Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 48

Nyɔŋmɔ Toiŋjɔlɛ Jeŋ Hee Lɛ—Obaanyɛ Ohi Jɛmɛ

Nyɔŋmɔ Toiŋjɔlɛ Jeŋ Hee Lɛ—Obaanyɛ Ohi Jɛmɛ

NYƆŊMƆ kɛ Adam kɛ Hawa wo Eden abɔɔ lɛ mli. Eyɛ mli akɛ amɛfeee toiboo ni amɛgboi moŋ nɛ, shi Nyɔŋmɔ egbele hegbɛ naa kɛha amɛbii, ní wɔ hu wɔfata he ŋmɛnɛ lɛ, ákɛ wɔhi shi kɛya naanɔ yɛ Paradeiso. Biblia lɛ woɔ shi akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29.

Biblia lɛ wieɔ “ŋwɛi hee” kɛ “shikpɔŋ hee” he. (Yesaia 65:17; 2 Petro 3:13) Mɛi ni feɔ ŋmɛnɛŋmɛnɛ “ŋwɛi” lɛ ji adesai anɔyelii ni yɔɔ ŋmɛnɛ lɛ, shi Yesu Kristo kɛ mɛi ni baafata ehe kɛye nɔ yɛ ŋwɛi lɛ baafee “ŋwɛi hee” lɛ. Kwɛ bɔ ni ebaafee miishɛɛ eha yɛ be mli ni ŋwɛi hee lɛ, ni ji Nyɔŋmɔ jalɛ nɔyeli ni kɛ toiŋjɔlɛ baaba lɛ yeɔ shikpɔŋ lɛ nɔ lɛ!

Belɛ mɛni ji “shikpɔŋ hee” lɛ?— Shikpɔŋ hee lɛ baafee gbɔmɛi kpakpai ni sumɔɔ Yehowa. Esa akɛ onu shishi akɛ, kɛ́ Biblia lɛ wie “shikpɔŋ lɛ” he lɛ, bei komɛi lɛ eetsɔɔ gbɔmɛi ni yɔɔ shikpɔŋ lɛ nɔ, shi jeee shikpɔŋ lɛ diɛŋtsɛ. (1 Mose 11:1; Lala 66:4; 96:1) No hewɔ lɛ, mɛi ni feɔ shikpɔŋ hee lɛ baahi shi yɛ biɛ yɛ shikpɔŋ nɛɛ nɔ.

No mli lɛ efɔŋfeelɔi ni yɔɔ ŋmɛnɛ lɛ bɛ dɔŋŋ. Kaimɔ akɛ, Noa gbii lɛ amli Nu Afua lɛ kpata efɔŋfeelɔi ajeŋ ko hiɛ. Ni taakɛ wɔkase lɛ, abaakpata efɔŋfeelɔi ajeŋ ni yɔɔ ŋmɛnɛ lɛ hiɛ yɛ Harmagedon. Agbɛnɛ nyɛhaa wɔsusua bɔ ni shihilɛ yɛ Harmagedon sɛɛ yɛ Nyɔŋmɔ jeŋ hee lɛ mli lɛ baaji aha lɛ he wɔkwɛa.

Ani oosumɔ ni ohi shi kɛya naanɔ yɛ Paradeiso yɛ Nyɔŋmɔ toiŋjɔlɛ jeŋ hee lɛ mli?— Datrɛfonyo ko bɛ ni baanyɛ aha wɔhi shi  kɛya naanɔ. Tsofa ko bɛ ní wɔɔkɔ ní baanyɛ atsĩ wɔnaa koni wɔkagboi. Gbɛ kome pɛ ni wɔbaanyɛ wɔtsɔ nɔ wɔhi shi kɛya naanɔ ji ni wɔtsi wɔbɛŋkɛ Nyɔŋmɔ. Ni Tsɔɔlɔ Kpele lɛ tsɔɔ wɔ bɔ ni wɔɔfee nakai.

Ha wɔgbele wɔ—Biblia lɛ kɛya Yohane yitso 17, kuku 3. Wɔnaa Tsɔɔlɔ Kpele lɛ wiemɔi nɛɛ yɛ jɛmɛ, akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.”

No hewɔ lɛ, mɛni Yesu kɛɛ esa akɛ wɔfee koni wɔhi shi kɛya naanɔ?— Klɛŋklɛŋ lɛ, esa akɛ wɔná Yehowa, wɔŋwɛi Tsɛ lɛ, kɛ agbɛnɛ e-Bi lɛ ni ŋɔ ewala eha wɔ lɛ hu ahe nilee. Enɛ tsɔɔ akɛ ehe miihia ni wɔkase Biblia lɛ. Kasemɔ Nii Kɛjɛ Tsɔɔlɔ Kpele lɛ Ŋɔɔ wolo nɛɛ, miiye kɛmiibua wɔ koni wɔfee enɛ.

Shi yɛ mɛɛ gbɛ nɔ Yehowa he nii ni wɔɔkase lɛ baaye abua wɔ koni wɔhi shi kɛya naanɔ?— Ojogbaŋŋ, taakɛ bɔ ni niyenii he hiaa wɔ daa gbi lɛ, ehe miihia ni wɔkase Yehowa he nii daa. Biblia lɛ kɛɔ akɛ: ‘Jeee aboloo kɛkɛ haa gbɔmɔ yi naá wala; shi moŋ wiemɔ fɛɛ wiemɔ ni jɛɔ Yehowa daaŋ lɛ.’—Mateo 4:4.

Esa akɛ wɔná Yesu Kristo hu he nilee, ejaakɛ Nyɔŋmɔ tsu e-Bi lɛ kɛba koni ebajie wɔhe eshai lɛ kɛya. Biblia lɛ kɛɔ akɛ: “Yiwalaheremɔ bɛ mɔ ko mɔ ko mli.” Ni Biblia lɛ kɛɔ hu akɛ: “Mɔ ni heɔ bi lɛ nɔ yeɔ lɛ, eyɛ naanɔ wala.” (Bɔfoi lɛ Asaji 4:12; Yohane 3:36) Agbɛnɛ, ákɛ ‘aaahe’ Yesu nɔ ‘aye’ lɛ tsɔɔ mɛni?— Etsɔɔ akɛ wɔheɔ Yesu nɔ wɔyeɔ diɛŋtsɛ, ni wɔle akɛ kɛ́ ehe bɛ mli lɛ, wɔnyɛŋ wɔhi shi kɛya naanɔ. Ani wɔheɔ enɛ wɔyeɔ?— Kɛ́ wɔheɔ wɔyeɔ lɛ, no lɛ wɔbaaya nɔ wɔkase nii kɛjɛ Tsɔɔlɔ Kpele lɛ ŋɔɔ daa, ni wɔbaafee nɔ ni ekɛɔ akɛ wɔfee lɛ.

Gbɛ kome ni hi jogbaŋŋ ni wɔɔtsɔ nɔ wɔkase Tsɔɔlɔ Kpele lɛ ji ní wɔkane wolo nɛɛ shii abɔ, ni wɔkwɛ mfonirii lɛ fɛɛ ni wɔjwɛŋ  he. Kwɛmɔ akɛ obaanyɛ oha sanebimɔi ni kɔɔ mfonirii nɛɛ ahe lɛ hetoo lo. Kɛfata he lɛ, okɛ omami loo opapa akane wolo lɛ. Kɛ́ ofɔlɔi bɛ lɛ, okɛ mɛi krokomɛi ni edara kɛ gbekɛbii krokomɛi akane. Ani efeŋ sane ni yɔɔ miishɛɛ waa akɛ ooonyɛ oye obua mɛi krokomɛi koni amɛkase nɔ ni ehe hiaa ni amɛfee, koni amɛhi shi kɛya naanɔ yɛ Nyɔŋmɔ jeŋ hee lɛ mli lɛ, kɛjɛ Tsɔɔlɔ Kpele lɛ ŋɔɔ?—

Biblia lɛ kɛɔ wɔ akɛ: ‘Je lɛ miiho aya.’ Shi kɛlɛ, Biblia lɛ tsɔɔ wɔ bɔ ni wɔɔfee ni wɔhi shi kɛya naanɔ yɛ Nyɔŋmɔ jeŋ hee lɛ mli. Ekɛɔ akɛ: “Mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:17) Belɛ, te wɔɔfee tɛŋŋ wɔhi shi kɛya naanɔ yɛ Nyɔŋmɔ jeŋ hee lɛ mli?— Hɛɛ, kɛtsɔ Yehowa kɛ esuɔmɔ Bi Yesu he nilee ni wɔɔná lɛ nɔ. Shi esa akɛ wɔfee loo wɔkɛ nɔ ni wɔkaseɔ lɛ hu atsu nii. Eba akɛ wolo nɛɛ ni okaseɔ lɛ baaye abua bo koni otsu enɛɛmɛi ahe nii.