Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 4

Nyɔŋmɔ Yɛ Gbɛ́i

Nyɔŋmɔ Yɛ Gbɛ́i

BEI pii lɛ mɛni ji klɛŋklɛŋ sane ni obiɔ mɔ ko kɛ́ okɛ lɛ kpe klɛŋklɛŋ kwraa lɛ?— Hɛɛ, obiɔ egbɛi. Wɔ fɛɛ wɔyɛ gbɛii. Nyɔŋmɔ wo klɛŋklɛŋ gbɔmɔ ni abɔ lɛ yɛ shikpɔŋ nɔ lɛ gbɛi. Ewo lɛ gbɛi akɛ Adam. Awo Adam ŋa lɛ gbɛi akɛ Hawa.

Shi kɛlɛ, jeee gbɔmɛi pɛ yɔɔ gbɛi. Susumɔ nibii krokomɛi hu ni yɔɔ gbɛi lɛ ahe okwɛ. Kɛji akɛ mɔ ko ke bo tsobi loo shia kooloo ko lɛ, owoɔ lɛ gbɛi, aloo jeee nakai?— Hɛɛ, gbɛi ni mɔ ko yɔɔ lɛ he hiaa.

Kwɛmɔ ŋulamii babaoo ni anaa yɛ ŋwɛi kɛ je na lɛ. Ani osusuɔ akɛ amɛyɛ gbɛii?— Hɛɛ, Nyɔŋmɔ wo ŋulami fɛɛ ŋulami ni yɔɔ atatuiaŋ lɛ gbɛi. Biblia lɛ kɛɔ wɔ akɛ: “Etsɔɔ ŋulamii ayibɔ hu, ekɛ amɛteŋ mɔ fɛɛ mɔ gbɛi tsɛɔ lɛ.”—Lala 147:4.

Ani ole akɛ ŋulamii lɛ fɛɛ yɛ gbɛii?

Namɔ obaakɛɛ akɛ lɛ ji mɔ ni he hiaa fe fɛɛ yɛ jeŋ muu fɛɛ?— Hɛɛ, lɛ ji Nyɔŋmɔ. Ani osusuɔ akɛ eyɛ gbɛi?— Yesu kɛɛ akɛ E-yɛ gbɛi. Be ko lɛ Yesu kɛɛ Nyɔŋmɔ yɛ sɔlemɔ mli akɛ: ‘Mijie ogbɛi lɛ kpo mitsɔɔ mɛi ni nyiɛɔ misɛɛ lɛ.’ (Yohane 17:26) Ani ole Nyɔŋmɔ gbɛi?— Nyɔŋmɔ diɛŋtsɛ kɛɔ wɔ bɔ ni atsɛɔ egbɛi. Ekɛɔ akɛ: “Mi ji Yehowa, migbɛi ji no.” No hewɔ lɛ, Nyɔŋmɔ gbɛi ji YEHOWA.—Yesaia 42:8.

Kɛji akɛ mɛi krokomɛi kai ogbɛi lɛ te onuɔ he ohaa tɛŋŋ?— Onáa miishɛɛ, aloo jeee nakai?— Yehowa hu miisumɔ ni gbɔmɛi ale egbɛi. No hewɔ lɛ, esa akɛ wɔkɛ gbɛi Yehowa lɛ atsu nii kɛ́ wɔmiiwie Nyɔŋmɔ he. Tsɔɔlɔ Kpele lɛ kɛ Nyɔŋmɔ gbɛi Yehowa, tsu nii kɛ́ ekɛ gbɔmɛi miiwie. Be ko lɛ Yesu kɛɛ akɛ: ‘Suɔmɔ Yehowa o-Nyɔŋmɔ lɛ kɛ otsui fɛɛ.’—Marko 12:30.

 Yesu le akɛ “Yehowa” ji gbɛi ko ni he hiaa waa. No hewɔ lɛ, etsɔɔ esɛɛnyiɛlɔi lɛ ni amɛkɛ Nyɔŋmɔ gbɛi lɛ atsu nii. Etsɔɔ amɛ ni amɛtsĩ Nyɔŋmɔ gbɛi lɛ tã yɛ amɛsɔlemɔi amli po. Yesu le akɛ Nyɔŋmɔ miisumɔ ni gbɔmɛi fɛɛ ale E-gbɛi, ni ji Yehowa lɛ.

Yɛ be kakadaŋŋ ko ni eho lɛ mli lɛ, Nyɔŋmɔ tsɔɔ bɔ ni egbɛi lɛ he hiaa ha lɛ mli etsɔɔ nuu ko ni atsɛ́ɔ lɛ Mose, ni eji Israelnyo lɛ. Atsɛɔ amɛ akɛ Israelbii, ni amɛhi shikpɔŋ ni atsɛɔ lɛ Mizraim lɛ nɔ. Ale nakai shikpɔŋ lɛ nɔ bii lɛ akɛ Mizraimbii. Amɛkɛ Israelbii lɛ fee amɛnyɔji ni amɛwa amɛyi waa. Beni Mose da lɛ, ebɔ mɔdɛŋ ni eye ebua ewebii lɛ ateŋ mɔ ko. Enɛ ha Farao, ni ji Mizraim maŋtsɛ lɛ mli fu. Eetao ni egbe Mose! No hewɔ lɛ, Mose jo foi kɛjɛ Mizraim.

Mose tee shikpɔŋ kroko nɔ. No ji Midian shikpɔŋ lɛ. Mose bote gbalashihilɛ mli yɛ jɛmɛ ni ebɔi weku námɔ. Etsu nii  hu akɛ tookwɛlɔ. Gbi ko beni Mose bɛ dekã ni ekwɛɔ etooi lɛ yɛ gɔŋ ko masɛi lɛ, ena nɔ ko ni yɔɔ naakpɛɛ. Ŋmeitso ko miitso, shi ŋmeitso lɛ eshãaa! Mose tsi bɛŋkɛ jɛmɛ koni ena nɔ ni yaa nɔ lɛ jogbaŋŋ.

Ani ole nɔ ni ba?— Mose nu gbee ko ni miitsɛ lɛ kɛmiijɛ nakai ŋmeitso ni tsoɔ lɛ mli. Gbee lɛ tsɛ́ akɛ, “Mose! Mose!” Namɔ kɛɔ nakai lɛ?— Nyɔŋmɔ ji mɔ ni wieɔ lɛ! Nyɔŋmɔ yɛ nitsumɔi babaoo kɛha Mose ni ebaatsu. Nyɔŋmɔ kɛɛ akɛ: ‘Ba koni matsu bo kɛya Farao, Mizraim maŋtsɛ lɛ ŋɔɔ, koni oyajie miwebii, Israelbii lɛ kɛjɛ Mizraim.’ Nyɔŋmɔ wo shi akɛ ebaaye ebua Mose koni efee enɛ.

Mɛni nii ni he hiaa Mose kase kɛjɛ ŋmeitso ni tsoɔ lɛ mli?

Shi Mose kɛɛ Nyɔŋmɔ akɛ: ‘Shi kɛji akɛ mitee Israelbii lɛ aŋɔɔ yɛ Mizraim ni mikɛɛ amɛ akɛ Nyɔŋmɔ tsu mi. Kɛ́ amɛbi mi akɛ, “Mɛni ji egbɛi?” Mɛni mikɛɛ amɛ?’ Nyɔŋmɔ kɛɛ Mose akɛ ekɛɛ Israelbii lɛ akɛ: ‘Yehowa tsu mi nyɛŋɔɔ. Yehowa ji migbɛi kɛmiiya naanɔ.’ (2 Mose 3:1-15) Enɛ tsɔɔ akɛ Nyɔŋmɔ baahiɛ gbɛi ni ji Yehowa  lɛ. Etsakeŋ lɛ kɔkɔɔkɔ. Nyɔŋmɔ miisumɔ ni akɛ gbɛi ni ji Yehowa lɛ ale lɛ kɛya naanɔ.

Te fee tɛŋŋ ni Nyɔŋmɔ ha ale egbɛi lɛ yɛ Ŋshɔ Tsuru lɛ naa?

Beni Mose ku esɛɛ kɛtee Mizraim lɛ, Mizraimbii lɛ susu akɛ Yehowa ji Israelbii lɛ anyɔŋmɔ ko ni edaaa. Amɛsusuuu akɛ lɛ ji shikpɔŋ muu lɛ fɛɛ nɔ Nyɔŋmɔ. No hewɔ lɛ, Yehowa kɛɛ Mizraim maŋtsɛ lɛ akɛ: ‘Maha ale migbɛi yɛ shikpɔŋ muu lɛ fɛɛ nɔ.’ (2 Mose 9:16) Yehowa ha ale egbɛi lɛ lɛɛlɛŋ. Ani ole bɔ ni efee enɛ eha?—

Ojogbaŋŋ, eha Mose nyiɛ Israelbii lɛ ahiɛ kɛjɛ Mizraim. Beni amɛshɛ Ŋshɔ Tsuru lɛ naa lɛ, Yehowa fee gbɛ ni nɔ egbi kɛtsɔ mli. Israelbii lɛ tsɔ shikpɔŋ gbiŋ nɔ kɛtsɔ mli shweshweeshwe. Shi beni Farao kɛ esraafoi lɛ fɛɛ bote ŋshɔ ni eshishi egbi lɛ mli lɛ, nui ni atsĩ naa yɛ afãi enyɔ lɛ fɛɛ kumɔ shwie Mizraimbii lɛ anɔ, ni amɛ fɛɛ amɛgboi.

Etsɛɛɛ ni gbɔmɛi ni yɔɔ shikpɔŋ lɛ nɔ he fɛɛ he lɛ je shishi amɛnu nɔ ni Yehowa fee yɛ Ŋshɔ Tsuru lɛ naa lɛ he. Te wɔfeɔ tɛŋŋ wɔleɔ akɛ amɛnu he lɛ?— Ojogbaŋŋ, aaafee afii 40 sɛɛ lɛ, Israelbii lɛ ba Kanaan, ni ji shikpɔŋ ni Yehowa ewo shi akɛ ekɛbaaha amɛ lɛ nɔ. Oblayoo Rahab kɛɛ Israelbii hii enyɔ ko akɛ:  “Wɔnu, bɔ ni Yehowa ha Ŋshɔ tsuru lɛ mli nu gbi yɛ nyɛhiɛ, beni nyɛje Mizraim lɛ.”—Yoshua 2:10.

Gbɔmɛi pii tamɔ nakai Mizraimbii lɛ ŋmɛnɛ. Amɛheee amɛyeee akɛ Yehowa ji shikpɔŋ muu lɛ fɛɛ nɔ Nyɔŋmɔ. No hewɔ lɛ, Yehowa miisumɔ ni lɛ diɛŋtsɛ ewebii lɛ agba ehe sane amɛtsɔɔ mɛi krokomɛi. Enɛ ji nɔ ni Yesu fee. Beni ewala heɔ aba naagbee yɛ shikpɔŋ nɔ lɛ, ekɛɛ Yehowa yɛ sɔlemɔ mli akɛ: “Mijie ogbɛi lɛ kpo mitsɔɔ amɛ.”—Yohane 17:26.

Yesu ha ale Nyɔŋmɔ gbɛi lɛ. Ani obaanyɛ otsɔɔ he ni Nyɔŋmɔ gbɛi lɛ yɔɔ yɛ Biblia lɛ mli?

 Ani oosumɔ ni otamɔ Yesu? Belɛ kɛɛmɔ mɛi krokomɛi akɛ Nyɔŋmɔ gbɛi ji Yehowa. Ekolɛ obaana akɛ mɛi pii leee enɛ. No hewɔ lɛ, ekolɛ obaanyɛ otsɔɔ amɛ ŋmalɛ lɛ yɛ Biblia lɛ mli yɛ Lala 83:19. Nyɛhaa wɔgbelea Biblia lɛ amrɔ nɔŋŋ ni wɔ fɛɛ wɔkwɛ ŋmalɛ lɛ. Ekɛɔ akɛ: “Koni amɛná amɛle akɛ bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!”

Mɛni wɔkaseɔ kɛjɛɔ enɛ kanemɔ mli?— Hɛɛ, wɔkaseɔ akɛ Yehowa ji gbɛi ni he hiaa fe fɛɛ eko ni yɔɔ. No ji Nyɔŋmɔ Ofe lɛ, Yesu Tsɛ lɛ, kɛ Mɔ ni fee nibii fɛɛ lɛ gbɛi. Ni kaimɔ akɛ, Yesu kɛɛ akɛ, esa akɛ wɔkɛ wɔtsui fɛɛ asumɔ Yehowa Nyɔŋmɔ. Ani osumɔɔ Yehowa?—

Te wɔɔfee tɛŋŋ wɔtsɔɔ akɛ wɔsumɔɔ Yehowa?— Gbɛ kome ji kɛtsɔ le ni wɔɔle lɛ akɛ Naanyo lɛ nɔ. Gbɛ kroko hu ji kɛtsɔ kɛɛmɔ ni wɔɔkɛɛ mɛi krokomɛi nɔ ni egbɛi lɛ ji. Wɔbaanyɛ wɔtsɔɔ amɛ kɛjɛ Biblia lɛ mli tɛ̃ɛ akɛ egbɛi ji Yehowa. Wɔbaanyɛ wɔgba amɛ naakpɛɛ nibii ni Yehowa ebɔ lɛ kɛ nibii kpakpai ni efee lɛ ahe sane. Enɛ haa Yehowa náa miishɛɛ waa ejaakɛ eesumɔ ni gbɔmɛi ale ehe sane. Wɔbaanyɛ wɔná enɛ feemɔ mli gbɛfaŋnɔ, aloo jeee nakai?—

Kɛ wɔwie Yehowa he lɛ, jeee mɔ fɛɛ mɔ baasumɔ ni ebo toi. Mɛi pii booo toi beni Yesu, ni ji Tsɔɔlɔ Kpele lɛ po gba E-he sane etsɔɔ amɛ lɛ. Shi enɛ etsĩii Yesu gbɛ koni ekawie Yehowa he.

No hewɔ lɛ, nyɛhaa wɔfea tamɔ Yesu. Nyɛhaa wɔyaa nɔ wɔwiea Yehowa he. Kɛ́ wɔfee nakai lɛ, ebaaŋɔɔ Yehowa Nyɔŋmɔ naa akɛ wɔmiifee nakai, ejaakɛ wɔtsɔɔ akɛ wɔsumɔɔ egbɛi lɛ.

Agbɛnɛ ha wɔfee ekome kɛkane ŋmalɛi fioo ko ni tsɔɔ bɔ ni Nyɔŋmɔ gbɛi lɛ he hiaa ha lɛ kɛjɛ Biblia lɛ mli: Yesaia 12:4, 5; Mateo 6:9; Yohane 17:6; kɛ Romabii 10:13.

Ekrokomɛi Hu Nɛ

SANEKPAKPA NI JƐ NYƆŊMƆ ŊƆƆ!

Namɔ Ji Nyɔŋmɔ?

Ani Nyɔŋmɔ yɛ gbɛ́i, ani esusuɔ wɔhe po?