 8:28, 29; Hebribii 11:8, 17-19.

Mɛni hewɔ Abraham ji ‘Yehowa naanyo’ lɛ?

 Yesu kɛɛ ebɔfoi lɛ akɛ: “Kɛji nyɛfee nii ni miwoɔ nyɛ he kita lɛ, no lɛ [minanemɛi] ji nyɛ.” (Yohane 15:14, wɔma efã ko nɔ mi.) Akɛni nɔ fɛɛ nɔ ni Yesu kɛɛ gbɔmɛi lɛ baa kɛjɛɔ Yehowa ŋɔɔ hewɔ lɛ, Yesu miikɛɛ akɛ enanemɛi ji gbɔmɛi ni feɔ nɔ ni Nyɔŋmɔ kɛɔ akɛ esa akɛ amɛfee lɛ. Hɛɛ, enanemɛi fɛɛ sumɔ Nyɔŋmɔ.

Tsɔɔlɔ Kpele lɛ nanemɛi ni bɛŋkɛ lɛ kpaakpa lɛ ekomɛi ji ebɔfoi lɛ ni obaanyɛ ona amɛhe mfoniri yɛ wolo nɛɛ baafa 75 lɛ. Amɛkɛ lɛ fã gbɛ ni amɛye amɛbua lɛ ni etsu shiɛmɔ nitsumɔ lɛ. Yesu kɛ nɛkɛ hii nɛɛ ye ebe lɛ mli nɔ ni fa babaoo. Amɛye nii kutuu. Amɛwie Nyɔŋmɔ he kutuu. Ni amɛfee nibii krokomɛi kutuu. Shi, Yesu yɛ nanemɛi krokomɛi babaoo. Ekɛ amɛ hiɔ shi, ni amɛnáa nibii ahe miishɛɛ kutuu.

Weku ko ni Yesu sumɔɔ ni ekɛ amɛ ahi shi lɛ yɛ Betania maŋ bibioo lɛ mli, yɛ Yerusalem maŋ wulu lɛ sɛɛ nɔŋŋ. Ani okaiɔ amɛ?— Amɛji Maria kɛ Marta kɛ amɛnyɛmi nuu Lazaro. Yesu tsɛ  Lazaro akɛ enaanyo. (Yohane 11:1, 5, 11) Nɔ hewɔ ni Yesu sumɔɔ nɛkɛ weku nɛɛ sane ni esumɔɔ ni ekɛ amɛ ahi shi lɛ ji akɛ, amɛsumɔɔ Yehowa ni amɛsɔmɔɔ Lɛ.

Mɛni hewɔ Yesu fɔɔ nɛkɛ weku nɛɛ kɛ shihilɛ be ni eyasaraa Yerusalem lɛ? Ani ole amɛgbɛ́i?

Enɛ etsɔɔɔ akɛ Yesu bɛ mlihilɛ kɛha gbɔmɛi ni sɔmɔɔɔ Nyɔŋmɔ lɛ. Emli hi kɛha amɛ. Etee amɛshiai amli ni ekɛ amɛ ye nii po. Enɛ ha mɛi komɛi wie akɛ Yesu ji “toohelɔi kɛ eshafeelɔi [anaanyo].” (Mateo 11:19) Anɔkwa sane lɛ ji akɛ, Yesu eyaaa nɛkɛ gbɔmɛi nɛɛ ashiai amli yɛ suɔmɔ ni eyɔɔ kɛha bɔ ni amɛhiɔ shi amɛhaa lɛ hewɔ. Eyasara amɛ koni enyɛ egba amɛ Yehowa he sane. Ebɔ mɔdɛŋ koni eye ebua amɛ ni amɛtsake amɛshihilɛ gbonyo lɛ ni amɛsɔmɔ Nyɔŋmɔ.

Mɛni hewɔ Zakeo ekwɔ tso nɛɛ lɛ?

Enɛ ba gbi ko yɛ Yeriko maŋ lɛ mli. Yesu nyiɛ maŋ lɛ mli kɛmiiho ni eeya Yerusalem. Gbɔmɛi babaoo ebua amɛhe naa, ni nuu ko yɛ mɛi lɛ ateŋ ni atsɛɔ lɛ Zakeo. Eesumɔ ni ena Yesu. Shi Zakeo yɛ kpitioo, ni enyɛɛɛ ena nɔ ni yaa nɔ lɛ ejaakɛ gbɔmɛi babaoo etsĩ ehiɛ. No hewɔ lɛ, ejo foi yɛ gbɛ lɛ nɔ kɛtsɔ gbɔmɛi lɛ ahiɛ ni eyakwɔ tso ko bɔni afee ni ekwɛ nii jogbaŋŋ beni Yesu hoɔ lɛ.

Beni Yesu shɛ tso lɛ he lɛ, ewó eyitso nɔ ni ekɛɛ: ‘Feemɔ oya ni oyi shi, ejaakɛ mibaba oshia ŋmɛnɛ.’  Shi Zakeo ji nuu niiatsɛ ni efee nibii fɔji babaoo. Mɛni hewɔ Yesu sumɔɔ ni eya nuu ni tamɔ nɛkɛ shia?—

Ejeee akɛ Yesu sumɔɔ gbɛ ni nuu lɛ tsɔɔ nɔ ehiɔ shi lɛ. Etee jɛmɛ koni eyagba Nyɔŋmɔ he sane etsɔɔ Zakeo. Ena bɔ ni nakai nuu lɛ bɔ mɔdɛŋ waa koni ena lɛ lɛ. No hewɔ lɛ, ele akɛ ekolɛ Zakeo baabo toi. Enɛ ji be ni hi jogbaŋŋ ni ekɛaawie gbɛ ni Nyɔŋmɔ kɛɔ akɛ gbɔmɛi atsɔ nɔ ahi shi lɛ he etsɔɔ lɛ.

Mɛni hewɔ Yesu etee eyasara Zakeo lɛ, ni Zakeo miiwo shi akɛ ebaafee mɛni?

No hewɔ lɛ, mɛni wɔnaa ni yaa nɔ bianɛ lɛ?— Zakeo sumɔɔ Yesu tsɔɔmɔi lɛ. Edɔ lɛ waa akɛ eshishiu mɛi, ni ewo shi akɛ ekɛ shika ni ebɛ hegbɛ akɛ eheɔ lɛ baaha gbɔmɛi lɛ ekoŋŋ. Kɛkɛ ni ebatsɔ Yesu sɛɛnyiɛlɔ. Yesu kɛ Zakeo bafee nanemɛi yɛ no sɛɛ.—Luka 19:1-10.

Kɛji akɛ wɔkase nii kɛjɛ Tsɔɔlɔ Kpele lɛ ŋɔɔ lɛ, ani wɔbaaya ni wɔyasara gbɔmɛi ni jeee wɔnanemɛi lɛ?— Hɛɛ. Shi wɔyaŋ amɛshia yɛ suɔmɔ ni wɔyɔɔ kɛha gbɛ ni amɛtsɔɔ nɔ amɛhiɔ shi lɛ hewɔ. Ni wɔkɛ amɛ efeŋ nibii fɔji. Wɔbaaya amɛŋɔɔ koni wɔyawie Nyɔŋmɔ he wɔtsɔɔ amɛ.

 Shi nanemɛi ni bɛŋkɛ wɔ kpaakpa lɛ ji mɛi ni wɔsumɔɔ ni wɔkɛ amɛ ahi shi titri. Bɔni afee ni wɔkɛ nanemɛi kpakpai ahi shi lɛ, esa akɛ amɛfee mɛi ni Nyɔŋmɔ sumɔɔ amɛsane. Ekolɛ mɛi komɛi po leee mɔ ni Yehowa ji. Shi kɛ amɛmiisumɔ ni amɛkase ehe sane lɛ, wɔbaanyɛ wɔye wɔbua amɛ. Ni kɛ be shɛ ni amɛbafee mɛi ni sumɔɔ Yehowa tamɔ bɔ ni wɔfeɔ lɛ, kɛkɛ lɛ wɔkɛ amɛ baafee nanemɛi ni bɛŋkɛ.

Gbɛ kroko hu yɛ ni atsɔɔ nɔ anaa akɛ mɔ ko baafee naanyo kpakpa. Kwɛmɔ nibii ni efeɔ lɛ. Ani efeɔ gbɔmɛi nibii ni ehiii, kɛkɛ lɛ eŋmɔ yɛ no hewɔ? Enɛ ejaaa, aloo jeee nakai?— Ani ekɛ ehe woɔ haomɔ mli be fɛɛ be? Wɔsumɔŋ ni wɔfata ehe kɛbote haomɔ mli, aloo jeee nakai?— Aloo ejeɔ gbɛ efeɔ nibii ni ehiii, kɛkɛ lɛ esusu akɛ ehiɛ etɛ̃ waa akɛni amɔɔɔ lɛ hewɔ? Kɛji akɛ amɔɔɔ nakai mɔ lɛ po lɛ, Nyɔŋmɔ na nɔ ni efee lɛ, aloo Enaaa?— Ani osusuɔ akɛ gbɔmɛi ni feɔ nibii ni tamɔ nɛkɛ lɛ baafee nanemɛi kpakpai ni esa akɛ wɔná?—

Ani obaasumɔ ni okɔ o-Biblia lɛ? Ha wɔkwɛ nɔ ni ekɛɔ yɛ bɔ ni wɔnanemɛi baanyɛ aná wɔshihilɛ nɔ hewalɛ eha lɛ he. Ŋmalɛ lɛ yɛ 1 Korintobii yitso 15, kuku 33. Ani ogbele jɛmɛ?— Ekaneɔ akɛ: “Nyɛkahaa ashishiua nyɛ. Naanyobɔɔ fɔŋ fiteɔ jeŋba kpakpa.” Enɛ tsɔɔ akɛ, kɛji akɛ wɔkɛ gbɔmɛi fɔji bɔ lɛ, wɔbaanyɛ wɔtsɔmɔ gbɔmɛi fɔji. Ni eji anɔkwale hu akɛ, nanemɛi kpakpai yeɔ amɛbuaa wɔ ni wɔnáa subaŋi kpakpai.

Nyɛkahaa wɔhiɛ kpaa nɔ kɔkɔɔkɔ akɛ, Mɔ ni he hiaa fe fɛɛ yɛ wɔshihilɛ mli ji Yehowa. Wɔsumɔɔɔ ni wɔfite wɔkɛ lɛ teŋ naanyobɔɔ lɛ, ani esa akɛ wɔfee nakai?— No hewɔ lɛ, esa akɛ wɔkwɛ jogbaŋŋ koni wɔkɛ mɛi ni sumɔɔ Nyɔŋmɔ lɛ pɛ afee nanemɛi.

Atsɔɔ bɔ ni nanemɛi kpakpai ahe hiaa ha lɛ yɛ Lala 119:115; Abɛi 13:20; 2 Timoteo 2:22; kɛ 1 Yohane 2:15.